【北九州出走之旅】福岡、長崎、熊本、宮崎、大分9日遊記 (極多圖)

由於 KKDay 嘅一日巴士遊，只包括一程的士由高千穗巴士總站到高千穗峽，回程返高千穗巴士總站果轉係需要閣下自理 所以我搵咗同樣坐高千穗巴士嚟嘅兩個香港人，一齊夾的士返巴士總站，因為大家都要搭回程巴士返熊本

仲有啲時間先上巴士，喺巴士總站附近遊下先




嗱咪話樓豬唔益大家，日本學生妹


回程同樣會停一停南阿蘇高森站，稍作休息，同樣遇到個唔錯日落




再一次經歷3.5 hrs嘅巴士旅程，返到熊本已經係夜晚8點幾。。。而是日晚餐，本身想揀「黑亭」，但樓豬發覺自己嚟到北九州仲未食過一餐正餐壽司。。。所以選擇咗日本其中一間嘅迴轉壽司「くら寿司」，仲要係冒住無尾班巴士嘅風險去食 平有平食貴有貴食，くら寿司已經好夠我食，15碟埋單先係二千幾円

啱啱開始追

歡迎加入

Day 7 // 大分 27 Sept 2024

由布院 -> 別府塔

依一日嘅行程睇落好似好少地方去，但其實要用嘅時間都唔少 首先樓豬會去坐多一次阿蘇男孩，不過今次嘅目的地唔再係阿蘇，而係距離熊本有百幾公里遠嘅 大分，車程足足三個零鐘

樓豬今次都係早大約45分鐘到站排隊，吸收咗第一次排隊經驗後，今次無排錯隊了，但。。。。 竟然有人早過樓豬爭位！！！！！！

樓豬排第二位，然後後面長長嘅人龍都係排車頭位置 認住地下「特急あそぼーい」個標誌


又好神奇地，排第一名個日本人又唔係爭第一排，佢反而坐咗單人座第二排嘅位 樓豬順理成章又坐到全景座席單人座第一排

望住列車穿過城市、草原、隧道、叢林、鐵橋，一路奔往目的地





要學習下咩係「路上觀察學」




時間轉眼嚟到中午，嚟到大分我嘅輕鬆時間唔係好多，樓豬需要一個鐘頭內，去酒店放低行李之餘，仲要食埋 Lunch，因為要趕上1點半嘅 JR 由布 列車

所以樓豬又入咗AMU Plaza (點解博多又有，長崎又有，連大分都有AMU)，求其喺Food Court食啲嘢就算

豚屋とんー



樓豬嗌咗份「とんいち定食」，有 吉列豬扒 同 汁煮厚切豬肉，吉列豬扒好食，但個汁煮豬肉就還好，個汁略嫌濃咗啲，但都好食嘅，如果比我再揀，我會嗌吉列豬扒就算

喺 Foodcourt 食完 Lunch，就過返隔離大分站，準備登上 JR 由布，前往由布院

博多 來回 大分/別府 嘅列車除咗 由布院之森，其實仲有 由布號，由布號 一日會有三班列車經過大分返博多，但 由布院之森 只有4號車 係會經大分返去，其餘兩架都只會由由布院起行，大家可以睇準時間選擇搭邊架車

由布號要入站了，全紅色車身，車頭亦有寫住「ゆふ」



睇外觀會覺得佢似一架普通區間列車，但車廂佈局係類似 JR 接力海鷗 嘅樣



由大分去由布院需要一個鐘頭車程，但樓豬坐果個位隻窗太污糟，影唔到車外風景

到達由布院站，有好多人上車返博多



由布院站係無閘機嘅，每次有列車到都會有站務員喺到check check大家嘅車飛

AMU Plaza係JR九州屬下嘅副業之一

唔怪之得啦，去到邊都見到AMU

仲要每間AMU都咁靚地段喺車站隔離

嚟由布院其實唔係好多嘢行，除咗最主要嘅金鱗湖之外，其實就只有沿路嘅 由布見通 以及 湯之坪街道，大家可以喺到食「由布まぶし心」嘅豐後牛釜飯，又或者去 花卉村莊 果邊餵下小動物，悠閒啲嘅可以坐下人力車

由布院地區地圖


由布見通有人力車可以比大家乘坐體驗


一貫藍天白雲好天氣，但樓豬無乜點影商店街，無辦法話比大家知有咩賣，留待大家親自行一轉



見到指示牌，跟住行入去就啱了



金鱗湖以湧出嚟嘅冷地下水同熱泉水混合而成嘅晨霧而聞名，原本個湖就叫做「岳本の池」，但喺1884年，儒家學者 毛利空桑 造訪果時，因為見到湖入面魚嘅魚鱗喺夕陽映照下反射出耀眼如黃金嘅光芒，所以幫個湖取名「金鱗湖」

金鱗湖真身，依個季節依個鐘數就一定見唔到霧氣㗎啦




樓豬喺依到見到樣好神奇嘅嘢，係紅葉！！！！！！全個由布院只有依一棵當刻係紅嘅，完全唔知發生咩事咁早紅，地球又病多兩錢重？




金鱗湖範圍內有一個天祖神社，相傳係第十二代景行天皇為咗祭祀皇祖神靈，而命住喺豐後國速見郡嘅速津媛所建，中央供奉天祖神，右邊有八坂神社，左邊有金比羅神社

天祖神社



天祖神社のスギ，即係杉木，有成超過1000年嘅歷史



天祖神社有一座水上鳥居，係金鱗湖其中一個打卡勝地



打個卡影張相其實只需要幾秒 但果時有三個香港阿嬸，逐個影張單人打卡相，霸住咗眼前湖邊位置超過5分鐘，三個人影完睇下唔滿意又再影過，我就企足咁耐等佢地影到心滿意足行開，先影到張無人嘅水上鳥居光芒相


靜靜地坐喺湖邊，也是一種享受

由布係咪一日就夠玩

唔浸溫泉半日都夠做
但呢到無咩景點值得要特登過黎

半日都好夠做，食個飯行一行個金鱗湖就完

沿住金鱗湖圍繞咗一圈，慢慢行返出去湯之坪街道，會有一個幾有特色嘅村莊，叫「湯布院フローラルビレッジ」，依到有好多童話風格特色嘅商店，同埋有一啲小動物可以比大家試下餵食體驗

好童話特色嘅村莊


眾目睽睽之下打羽毛球，如入無人之境


天竺鼠車車 行過就係咁撲上嚟想人餵嘢食 (其實啲動物都幾慘，餓佢地然後想旅客課金餵佢地。。仲放咗個牌話販售，¥3,300一隻天竺鼠)



見佢地好餓。。唔忍心餓親佢地



渴望有嘢食嘅眼神 樓豬唔敢唔餵



行返出去湯之坪街道，仲有一啲有特色嘅cafe，例如依個足湯cafe


行到有啲熱，最好就飲返杯凍飲消消暑 5toku 抹茶飲品專門店，嗌咗杯佢地人氣嘅 抹茶Latte，值得推介比大家嘗試


沿途都有人力車喺身邊經過真心佩服佢地嘅體力，要拉咁重嘅人力車


由布院偶遇嘅貓貓，但你條尾呢？

入面仲有個貓頭鷹園
有冇入去摸佢哋？

就黎獨遊 可唔可以share個行程黎參考下

無入，淨係喺出面望咗陣

#7 已經有行程表

不過可能會有啲chur，同埋啲景點開放時間會有不同

由由布院出發去別府嘅話，如果坐JR需要先入大分再入別府，需時同距離都比較長，所以建議大家直接坐巴士會更好

36號巴士，由由布院直到別府站，好多人坐



去到別府，除咗別府地獄之旅之外，大家可以一登別府塔，觀看別府周圍景色 別府塔建於 1957年，高100米，佢係日本第三座電視塔嚟，而離地面55米高嘅展望台可以比大家飽覽360度別府景色㗎

遠眺別府塔



展望台景色




展望台有兩個比較「有特色」嘅步道，第一個係依個「星空步道」



第二個就係依個「音樂步道」，反而依個好玩啲，踩上去會有不同嘅音階



返到別府站，見張 JR Pass 仲有未用嘅免費指定席預約額，即刻走去劃張 別府 返 大分 嘅 JR音速 指定席車飛 但其實只係坐10分鐘車程就落車

10分鐘音速返到大分



現在已夜深，唔搵嘢食點得？ 樓豬我就傾向每餐都係不同款式嘅嘢食嘅，所以即使樓豬自己一個毒撚遊，都選擇咗食 sha bu sha bu

又係喺AMU Plaza入面，位於4樓嘅 美山 依到有好多款放題嘅選擇，有最普通嘅豬梅花、牛+豬，仲有特別啲嘅六穀豚，以及宮崎縣產霧峰牛


樓豬一個人就唔食咁豪，就嗌返啲普通嘅牛+豬就算了，體會到比香港更強勁刀法嘅 紙片牛 紙片豬 不過雖然佢薄，但係味道係okay嘅，不過不失嘅shabushabu質素肉


放題包咗出面自助沙律吧，包 飯/粉/菇/菜 等等依啲主食，之後加多 ¥280，無錯係¥280！就有任飲！！！抵到爛 不過全程需人手落單，大家可能要識講「追加 (ついか)」然後舉手指，話比店員知想追加幾多，如果有平板就真係更好了


食完飯，同大家開箱一下依間我只住一晚嘅酒店，依間叫做 Oita Regal Hotel，距離大分站一個街口，也是因為近車站而揀 樓豬長崎住果間係傳統但有翻新，依間就傳統得嚟又有啲舊，門匙仍然真係一條匙，屌

仲要比個頭房我



間房一眼睇哂，窄，床尾仲要放多張圓枱兼兩張櫈 不過面積都仍然細唔過 東橫INN / APA 嘅。。。 床頭無電制位，要靠依張圖最右手邊地下圓形果舊嘢拎電。。

淨係睇D牆紙都睇得出有咁上下年紀

一入房真係屌出聲 好彩我淨係訓一晚就走，兼房價係咁多晚之間最平

大分 Dormy 都唔算貴前幾日住完 我同你行程差唔多 係冇長崎去左宮崎

我本身就係book咗Dormy，因為我原本行程係無高千穗，但我臨時減走一日大分去高千穗，取消咗Dormy個booking，之後想重新book返，但單日好貴

Day 8 // 福岡 28 Sept 2024

櫻井二見浦 夫婦岩 -> 宮地嶽神社 -> 玄界灘煙火

逆時針咁遊咗一轉北九州，第8日終於要返福岡了 拎出手上嘅 JR Pass同指定席乘車券，再一次登上 JR音速 啦大家

琴晚搭嘅時候係夜晚，無作介紹，依家日頭了，就同大家講返依架 藍色嘅 883 系 列車，車門亦有寫住 883 比大家驗明正身



車廂感覺陳舊啲，始終佢係架 1995 年已經服役嘅列車車款 但依舊有行李置放架



有一樣嘢好想講係，音速 去到 小倉站 之後呢，大家係需要將張櫈180度轉，轉往車尾方向，因為列車將會反方向出發駛往 博多站 唔好戇戇鳩鳩全世界轉，得你一個唔轉，好撚老尷。。

去糸島嘅櫻井二見浦有幾種方法，第一種係喺 博多巴士總站 坐32號巴士，直接到達櫻井二見浦 第二種係先坐 JR 筑肥線 去到 九大學研都市站，之後再轉 昭和巴士 入櫻井二見浦 樓豬機緣巧合下兩種方式都坐哂

先係第一種方式，上博多巴士總站3樓搵32號巴士


沿途會望到好靚嘅風景，博多港塔，一望無際嘅大海




小田浜海岸有個好出名嘅沙灘玩樂區，有韆鞦，有歷奇設施，有奇蹟の流木，好啱一家大細嚟玩返餐


大概一個鐘嘅車程，去到 二見ヶ浦 (夫婦岩前)站 就可以落車了



位於糸島嘅 櫻井二見浦，係「日本海灘百選」同「日本夕陽百選」嘅景點嚟 喺沙灘上有一座白色嘅鳥居，而鳥居係櫻井神社嘅領地，境內供奉住日本神話傳說神衹 伊邪那岐 同埋 伊邪那美，所以依到被視為神聖嘅場所

依座鳥居當潮漲嘅時候會變成海中鳥居 而佢背面仲有兩座以注連繩連繫住嘅巨岩，兩舊巨岩好似互相依偎咁，依個就係夫婦岩了

不過本來 plan 係第二日過嚟，會係潮漲嘅景色，但調整行程變第八日嚟，就變成潮退景色


潮退代表咩？就即係人可以企上鳥居影相咯




一整個沙灘同大海，都係絕美嘅景色





大家係咪想收集物資紮木筏出海？


但其實一個咁靚嘅風景，背後就係有大量嘅人喺到排隊影相