【北九州出走之旅】福岡、長崎、熊本、宮崎、大分9日遊記 (極多圖)

返到市中心已經成10點幾 福岡近年好出名一間拉麵店叫做 “Shin Shin”，上網睇評價都有點兩極，不過既然咁出名就不如親身試下佢

博多純情らーめん Shin Shin 天神本店，開到凌晨3點


十點幾仍然有廿幾個人喺本店外排緊 不過我算！四個鐘嘅 うお田 我都等到，廿幾個人算係咩？


拉麵上枱，我叫咗碗「全部のせらーめん」，有六塊叉燒+兩粒半邊半熟蛋，由落單到上枱極快速 (順帶一提 Shin Shin 用人手落單，唔係好似一蘭咁買飛)


本身我唔抱好食嘅心態，所以碗拉麵比我想像中好，湯頭濃郁鮮甜，細麵夠彈牙，唯一一樣要彈嘅係隻蛋太熟，完全唔係半熟

枱面有辣油可以加，我後期加咗少少，但都係覺得唔加好食啲


食飽咗，望下夜晚11點幾嘅福岡，就返酒店休息，準備下一日正式開始JR Pass跨區

Day 3 // 長崎 23 Sept 2024

長崎原爆紀念館 / 追悼平和祈念館 / 平和公園 -> 鎮⻄⼤社諏訪神社 -> ⻑崎企鵝⽔族館 -> 稲佐⼭展望台

第三日，JR Pass 行程正式開始

第一晚嘅時候已經拎好哂JR Pass，劃好哂跨區列車嘅指定席，所以依家要做嘅，只需要準時去到博多站上車就得

食多次酒店靚早餐就準備起行


由博多出發去長崎站，大家係必須要搭 JR接力海鷗 去 武雄溫泉站，然後行過對面月台上 西九州新幹線 海鷗，先可以到長崎站㗎
(又順帶一提，兩程車只會消耗大家一個免費指定席預約額)


偽鐵膠mode，對面月台係 36+3 九州環島觀光列車，會喺 星期四至星期一 嘅五日時間內，由博多經鹿兒島中央、宮崎、大分，之後返博多，再即日來回佐世保


樓豬要搭嘅 JR接力海鷗 入站了，同 36+3 一樣使用 787系 列車，但想講車頭好L污糟



車廂內情況，座位還好，空間闊落，但車廂都有點歲月嘅味道，車廂中間有大型行李置放架


「肥婆彈出車外是遇見到真愛」


上網一查，JR 貨物 EH500-45 ECO-POWER 金太郎


到達 武雄溫泉站，要行去對面轉乘 西九州新幹線 海鷗 (かもめ)


海鷗 嘅大型行李置放架 (唔洗預約)，以及左邊嘅 特大行李放置區 (要預約)
(要用置放架請盡早上車，先到先得)


海鷗 嘅座位，比 JR接力海鷗 嘅座位薄 但空間更闊落，架車都新淨光猛好多


想講，出發前睇天氣報告接近9日都係落雨/多雲，但最終由依日開始，接近所有行程都 藍 天 白 雲！！！


長崎站到著，就係時候好好欣賞返依㗎 西九州新幹線列車 N700S系 列車

我個時係個站附近食一蘭 佢個碗係五角型 合格碗

如果鍾意水族館 強烈建議要去下鳥羽水族館
暫時係我去過日本咁多水族館之中 最鍾意TOP1

可唔可以講下有咩特別

樓豬都想知道 快啲講！！

樓豬我今日作感冒無乜點寫遊記 我盡快寫返多幾節

有五角合格碗加持實無死

我個時係個站附近食一蘭 佢個碗係五角型 合格碗

有五角合格碗加持實無死

我記得呢間一蘭係好早收
上次諗住行完天滿宮再去食
點知原來6點前已經L.O.左

樓豬住嘅酒店，一出長崎站轉個灣就到，放低行李喺酒店就拍拍囉柚搭車去想去嘅景點

係我日思夜想嘅藍天白雲好天氣



長崎市內主要使用 電軌系統 同埋 巴士 代步，如果要去原爆資料館，只需要搭1號電軌 / 3號電軌 去 原爆資料館站 就到




長崎原爆資料館，講述當年原爆前後嘅歷史、展出當年原爆嘅遺物。沿斜路落去，會慢慢將你由2024年，帶返去1945年



// 長崎を最後の被爆地に Nagasaki must be the last place exposed to an atomic bomb //


時間永遠停留喺1945年8月9日早上11點02分


// 忘れないでください Please do not forget //，依到播緊當年投放原子彈、蘑菇雲衝天嘅紀錄片段


重現當年東亞最大嘅 浦上天主堂 原爆後嘅樣貌


入到去有詳細講解長崎被投下原子彈嘅經過



展出歷史上第二次，亦係最後一次投入實戰、投擲落長崎嘅「小胖子」原子彈外觀同內部構造



當年嘅原爆死亡證明書


(依到雖然嚴肅但絕唔無聊，強烈建議大家過嚟長崎原爆資料館了解當年歷史，樓豬亦希望可以去埋廣島嘅和平紀念館，了解世界上第一個被原子彈襲擊嘅城市)


了解完1945年8月9日嘅長崎原爆，可以過埋去隔離嘅 追悼平和祈念館，追悼當年因原爆死亡嘅生命

追悼平和祈念館


追悼大廳有12支玻璃柱，排列方向正對住原子彈落下中心地嘅方向，而玻璃柱嘅光，向天空伸延反映對未來世界和平嘅願望。



正前方係原爆死難者名冊架，高9米，有27層，每一層可以放9本名冊。現時一共記載咗198,785名因原爆而死亡嘅人 (共202本名冊)

本身太宰府天滿宮依啲景點，應該唔預大家夜晚去

條商店街啲舖頭5點幾已經落閘關門，一蘭6點先L.O應該算晏了

咁耐都未有架妹相
明明福岡周街都係靚女

間館好大好多好多海洋生物
有特別嘅漁貓 儒艮 海獺 黑白海豚
又有水豚 海象 海牛
海獅海象show又好睇
仲有地方比你摸魔鬼魚同章魚仔
細心慢慢欣賞成個館 都要大概花4個幾鐘
我去過一次都仲想再去

派你過去街拍一下

行出追悼平和祈念館，過返去原爆資料館，有條樓梯可以去到原子爆彈落下中心地紀念碑。紀念碑其實係平和公園嘅一部份，不過順路嚟講就會先行紀念碑，再上返平和公園。

平和公園喺原爆後 6年 嘅 1951年 建立，係為咗祈求遇難者嘅靈魂可以得到安息，以及希望世界永久和平。

而原爆中心點高6.5米嘅紀念碑喺 1956年 (昭和31年)建造，其後喺 1968年 (昭和43年) 加建咗黑色花崗岩石碑，悼念死難者

紀念碑正面



刻有原爆當刻時間嘅 原爆50週年紀念碑，係長崎市雕塑家富永直樹嘅作品，慈母溫柔抱住嬰兒嘅雕塑

原爆當時嘅地層狀態，可以見到瓷磚、被熱力融化嘅玻璃、茶杯、電線etc



一個街口之隔，可以經扶手電梯上去平和公園


長崎之鐘 & 原爆殉難者之碑。依座鐘喺每月9號都會敲響



平和祈念像，指天嘅右手代表原子彈威脅，水平伸展嘅左手代表和平

經平和公園扶手電梯出返去，行過對面就係平和公園站，我地搭返3號電軌，就可以一線直到鎮西大社諏訪神社

長崎電軌系統




「諏訪神社」又名鎮西大社，係長崎嘅總氏神，喺 1648年 正式興建社殿，不過社殿喺 1857年 遭受火災燒毁，而喺 1869年 重建。依到祭祀「諏訪大神」、「森崎大神」、「住吉大神」三社，是除厄、結緣、守護海上的神社

諏訪神社 參道



到達神社之前先要接受「考驗」 長命樓梯「長坂」



但上到嚟高位望出去嘅景，即刻覺得行樓梯值嘅


拜殿


依到竟然可以體驗騎馬



然而每次旅行當我考慮skip咗餐午餐嘅時候，總會有間茶屋出現打救我

神社隔離嘅 月見茶屋


室內嘅裝潢好樸素，好有味道


叫咗個天婦羅蕎麥麵，味道正常，但點解炸嘅天婦羅要放喺蕎麥麵入面浸湯！？？？上枱後我第一件事係分返開隻天婦羅。。。。


食飽就落返下面大街準備坐巴士，去依個行程第二個水族館

巴打啲相影得好靚
係用相機定iPhone影？
同埋係用咩effect

當然係相機，iphone做唔出依種景深同壓縮感出嚟

今次一機三鏡，Canon R6 Mark II 配 1635/4L、24105/4L、70200/2.8L，一個斜孭相機袋裝得哂，勁輕便開心

Effect方面我用咗隻好多年前儲落嘅Lightroom cinematic preset，再自己因應場景fine tune

福岡城(CG)
怪唔得行程無去

某啲長崎偏遠少少嘅景點，電軌無cover到，就唯有坐巴士去 落返去電軌諏訪神社站果邊，等一架「女の都方面~中央橋~西山木場•春日車庫線」嘅巴士，你就可以去到 長崎企鵝水族館

長崎企鵝水族館 正門



既然係企鵝水族館，當然係一入門口就見到企鵝！



有幾隻企鵝見到有人類嚟就好hyper係咁跳出水，然後游過嚟望下你同你打招呼，之後繼續hyper



得意嘅企鵝





企鵝嘅演奏會開始啦 佢地係咁喺到集體叫囂，捉哂你地非法集結啊嗱



先生，小姐，依到唔可以打羽毛球㗎


我諗企鵝們每日嘅煩惱就係幾時有得開餐




企鵝水族館唔大，基本上45分鐘點都行得完 參觀完班企鵝仔，就出去搭返頭先架巴士返長崎站



我嘅人生都想好似啲草咁，日日養生中

留名！
我今個月都去福岡

睇完企鵝，返去酒店 checkin 抖抖，就可以準備出去食晚餐，再出發睇夜景 但出發晚餐之前，想同大家講下樓豬喺長崎住嘅酒店

樓豬係住長崎站隔離嘅 Hotel New Nagasaki，主要原因係近車站之餘，價錢極平靚正

依間酒店係好傳統嘅酒店，Lobby好大好華麗，房亦都好大，以當日房價 $524 嚟講，真係抵到爛 (當日23/9係日本秋分節翌日假期)




而checkin果時發現仲有一個好正嘅點，就係佢有免費嘅接駁巴士送你去稻佐山山腳纜車站！！！！！ 仲要包來回！！ 樓豬本身已經搵好巴士路線去纜車站，但佢有接駁巴士就二話不說 book 咗先！

上佢接駁巴士官網有得預約，而你必須預約咗先有得搭，每日只有4班車所以請盡早預約，而接駁巴士會喺市內5間酒店接人上車 (最重要係，唔需要係依5間酒店嘅住客都可以預約)

巴打啲相好靚
Shin shin我覺得好一般

間酒店喺Agoda嗰啲相望落咁舊嘅

巴打我有睇你北九州廣島遊！！！宮島 & 原爆館！！

Shin shin真心comment好兩極，可能近年比人捧得太高
我無期待咁去食就覺得幾好食