【北九州出走之旅】福岡、長崎、熊本、宮崎、大分9日遊記 (極多圖)

近年大家應該都會喺 ig / youtube見到依間好出名嘅 糸島海鮮堂，因為依到除咗食海鮮丼之外，仲有得食個無敵大海景

距離 夫婦岩 一兩分鐘路程，就即刻會到外表好四四方方嘅 糸島海鮮堂 店入面嘅位都唔少嘅，不過如果想坐窗口位呢，可能就要等等


借用一下官方餐牌圖 有大概16款不同嘅丼飯可以比大家選擇，有平有貴，而佢個飯底可以選擇白飯 / 醋飯，飯亦可以選擇多飯 / 少飯


先比大家淨係睇個丼飯嘅樣，樓豬嗌嘅係 糸島海鮮丼(上)，¥3,800 其實勁多款都想食，不過獨遊撚又無理由嗌兩份


再嚟就比大家食下個海景 職員知你想影相打卡，會拎個木箱過嚟比你墊高嚟影



望住依個海景真係心曠神怡



食完飯就準備坐車，出發去下一個幾重要嘅景點 樓豬之前話機緣巧合下，兩種往來糸島嘅交通方式都坐哂，因為我本身係夾好時間食完飯，衝出 糸島海鮮堂 上巴士，以為係32號高速巴士返博多啦，但點撚知果架原來係去 九大學研都市站 嘅昭和巴士 下一班高速巴士原來要過多成粒鐘先有，逼於無奈下就上眼前架昭和巴士，再用 JR筑肥線 做轉乘。。

今個旅程其中一個重點，就係嚟緊嘅 宮地嶽神社，以及我一早搵好咗嘅 玄界灘花火大會

宮地嶽神社 出名嘅點在於，依到係睇日落一流嘅地方，而每年2月同10月更加會有「夕陽祭 黃金光之大道」嘅活動，比人欣賞由神社沿參道延伸開去嘅絕美日落 不過樓豬係9月去，所以係無緣夕陽祭嘅，但都想趕去感受一下 宮地嶽神社 嘅日落美景

但由 櫻井二見浦 去 宮地嶽神社，其實係好長時間 返到博多站 仲要轉 鹿兒島本線 入 福間站，再轉巴士去到神社附近，再行上去 然而仲要同 玄界灘花火大會 同一日，就更多人同樓豬爭巴士，樓豬成為最後一個逼上巴士嘅沙甸魚 (不過沿途好多和服妹豬)

6點鐘日落，而樓豬6點25分先跑到神社嘅樓梯底


但當見到身後嘅依個景，咩都值返哂




戲玉上映完，就轉身行返去宮地嶽神社參觀下 宮地嶽神社 係間擁有 1,700年歷史嘅古老神社，佢除咗係福岡三大神社之一，亦係日本全國宮地嶽神社嘅總本社。依到供奉住 息長足比賣命神，自古以嚟就係保佑大家開運、生意興隆嘅神社

宮地嶽神社 六の鳥居



樓門


本殿，本殿上面掛住果條，曾經係全日本最大嘅注連繩，直徑2.6米，長11米，有成3噸咁重由神社1,500個義工親手製造，而且每3年就會換一次




由於樓豬接近完日落先到，所以係無辦法去 八社参り 嘅 宮地嶽神社係祭祀以「奧之宮八社」為名嘅八座神社，由於傳說話只要逐個逐個神社參拜後，就能夠實現願望，所以發展出現時嘅 八社参り

八社包括 求福報嘅「七福神社」、求生意興隆嘅「稻荷神社」、求消災解難嘅「不動神社」、兒童守護神「萬地藏尊」、求幸福嘅「戀之宮」、烹飪之神「三寶荒神」、祭祀龍神嘅「水神社」，以及求病愈嘅「藥師神社」

參道入口已關 樓豬失去咗以上八個機會，各位巴絲打證實了這消息


唯有周圍行下睇下有咩睇



好彩社務所未關 買到樓豬認為勁靚嘅「夕陽叶守」


睇下以後有無機會嚟「夕陽祭」 但今日就係咁先，我仲要出發去隔離嘅 福間海岸

接近夜晚7點，行返落去參道搭巴士過隔離福間海岸，迎接樓豬人生中第一場日本花火大會

雖則都係放煙火，但相信無乜人聽過 玄界灘煙火 依回事，因為樓豬都係第一次聽 規模就一定無出名嘅花火大會咁大型，依個花火大會係 福津觀光協會 同 宗像青年商會 共同主辦，時隔五年再一次喺玄界灘舉行，大家可以喺海岸邊觀賞5,000發煙火



埋嚟睇埋嚟揀，場外有小食攤檔


揀好個靚位，就好好欣賞花火 (樓豬無帶腳架，只係手持1/4s快門)








歷時接近一個鐘嘅花火大會，都會有肚餓嘅時間，出去睇下有無咩好西食先


和牛串，有四款牛可以揀，樓豬求其篤咗隻但唔太好食，¥800


有一層麵粉包住條腸，然後外層加上 煎蛋 同埋 不同醬汁配料，仲平過食串和牛串，好似係¥700


食嘢不忘要繼續睇花火大會

返到博多已經接近11點 好多嘢食都已經關咗門，本來諗住去博多站筑紫口果邊間 博多一幸舍，但經過聞到佢果陣臭味就真係唔想入去 唯有去博多站拉麵一條街，睇下有無舖頭仲開緊



博多辛麺 狛虎 博多DEITOS店，用門口售票機買飛，買完飛店員會安排位置比你



樓豬嗌咗個 黑辛麵，少辣，加蛋，加芝士 芝士會另上一碗半熟芝士比你倒上面，但蛋係碎熟蛋，同埋湯底太咸 唔太推薦食



今晚會係最後一晚，Weekend嘅酒店係 超 級 貴 博多站前 2 丁⽬ APA 都要 $886一晚，屌出聲 房就一定係最多晚最細，但起碼一定新同靚過琴晚大分果間

幫樓主推下

Day 9 // 福岡 29 Sept 2024

福岡塔 -> Teamlab Forest -> 住吉神社 -> 快運UO639 日落機

嚟到最後一日，最合乎經濟效益就一定係揀日落機走，咁就唔會浪費一日時間之餘，又唔會太夜先返到香港

首先坐一坐巴士去福岡塔先 福岡塔係一座電波塔，福岡縣所有電視台都係靠佢嚟做訊號發射，但佢外觀完全唔似一座電波塔，反而同香港啲甲級寫字樓大廈極相似當初係為咗迎接1989年亞洲太平洋博覽會而起建造，而佢現時係除咗 東京Skytree 以及 東京鐵塔之外，全日本第三高嘅塔

福岡塔好現代摩天大廈嘅外觀


好似一把刀咁利，唔知界唔界得死人？


喺門口售票處買完飛，就可以搭電梯直衝上觀景台，沿途有個mon show比你睇去到幾高，又會有職員介紹下座塔



上到嚟觀景台，好天就係配咩景色都好靚




基本上啲角落全都變成打卡熱點 現場仲配備埋 props 比你影相


一場上到嚟大家仲可以收集一共六款嘅蓋印 六款蓋印代表住六個不同嘅景物



到此一遊嘅印章


行落一層，又有一個「恋人の聖地」 日本就嚟周街都係戀人聖地




隔離仲有一部運勢機，同埋一部抽紀念品機，有興趣可以抽下

樓主你klook買嗰張JR Pass 換剩係護照同電子憑證就ok? 唔洗帶埋買嗰張信用卡？

唔洗，淨係 passport + 已print嘅憑證就得

謝謝

高千穗神社仲有一個神樂殿，每晚都會有「高千穗神樂」表演，不過要去到夜晚先會開放，樓豬無緣欣賞

之前去有睇過，頂唔順勁眼瞓

悶到咁？

差唔多睇成個鐘，成場得兩、三個角色，大部分時間都係一個角色行嚟行去，啲音樂又沉悶搞不掂，唔識欣賞

全個旅程都無乜可以玩嘅點，要玩嘅話過隔離BOSS E • Zo Fukuoka就啱哂了，Teamlab Forest就正正喺依個設施嘅5樓 又有得睇又有得玩

沿住 ももち浜 嘅海邊一路行過去，唔遠嘅幾好行，又有海景睇



記得去預約定就包保有得入場啦 樓豬一早預約咗，到場嘟嘟QR Code，就即刻入得場


「捕まえて集める森」，顧名思義就係探索，發現，捕捉 大家可以download佢地個app，去捕捉各種各樣嘅動物







「運動の森」，有啲可以親身體驗嘅設施，例如「あおむしハウスの高速回転跳ね球」，「つぶつぶの地層のふわふわな地形」、「タイフーンボールと重力にあらがう呼応する生命の森」等等




迷幻萬花筒



無重力生命森林，應該會係小朋友最愛嘅地方


點滴瀑布 & 與花共生的動物們 II



當然嚟到日本，少不免都有 補習班 ，睇下啲小朋友幾勤力 你可以喺 補習班 彩繪工廠依到將 補充練習 你畫嘅圖案變成紀念品帶返屋企


Teamlab Forest 佔地唔算大，所以大家如果唔夠喉，可以選擇行多轉先離開

行程差不多到尾聲，我要去食喺北九州最後一餐 之前已經想搵牛舌專門店，而又遷就到我方便嘅，就一定係喺博多站解決

首先坐車返博多站先，途中會經過博多港塔


牛たん炭焼 利久 博多デイトス店



樓豬嗌咗 3枚6切 嘅 牛たん定食，附有白飯、湯，同一粒大福 一食個牛舌真係驚為天人！！！ 好食到dum一聲！勁想單嗌多份 味蕾嘅享受


喺香港真係好難搵到好好食嘅牛舌，如果有嘅請推介比我


滿足完個胃，樓豬就去埋博多站附近嘅神社做收尾 位於博多嘅 筑前國一之宮 住吉神社 有成超過1,800年歷史，佢同 大阪 嘅住吉大社，同埋 山口縣下關 嘅住吉神社，並列日本三大住吉神社

「住吉神社」主祀住吉三神，分別係 底筒男神、中筒男神，同埋表筒男神，保佑開運除災、航海安全、保佑船舶等等

住吉神社 南門


住吉神社 神門



拜殿


社務所


再買咗一個靚到爆嘅御守！住吉神社 嘅 星守 有黑有白各有特色



住吉神社境內仲有好多不同神社，例如 三日惠比須神社、荒熊/白髭稻荷神社、志賀神社等等





之後就沿住 一の鳥居 方向返酒店拎行李，準備要離開依個咁美好嘅北九州

九日前踏足入福岡機場開始北九州之旅，九日後嘅依日就要返嚟福岡機場準備離開



唔係好想行去上機



上機前享受埋杯 The Matcha Tokyo 嘅 Matcha Latte先，一路望住飛機升降，一路歎下




真係要離開了，又要返去一個壓力大到爆嘅環境

正正常常用菲林求還原度咪算囉
係要買貴一貴器材 扭屎窟花搞到成品半世紀前咁

多謝巴打絲打們追咗成個月 post

福崗好遠喎

福田 + 皇崗

喺我依個遊記中出現過而我覺得可以嘅

熊本：勝烈亭、阿蘇赤牛

福岡：うお田、糸島海鮮堂、利久千舌

另外熊本可以試 黑亭拉麵 ，同埋馬肉刺身，博多嘅可以試 金木犀，其他留待巴絲打推介

廣東省有好多個福崗

睇曬 多謝分享