南美、一個人、七個月

其實都係第一次去西人地方過聖誕，臨近呢個西人最重要節日，於是就想搵個大少少既既城過，費事落街買罐汽水都無(但其實都幾乎無可能)，於是有少少趕咁過來Puerto Varas住幾晚

原本Castro 所在既Chiloe 島都可以玩多一兩日，睇自然風景，但咁樣搞搞下隨時留多兩三晚

今日就算係平安夜，總要搵個地方去，尋晚問左個美國妹，雖然佢新來實習，但都幾熱心，佢介紹左一個德國式小鎮Frutillar，Puerto Varas坐小巴大概30分鐘就到，時間唔太長

既然呢度叫湖區，幾個重要景點都係圍住湖邊



呢個小鎮都係周圍行下，僅有景點都閂門，就隨便影相，因為呢度百幾年前有唔少德國移民，所以建築都保留德國風格，而唔係嗰種五顏六色



餐廳都唔多間開，是但搵間食個晏，60港紙食個魚飯加汽水加麵包

返到hostel 就準備聖誕大餐，其實只係快熟飯加生菜加肉腸，同有對荷蘭老夫婦既西式炒雜菜，真係無得比，真係食得飽就算好彩個美國妹既屋企人來智利同佢一齊慶祝聖誕，請大家食呢度既特色德式蛋糕，總算有兩道菜

Day 56

今日聖誕節，同其他西人地方一樣，全世界都係留喺屋企過節，難得今日都有一日團做遊客生意，去睇湖同瀑布，所以都無點考慮，照報

其實段路由Bariloche 來呢度時有經過一段，但之前睇過Bariloche 去Puerto Montt 呢段，四程船三程車既套票要近280美金所以當今日補去智利一段，當時要65000 peso (即係大概700港紙)，合理得多

剛剛食完早餐，架接送車已經到，實在難得準時，但原來係去到中間位再所謂拼車，前後用左近半個鐘

個導遊(可惜無記低佢叫咩名)從頭到尾都係先講西班牙文，再講英文去介紹景點同其他重要資料，例如集合時間，佢都盡量加插笑話，笑得出既

一開始係去Todos los Santos湖湖邊停低，睇Petrohué 瀑布，亦可以行落去個溪流度睇





之後就坐船遊Todos los Santos 湖，導遊呢個時候就問：究竟係眼前既Osorno火山似日本富士山，定係日本富士山似呢個火山



架船去到湖既另一邊，估計係Peulla村就全部人落船，有報收費項目例如兩棲車就跟住去玩



無既就去酒店休息或者周圍影相，導遊都幾好人，見我呢個外星人肯定錢都唔多個，都會主動搭訕，雖然目的都係推銷，但我婉拒同問免費活動例如點樣行山，佢亦有詳細介紹

佢話去到某個位因為太近阿根廷邊境，到時就要返轉頭，於是我就照佢介紹咁周圍兜個圈影相




景色方面，當然無得同Patagonia比，但瀑布既淺綠色河水、觀景台既湖景都幾吸引，甚至好過阿根廷一邊

回程都係原路，只係中間有少少誤會，上船時我夾左喺一班人裏面，後來應該係佢地搵唔返我張船票，結果個船長行過來有少少惡咁問我，我當然堅持交左票尾俾個職員，好彩之後亦無再追問


聖誕日就咁過

今時今日買支osmopocket 同你手機影相一般人已經夠哂拍片都有4k
細細支易拎易收藏
又唔洗放背包

Day 57

經過多日不斷坐車影相跑景點，今日就決定只係喺小鎮入面休息，咁當然又唔係完全休息，只係去鎮裏面既山仔同湖邊影相，反而今日食晏時有奇遇

晏晝去hostel 老闆推薦既Donde El Gordito (姑且叫作肥仔餐廳)，要左碟鰻魚，相當新鮮，但更有感受既係呢度個老婆婆，我一入去就同我講：後生仔，食乜？
https://maps.app.goo.gl/cGVg8YZjGTiSRDscA

簡單同老婆婆講自己係香港人，來呢度旅行等等，突然隔籬檯有另一個老婆婆叫我，話原來佢個仔去過香港，好似係工程師開會，我呢個時候當然有盡量介紹香港，但有啲地方唔熟書，自己都講錯，以為IFC係全港最高大廈，反而婆婆個仔話IFC而家只係第二高，第一高係ICC

全程當然用西班牙文，我諗反而會多D人對自己好奇以後會比較多同旅遊中相遇既人合照


食飽就去個鎮有個耶穌走苦路雕像既山仔，同有因為有歷史價值而保留既古老木屋，都係影張相就算

Day 58

今日參加老闆親自揸車帶隊既行山團，其實就係去行Osorno火山團，同團有我同一對荷蘭公公婆婆

老闆以前喺德國讀書，娶左個瑞典人，前幾年由Santiago過來開hostel (所以幾有北歐風)，老闆都去過東南亞同中國，所以都幾傾得埋，不過佢有意無意講幾多中國既野，後來我都坦白講其實香港同中國都幾有分別，香港人本身點睇中國人，佢先明白多少少

另外有個細節就係個荷蘭伯伯問我返香港之後係咪一定會搵到野做，自己一時接不上，個老闆就幫口話佢以前都試過勇闖東南亞，而家都慶幸自己有過呢種經歷隔左咁多年，我都同樣慶幸自己當年有去勇闖南美，睇返其他人遊記，真係桃花依舊但人面全非

一開始既一段，之後又係睇瀑布同湖邊，但竟然又無咩厭倦感覺



後來開始上山，即所謂國家公園既一段，但無去到頂峰雪山個度，記得既只係有一大堆果蠅，同老闆非常熟手咁逐隻摧毀而對荷蘭人老夫婦都有少少奇怪，個伯伯好似唔太理個婆婆，多數係自己一個喺前面行，女既隨後


到之前非常期待既火山一段，其實只係行到去山腰既火山口，但泥石已經係黑同紅，一層層咁，老闆話最遠既山就係安第斯山脈，所以山後面就係阿根廷，印象中都係八仙嶺既級數



後來去東南亞都有去登山，我諗印尼Bromo火山或者馬來西亞神山個感受比較豐富掛

玻璃樽整出來既聖誕樹


晚飯，牛扒加手工啤

Day 59

今晚坐過夜巴士去Santiago，於是呢日無咩做，就決定去呢一區最大城市Puerto Montt 兜個圈，連相機都無帶出去

坐小巴去Puerto Montt 巴士總站落車，搵路時突然遇到一個東亞返叔，原來係韓國人，佢話喺呢度做漁業生意，又俾我睇佢個妹定家姐拎大紫荊勳章定唔知咩慶典既相，來頭不小初時都唔知佢想點，見到佢既相就放鬆左唔少，不過後來佢話趕時間，無時間帶我周圍睇同食飯，就咁道別，最後佢都不忘提醒我小心Santiago大巴站，有好多賊偷野，雖然只係短短幾分鐘，心情舒服左好多，感覺終於遇到比較容易溝通既人

個城市真係無咩特別，只係見到有啲人乞食、有個大少少既商場、海邊有個工藝品市集同海鮮市場，但呢個魚市場勁多阿嬸喺度招生意




我避開晒班阿婆之後入去，搵到間又係由一個阿婆主理既餐廳仔，又點了Curanto，雖然平過上次喺Chiloe 島，但質素同份量都差左少少，反而杯白酒唔錯



行到無野好行，就返Puerto Varas，用左近半個鐘搵夜晚上車既地方，於是返hostel休息下，拎返行李就返去個站度，上巴士時竟然唔太肚餓，就咁樣空住個肚訓到第二朝

留個名先
想出年去南美1個月

巴打暫時想去邊？打算邊個月去？

Day 60

臨落車時派左包餅同呢個俾你沖咖啡飲


車總算準時到達Santiago，去hostel 擺低行李先，因為要等下晝先可以正式check in，於是就去市中心

Hostal Providencia，位置方便，比較似party hostel，早餐同設施就一般啦
https://maps.app.goo.gl/MdeAot5C1U9cKa5X9

hostel 入面有呢個牌，原來跟住幾日都完成左唔少


第一站係中央市場，都幾遊客地方，於是就搵一間遠少少既，但都係受唔住誘惑，叫左個海鮮湯，係足料，但唔太值8000 peso (即係大概港紙80)，少少中伏


然後去武器廣場 (Plaza de Armas) 兜個圈，幾乎每個中南美城市都有呢個武器廣場，喺正市中心，附近多數有主教堂

既然係首都，個廣場同附近大教堂都宏偉好多，雖然名氣無得同阿根廷Buenos Aires比，都相當有睇頭


主教堂




下晝返到hostel正式check in 之後唔知做咩好，就決定去Sony store，想買返個鏡頭蓋於是就出發去號稱全南美洲最高大廈Gran Torre Costanera 個商場，搵左陣終於搵到Sony store，但當然款式唔及香港既，有鏡頭連鏡頭蓋買，但唔會分開賣鏡頭蓋，所以失望而回

然後都搞到好夜，就去商場個美食廣場食Pizza Hut



同試埋hostel 推薦既雪糕，不過不失吧

Day 61

今日一開始都係唔死心，想去搵返個鏡頭蓋，於是去另一間大商場，呢次間鋪就比較大，但一樣無賣鏡頭蓋

失望之下就繼續參觀景點，第一個係La Chascona，係智利好出名既詩人Pablo Neruda 既居所

入面擺設佈置好有60年代風格，但唔畀影相，所以只好門口影張


再之後上附近個山仔Cerro San Cristóbal，都係例牌高處睇城市全景




個景都唔錯，即使有煙霞，可以隱約見到安第斯山脈



上山整返杯mote con huesillo，其實係桃乾加糖水加薏米咁


聖母像



夜晚頂唔順，去食亞洲菜，於是搵到一間叫大長今既韓國菜餐廳，初時睇個有齊中日英西文既餐牌，無自己好想食既人參雞，但韓文版竟然有，於是狗衝

老實都幾正宗，起碼有兩三條有鉛筆咁粗既人參，呢度隔半個地球咁遠，無謂強求更多，而且外國既韓國餐廳通常個價係包埋白飯、前菜，但唔知係咪俾人呃得多，每來一碟就問使唔使錢，個當地人侍應每次都會呆一下然後答包埋的

Day 63

天一光就起身，食少少野當早餐就上的士去機場，無提早網上check in，但其實都無咩分別，因為都要寄行李，一直都係南美日常咁無效率咁排隊、等


排隊時隱約聽到廣東話，原來同機應該有兩個香港中女，但見佢地D語氣態度都一般，都係收埋自己算，但唔知好彩定唔好彩，竟然坐同一排

到埗後機場影既相，我諗去過咁多地方，最細既機場應該係呢個，一落機行3分鐘左右就去個一個籃球場咁大既「客運大樓」等行李



搵唔到旅館既人接機，於是有另一間旅館既司機兜生意，應承左後原來要等一陣接另一個客，原來個客係個廣東佬，簡單交換左資料，呢個時候再查，發覺其實唔算好遠，於是就話唔使，自己行去，行左大概約20分鐘後終於到，但自己save低既地圖得大街，睇唔清楚內街，問途人、附近鋪頭同住客都唔知，呢個時間個司機駛過，同我講：重未搵到？唔肯畀錢就係咁囉，唔係呢邊，返轉頭吧！喺南美差唔多兩個月，第一次俾人咁樣侮辱，好難受但既然都行到附近，為啖氣點都要搵得到，無理由返轉頭去機場叫的士

最後喺一個本地女仔幫忙下(後來知道佢喺嗰度打工) ，終於找到，然後接待個男仔話今日係元旦，無提供接送，後來發現原來要用email預先通知算啦，搵到就好

Hostal Petero Atamu，當時搵唔到除左露營以外既更平選擇，於是就住呢間既單人房，其實似住郊野公園既渡假村多過民宿，早餐有等於無啦，位置都方便
https://maps.app.goo.gl/kHHRPHdgKhZmRTsJ6

復活節島而家連hostel 都有了，入境方面，以前有錢買到機票就去到，但而家入島要好似去第二個地方咁，要上網填表，交來回機票同住宿證明

之後就去村中心(呢度應該無鎮咁大)買跟住幾日既飲品、蔬果等等，物價其實似意大利、西班牙，但已經無想像中咁貴，起碼唔會係英國、挪威呢啲亦去過附近石像睇睇，可惜今日陰天



因為元旦，得一兩間餐廳開門，本身都唔想煮，但見到咁就拎智利大陸拎來既罐頭再加少少菜就一餐

Day 64

講呢日行程前，想講返買機票時有個幾後悔既決定

當時心諗既然留5晚同6晚同價，點解唔揀留多一日？當時覺得留多一日會玩得多啲野，結果而家後悔，因為日子太多，留多日其實無咩做，而且諗漏左呢度消費一定高過智利本土

講返行程，今日由民宿行兩個鐘去鳥人文化既村落Orongo，中間經過火山湖才到，天氣算幾好，休息一兩次就行到去


鳥人文化其實復活節島唔再起石像產生出來既文化，有個一年一度比賽，參加者要鬥快游返去主島對出一個小島，爬上石堆既尖拎隻鳥蛋，再游返去主島

中間經過有個海洞


其實只係一堆石屋，無咩好特別既文物，多數靠展板描述


而呢個山上有個火山湖咁


但都顯示到當時復活節島已經有相當豐富文化習俗，而最新研究認為島上無試過因為耗盡資源而人口大幅下降
https://tw.news.yahoo.com/%E5%BE%A9%E6%B4%BB%E7%AF%80%E5%B3%B6-%E7%A4%BE%E6%9C%83%E5%B4%A9%E6%BD%B0%E4%B9%8B%E8%AC%8E-%E6%96%B0%E7%A0%94%E7%A9%B6-%E5%8F%AF%E8%83%BD%E4%B8%8D%E6%98%AF%E5%9B%A0%E8%80%97%E7%9B%A1%E8%B3%87%E6%BA%90-083444514.html

簡單參觀過後就返村中心，是但搵個地方食晏，但普普通通一餐連汽水都要8000 peso (即係港紙$80)，果然係歐洲價


然後趁天氣唔錯就周圍行下，影石像，可以留意幾乎所有石像都係望向島內陸，後來天陰，結果影相時背晒光





夜晚又係是但煮個飯就算，但重點原來係晚飯後，老闆見我一個人，就叫埋我同一個喺度打工既一個後生仔Alfredo一齊飲酒，亦都同佢地傾左陣，原來老闆係智利大陸人，娶左個島民，於是就呢度開間民宿，唔怪得呢一兩日見到有班公公婆婆喺度打躉，外表同老闆都幾唔同

當然都有介紹下自己，話一路會向北去玻利維亞、秘魯，佢就話玻利維亞人唔太鍾意智利人，因為以往歷史因素，個創傷原來一直都喺度，再諗下而家個世界，有國家好努力放低，亦有國家不斷強調唔知幾多年抗戰

老闆養既狗，都幾黐人，脾氣都唔錯

有事唔方便更新住，希望月底可以繼續，如果仍然有人睇

如果繼續爛尾既我或者直接打個行程出來公諸同好算
話時話絲打個遊記會唔會繼續寫埋落去？