南美、一個人、七個月

Rio 確實比想像中難去，同疫情後機票貴左唔少

巴西二線城市就可以搭TAP，經葡萄牙，但因為獨市，唔平得去邊

留個名先~

留名

Day 8

今日就係去睇伊瓜蘇瀑布，一開始講過，去唔少重要景點都係天氣差，呢個算係例外

對南美既第一印象，其實都係王家衛既《春光乍洩》，呢套戲上畫時只係好細個，只係聽過套戲入面既幾個地方，到出來做野無幾耐先認真由頭第一次，其實景物依舊，但人面全非

所以頭幾站就係想去幾個取景地朝聖，其中一度就係伊瓜蘇瀑布

唔係部相機壞左，只係巴士冷氣太勁，一落車30度，要等部機晶片既霧散左先


買完門票，見入面無得食野就決定食飯先，Quati，呢度既主人，攻擊力隨時勁過馬騮山，食食下就見到佢地爬上枱，搶人地食剩既野食，張枱都專登整埋警告字句





就係搭呢架雙層巴士，呢度多數係用來來往城市之間，做遊覽車比較少見，然後搭車就出現柒事，一般係由遠既地方行到去近，但見第一個站大部份人落車時就無為意，結果我同幾個人去總站落車，然後向相反方向行但一樣咁震撼



第一個感覺就係好嘈，然後先係咩大自然威力、影相、又去多個世界自然遺產









大概呢個位就係春光乍洩個取景地，呢個景係未必有套戲咁美好，但因為套戲加持，成件事浪漫晒，除左感受大自然，亦感受到種孤獨


行返去又見到隻Quati 趁個美國姨姨一時無留神，搶佢包野食同件褸，件褸後來喺斜坡執得返，野食就無了

夜晚食咩？無印象了.....但記得夜晚返到hostel時，hostel 有個黑人哥哥職員搭訕，問我邊度來、鍾唔鍾意呢度之類，呢幾個月喺南美都習以為常，即使係巴西、秘魯呢啲唔少亞裔既地方

但問返佢時佢講左幾次我先知係咩地方，原來係海地(Haiti)，因為巴西葡萄牙文如果t之後係e 或者i，t 會轉讀ch，再諗返以前睇過既一本書《大崩壞》(Collapse)，發現呢個國家都無得救了，可以話典型失敗國家 (failed state)，土地貧瘠、政局混亂，又互為因果，同側邊既多明尼亞共和國，無論發展水平、人民生活、政治情況差天共地，南美眾多國家，即使只係委內瑞拉，似乎只係小問題

聽日就離開巴西，但會再入境兩次，分別係大概3個月後經玻利維亞Santa Cruz去Bonito (見都有少量遊客咁玩，但其實超級兜路，而且唔算好特別)，同近半年後由哥倫比亞Leticia 坐三日兩夜船沿亞馬遜河去Manaus

東南、中同東北部就希望下次踏足南美再探索了

Day 9

第二日一訓醒就執行李，食埋個飯就過境去阿根廷一邊既伊瓜蘇瀑布，無打算去睇咩植物園，後來諗返其實計劃錯左，應該呢邊留多一日去睇水壩或者過巴拉圭Ciudad del Este 行商場同食台灣野，而唔係喺阿根廷留多一日

因為要準備多少少現金，同咁啱hostel識到人一齊過關，於是自己出去提款先，發覺又有奴隸飯食，而且當時只係10 巴西幣 (即係港紙$20左右)，於是狗衝，其實唔差得過當日喺里約熱內盧



之後返去拎行李，同幾個人一齊搭巴士過境，平時架車係直接穿過邊境，因為唔會有檢查站、禁區、封鎖線，但因為我地幾個遊客，要落車去檢查站出入境，搞掂再等下一班車去阿根廷

去到間hostel，而家睇返相真係十年如一日，應該恭喜佢地捱得過呢個疫情，間hostel都幾熱帶風情，有個泳池仔，又有吊床俾人chill
https://maps.app.goo.gl/sAfpncNMPCKN7xJH7

同埋有佢地



食晚飯前就去hostel 提議既地方換錢(當然係黑市價)、超市等
，然後睇返呢張相，已經唔記得自己食過乜，感覺似歐洲咁有盆麵包送，其他南美國家例如巴西、秘魯就少見

Day 10

呢日就係去阿根廷呢邊睇伊瓜蘇瀑布，究竟邊一邊比較好睇？以呢次旅程計就係巴西，好簡單，因為前日天氣好好

天氣預報已經話呢日天氣會幾差，但又唔知點解當時訂左住3晚，第二日天氣又唔特別好，所以算啦，照去，手機相機無壞就算了，靠件防水風褸同快乾衫褲就頂硬上

一開始就坐小火車，先去主要景點魔鬼之喉 (Garganta Del Diablo)，張相可以見到大家都做足準備



慢慢靠近了，天氣差，其實全日都不斷落雨，好似更加有魔鬼之喉既意境，但當時條褲都就快濕透




段片搵唔返了，但可以肯定既個背景噪音同喺酒吧係無分別，見其他遊客之間講野係要叫，加埋呢日既天氣，更加有身處地獄既感覺





去到呢個時候基本上全身濕晒，聲稱防水既Sony後備手機都捱唔住，開唔著....係時候返hostel了


夜晚去間好少少既餐廳食河魚，初初以為係雞肉，加埋係煎就更加似，至於阿根廷最出名既牛扒就留返Buenos Aires 再慢慢試了

師兄好勇

多謝巴打
你又有無去過邊度探險？

Day 11
點解呢度要留多日？可能係想去埋巴拉圭嗰邊，可能想去睇個鳥園，但後來發現其實兩度都要去返巴西嗰邊，諗行程又忽略左，所以成朝都只係同南極last minute 團公司傾行程，執下相等等，出面天氣就出奇咁好，咁點解我唔今日先去睇瀑布

Hostel 養既狗


是但去食個斷斤秤飯就去睇個三國(巴西、阿根廷、巴拉圭)交界碑，沿路又影少少相





夜晚見有間食所謂亞洲菜，忍唔住幫襯，叫左個海鮮烏冬，結果

Day 12

今日又係移動日，飛去Buenos Aires，但班機係下晝，即係我有一日半係留喺伊瓜蘇呢個鎮，如果早一日飛應該有趣好多

無聊於是喺度亂影



當時正值總統選舉，呢張左派宣傳海報就話如果投右派，等於返到90年代 (結果佢險勝)


當時廉航只係哥倫比亞先有，選擇唔多，阿根廷航空平過LAN 少少，所以揀呢間






兩個鐘後就到Buenos Aires，去個櫃枱度同個索姐姐買張巴士票就搭去七月九日大道 (Avenida 9 de Julio)

好記得落車嗰下只係黃昏，即使孭住近20分斤家當，喺好有歐洲風情既七月九日大道漫步去hostel，有少少涼，馬路好繁忙，但就係有種獨遊種浪漫感覺

無幾耐就到 Hostel Estoril (呢間捱得過疫情，值得的)，同房都有幾個鬼佬同一日到，於是跟住幾日就一齊行動，包括呢晚去食飯
https://maps.app.goo.gl/AyncRm1C9PjuPYn96


其實好簡單，無咩調味既阿根廷牛扒加紅酒，唔使多，食開五成熟，大概港紙一舊水就有香港兩三舊水既質素

Day 13

我諗Buenos Aires 都係要再去既地方，主要原因係唔少地方無去，咁點解留5晚都會唔少地方無去？咁慢慢俾我解釋下

呢間hostel 懷念既地方主要係人吧，識到一堆人一齊玩，歐洲南美既乜都有，只係多數係男另外個事頭婆都好有印象，朝朝都係佢煮早餐，英文只識單字但佢寧願會同遊客講西班牙文

有兩個巴西仔Leonardo 同 Gustavo，有個比利時仔，另外有班人但無加到Facebook 所以醒唔起佢地咩人了

亦遇到個日本仔勇闖巴西開拉麵店，印象中喺Buenos Aires 遇到佢的，大家去聖保羅不妨試下佢手勢
https://www.instagram.com/brazilamen

朝早都係搶緊last minute南極船票，但就牽涉到要提早兩日飛去Ushuaia，即係Buenos Aires 留既日子少兩日，機票個邊好快覆話改唔到，但又度縮數，覺得唔值得使千幾二千港紙再買張機票，於是揀另一個團，咁就用左半日時間所以今日剩返行程就係去換阿根廷幣，後來得知一個好難得既活動於是即刻去搶飛

有關南極船票，可以去到Ushuaia 再整理下

換錢就決定搭車去唐人街，順便見識下呢度個唐人街咩規模，中途去間普通pizza 店當食晏，可以比較下幾年間物價相差幾大 (75 peso 當年大概係7美金)


唐人街一覽，其實都好直接，入去話想換錢就可以，佢會問換幾多，答有幾錢美金去換，佢會報匯率








回程返去周圍影，正值總統選舉，呢幾張海報係叫人投白票，但發起者係社會主義運動、左翼陣線


返到去，班鬼仔就話頭先買左第二日世界盃外圍賽阿根廷對巴西既票，叫我即刻去買，於是狗衝，成功入手，又係索姐姐賣飛俾我，但得作客位，即係坐巴西球迷嗰邊


睇返相，先記得我去過呢間Buenos Aires Grill (個名就係咁)， 又係食扒同飲紅酒，特別在沙律係自助，但我真係諗唔到點解無影到野食幅相了


然後食飯之前去呢間號稱全世界第二靚既書店El Ateneo 兜個圈，前身係劇院，亦有間cafe

LM 跟進 !

Day 14

南極last minute船票總算定到，今日一早用信用卡畀左首期，然後終於可以出去行下

見巴西哥哥Gustavo 仍然喺hostel，就約佢一齊出去食晏，同埋去附近既Casa Rosada，即係阿根廷既總統府

野食無咩特別，只係食塊普通牛扒，但咁啱對面有對巴西叔叔嬸嬸，於是Gustavo就用左半餐飯時間同佢地講當時巴西好大件事既司法醜聞，大概係女總統Rousseff 將唔同項目既政府資金調動，等佢可以尋求連任，加上前一兩年有單嚴重醜聞，就係政治人物幫工程公司投到國營巴西石油公司既合約後，收回佣，令前總統Lula 要坐監

記得喺有位巴打既遊記度見到呢句，大概就係對一個國家既認識，係旅行後先開始

然後去Casa Rosada 影幾張相



又去附近既Buenos Aires 大教堂，當中有紀念獨立戰爭既烈士像




地鐵


7月9日大道，陰天



返到hostel 見到另一個巴西哥哥Leonardo 好灰，佢喊住口話俾人搶野，事緣佢戴住隻老竇送既金錶，但無為意自己去旅行要除隻錶，結果頭先行行下俾個賊從後撳佢埋牆再箍頸，迫佢除錶，心痛既係因為隻錶係屋企人送

下晝既天氣可能就係伏線，終於等齊人可以出發睇波，一出門口已經好大雨，係大雨到類似香港紅雨嗰種，上左巴士無幾耐就收到通知，場波因為大雨，要順延一日

於是球場附近搵間餐廳食晚飯，然後返hostel 所以第二日去唔到烏拉圭，但我就係諗唔明點解始終無去最出名既Boca

Day 15

因為夜晚要睇波，所以太遠既地方去唔到，就朝早參加free walking tour，即係唔收錢有導遊帶你去主要景點，最後隨意定價

阿根廷風光一時，二戰前係富裕國家，自然好多華麗建築，只係貝隆總統行左翼政策，後來又獨裁政府，眾多原因搞到而家隔幾年就經濟危機





11月喺阿根廷係藍花楹(Jacaranda)盛開季節，只係今日天氣


做咗一下巴膠，連續兩日都係坐呢類巴士去球場


福克蘭戰爭紀念碑，現時總統Milei 立場有少少軟化，承認福克蘭群島現時由英國統治，但希望可以「和平移交」俾阿根廷，好似1997年香港回歸咁，老實佢既主張我認識唔深，無咩睇法，只係佢講到香港就
https://www.bbc.co.uk/news/articles/ce43zv3qln9o





重點行程就係去公眾墳場，睇貝隆夫人陵墓，佢係貧民區出身，後來老公做總統，到老公過身後就繼任，主張社會主義，所以好受基層擁戴，當然，呢幾十年來個國家不斷來回左右翼，佢點都有責任的



因為當時阿根廷相當有錢，自然有錢人家都係風光下葬




晏晝自己一個去食秘魯名菜醃魚生ceviche


街頭都有教人點跳Tango，其實呢幾日都見到，但無點影相了




返到去hostel 等齊人又出發去河床球場，其實自己好耐無留意足球，但既然戲碼咁吸引就去湊熱鬧，睇返資料係無美斯，但阿根廷有迪馬利亞、希古恩，巴西有尼馬、韋利安，都算唔錯





器材所限，只影到咁，真係第一次去有鐵絲網既球場睇波，原來真係要用，因為完場後球迷亂掟野，但已經算少，防暴隊都即刻出動制止，見到有球迷俾雜物掟中流晒血咁，然後有個人話國家隊比賽已經算溫和，球會賽事係更癲

河床球場設施好頹，得石屎凳、廁所係香港食環署街市公廁咁既樣，但氣氛好好，人浪隔幾分鐘玩一次，如果係球會級比較相信更熱鬧，睇完呢場比賽，我諗香港足球需要改善既唔只係設施既問題，而係人既問題吧

咁有冇去南美嘅書推介

如果講旅遊書，有日本《地球步方》既中文翻譯版，你會佩服日本人做事有幾認真
https://blog.mook.com.tw/book/info/265678 (阿根廷 智利 巴拉圭 烏拉圭)
https://blog.mook.com.tw/book/info/216561 (秘魯 玻利維亞 厄瓜多爾 哥倫比亞)

如果文學，可以睇呢本《逆光天堂》，近幾年香港人寫既
https://www.books.com.tw/products/0010737318

張翠容十幾年前個本《拉丁美洲真相之路》其實更深入講中南美，但佢個名而家已經臭晒，同有少少過時了

Day 16

天氣終於好返好多，但一心只係期待南極團，亦可能因為擔心安全，無去Boca，所以全日就喺市中心漫遊

希望我再有機會去南美，咁就會去Boca 朝聖

再去多次El Ateneo 書店


行返去墳場附近
Basílica Nuestra Señora del Pilar





Casa Rosada，阿根廷總統府


San Telmo 區


《春光乍洩》拍攝地Bar Sur，聽日好早機所以無去睇Tango….我做緊乜鳩


再望多次7月9日大道



最後同去烏拉圭既hostel 朋友會合返，再去食多餐牛扒，結束Buenos Aires 之旅，臨走因為聽朝好早機，自己坐的士返hostel，竟然跟咪錶，亦安全到步，幾意外

南極團

機械人巴lm

留個名先

留名

但係你唔係話信錯《地球步方》呢本旅遊書咩

sorry 之前講得唔好，我意思係本書好認真咁講點樣搭公共交通，但其實跟一日團玩唔貴得幾多，而且方便好多
另外部份其實唔太吸引既景點，都講到好值得去
於是部份地方，例如玻利維亞東部同秘魯北部就去得太多日子
如果講主要景點例如Lima Cusco Uyuni，其實介紹得好詳細

Day 17

今日只係坐飛機去Ushuaia，預備第二日下晝上船

Last minute 南極船票，大家可以留意以下兩間旅行社，大家會見到佢地個Facebook page 去到今年年頭就無更新，因為南極天氣每年只係10月到3月先係比較適合人類去，自然呢個時候先有last minute 團

Freestyle Adventure
https://www.facebook.com/FreestyleAdventureTravel

Antarctica Ushuaia Turismo
https://www.facebook.com/antarcticaushuaiaturismo

而經典團多數10日，只係去到南極洲，但唔會入南極圈 (南緯66.5度)，亦有去埋福克蘭群島同South Georgia 既全包團，起碼20日
價錢就視乎時間、住宿 (由四人房無窗去到二人豪華房有窗) 等等而定，但多數包三餐、大部份活動，酒水、上網就另計，最好揀100人左右既船，咁就次次都可以上岸 (國際組織規定每次只可以最多100人上岸，保護生態)，但缺點就係架船比較拋，過幾日擺段片上來俾大家睇下

當時有呢三個選擇

1. 180人船，10日團，大陸人包船，飲食方面唔使擔心但如果全船都係大陸遊客就 $4800 美金水雙床房，有窗，送件褸

2. 115人船，11日團，有獨木舟、行山、陸地過夜等活動，$6500美金，1雙床有窗房

3. 115人船，19日團，去晒福克蘭群島同South Georgia，$10000 美金，豪華房，都送件褸

最後我揀左2，我估係貴在雙床有窗房呢度，同聽講當時有船故障所以拉高左個價

講返行程，我好似天未光就坐白牌車去機場，搭朝早8點半機去Ushuaia，用架大機，可能因為旺季....？




3個幾鐘飛機，無預計臨降落時有咁靚風景睇



一出機場


去到hostel 時因為要就個南極團時間，想將後兩日個床位交左既錢，擺落南極團返來之後先用，但事頭婆唔肯，於是嘈起上來
但後來睇返訂房網站個條款發覺無得改，決定算數同道歉，然後南極團後返來，經過一D事後發覺事頭婆其實都幾好人

Torre al Sur
https://maps.app.goo.gl/EVKCaSTAt54pvvox5

去旅行社交埋條尾數就出去呢個號稱世界最南既城市兜個圈，但市中心得幾條大街






來到呢度食羊....我當時諗緊乜



本地啤酒，用Beagle 海峽做牌子名


聽日就上船了，阿根廷跟住會出入境幾次，分別係返Ushuaia、El Calafate 至 Bariloche、Mendoza 至Salta