南美、一個人、七個月

本地短途的話多數係去到睇資料同問人，因為大巴喺網上既資料唔太準
同樣hostel 好多都會俾人報當地團，一日至三日遊都有

Day 48

今日就係去湖區踩單車

湖區要搭巴士去，所以先去雜貨鋪買張類似八達通既搭巴士，呢度搭巴士係遞手，無咩問題，但落車真係好似香港搭小巴咁講「有落」，連站牌都無，真係幾南美，睇返Google Maps，有標記但睇返實際地圖，乜都無

巴士上面影既，大概意思係「神伴我同行，如果我無返來，即係我跟左佢走」


路線總長27公里，有部份地方會中途落車然後行上山睇，唔記得左點解逆時針而唔係跟地圖順時針行難度算中等啦，因為都要不斷上上落落，落斜固然輕鬆，但都幾多急彎


始終喺Patagonia 都一段日子，難免有少少審美疲勞，呢日大致天晴，整體景色肯定係精彩，但睇過咁多絕景，真係有少少攰，所以停低既地方唔太多，比較有印象既就係橋中間停低影少少相



然後就係全段最高點既觀景台




其他相



所以主要只係停兩個位，諗住今日總算平淡過去，意外就喺最後一段路發生，即係上面地圖既1號危險路段，過左觀景台後，係近兩公里落斜，已經不時煞掣，但到某個路口時有急彎而且係碎石路，一時慌張就成架車鏟上附近碎石路再反埋，不幸中之大幸係手掌落地先，然後先膝頭

應該就係呢個位


回過神，企返起身睇傷勢時，後面已經有三個以色列哥哥從後趕到，見我雙手流血，又無急救用品隨身，就超熱心咁用自己私伙野幫我消毒同包紮傷口，甚至用繃帶將兩隻手都包實晒，好似好嚴重咁當時都諗住畀返班餅佢地多謝返佢地，但佢地無要，話呢啲小事唔使多謝

然後就PTSD咁踩埋最後幾公里就還車，好彩架單車無大礙，只係意外時甩鏈，當場已修理好，無其他損壞

返到hostel 大家都有簡單慰問，尤其見到我對手之後


其實又唔係超痛，只係唔方便，所以決定呢度住多晚，聽日休息

因為對手傷左，今日成日喺城入面，其實都唔係點休息，只係無搭車去邊度

既然全日無特別節目，就洗衫同剪頭髮，160 peso (約95 港紙) 就可剪頭髮佢剪頭髮都算快，有少少似歐洲咁，齋剪，唔會洗頭，大概20分鐘就完成其間都會吹下水，例如咩風吹我來呢個中部小城市，都有傾少少時事，例如近期匯價，當時正值政府宣佈取消官方匯率，匯率會短期內貼近市場匯率 (即黑市價) ，亦都見佢同其他師奶客人喺度傾

是但搵間餐廳食個晏後，就去湖邊同教堂兜個圈，呢度教堂樸實無華，大概50年歷史，外圍用石砌成，裏面就係木造建築，但就係無一般天主教教堂咁華麗，反而陳設簡單，似基督教既小聖堂，咁樣更加感受到聖誕節應有氣氛


「慈愛和誠實彼此相遇，公義與和平彼此相親」


呢度市中心個商場都係好簡單


睇返相，夜晚我原來去食中餐 普普通通咁啦印象中

Day 50

尋日休息之後，對手無咁痛，就決定今日去行山，但要先去一個小鎮叫 La Angostura，離Bariloche 大約個半鐘車程

喺hostel 出發前唔記得點行去巴士站，只係憑記憶同手機影左既地圖，最後一個上車，一分鐘後就開車，好彩

到左之後去遊客中心拎地圖，就出發去附近山頭，行行下發現前面有圍欄，就無行過去而係附近蹺路，但越行越遠，行左近半個鐘都係行回頭路問人，唔好意思打攪人都無計

問左之後，其實可以繼續向前行，個欄原來只係欄著車，人同單車可以照常通過

條路其實唔算難行，至少簡單過Torres del Paine 好多，但沿途風景就唔算特別，或者我審美疲勞啦，呢個時候開始覺得智利其實幾俾人低估，國家本身有唔少精彩既人文同自然風景


喺瀑布遇到個阿根廷後生仔，來自Santa Fe，高中畢業後就闖蕩全國，玩左近九個月，開心自己西班牙文都同當地人簡單溝通到，都希望佢咁多年之後繼續享受旅程


用左差唔多4個鐘就走完全程，返去個鎮，買巴士飛返Bariloche，既然有時間剩就周圍睇睇，食個雪糕


返到巴士站時見有英國女人因為遲左托行李上巴士，唔知點解俾個職員針對同狂罵，好彩有個當地男仔出聲幫手諗返自己嗰幾個月都還好

開始想食亞洲菜，夜晚去個城少數既日本餐廳食壽司，都似模似樣，而且真係日本人主理的，懷疑呢間鋪執左

正呀留名

Day 51

本來只係搭一程車又返去智利，但係都無預到可以咁多奇遇

因為架車係下晝，所以朝早都係打算靜靜地食過早餐就返房執行李，但食左早餐之後突然有個亞裔法國人知道我係香港人，就問我一大堆政治問題，例如佔中，又引到其他人一齊傾同聽，就甩唔到身

一開始試下用西班牙文但嚴重1999，用返英文之後就好好多，我都係說好香港故事


hostel 做接待個姐姐就話其實阿根廷人都唔太關心，即使而家個經濟亂局，有個住喺Buenos Aires 既醫生就話唔太想理，反正政治就係有錢人既遊戲

講到過晒鐘，即刻check out，同坐的士去大巴站，竟然跟咪錶等車時又遇上典型南美情況，大巴遲左近半個鐘，期間同其他遊客吹水，更加遇上一個識廣東話既阿叔廣州人，住過香港，而家住三藩市居住

成程車都幾精彩，首先就係個巴士餐，但劣得幾緊要，有香港中小學學生餐既質素，最好既係杯汽水



而入境智利時相當嚴謹，但唔係對人，反而係對行李所有行李一概要搬海關度，俾隻搜索犬聞期間有大媽需送院，導致又延誤


結果原訂8點到，最後遲近2小時先到Puerto Montt，個天黑晒，好感激個廣東人話順道載我去民宿，如果唔係我要摸黑行近20分鐘上山

成功去到之後，個男主人只係單字、機械式帶我去房，同介紹廁所、wifi 之類就走，我當然有道歉，但佢亦無咩反應，怪怪的

好彩下晝頂硬上食左個巴士餐

Day 52

其實呢度只係住一晚，一早起身食早餐，發覺婆婆好親切，會盡量同其他客人傾幾句，雖然佢只係識簡單英文，但已經感受到呢份溫暖，臨走時想影屋裡面既聖誕樹，於是就問可唔可以影相，佢竟然主動話要開燈先好睇，跟住即刻去開燈，相反食早餐時個阿伯一樣勁嚴肅，完全唔明

然後就收拾行李，冒雨去Puerto Montt大巴站，去Chiloe 島的中心點Castro，呢度其實已經離開Patagonia，正式進入智利湖區，比較少外國遊客，本地遊客為主，相比Santiago呢度天氣會再舒服少少，跟自己行程次序：


1. Puerto Montt，全區最大城市，港口以外幾乎無特別
2. Castro，Chiloe 島最大城市，可以一日遊去睇濕地同滿佈全島既木造教堂，教堂群係世界文化遺產
3. Puerto Varas，湖區小鎮，有大量美景，睇湖、瀑布、德國小鎮甚至行火山都可以

喺車裡面半睡半醒咁過左三個半鐘，終於到了目的地Castro，期間風景不錯，似返有人住既地方，同Patagonia 的荒蕪完全相反，一路都係牧場、草原和一間間屋

一出巴士站，覺得自己終於去返比較有人氣既地方，而唔係只係咁啱經過Bariloche呢個城，大街有齊電器店、時裝店，而且就快聖誕節，好多人買禮物，就咁行左15分鐘就到hostel

hostel 老闆原來娶左個上海女人所以佢都去過亞洲，都好深入咁介紹有咩地方可以去，佢知我喺Patagonia都一段長時間，大自然景色肯定睇到厭，叫我不如第二日去看教堂，今日就鎮裡面行下睇下教堂

Palafito Waiwen (Palafito 意思係棚屋，類似我地大澳見到既，Waiwen 唔係個上海女人個名，而係原住民語言入面解南風)
https://maps.app.goo.gl/Gjj9xt98kGDsULgg9

望過去一排棚屋


去超級市場買野都有奇遇，一時不小心跌左500 peso入雪櫃底，其實係港紙$5左右，但都會嘗試挖返出來，有個大叔問我咩事之後，竟然主動搵散銀畀500 peso 我好感動，但當然無要啦

鎮上教堂




當年呢個地方仍然好傳統、生活化，完全唔似有世界文化遺產既小鎮，唔會成條街都係餐廳紀念品店，但有種建築無見好耐，就係商場今日晚飯都係呢度搞掂，我諗出左香港先會明白，餐廳同鋪頭唔使無時無刻都有客先可以維皮

又整兜chorrillana

Day 53

呢日就跟hostel老闆提議，淨係去幾個列入世界文化遺產既木教堂，行程


但一起身就發現已經10點飲杯咖啡，然後出發就去小巴站

點解叫小巴站，因為坐既真係類似香港既綠小，真係用豐田車，有固定路線、收費，但無站牌，真係要叫有落

第一站去近海邊既Dalcahue 午餐，因為落車時落緊雨，教堂又午休，所以去附近個熟食市場食個飯，多數都係老婆婆親自炮製，我就是但搵間入少少、平少少既，我呢個遊客自然係叫特式Curanto，類似石頭窩，其實即係將蠔、青口、蜆、豬肉、雞脾、腸等等放晒入石窩煮，只係港紙60，送埋海鮮湯，堅正



一個人都勉強食得晒，應該夜晚都唔使食期間預到一對聖地牙哥來既情侶，見到我亞洲來既稀客就傾左陣，女既問香港有咩地方推薦，我只係諗到西貢行山又無理由講大澳，因為呢度已經成個大澳咁，同如果而家，應該會要求自照一張

食飽後就真正開始參觀，當時只有一兩個當地人喺入面，擺設好簡單，亦無咩翻新，但就係好清靜、神聖，真係好鄉村既感覺，生活好簡單，諗起台灣既鄉下地方，人幾友善，生活質素都唔錯

搵唔返入面既相，明顯見到落住雨


之後去附近個工藝品市集，同樣擺攤位既人多過遊客好多，大城市來既我同樣唔係咁接受到，成日會諗佢地點做生意，點賺到錢

下一站就係坐小巴去Achao，群島入面最古老既教堂就係呢個鎮，呢個教堂規模大少少，但同Dalcahue的教堂都幾似，個宗教氣氛多過建築本身，所以中間本來有個地方可以順道去，但最後都無，直接返Castro


返去hostel之後，個上海老闆娘都喺度，於是再傾多陣，原來佢地本身喺Santiago，後來覺得生活太緊張先來呢度開hostel 定居，呢度生活節奏確實比較慢同簡單，但亦唔算好唔方便，而家人大左，開始明白住小鎮有咩好處，同大城市既生活水平唔會差太遠


呢晚遇到兩個澳洲人，推薦我去Puerto Varas既一間hostel，就係咁，聖誕節期間既5日就係住嗰度

點解香港啲旅行團南美洲團費可以咁誇張…..

睇咗咁多篇連登南美洲遊記 比我感覺價格都好似頗低 去兩個半星期應該3皮搞得掂？ 但旅行團團費講緊最cheap嘅18日都12萬起跳……

相反歐洲d團費最多都係自由行 20% 多啲 收2皮嗰啲自己去可能都要1皮半 星馬泰越有啲團分分鐘仲平過自己去

旅行團首先貴在交通，佢地行程係不斷坐飛機，住又唔會頹得去邊，自然唔平
疫情前20日3萬如果唔連機票應該唔難，連機票就除非你去玻利維亞、秘魯呢類物價低既地方
就快有巴打遠赴南美，可以參考下牙痛巴個遊記

型

LM學嘢