南美、一個人、七個月

影得好清
剩係睡袋都夠暖？

印象中著住羽絨、雪褲、戴埋帽咁，係夠暖的
南極半島夏天又未算好凍，0度左右

呢日朝早架船駛去附近既Neko Harbour，都係瘋狂影企鵝同冰山





無端端有隻企鵝對人類好好奇，大家見到全部隔開，保持距離



企鵝公路，之後去智利再見到，人係要俾企鵝行先的












因為下晝自己無份玩活動，於是就同其他乘客一齊吹水，就趁而家講下其他同船既人

同船亞洲人唔多，有一家大細既新加坡人，小朋友10歲左右，另外有幾個三四十歲既大陸人，於是多數時候同呢幾個大陸人一齊坐，但唔知點解呢班人特別鍾意講政治



然後有時激動到附近d西人來問我地有無事如果呢篇遊記係幾年前寫，相信印象深刻好多，但而家都唔知點搵得返咁多年前既whatsapp 紀錄，起碼當時有同朋友講過發生咩事

最後都有交換微信，但呢個app 無用好多年，亦無意欲開


另外一單柒事就係買上網數據，成程船上網都係收費，20MB 要 €15，好記得買20MB 時個職員問「你肯定？」似乎無人買咁少，不過呢個都無咩問題，但買完開wifi 時先發覺唔記得熄自動更新於是覆幾個whatsapp 就用晒數據

我諗寫呢個遊記唔係為左曬自己去過好多地方，柒事邊個都有，當係苦中作樂又好，大家引以為鑑又好，希望大家繼續勇敢探索世界，無想像中咁難，亦唔應該慣左享受就失去對世界既好奇心

Day 24

今日終於好天，揀左個海灣另一邊行冰山 (Jabet Peak，540米)


首先要每人帶返套裝備，有冰爪同冰鎚，同隊員之間會綁繩，保障安全





好似無點講到當地天氣，其實又唔算話好凍，大概0度左右，當時靠件羽褸、長袖衫、Uniqlo Heatech 運動底衫咁就夠，但如果今日行山就拎返件快乾運動衫出來，行行下其實得件運動衫都夠


體能真係唔及班西人，成日會慢左，同俾冰爪刮花左條防水厚行山褲

上到山一刻，感覺仙境一樣，只係唔夠5分鐘就要著返件羽絨





回程




下晝係最後一次登陸，會去阿根廷Almirante Brown 基地，首先行去個山仔，呢次咩裝備都唔需要，然後再瘋狂影企鵝







西人BBQ自助餐，即係有人不斷烤肉然後俾人任拎咁，食埋呢餐就啟程返南美


深夜南極

覺得比佢呃左一晚床錢

Day 25 - 26

坐兩日船返阿根廷，中途風浪都係異常咁大，活動都幾乎無，都係食同訓度過，原來係可以順路去南極郵局 (其實係個英國基地Port Lockroy)，但因為要追返時間所以無去

但架船俾我地擺低明信片同錢，下個月佢地再去南極時會幫手寄，結果隔左近3個月，臨過年屋企人同朋友終於收到




全程最南一點


船上最後晚餐




呢個牌係用來記低自己喺船上定出左船去玩，每次上落船都要自己轉個牌做記認，方便船上職員統計

Day 27

朝早到Ushuaia，同其他團友分別，亦好似加左幾個大陸團友微訊，但老實個app 好多年無用了，亦無咩需要開



返到原來間hostel，迎接我既係佢，然後先係老闆娘Marisa 同佢個仔


其實全日都係不斷睇message，餓左好多日無網上，玩到下晝先出去食飯，去一間自助餐餐廳，又遇到班大陸人，最搞笑既係佢地叫左隻長腳蟹，但唔係一般既清蒸，而係好似我地食龍蝦咁用芝士焗
佢地叫埋我，咁我都唔客氣


下晝就去行間原住民博物館，佢地最後一個族人已經過身，而家只係得混血既盡力保存自己族人文化






呢度都有解釋火地島(Tierra del Fuego)個名既由來，事緣原住民平時係唔著衫，靠動物油搽滿全身，同生火取暖，歐洲人來到見到成個島都係火，於是取名火地島

亦有南美其他原住民既介紹



返到hostel 時見到老闆娘，就問佢借針線，想補返條雪褲，但喺香港幾乎無自己做過，自然雞手鴨腳，佢見到就主動話幫手，我幫佢穿好線之後就佢就幫連返個口，自從呢件事之後大家就熟左，明知我西班牙文1999都會吹幾句水

Day 28

既然來到世界最南城市，今日就去世界最南公路盡頭，景點包括火地島國家公園同3號公路盡頭

印象中就係經hostel 去訂架小巴車票，去程同回程時間就間間都一樣，憑票上車




感覺清靜、舒服，唔會好大風，未去到荒涼嗰種，而全段上落幅度唔大，但去到中段有個位係要手腳並用爬上去.....但無難度的，途中遇到船上既英國離婚姨姨，於是傾左陣









打卡位，3號公路盡頭，睇返相既資料，大概用左5個鐘，中間行下停下，時間又過得好快，我諗真係做到放空既感覺，享受大自然
就算有買數據卡，我諗呢啲地方都係收唔到網絡


既然尋日誤打誤撞食左呢度最出名既長腳蟹，今日就食其他，見呢度近海就試下食魚

Day 29

呢日報左個半日團，去睇一睇世界盡頭的燈塔，其實正式既名係Les Éclaireurs，即係《春光乍洩》入面最後張震企喺頂既燈塔

下晝出發



越來越近



當然個燈塔係無得行上去，但其實個島上面有好多動物，雀、海豹乜都有，亦有大概一個鐘時間可以喺個島上行，即使個島好細，都感受人類既渺小感覺，個島根本係屬於其他動物，而唔係人類





呢條係魚....？總之食埋呢餐，第二日就去智利，之後再返阿根廷就係行完Torres del Paine

Day 30

呢日開始得手機相，直至幾個月後既哥倫比亞

今日主要行程就係搭近12個鐘車去Punta Arenas，由朝早8點坐到夜晚8點，所以得幾張搭車期間影到既無聊相，其他唯有純文字

一早就起身，走時hostel 老闆娘Marisa 同仔女都未返到hostel，唯有不辭而別了

到巴士站竟然遇上南極船上遇到既英國嬸嬸Clara，佢話會直接坐到Puerto Natales，因為時間有限，寧願一日之內去到個邊，然後準備到Paine行山，咁佢起碼要坐到10點

幅圖見到揸車都要8個鐘，大巴肯定更加耐

其實架巴士無餐枱無Wifi，條路路況又幾差，訓唔著就唯有同佢吹水，佢話雖然只係去三個幾月旅行，但去過四個洲 (非洲 Namibia、澳洲、南美洲 Chile 和南極洲)，佢果然好好傾 (而家先明白英國人一般都係咁)，講好多旅程既經歷同感受，甚至透露自己係分居之後，前夫買左佢半間屋，所以有一筆錢旅行，之後準備創業

同時亦發覺自己英文實在一般，講「公事」例如去幾耐旅行、上一站係邊度同準備去邊就還好，但所謂small talk真係唔在行，有時唔係好識將意思簡單表達

中間要去個休息站停20分鐘左右俾人去廁所同買野食，荒涼程度都好少見了



是但買個漢堡包都有營養標籤，當日晏晝就係靠呢個包



過關時關員同我講 Welcome to Chile，又喺咁南既地方都見到guanaco (某種羊駝)，起碼令搭車無咁悶

坐左大半程終於可以落車行下，車同人分開上船，橫渡麥哲倫海峽


最後近7點半先到Punta Arenas，然後用近45分鐘先行到去hostel，安頓好就到附近超級市場撳錢，但去到先知部機壞，而且超級市場已經閂門....但當時已近十點，唯有挨餓返hostel，靠能量棒同朱古力充飢，就訓

呢幾晚就住Hostel Entre Vientos，食早餐時由hostel 望出去個海景係好靚但每次由市中心行20分鐘返去都幾攰，而且沿途會有狗吠
https://maps.app.goo.gl/MPe7y8g1L2a8AJqs7

lm

未爛尾，準備繼續寫

露營咁顛？ 唔會有大風雪咩

呢個風景幾夢幻

唔會，當時係南極夏天，同我諗做晒天氣預報掛

Day 31

呢日係休息日，亦所以有閒情逸致用手機周圍影相，所以逃過一劫




晏晝再去多次超級市場熟食檔食晏，原來要拎籌咁叫野食，4000 peso (即係$40港紙左右)可食飽，有燒雞lasagna加可樂，算幾平


流動手信鋪


然後成個下晝都係睇Torres del Paine 行山資料，Puerto Natales住宿等等，亦訂左聽日去睇麥哲倫企鵝船票，夜晚就去朝早見到既中式自助餐，原來呢度係叫Tenedor libre，西班牙文即係自由叉咁解

Day 32

其實呢度景點主要係兩個島，一個去Parque Pingüino Rey 睇國王企鵝 ，但由Punta Arenas 就要一早起身坐幾個鐘車加船去睇一兩個鐘，再坐幾個鐘車加船

睇麥哲倫企鵝個島 Isla Magdalena 就好少少，下晝出發，單程要坐2個鐘，島上面就有1個鐘遊覽，然後又坐返2個鐘船返去，所以最後決定就係去呢個算

hostel食左早餐就再去市中心周圍行下，去Tripadvisor 排名第一的小食店食晏，感覺就係賣點係好平，食pan de chorizo，即係腸肉碎加芝士再用麥當勞豬柳蛋漢堡既麵包皮做包，其實無咩特別，反而個香蕉milkshake非常足料，蕉係半生熟，再加大量牛奶用攪拌機整，唔使2000 peso (即係港紙$20)就可以解決晏晝


之後就坐colectivo (即係泥鯭的)去碼頭，比想像中易，亦早到，到後先發覺原來碼頭都可以買船票，完全中伏

去程喺船上面半睡半醒咁過左個半鐘，突然船上有廣播，話左邊有海豚，船上大部分人隨即湧過去，因為要等英文廣播，遲左一步，但都勉強睇到幾隻，但到影相時就俾人擋著，嗰下都幾唔忿氣

落船後隨即有一大堆企鵝歡迎我地呢個島確實係被企鵝及海鷗佔領，但船上近二百乘客一次過來到，其實都幾滋擾，呢度遊客亦唔及喺南極既咁有規矩，唔會讓路俾企鵝，更加明白點解南極有咁嚴格限制





老實講，去過南極之後，新鮮感少左一截，但仍舊有唔少得意地方，例如呢日見既係唔同品種，因為要避Patagonia 地區既三號風球級數強風，所以企鵝係靠挖窿保護蛋同幼兒，自然吸引大量遊客來。



其實島上逗留時間得一個鐘，時間緊迫，碼頭附近逗留一陣後即刻趕去條路既盡頭燈塔，再行返去碼頭，中間亦試過用長鏡嘗試影海鷗，但難了




有段片，但只聽到風聲
https://streamable.com/l7xz8u

差唔多到集合時間，職員就好似趕收工咁不斷提醒遊客上船，大家都有少少不捨同不爽吧

然後又喺船上面呆坐兩小時返Punta Arenas，之後又等Colectivo 回市中心，喺間普通餐廳食個Cazuela (南美既燉湯，有舊肉再加薯仔紅蘿蔔粟米等等)加白飯，不過不失啦

Day 33

今日目標就係去Puerto Natales，準備行Paine 既W路線，食早餐時聽到有個日本人又打算今天Puerto Natales，佢問一齊坐的士好唔好，當然即刻答應到大巴站就即上車，喺車上訓三個鐘到下一站

去到hostel 擺低行李就趕去食飯，因為要趕去下晝3點另一間hostel (Erratic Rock)搞既Torres del Paine W路線briefing，職員推薦的餐廳其實有少少遠，但質素果然唔錯，叫左牛扒加蛋加洋蔥加薯條，叫 Lomo a la Pobre，好飽肚，於是搞到3點個briefing遲左近15分鐘


錯過左少少，但個美國佬講解得非常詳細，中間亦有笑位，整體其實好精彩，都有提出新觀點，就是W 路線可由西至東走，因為以Paine做目標，最後一日睇日出結尾，比較容易鼓勵人堅持走落去，聽完就覺得幾有道理，於是就行呢條路，但後來明白佢推介既5日4夜，其實可以濃縮做4日3夜


可惜疫情後間hostel 無再做，而家專做行山團同出租器材

之後就想開始租器材，但發覺自己太緊張，其實唔少人喺呢個鎮只住一日，靠一個下晝租同買晒所有野，第二日一早出發

於是剩返時間就去超級市場買未來幾日物資，都係亞洲人食法，杯麵同公仔麵為主，再加生菜、香蕉等等

因為晏晝食得太飽，夜晚食個杯麵都夠頂

見到樓主有去聖誕島
聽講當地主要語言之一係廣東話
感覺都幾神奇

Lm

威啦 威啦 知你去南美好型

聖誕島確實係咁，但我去個度係復活節島

Day 34

呢日多左出來，基本上都係休息下，成個上晏都係打日記、查銀行之類(但無backup 相)，晏晝心血來潮，因為之後幾日也無啖好食，就想食好少少，於是去附近一間私房菜之類地方食，最後埋單都要一萬peso(大概港紙一舊水)食煎魚，但非常飽，魚亦新鮮



然後就開始租器材，唔知發咩神經，喺呢個地方咁緊張關頭竟然格價，最後喺兩個地方租，然後擺低護照同唔知點解帶埋既回鄉證

放養/流浪貓



之後就用近兩小時執拾行李，都成功租hostel既locker，擺低其他無需要帶上山既物品，例如普通出街衫褲、波鞋

晚上想去呢度間日本餐廳試伏，但無開門，於是頹食burger算，然後可能心情緊張，平時都好少失眠，呢一晚用左近20分鐘先訓得著