南美、一個人、七個月

我都係第一次有帶電腦去旅行嘅諗法
都係for back up，始終覺得啲相最重要

多謝解答，都係主要back up 用
但兩部相機+幾支鏡就一定會帶
始終都鍾意旅行時影相，喺城市行下都慣咗揹住部相機，係怕大大個攝影背囊喺南美黎講太招搖

有電腦方便好多,訂野睇片夜晚解悶咩都好

都慣咗用電話做呢啲
真係純粹想用黎back up +清下sd 卡
Btw巴打你黎緊係咪都係玩完歐洲去南美

係,不過估去到南美個人精神狀態應該散晒
仲有一個月出發

成個trip 諗住玩幾耐
有冇興趣交換tg 傾下？

大約6個月,我覺得夠皮,始終點都玩唔晒,所以簡左自己D想去先

TG好少用,到時開遊記一齊入黎傾仲好

都係，祝你一切順利

巴打大概行程係點？睇下幫唔幫到你

我最快一日都只係寫到兩日既事，所以唔使跟次序問喇

Day 4

如果我可以重遊南美，里約熱內盧肯定係其中一站，因為呢幾日都係陰天，而hostel 都係一個因素，接待既講野語氣勁誇張，好似好友善但成日好似想搵著數咁，設施又頹，同聖保羅同之後伊瓜蘇相比，亦無大堂俾人hea

呢一日都係睇晒幾個主要景點，第一站當然係最出名既耶穌像，但今日勁多雲，而且天氣預測來緊幾日都係咁，所以都係無得點揀，照去



搭到上去都係無咩分別，都幾無癮 但其他人都若無其事照影，期間有個疑似大陸婆遞晒手好誇張既姿勢影相，旁人都忍唔住偷笑，果然只要佢唔尷尬，尷尬既就係人地



望過去對面麵包山，只睇到山頂


好天就係咁


然後就落山去呢度個主教堂，同其他地方既古建築唔同，呢度既係新式，1979年先起好，建築似馬雅金字塔

記得出面影相時遇到個導遊帶住兩個遊客，話自己係所謂教徒但只係因為自己係巴西人



呢個就係市中心既舊教堂


今日唔知係咪公務員罷工，周圍都無咩人，條街都好靜

lm

樓主寫完南美會唔會寫埋中美

如果南美篇無爛尾既，都好
其實一開始應該寫中美先，因為計埋都係個幾月時間，而古巴嗰十幾日，幾年前寫左

入早咗阿屌
btw啲野食如何

係咪都係旅客區質素

支持，plan 緊巴、阿、智獨遊

如果去南美，想試啲steakhouse係咪要book定？
唱錢最好機場唱？
驚被人老笠/爆格但想拖喼，羨慕你大背囊

南美就大路掂下d景點 only

我會分三級
上：阿根廷 (牛扒、紅酒、烤肉asado)、秘魯 (醃魚生ceviche、當地中餐chifa)、巴西 (巴西燒烤churrasco、巴西式壽司)，普通餐廳都平靚正
中：哥倫比亞 (黑豆飯、煎香蕉、粟米卷arepa)、委內瑞拉 (同哥倫比亞)、厄瓜多爾、智利，尤其智利好多連鎖餐廳揀，有一定保證
下：玻利維亞 (好多燒雞)

Buenos Aires 當時食既幾間都係遊客餐廳，印象中無點訂枱，但最出名既估計要
換錢的話，巴西智利就用提款機 (巴西Itau 銀行可以用銀聯卡，但唔係間間得)
阿根廷到時酒店/hostel會同你換
過左咁多年，應該多左地方收信用卡，財物就邊度都要小心了

Day 5

呢日都係天氣好差，但都無計，去睇足球聖地Maracana球場同麵包山

首先搭地鐵去Maracana球場，呢個足球聖地坐到近8萬人，全球數一數二大既球場，而比利喺呢度第一次為巴西國家隊出場，亦係呢度踢退出國家隊前最後一場




歷代球王，比利、羅馬里奧、薜高





原來當年輸俾德國7-1個場喺第二度，如果唔係呢個場隨時要拆

之後繼續喺呢個天氣坐纜車去麵包山 (Pão de Açúcar)





舊款纜車


有一兩下少左雲，但始終無太陽就無咩好睇了


趁未天黑，坐巴士去Ipanema 附近兜個圈，想落車肯時就同個巴士司機拉鋸，我撳左鐘但無起身，於是佢以為我未落車就飛站，直到我再撳鐘而且企起身，於是就停站開門

同樣連自己食過咩都搵唔返了....印象中好似食斷斤秤既餐廳，又有巴西式壽司

呢個街景諗起澳門

留名

Day 6

見hostel 有單張話貧民窟一日遊，就去報名，今朝去參加，點知架車來到，原來得我一個參加車上面有兩個女人，一個係導遊，一個係一間本地團公司既老闆娘，巴西女人，話想搵下合作機會，所以來踩線

雖然之前都去過歐洲旅行，遇過唔同旅伴，但始終唔習慣對陌生人講咁多，本地團公司個老闆娘連自己生唔到仔都講埋，我當堂畀唔到反應，隔左幾秒先識講sorry

呢個貧民窟Vidigal其實都係有少少獵奇成份，因為有當地人支援，設施其實比想像中好，中間亦有個當地伯伯一齊，聽佢講社區發展


塗鴉


衫入面既字都係正面詞語，好似愛、尊重、勇氣、夢想


呢個景好似靚過前一日喺麵包山


社區農莊



當地生果Acai 整既刨冰，類似芋頭味


行左半日就返hostel，之後都係周圍行下，買左對Havaianas，返到hostel 擺低財物，就T-shirt 短褲去Copacabana 海灘兜個圈，但天色一樣係咁，都幾掃興

因為最後一晚係里約熱內盧，所以去附近一間餐廳食餐好，食既係「奴隸飯」feijoada，即係飯加豬肉、腸、黑豆咁煮埋一碟，顧名思義即係以前低下階層食既飯，但而家地位係巴西國菜，呢餐睇返都舊幾水港紙唔係話唔好食，但後來去其他城市時發現原來有平價版食而且個味都差唔多


附送大量海草同木薯粉


如果我有機會再來巴西，首先希望係好天去睇耶穌像、麵包山等等之餘，想去聽一次bossa nova現場演出，狂歡節就隨緣了

Day 7

今日又係移動日，去巴西部份既伊瓜蘇瀑布，想請hostel 幫手叫的士去機場，佢就報個價錢，同自己上網搵既貴起碼一半，而當時係無Uber的

於是唔理佢，自己是但出街截，又咁好彩截到架會跳錶的，成程的士佬都無咩出聲，好靜咁揸，應該無收多錢，總算安全去到機場

就係搭呢架，但唔係直航，要經聖保羅再轉機去Foz do Iguacu


大概飛一個鐘到聖保羅，等左半個鐘，再上另一架機去Foz do Iguacu，機上面係無野食無娛樂，好平靜咁過左全程機




一落機就拎返個行李，去坐巴士去hostel，因為無買電話卡，於是全部靠印出來既email 同網頁裏面既指示去，無想像中咁難，最難既就係孭住十幾公斤背囊周圍去.....

而家改左名，同變左做正式酒店，當時設施新淨，冷氣強勁，個格局似酒店房當hostel 咁住，而且係無碌架床呢樣爽，另一樣好深印象就係個自助早餐，麵包蛋糕生果咖啡奶一字排開，有日本商務酒店既款式同質素

CLH Suítes Foz do Iguaçu
https://www.booking.com/hotel/br/clh-suites-foz-do-iguacu.en-gb.html

當時同房無人，於是好毒咁去附近間酒店地下間巴西燒烤，其實就係侍應會拎住盤肉，周圍問人要唔要，部份餐廳好的話會整埋個牌，一邊寫要食一邊寫唔食，咁侍應見到個牌就會知你飽未


其實又唔係差，但返到去同個hostel 職員傾，佢話呢度幾間巴西燒烤，最差係呢間

睇返hostel 位置大概係呢間
https://maps.app.goo.gl/WTsLBqdXhFRcTQCM9

留名支持

以前成日覺得里約出名咁多，應該發達好多，之後睇機票，全部都係飛聖保羅 ／轉機