事源上個月中發現貓貓舒吸好似唔尋常，比起平時更用力更急促，但係食野，大小便都一切正常。
觀察左一排 情況都一樣係咁，前兩日約左獸醫檢查下，原本以為只係一次普通既檢查，好快就可以番屋企。
獸醫照到貓貓既肚仔同埋肺附近都有積水，覺得係FIP，就話需要即時抽血 照x 光 同埋抽積水，但係因為貓貓情緒比較激動需要做鎮靜etc.
就係出面等待既20分鐘，突然好緊急咁叫晒我地入去，話貓貓情況好差，就黎死，需要即時急救。當刻我個腦係一片空白，完全反應唔黎，今朝早明明仲行得走得，趴喺我心口訓覺，點解依家突然會咁？？ 我係咪做錯左d 乜野？
又經過左大概20分鐘，宣佈貓貓已經離開左。
最後醫生報告番，FIP 檢測係陰性，但係心臟酵素超出正常15倍，應該係先天性心臟病，佢自己都好sorry ，話如果知道係心臟病就會只係開d 去積水既藥 比佢，唔會令佢今日受咁大刺激，但係去到邊間診所都一樣，都係會做呢d 檢查。
唔敢講呢個係咪專業失當定係誤診，亦都無心力再去追究。可能都係個天註定，又或者貓貓專登知今日係4月1日，同我地開既一場大玩笑（係啦比你成功左啦！），明知我地最錫係你，點解要咁趕住走？
貓貓今年7歲，由2-3個月係街邊執到開始養。 係我遇過最善良最溫柔既貓貓，每晚都一定係趴係心口陪住訓覺。多謝你係我地既生命入面出現，希望你係另一邊每日開開心心，做個小天使，有緣再會，我地一定會認得你！
祝天下所有小動物/浪浪：身體健康，生活美滿。
