樓主嘅打鬥描述,簡直係揮灑自如,字字鏗鏘
BTW,咁嘅話哭的詛咒應該係佢老母
「嗯。」米莉亞主教點頭:「支配權能,可以無條件,從肉體、靈魂、精神各方面完全支配對方,下至普通人,上至神話生物都一樣做得到,因為權能本身就係屬於神明嘅力量,自然對所有處於神明層次以下嘅存在有壓倒性嘅優勢。更可怕嘅係,被支配嘅時候,你根本唔會意識到自己嘅一舉一動都已經被操縱......」
「因為認知受到影響,就好似,被植入嘅『指令』就成為咗你常識嘅一部分咁。相較於操縱記憶,影響認知更加可怕,因為記憶受到篡改,你仲可以通過外來事物,例如日記,搵到唔協調嘅地方。但如果係認知受到影響就唔可能。」時針回答:「例如,如果你被支配者植入嘅指令係,要將我殺死,你就會產生要將我殺死嘅『常識』,認為殺死我係生存嘅意義,或者基於本身嘅教育、道德觀、世界觀、記憶,塑造一個逼使自己殺死我嘅理由,甚至誕生出一個全新嘅人格,不停說服自己,要殺死我。過程無跡可尋,自己更唔可能發現到......自己已經唔係自己......」