《連登講故台絕命詛咒》(3)

但仔細一諗，就知道根本唔可以退縮。

身體暴露喺外面嘅毒氣，我必死無疑，依家我係身穿保護衣同戴上防毒面具先生存到......而最大問題係氧氣，我嘅氧氣來源自氧氣樽，而氧氣樽嘅氧氣存量有限......

我要喺氧氣樽嘅氧氣耗盡之前，逃出毒氣籠罩嘅範圍！

而阻礙我逃走嘅最大障礙就係放出毒氣嘅教廷同組織，所有機關嘅出入口位置應該早就有佢哋嘅人......

我盡量將身體貼近暗門後，聆聽門後嘅人對話。

「......第12小隊報告，未發現任何異常......」

入面嘅人似乎同緊上司報告緊情況......而且呢種感覺，冰冷嘅說話語氣，令我諗返起第一次遇上教廷嘅嗰班士兵......

由神父帶隊，訓練有素，手持各式槍械嘅士兵，受過嚴格訓練，完美執行命令，呢個係我對教廷士兵嘅印象。

當時唔係奈亞大人同機關嘅人解決咗教廷嘅人，我早就俾佢哋帶走，後果不堪設想......

「機關4號人物......張道士，未能確認位置......保持戒備......」

裡面嘅人仲未知道張道士已經身死嘅事實，佢哋應該唔係組織嘅人，應該係教廷嘅嗰班黑衣士兵......

但咁都即係話，教廷同組織嘅合作都唔係咁緊密，組織並冇分享張道士已死嘅情報俾教廷知道。

「『天使之塵』釋放......強烈超凡毒氣......通風口排放......已經從總部運送補給，防護衣物......注意腐蝕......」

天使之塵，應該指緊嘅係瀰漫喺空氣嘅橙紅色毒氣......同埋佢哋講到注意腐蝕，要補給防護衣物，防護衣都會受到毒氣侵蝕？

我諗返起當時被毒氣覆蓋嘅張道士屍骸，唔使一分鐘，屍骸已經溶解成毒水，而且毒氣既然被教廷士兵稱為超凡毒氣，毒氣嘅威力唔可以用常規方式判斷......就算係保護衣都未必完全抵擋到毒氣......

一諗到呢度，我心底就泛起一股涼意，身上保護衣帶嚟嘅安全感亦消失......全身上下開始覺得痕癢......

不過痕癢嘅感覺轉瞬即逝......只係自己嚇自己啫......

「調查到詛咒痕跡......密室......抽調人手支援......」我繼續偷聽裡面嘅教廷士兵對話，然後係一陣腳步聲，可以判斷係有幾個士兵離開咗。

喺我印象中，眼前嘅呢間辦公室並唔大，本身就容納唔到太多士兵，而依家佢哋仲要有人離開，去增援另一個地方。

「15分鐘後再次報告。」

係偷襲嘅最佳時機！

我把心一橫，拉開暗格大門，然後直闖入辦公室內！

政哥開無雙

幫推下先係咪尾聲喇？

今日冇文

15 篇

映入眼簾嘅係兩個士兵裝束，臉上帶著防毒面具嘅黑衣教廷士兵！

佢哋一人手上拎住對講機，另一人手持散彈槍戒備......果然係曾經見過教廷士兵！

見到突然闖入辦公室嘅我，佢哋頓時大吃一驚，但飽受訓練嘅佢哋顯示出極強嘅戰鬥素養。手持散彈槍嘅士兵用槍瞄準著我，手指扣向扳機，掩護同伴，而另一人則身影暴退，一手從腰間嘅戰術腰帶抽出匕首，並準備聯絡上級。

若果係幾日前嘅我，面對眼前呢兩個訓練有素嘅士兵，我絕對唔會係對手，但依家我早就今非昔比......

佢哋嘅動作同反應的確快捷，但喺我眼中依然太慢。

向前踏步，手掌握向持槍士兵嘅手腕，喺佢扣下扳機之前將槍械奪下，再一腳踢飛另一個士兵。

手持對講機嘅士兵重重撞向身後嘅牆壁，吃痛之下，手上嘅對講機亦跌落地上。

然後喺佢可以執返起對講機之前，先一步將兩人臉上嘅防毒面具摘下！

「嗚嗚......」防毒面具被摘下，兩人當場吸入毒氣身死，暴露嘅皮膚被毒氣短時間融解成毒水。

比想像中容易得多......

我攻擊速度、神經反射速度喺之前嘅經歷入面大大提升，面對強大嘅月獸同詛咒都有一戰之力，對付兩個士兵不再話下。

而摘下士兵槍械嘅手法，嗰種手感......係屬於4號嘅手感同技巧嚟......

但咁樣唔代表啱啱嘅交鋒輕鬆，相反，交鋒凶險無比。

喺充斥著毒氣嘅環境，我只要一有些少失誤，身上嘅防護服被匕首劃破，或被子彈射中，毒氣就可以從缺口進入防護服，輕易將我殺死。只要我動作慢上一拍讓士兵順利開槍，或攻擊出現破綻，我已經當場身死。

「沙沙......沙沙......」地上嘅對講機發出聲響。

呢度就係當初奈亞大人帶我到地下監牢嘅秘密通道......而咁神秘嘅秘密通道，果然仲未被組織同教廷嘅人發現！

行到去地下監牢，裡面果然一個人都冇......暫時安全......

我走到監牢附近嘅水槽，用水沖乾淨身上嘅防護衣物，然後換上路上執到嘅黑衣士兵衣物。

地下監牢冇毒氣存在，我只需要唔好掂到衣物表面沾染著毒物嘅地方......

「完美。」我執返嚟嘅士兵服裝同我身型接近，我好輕鬆就換上。

穿著教廷士兵服裝，只要唔開聲講嘢，我被敵方發現嘅機率大降，畢竟喺充斥著毒氣嘅環境，所有人都只能夠以肉眼判斷對方嘅衣物嚟分辨敵我。

而且我嚟到地下監牢，自然唔係只係為咗換衫咁簡單......

聽著附近嘅地下水聲，我懷疑，呢度附近可能有通往外界嘅出口！

接近㗎啦
但都仲有一段距離

15篇聽落好多
其實只係5更啫

咁幾時

諗定下個故未呀？
同埋會唔會諗出書？

有時間先
樓豬呢排比預期忙好多

下個故已經構思緊
不過未開始落筆
要完咗呢個故先

同埋唔會出書

點解唔出書我一定會買

出書呢啲應該好多嘢搞
樓豬怕麻煩

同埋樓豬寫故係興趣
就好似打機一樣
一同錢掛勾就唔好啦 好大壓力吖

支持你
希望你可以保留到呢個初心

可唔可以透露吓咩題材？

同埋同上個故/呢個故有無關係？

地下監牢四周圍都聽到有流水聲，經過暗道落嚟嘅時候都留意到天花板滴水......

我懷疑地下監牢附近應該有水源，可以通向外界嘅水源，係機關可以通向外面世界嘅出口。

雖然我嘅推測未必準確，但至少依家有個方向......

順便拎衫袋嘅手機出嚟，依家已經去到下午五點，時間比我預期過得快，距離再次進入詛咒世界嘅時間只有大概七小時。

不過，經歷一整天嘅戰鬥、潛行，我反而唔覺得太疲累，依家都未有任何飢餓感，狀態可以話係好得不得了。

但我用咗大概十五分鐘，徹底搜尋過地下監牢，都搵唔到任何通往外面嘅道路，不禁有一絲失望。都係，話晒呢度都係監牢嚟，設計上監牢附近唔應該有通往外界嘅秘密出口......

就喺呢個時候，我身上嘅對講機突然響起。

我猶疑咗一刻，然後決定接聽，對面嘅說話或者可以帶俾我些少重要嘅情報。例如，增援嘅兵力，士兵嘅去向。

「沙沙沙......收唔收到！」對講機另一端傳來聲音。

對面嘅背景聲音十分嘈雜，說話聲夾雜著大量槍聲，奔跑聲，仲有一陣極其詭異嘅笑聲......

我望一望身上衣物嘅編號：「第7隊回覆。」

但對面一直都冇回覆我，對講機淨係傳嚟奔跑聲音......睇嚟對面嘅情況唔太理想。

直到過咗幾分鐘後，對方先停落嚟，略微喘息一下，先回覆我。

「救我......唔好......」

教廷......究竟遭遇到乜嘢？

明明機關已經全滅，佢哋係同乜嘢戰鬥緊？失控嘅收容物？

「你依家喺邊度？」我嚴肅問道，對方嘅答案好重要，因為佢身處嘅地方一定好危險，要繞開。

「東側！唔好過嚟！！係詛咒，唔需要增援......嘻嘻嘻......」對面發出一陣令我毛骨悚然嘅笑聲，然後笑聲重新變成驚恐，「過嚟......唔好......唔好過嚟......唔好救我！！」

「喂......喂？！聽唔聽到？」我問對面。

暫時知道，機關東面有詛咒存在，而且非常危險......

之前遇見嘅幾隊教廷士兵，都係向機關東面增援，可見機關東面嘅詛咒係幾強大。

「快啲！！熄咗佢，太遲！！哈哈......」對方又突然大聲尖叫！

熄？熄咩......？

下一秒，一陣穿透力極強嘅笑聲從對講機傳嚟！詭異至極嘅笑聲猶如魔音一般從我耳邊迴盪。

腦海變得一片空白，臉部肌肉開始抽搐，露出歡笑嘅表情。

「嘻......嘻嘻......哈哈哈......」我不由自主發出笑聲。

眼前嘅一切開始笑......

天花板喺度笑，牆壁喺度笑，地下喺度笑，空氣喺度笑，監犯喺度笑，機關成員喺度笑，教廷士兵喺度笑，所有人喺度笑，圍住我一齊笑......

我亦跟住一齊笑，我臉部嘅肌肉喺度笑，全身身體肌肉喺度笑，骨骼喺度笑，血管喺度笑，心臟喺度笑，肺部喺度笑，肝臟喺度笑，脊椎喺度笑......所有呢片空間嘅一切有形無形之物都開始笑！！

「哈哈哈......哈嘻嘻嘻嘻......哈哈哈哈！！！」我已經壓制唔到自己，發出陣陣狂笑聲。

我隻手變得無力，我看見一張嘴巴喺我手心位置裂開，然後對著我微笑，繼而發出狂笑。

手上嘅對講機跌落地面，對講機喺度對住我笑。

笑聲充斥著地下監牢，唔係因為我嘅笑聲喺密閉嘅地下監牢出現回音，而係因為地下監牢已經開始狂笑......宛如一個真實嘅生命體一樣。

而嚟到呢度，我已經估到教廷遇上咗乜嘢......佢哋遇上咗類似音的詛咒同級別嘅恐怖詛咒......

係一種可以通過笑聲傳播嘅詛咒！

「哈哈哈......咳咳......哈哈哈哈嘻嘻嘻嘻！！」

但我已經咩都做唔到，腦海已經慢慢俾歡笑聲佔據，更因為無法停止嘅狂笑而開始窒息......

而一道人影亦緩緩喺我身前構成......我嘅直覺話俾我知，佢就係帶俾我無盡狂笑嘅詛咒真身！

係個有關殺手嘅故事
不過應該係獨立世界觀嚟

就快收檔