<借利關注組 - 卡華奴>
卡華奴外借到候城都一段時間, 叫做基本站穩正選企穩陣腳, 表現都越黎越好
在侯城佢既位置非常自由, 有時甚至排陣上佢會被列作輔鋒, 近兩場對修咸頓同西布朗都有入波, 全場亦做到威脅, 叫做慢慢搵返個狀態.
暫時見到優缺點仍然同以往差不多,
優點方面唔使多講, 技術仍然係唔差既, 射術亦有, 傳波眼界雖欠火候但最少在同齡人入面算合格以上,
缺點就係速度未夠快, 好多時佢既盤球靈巧有餘但殺傷不足, 暫時盤扭成功率以佢身型計都係未算高, 身形偏細粒身型弱係冇問題, 但最少要有古千奴既馬步同對抗去護波,
對佢我仲係有期望既, 不過佢一地要調整好個心態, 由一加盟時佢退出葡國U21既時候我已經話過, 佢太心急了! (亦算係自視幾高)
作為球員有自信唔係壞事, 甚至乎我覺得係成功球員必要條件之一, 但必需要認清客觀條件,
常言道欲速則不達, 呢個世界上當然會有天才球員一出道18/19歲直接彈起, 但更多既其實係慢慢打上黎, 以鍾斯為例, 年齡比佢大, 資歷比佢耐, 其實上年都仲踼緊英格蘭U21, 同樣義律而家都仲踼緊, 我自己覺得鍾斯同義律踼歐國盃U21對佢地成長都幾大幫助. (特別鍾斯踼完返黎係明顯更加成熟左)
不過有時球員發展都好睇際遇同選擇, 如果卡華奴今季唔係太急要轉會萊比鍚想踼常規正選, 留隊既話其實歐霸盃等等都有唔少空間比佢上場, 甚至啱啱聯賽盃決賽都應該會有份踼, 反而佢為正選而去既萊比鍚就撞正沙維西蒙斯令佢連落場機會都冇乜.
點都好, 外借侯城最近兩場都有入波, 共8場入3球, 算係慢慢回返正軌, 希望佢可以一步一步打上黎