人生由無數選擇構成，
只是在作出選擇的瞬間，
我們並不知道它將會為自己構成怎樣的人生。
其實標題入面嘅A0就係我。
無錯，我真係好需要各位巴絲幫幫手，不過喺入正題之前，我覺得點都要俾大家認識我多少少，咁先可以對症下藥幫到我㗎嘛。
上得嚟搵人幫手，我都唔介意自爆表示誠意。
我個真名叫做麥羊，同學大部份都叫我羊仔。
其實，今日1/9呢個開學日亦都係我嘅18歲生日。
我身邊好多同學一到18歲都好開心，個個去買啤酒賀成年。
但係我，對於18呢個歲數就一啲都開心唔起。
因為，18歲，對我嚟講係一個詛咒臨近嘅歲數。
喺我八歲嗰年，我俾阿婆帶咗去黃大仙廟求籤。
可能因為我係屋企九代單傳嘅男丁，我阿婆都幾關心我嘅姻緣，所以雖然我當時年紀少少，但係佢都捉咗我去求下姻緣。
求完籤之後，阿婆不惜工本帶咗我去黃大仙廟入面最靈嘅解籤佬度聽下籤文講咩。
我好記得，當時解籤佬收到我枝籤之後嘅表情。
佢嗰時瞪大咗隻眼，個頭係咁搖，好似見到一啲不可思議嘅事情咁。
「發生咩事啊？」唔單止我，就連我阿婆都發現到有啲唔妥，所以即刻問解籤佬。
解籤佬深深嘆氣一聲，摸一摸佢嘅八字鬚，然後咁講：「以姻緣嚟講，再夾埋你嘅八字，唉，呢枝籤可以話係九死一生。凡得此籤者，有如天剎孤星，終生求愛不成。莫過話姻緣，直頭係連朋友都唔多個，最後必定孤獨終老。」
對於當時只有八歲嘅我，雖然我未聽得明哂解籤佬到底講緊咩，但係聽到咩又死，又孤獨，再加上阿婆臉如死灰嘅表情，我都估到呢枝籤唔慌好嘢。
正當我以為自己已經俾解籤佬判咗死刑嘅時候，我阿婆突然用力一拍枱對住解籤佬大喝一聲：「咪住，你頭先話係九死一生，『九死』你就講完喇，咁嗰『一生』又點嚟呢？」
