根據港大同香港保健食品協會2019年嘅調查(1)
接近6成人有食保健品嘅習慣
但原來唔係個個人都知自己食緊咩／有無效
小弟讀緊營養學 盡我所能幫大家做啲資料搜集
嚟緊首先會講下香港現行對保健品嘅監管法例
有機會嘅可以繼續出po講下唔同嘅保健品（維他命／褪黑激素等）
入正題！
一、 保健產品不等於中西藥
簡單而言 將產品定義為藥物要符合兩個條件(2)
1. 可以預防／治療疾病
2. 透過藥理、免疫或新陳代謝作用，恢復、矯正或改變生理機能
換言之，只要唔係聲稱可以預防疾病／可以恢復生理機能等等
就可以唔使註冊成為藥物 監管亦會比較寬鬆
*順帶一提 咖啡因(caffeine) 都係藥物活性成分(active ingredient)嘅一種
當然飲品類咖啡 唔會聲稱可以醫病 所以唔洗做藥物註冊
二、 保健產品列作食物監管
保健產品唔會話「可以治療癌症」、「預防心臟病」
因為咁樣會受藥物條例監管 上市發售之前起碼要8 - 10年測試 (亦未必過到測試)
所以 大家市面上就會見到「適合關注XX人仕」等等較含糊嘅字眼
去避開法律問題
保健食品 會按一般食品去監管(3)
換言之 保健食品需要遵守有關食物安全、食物標準同埋標籤要求嘅規定
而唔需要為佢聲稱嘅功效負責 只要食完唔會痾爛屎 就可以上市發售
當然消費者亦都聰明 唔會亂買冇實證嘅保健品 呢點之後有機會再詳細講
我唔係話所有保健品都係冇用 我想講嘅係 保健品唔係萬能藥 唔會適合所有人／所有情況
大家亦要留意 優質同劣質嘅保健品 同樣可以喺市面上發售
三、咁應該點做？
由於保健品冇王管 所以大家更加要留意營養標籤／品牌等等
就算係同一種nutrient 唔同廠商整出嚟都可以有好大分別
例如 魚油(omega–3) 都有分30%濃度 同80%濃度
濃度高啲代表雜質會少啲 相對會貴啲
最低限度 可以喺決定買之前 上youtube搵下係咪啱自己食
有緣嘅話會繼續開po講多啲 暫時係咁先
懶人包：
1. 一般保健品 有病唔好亂食 要諮詢專業人士意見
2. 政府對一般保健品嘅監管同一般食物冇分別 食唔死人就得 唔會理有冇功效
3. 買supplement要留意廠商背景／營養標籤／做多啲資料搜集
頭盔：
小弟都係上網搵資料 資料絕對可以錯 如果有錯歡迎指正
資料引用：（link太長 只列標題 google就會搵到）
(1) 香港保健食品協會與香港大學社會科學研究中心發布「二零一九年香港保健食品的市場調查」結果
(2) 衛生署 藥物辦公室 常見問題
在香港，甚麼產品會被定為「藥劑製品」或「藥物」？
(3) 立法會十九題：「保健食品」規管 2009
