係亞茲德都玩到七七八八之後﹐我地去左一個伊朗較為冷門嘅地方玩下﹐叫做Garmeh。Lonely Planet 上面都只係得好少段仔介紹呢個地方﹐佢係咁形容的: An ancient oasis in the middle of the desert. 絕對絕對係值得一去嘅地方!如果用現語嘅話﹐就係叫祕景。
值得提係Lonely Planet 講千奇唔好夏天去﹐因為係會熱到有成50度。
送上坐係我地前面小妹妹嘅三寸金蓮俾各位腳膠巴打。
由於叫得做祕景嘅關係﹐當然就唔係咁易去架啦。由亞茲德要先坐3個鐘去一個城﹐旅館之後會安排私家車係個城到接你﹐再坐多一個鐘就到達Garmeh喇。成個Garmeh其實就只得一間旅館架姐﹐應該叫民宿正確D﹐最好就上網預訂好先喇。坐嘅車都係比較Local嘅巴士﹐印象中係無冷氣﹐車頂上面仲會放好多大型家具﹐係大漠黃土迂迴路上飛馳。
呢到就係沙漠中的綠洲。雖然係一條村嚟﹐但兩日一夜時間內﹐除左民宿嘅人外加埋見到嘅村民都唔知有無10個。
去到沙漠就當然要去沙漠玩啦(廢話)﹐民宿係有提供package去沙漠露營同騎駱駝咁。因為我地無錢﹐所以無玩到架。
民宿門口前面係養左一堆羊同駱駝。由於係民宿無咩特別野可以做架﹐係天台望住佢地、睇下書、曬下太陽就係最好嘅消磨。
企係中間成個耶穌咁嗰個就係民宿主人喇。佢本身係音樂家嚟﹐玩嘅係伊朗傳統樂器。食完晚飯後佢就會係廳到表演下。
雖然係係沙漠上﹐但伙食係一D都唔差的﹐應該可以話非常豐富先啱。有沙律、煎薯仔(十分好味)、雞肉、羊肉仲有翻版可口可樂飲添!
雖然話係祕景﹐但因為得唯一一間民宿﹐所以其實都幾多人幾爆下。大家都會席地而坐咁食晚飯。人物關係我記得係咁:一個瑞典人(左手頹頹地頭嗰個)﹐一個澳洲人(右邊嗰個﹐好型好靚仔﹐我非GAY都忍唔住J)﹐一個荷蘭中年男人﹐一對準備結婚嘅情侶(男嘅來自德國﹐女嘅來自伊朗)。
點解好地地要講人物關係?啱啱提到嘅人物們其實都唔太重要!重要嘅係張相左手邊遠處個肥妹﹐佢係一個英藉印度人。不過佢都唔係重點﹐係佢檔住視線嘅佢個朋友。佢個朋友係一個留學英國嘅伊朗女仔﹐說得一口流利英式英文。佢係我係伊朗兩個月嚟見過最靚嘅女仔﹐小麥嘅膚色、眼十分大、五官精緻、輪廓臉形鮮明、身材姣好。點解我要形容得咁詳細?因為我無佢嘅相囉!佢嘅樣貌只可以封存係我腦內回憶中……
(因為支鏡頭嘅手動對焦無限遠有D虧虧地﹐所以影出嚟有D out focus)
食完晚飯成班吹左陣水後﹐我地就同瑞典仔澳洲仔一齊去後山行下。行到出去抬頭一望﹐嘩!原來可以靚成咁。天上繁星多如細沙﹐係我呢世人第一次見到咁嘅畫面﹐嗰一刻先知道原來要睇到流星並唔係咁困難架咋。睇到呢個畫面﹐再遠嘅路程都覺得抵返哂!