(多圖多字有抒情)我驚我有一日會唔記哂

之前提過卡尚出名係傳統波斯花園大宅﹐所以都係主要旅遊景點。我已經唔太記得邊間係邊間。


Fin Garden (係唔知知邊一代皇帝起嘅花園)

話說我地係酒店附近一間不太出名嘅清真寺行緊時﹐又有一個叔叔邀請我地一齊玩﹐話車我地去旅遊景點。經過我地上次中過伏之後﹐我地的確係戒心大左﹐佢見到我地懷疑嘅眼光都好似有D不悅。我當諗左陣就決定信埋今次睇下點﹐最後發覺原來佢仲有其他家人一齊。我地就即刻放心哂﹐斷估騙子唔會帶埋一家人出嚟搵食掛。最後我地就坐左佢車去Fin Garden。叔叔佢係排隊入場時曾經嘗試幫我地爭取買本地人嘅飛(遊客票價係貴本地人5-10陪) ﹐但最後係唔成功架。其實只係好普通嘅花園﹐唔算話好靚。


和藹的叔叔與他的家人




Khan-e Tabatabei



Khan-e Borujerdi

上面兩間都係以前有錢人嘅大宅﹐屋頂係最為漂亮。


Hammam-e Sultan Mir Ahmad(一個以前公共浴室嘅屋頂)




大巴札(係由以前驛站改建成)


出左門都成兩個月﹐我朋友就決定係巴札附近一間剪髮舖剪斷千根煩惱絲。手工算係剪得唔錯的。至於我係無剪到架﹐因為小弟對人稱牛河博士嘅曹宏威博士心懷萬分敬佩﹐係學識上我諗呢世都追唔到佢架喇﹐唯有係髮型上貼近佢﹐希望留到佢嗰餅頭髮。所以最後我係四個月都無剪過頭髮架。

個個去完伊朗都讚伊朗人好人,樓主好似重未釋懷到

個個去完伊朗都讚伊朗人好人,樓主好似重未釋懷到

你講緊邊方面先

伊朗人定...?

新讀者留名
樓主同朋友好勁 真心佩服 絕對係男人的浪漫
想請問巴打全程大概洗左幾多錢?
同經過咁多個國家 出發之前點預算兌換當地貨幣?
定係去到每個地方先換?

我地都算係豪洗 住酒店多食好野咁去左好多地方玩...
已且計運買單車相機裝備等...可以話你知係6位數字以上

最後兩個問題問得好好 因為事前已經知道伊朗受到西方制裁 係用唔到信用卡提款卡的...

所以我地係由旅途開始就一人袋住舊美金咁踩

去到唔同國家再用美金嚟換當地貨幣

咁之前辛苦返工儲埋黎咁樣豪一次又好值得既
最正係有個好朋友同你一齊去癲

Live

今日工作較忙﹐share下少少瑣碎事就算喇！


離開左卡尚之後我地又上返條高速公路向伊斯法罕(Isfahan）進發。


途中經過左一個叫Natanz嘅城﹐呢個城有一樣野較為特別。Lonely Planet 提到呢個城係一個好敏感嘅城市﹐因為城邊附近有一個提煉地下濃縮鈾嘅核研究所﹐聽聞如果你係附近影張相又被人見到告發的話﹐你就可以一嘗係伊朗坐監嘅滋味。張相我見無人無車我先敢影咋！


當我地係公路踩緊嘅時候﹐突然有架車停係我地前面﹐一睇佢車頂嘅單車就知道係知音啦。之後我地傾左陣計﹐發覺佢地原來係伊朗嘅單車國家隊(個外國人係教練)﹐準備去伊斯法罕集訓！最後佢送左一個PIZZA俾我地食﹐可惜我地到晚黑想食時已經變左有少少臭﹐浪費左人地一番好意。

PS. 想提一提因為伊朗算係一個較為封閉嘅國家﹐大家係網上唔會搵到太多資訊﹐特別係住宿方面(因為沒得用Credit Card)﹐所以一本Lonely Planet 係十分之重要。除左有住宿同旅遊景點資訊之外﹐有一D額外要注意事項都好重要。如果一個唔覺意係Natanz周圍影相的話﹐可能大家就可以係新聞見到我地。我地本Lonely Planet 都係係德黑蘭先買架咋！

繼續推

係踩單車路途上﹐雖然風景較悶﹐但伊朗接觸嘅人同事就比其他國家有趣好多。


瑣碎照片﹐停低休息食下野。點解係呢個角度？應該係我行埋左一邊屙尿。


多機會同當地人接觸好大程度上係因為伊朗路旁好少會有酒店嘅出現﹐所以每日嘅住宿就成為左我地路上最大嘅問題。一般天黑前4-5點我地就會搵地方瞓﹐有瓦遮頭又好﹐再唔係搵個地方紮營都要啦。係去伊斯法罕路高速公路上我地又要面對同一個問題﹐今次我地又見唔到油站又無清真寺﹐但就見到不遠處有間工廠嘅物體。唔洗問啦﹐試左先無壞架﹐係咪？


話事人一開始是拒絕架﹐但唔知係咪我地咁堅持﹐個樣又鬼咁可憐咁﹐佢就心軟俾我地留低。佢俾左工廠Common Area我地瞓﹐咁啱又有兩張床喎﹐仲要有得沖涼添！上天對我地真係不薄。



其中有兩個工人﹐一個老一個後生對我地特別照顧﹐雖然都係唔太溝通到﹐但佢地都係一貫伊朗人嘅熱情同好客﹐同我地係Common area傾下計飲下茶影下相。最後佢仲邀請左我地去佢地工廠旁邊嘅宿舍食晚餐。




老嘅就去左準備晚餐﹐後生嘅就戴左我地係佢地宿舍前院參觀下。佢地前院養左好多小動物﹐見到有羊有雞有好多兔。我諗雞同羊都有機會係養嚟食嘅﹐白兔就應該唔會係掛﹐因為我係伊朗咁耐都無見過有兔肉食。


嚟左伊朗兩個星期有多﹐呢餐都算係最地道一餐喇。首先我地係坐係地下食架﹐伊朗人一般係屋企都係會坐係地下食飯。餸茶都係較為簡單﹐分別有乳酪奶(佢地會加鹽飲﹐我諗唔太多人接受到)、小蕃茄(都係加鹽)、薯仔雞、當然唔少得伊朗薄餅啦！我最記得嘅係佢地俾左兩邊雞脾我地食﹐佢地就食雞頭雞尾﹐想感動死人咩！呢次算係相當地感受當地平民正常晚餐嘅經驗。

去到伊斯法罕之後我地又有一個大休﹐大約有成10日﹐因為附近都算多野玩。



係德黑蘭嘅時侯﹐我地有一晚求其入左間串燒舖頭食晚飯﹐隔壁就坐左個後生仔自己係到食緊野。佢見我地兩個外地人係間咁Local 嘅串燒舖食野﹐就撩我地講野喇。佢叫Reza係一個大學生﹐英文係十分好﹐讀嘅科目係航海工程﹐住係伊斯法罕﹐嚟德黑蘭係為左考試。佢知道左我地係嚟踩單車又會經過伊斯法罕之後﹐就叫我地到左搵佢﹐佢帶我地周圍玩﹐之後我地就交換左電話喇。本身以為都係講下就算﹐點知佢係路途上都有Keep住問我地到邊﹐幾時到伊斯法罕。最後就係伊斯法罕會合左佢﹐佢仲帶左我地玩好幾日。而呢次旅程認識到佢係好重要﹐如果唔係有機會係完成唔到﹐往後再到大家講咩事。由於大家都係年青人話題相近﹐佢英文又好﹐所以我地都較為傾得埋﹐係佢口中我地開始打開左伊朗情感的禁區。

問: 伊朗女性嘅地位係點？
答: 伊朗女性係部分伊斯蘭國家來講已經算較為平等﹐佢地可以出嚟做野、可以揸車同有投票權(可以投總統﹐但總統係無咩實權話唔到事的﹐最大都係宗教領袖)。

問: 你地係唔係好唔憎美國？
答: 後生一代都無咩野﹐會聽美國嘅歌睇美國嘅戲。

問: Lonely Plant講舉係手指公﹐thumb up係解fuck?
答: 唔係﹐係解Like。

問: 你地會唔會睇咸片架？你地上網咁慢﹐睇唔睇到咸片架？睇咩類型多？
答: 會﹐屋企上網其實唔慢﹐可以BT Down 咸片的。我地係鍾意睇西人的。

問: 你地可唔可婚前性行為呢？
答: 係可以嘅﹐你只要問准左女方雙親就得。: Hi Auntie, may I fuck your daughter?

問: 伊朗有無雞叫架呢？(純好奇)
答: 有架﹐多數係離左婚嘅女人先會出嚟做。

問: 上次係德黑蘭有個人妻叫我同佢SEX啵﹐原來要收錢架？
答: (笑)應該會收你錢。



其中一日就同左Reza去左伊瑪目廣場(Imam Square)﹐全世界第二大嘅廣場。第一就係鄰國掛住左個殺人魔嗰個。


廣場上有班女小學生﹐見到我地之後突然成班衝過嚟問我地攞簽名。唔通認錯左我係Brad Pitt？

問: 點解淨係得女小學生？
答: 學校唔會帶男出嚟郊遊﹐會失控架！

好睇, 加速!

好精彩，睇咗當去咗啦

好精彩，睇咗當去咗啦

唔親身感受點得架

我寫呢遍遊記其中一個目的 就係想鼓勵人 唔好諗喇 起行啦！

係伊斯法罕都係以市內景點為主。




希克斯羅圖福拉清真寺(Sheikh Lotfolah Mosque)﹐係伊瑪目廣場隔離的﹐聽講係以前皇室貴族祈禱用。亦都係Lonely Planet 嘅封面。




伊瑪目清真寺（Imam Khomeini Mosque）﹐都係係伊瑪目廣場隔離的。



伊斯法罕大巴扎。因為鄰國嘅強大﹐伊斯法罕又係一個大旅遊城市﹐好多商戶見到我地都會你普通話講：你好﹐有d直程係會講得出一口流利嘅普通話…你同佢地講係香港嚟的話﹐佢會問返你Japan.....?


去到伊斯法罕已經算係伊朗中部﹐天氣好好亦都十分熱下。最大問題係伊朗係唔可以著短褲架！有一日我諗住落樓下食個晚餐就返酒店﹐速去速回。所以就只係著左運動Legging(Adidas的)加條短褲出去﹐點知係街上面好多人都用奇異嘅望住我﹐係嘲笑嘅眼神呀！我由街頭就被人笑到落街尾。最係我問返Reza﹐佢話佢地一般男人都唔會咁著﹐只會係女人同乸形先會……..

追到live 支持一下

樓主黎到呢到對伊朗人改觀未？定係重有戒心？

下篇你就知

繼續都係伊斯法罕都係市內景點。



凡克主教座堂(Kelisa-ye Vank)﹐一座阿美利亞教堂。無錯﹐你無睇錯﹐係一座天主教嘅教堂係一個封閉嘅伊斯蘭國家。當你日日都睇住清真寺時﹐有一間教堂睇下都會有返D新鮮感。雖然伊朗係一個封閉嘅伊斯蘭國家﹐但其實佢又算幾open嘅。佢係容許人信其他教派的﹐大約係全國有幾個%到人係信其他教。教堂裡面亦有一個展覽廳係關於當年阿美利亞人係點樣俾土耳其人大屠殺﹐係絕對直得一看！

當日係Reza同我地一齊去睇嘅﹐而教堂附近就有d地毯舖頭。大家都聽聞過波斯地毯聞名於世﹐D地毯舖頭嘅人就係咁捉我地入去話介紹我地認識下波斯地毯俾我地識﹐其實就係人都知係想sell我地啦。值得一提嘅通常係伊朗嘅地毯舖都係有得簽信用卡的﹐證明係幾咁靠旅客生意同幾咁大咬。當介紹完一輪之後﹐我地當然就係無錢買啦﹐老板就捉左Reza去一邊傾計。當我地離開左間舖後﹐Reza同我地講返原來老板叫Reza幫手一齊說服我地買﹐會俾返Commission 佢。最後Reza係拒絕左﹐佢話因為佢當我地係朋友唔會咁呃我地。我唔係要指責老板有幾衰﹐因為做生意就係咁架啦。我係想表達Reza真係好好好好好人﹐當我地呢兩個平水相逢嘅人係真心朋友！



三十三孔橋(Bridge of 33 Arches)﹐係當地人一個悠閒9hea嘅地方。




三十三孔橋夜晚係會有另一番景象的。夜晚比朝早更多人﹐因為係伊斯法罕人茶餘飯後嘅聚腳點。我地就特登搵日夜晚去睇下﹐點知就遇上兩件事喇。第一件係三十三孔橋夜時﹐又有人撩我地傾計喇。今次係一個約三十歲嘅男人﹐佢講野語氣同佢嘅動作都好浮誇好大動作﹐好似high左野咁。佢聲稱自己係一個醫生﹐十分討厭伊朗女人﹐有個韓國好聽話嘅女朋友(無相無真相的)。由於佢嘅浮誇﹐豪無醫生嘅格調﹐同無圖無真相嘅韓國女朋友﹐所以我地介定佢係一個痴線吹水佬。其實我地就唔太算傾得上﹐但佢又足足跟左我地兩個鐘有多周圍行一邊傾計。最後佢仲叫我地上佢屋企一齊飲酒(伊朗禁酒的)﹐由於介定左佢係一個痴線吹水佬關係﹐我地就不斷諗原因拒絕佢﹐最後佢只好依依不捨咁離開。嗰一晚好鬼累﹐行左好多路又要應付左個痴線佬成晚。

第二件事﹐當我地回程時已經係11點多﹐我地行返酒店太約要20分鐘到。係三十三孔橋附近一條好靜嘅路上﹐我地迎面有一個著住軍服嘅後生仔就行嚟同我地講左一大堆波斯文﹐雖然我地就唔明講咩﹐但大約都預感到唔係咩好事架喇。我地就扮唔明繼續行啦﹐佢就攞左D錢出嚟示意我地要俾錢佢﹐姐係點呀？打劫囉！我地想繼續扮唔明繼續行﹐佢就用個胸口頂住我個friend﹐唔俾我地走。好老實﹐我嗰時就唔太驚嘅﹐因為佢好似就無武器咁﹐我就唔信我地兩個大男人會打唔過佢(雖然佢著住軍服)。正當準備要開拖之際﹐終於有人係不遠處經過﹐佢亦都發覺到﹐我地就把握機會急步閃人啦﹐好彩佢亦都無再追上嚟。我friend 事後話見到佢準備係褲袋準備攞野喎﹐唔知係咪刀呢？就係咁我地就幸福地避過左一場腥風血雨之夜。

lm

支持支持

留名

唔好意思呢幾日都有D忙update唔到。好！繼續！

亞茲德(Yazd)都係伊朗其中一個旅遊熱點﹐但由於我地單車路線上係唔順路﹐所以我地就放低左架單車係伊斯法罕﹐再坐車去亞茲德玩。由於唔係踩單車關係﹐都無咩好特別嘅經驗分享。只係同一般遊客差唔多﹐就貼下景點相為多。


好鍾意呢張相﹐係亞茲德行過一間雜貨店時﹐佢叫我幫佢影張相的。


原來一個打十個已經紅到去伊朗。


今次我地又係住係波斯大宅改建嘅酒店﹐十分舒服寫意。


酒店對出就有個足球場﹐當然就要技術交流下啦。不過佢地好矛﹐輸左唔認數的。




多萊特阿巴德花園(Dowlat Abad Garden)
佢咁啱清潔緊水池嘅關係﹐外面影出嚟就差咁D。屋頂嗰支野係波斯人以前發明用嚟收集高處嘅風到屋內﹐等屋內可以涼D。呢一種風塔係亞茲德好常見﹐亦都算係景點之一。


我亦當然成為左當地美女們集郵嘅對象啦。