係伊朗我地習慣哂呃飲呃食呃住嘅生活﹐嚟到杜拜當然唔會期望有呢種生活啦。因為越發達嘅城市﹐人就越冷漠﹐就好似香港咁。
呢一張相係標志左我地成個單車之旅係杜拜接近尾聲。呢一段路係最後一程由酒店踩去單車鋪搵單車盒pack車準備上飛機。
係我地拆緊單車同行李準備Pack箱時﹐有個鬼佬係鋪裡面見到我地咁多大件細件野﹐就問我地搞咩?我地就講佢知我地係由土耳其踩到嚟杜拜﹐佢覺得成件事好Amazing﹐話我地不如坐低飲下咖啡傾下計。我地見都仲有段時間先上機﹐就答應左喇。
佢之後就車左我地去左一間倉庫﹐原來係一間主要做咖啡豆源料批發順便做埋Café Shop嘅鋪頭﹐所以都係幾隱閉下。
係呢到介紹下個鬼佬先。佢叫Phil﹐係一個荷蘭人﹐定居係杜拜。喂﹐唔洗問都估到啦!無錯!佢係係Emirates 做機師嘅…….
我地傾嘅話題主要都係圍繞住踩單車﹐因為佢都好鐘意踩單車﹐我地都有分享下旅程嘅趣事。另外我地都係佢口中了解左多少少阿聯酋。
傾到興起時﹐佢就問我地食左lunch未﹐不如去佢屋企佢煮野我地食。就係咁﹐我係連係杜拜都可以呃飲呃食….
Emirates到底幾有錢?人工高﹐有車接送返放工唔洗講啦。就係佢係有一塊地起左一堆獨立屋俾佢地機師住﹐而Phil一個人係住一間獨立屋架﹐兩層有花園有車房嗰隻…..佢只係個廚房都有成200尺
我講笑話早知努力啲讀書做機師啦…佢回我一句其實唔太難…可以去試下考…
食飯途中佢女朋友都嚟埋﹐係Emirates嘅空姐﹐都係荷蘭人。Phil見我地係亞洲人﹐仲特登煮左米飯我地食。我地問左一條問題﹐就係阿聯酋係穆斯林國家有無豬肉食架呢?佢馬上就係雪櫃攞左舊出嚟煮埋俾我地食。
仲有埋甜品添。食到七七八八﹐又打擾左Phil咁耐﹐我地都係時候起行去機場了。
為期三個多月嘅單車之旅就正式完結左﹐多謝大家收看。
再會。
只係單車之旅完結咋﹐唔係我地旅程呀!難得嚟到中東咁遠﹐更係去多啲地方玩啦!我地係機場唔係返香港呀!其實我地係放左架單車係單車鋪﹐去左另外兩個國家玩﹐呢到就係後記嘅開始!
以色列
約旦