對比之前幾個國家﹐踩單車沿途嘅景色都會比較悶少少。成條公路旁都係一遍黃土﹐十分大漠風情。
偶爾會遇上牧羊人係到趕羊﹐同D羊一齊︰咩～ 咁大叫算係大漠黃土上嘅點點樂趣。
係我地第一日踩單車嘅餐程終於遇上伊朗第一個好人喇。話說係油站旁邊嘅餐廳食中午飯時候﹐我仲記得我係點左個大熱狗食﹐差唔多食哂時﹐旁邊嘅一個男人就行去Cashier 埋單﹐ 埋完之後佢就同我地講我已經幫你地俾左錢喇﹐你地要加油。我地嗰一刻都有D錯愕﹐因為我地之前無同佢講過野﹐我地都話唔洗喇﹐無啦啦要人請食飯。但佢好堅持﹐同我地講一句︰You are my guest. 呢一句係佢地好客嘅金句(Lonely planet咁講的)。
之後我地都傾左陣計﹐交換左Instagram﹐發覺佢有成幾百K人follow。我就問佢︰你係名星嚟架？佢答：我係。感覺上成件事都好似好奇炒咁。後來我地攞張左合照問其他伊朗人﹐證實佢真係明星嚟架。
踩高速公路有一個唔好處﹐就係好遠先去到一個城﹐通常都會多過200KM﹐一日係踩唔哂的。咁我地可以瞓邊？原本就打算係油站旁邊紮營﹐但好彩伊朗係伊斯蘭教國家﹐總有一間清真寺在附近﹐只要你敢你就可以係到瞓架喇！可以慳返好多酒店錢架！但要注意以下幾點︰
1. 一定要問下人地可唔可以俾你借宿先。
2. 人地問你信唔信上帝﹐你一定要答信﹐即使你唔係穆斯林。
3. 佢地5點鍾就會第一次祈禱﹐你唔驚晨早流流一大堆人出出入入就得。
做咩送粒膠過我
