帶左係身差唔多三個多月嘅營﹐終於係我地伊朗路程嘅尾聲發輝到佢嘅作用。
如無意外﹐呢一日就會係我地最後一日瞓街嘅日子﹐因為只係得返幾十公里路就會去到阿巴斯港。當日紮營嘅地方係一間係公路旁餐廳嘅側邊﹐起碼晚餐叫做有著落先啦。
餐廳旁咁啱又有一家road trip緊嘅伊朗人係到休息緊。左上角個死o靚仔係煩到痴線﹐不斷係到話要玩我地電話﹐又話要試踩我地架單車。
值得留意係當時我嘅膚色係比中東人更黑架﹐因為我信真男人係唔需要用太陽油架!事後我對呢個想法係後悔不已….依家睇返張相我都唔太頂得順自己個樣…3日無沖涼、無洗頭、3個月無剪頭髮、個樣曬到濃哂嘅死樣……
嗰一日嘅日落好似特別靚咁。
到達紮營地點之前﹐當日嘅路程好大部分都係山路﹐係呢種峽谷踩單車係另有一留風情。
呢一張相好值得紀念﹐因為我地終於完成左旅程最後一座要翻過嘅山!
之前咪提過我係旅程開始時我慢我個FD好多﹐去到尾聲最後一座山時﹐我上到山頂Zoom到盡部相機影左呢張相﹐你地見唔見到佢呀?當刻我係覺得自己雙腳係快過摩打!(上山前飲左罐紅牛﹐本身係係土耳其時買定為日後不時之需﹐但最後都用唔著﹐就係最後一座山飲左佢。)
當然我講過踩單車唔係為左鬥快﹐只係上山時係無可能停低等同伴﹐一停左就好難會踩得返起﹐所以就係山頂等埋佢。