搞好Visa後﹐我地就重回我地單車路途﹐下一個目的地會係距離大約500公里嘅設拉子(Shiraz)。係嗰日我地仲未踩離伊斯法罕市區時﹐我發覺架單車有D飄﹐有D唔太穩咁。可能係架單車都放低左成十日關係﹐估計係有D零件位鬆左移左位都唔定。調整左之係無咩事就繼續喇!
由於休息得夠嘅關係﹐嗰日都算踩得幾快下。大約下午四點到已經踩左90km﹐但當時我發覺架車越嚟越飄﹐車轆仲開始發出d怪聲。一睇就發現出事架嘛!原來係車轆D鐵線斷左!發現嗰一刻已經斷左4條。鐵線斷左的話自己係換唔到架﹐只可以去單車鋪有齊工具先可以換到﹐唯有頂硬上飄住咁踩希望可以去到附近嘅城維修。但踩左無耐真係發覺唔對路喇﹐飄到就炒車咁﹐再睇一睇﹐已經斷左7條!由於單車轆鐵線斷嘅機會唔太大﹐所以買單車時只俾左8條我地以備不時之需。而且我地嘅車轆係特別d﹐比一般大(可以省力d)﹐無記錯的話係28吋。意味住如果我再斷多兩條﹐就可以完結今次單車旅程﹐因為配唔到啱尺寸嘅鐵線。
係大漠黃土上﹐你架單車唔郁得﹐又維修唔到咁可以點呢?我地有打算接順風車返伊斯法罕整﹐話哂都係大城嘛。係呢個時候我地見到公路旁有間工廠﹐有班工人係到做緊野﹐就走行埋去睇下可唔可以車我地去附近嘅城維修。當然地佢係睇得出我架單車係壞左﹐但由於佢地係完全唔識英文關係﹐溝通上係十分困難!係呢個時候﹐我地就諗起我地係有個伊朗朋友—Reza!我地就打左俾佢﹐講俾佢知發生左咩事﹐佢就幫我地充當左翻譯喇!係危急時候總會係迫到自己想出解決方法﹐最後其中一個工人就話佢放工就會車我地去佢住嘅城睇下有無得維修。點解會係佢?因為佢有架吉普車可以放哂我地兩架單車同行李囉!我地稱呼佢為”恩公”﹐無佢的話﹐我地嘅旅程話唔定已經可以收隊。
恩公收左工就車左我地去佢住嘅城﹐叫做沙阿禮薩(Shahreza), 一個離伊斯法罕約80KM嘅小城。由於伊朗嘅單車款式一般都比較簡易(無得轉波嗰D款式)﹐恩公車左我地係城內搵左三間單車鋪都係話唔識維修。我地心諗唔通真係要走回頭路﹐返伊斯法罕整?搵左差唔多成個鐘搵到第四間﹐單車鋪老闆見到我個車轆就點點頭﹐嗰一刻我就知道我地有救喇!
整完單車後﹐恩公叫左佢個仔嚟﹐佢個仔係識少量英文﹐就問我地想去酒店定去佢地屋企過呀今晚?唔洗問啦﹐以我地係伊朗呃飲呃食嘅生活﹐更係話去恩公屋企啦!我諗恩公其實都算係一個有有地錢人﹐因為佢有一整棟樓房﹐計埋地牢有成3層。地牢嗰層就係我地當日食飯同瞓覺嘅地方喇﹐都相當之大架。
恩公與我們
唔知係咪唔太溝通到關係﹐恩公都比較cool同少說話﹐但其實佢絕對係nice的。仲記得佢用Google translate 問我地今晚食米飯同肉好唔好﹐又包食又包住﹐點會答唔好丫!
恩公的一族與我
食完晚飯之後﹐突然有一班人攞住兩盒伊朗西餅嚟到﹐原來佢地係恩公嘅親戚!可能係一個小城﹐唔會有外國客人關係﹐所以恩公叫哂成族人浩浩蕩蕩嚟參觀下我地兩位外國人喇。嗰一晚我地一齊食西餅﹐一齊瘋狂咁影相﹐係一晚充滿歡笑同家庭感覺嘅一晚。
兩位小朋友係咪好眉清目秀好靚仔呢?但大約估計二三十年後就會變成下面張相中嘅男人咁﹐無錯﹐嗰個就係佢地老豆。
恩公的子女與我們(個仔係特登換件恤衫西褲同我地影相的)