［校園鬼故 X 陳生回歸 X 角色崩壞］無能子鋒與無能鬼

文啊文啊！

加油心巴

隻嘢係唔係去咗王馬門個異世界到？

（三十八）德叔的情況

天台上，只見一人在半空中搖晃著，而另一人則緊抓著半空中的人不放。
而這兩人，正正是我和德叔。

「德叔，唔好放手呀！」我咬緊牙關，希望把德叔拉回天台的位置。

「子鋒，放……放手啦，我……我唔得㗎啦……」德叔無力地說，看來十分虛弱。

「唔……唔可以放棄㗎！德叔，堅持住呀！」我再次嘗試發力，但受傷的左臂傳來一陣劇痛，只能勉強維持著現有的姿勢，無法把德叔拯救起來。

「子鋒，算……算數啦，我已經畀啲邪氣入侵，三魂七魄已經受損……就算救返我，我……我都只會成為一個廢人。」

「唔可以放棄㗎！天命叔一定……一定有辨法幫你！」說話的同時，我感到左臂開始發麻，握著德叔的手愈發無力。

「我……我傷害咗個細路女，我……我無資格生存落去，你放手啦，我唔想……唔想連累埋你！」德叔說著的同時，慢慢的轉動手腕，嘗試擺脫我的雙手。

「唔可以，唔可以放棄！求下你，唔好放棄，你畀隻手我呀！」我感到快要被德叔掙脫，激動得大喊起來，眼淚亦不自覺從眼眶內湧了出來。

我紅著眼看著德叔，只見德叔對著我露出了溫暖的笑容。
這個笑容我曾經看過，那是在爺爺過世時，對我露出過同樣的表情，那是訣別的笑容。

「子鋒，再見啦，你要平平安安，開開心心。我相信，嚟緊有咩難關都好，你都會無事嘅！」

我的手愈發無力，內心卻愈是激動！
我的尾指無法再緊握著，然後，無名指亦開始慢慢鬆脫。

「德叔！！！」我無助地大喊，聲音響遍了整個天台。

到底為甚麼會出現這個狀況？
事情要回溯到昨天。

「我哋係咪依家去救炎冰呀？」知道了小詠能夠追踪到那傢伙後，我恨不得馬上把那傢伙捉出來狠狠教訓一頓。

「你冷靜啲先！啱啱小詠咪講咗，佢可以保存呢道邪氣一星期，依家要做嘅，唔係衝動行事，而係要好好部署，一擊即中！」天命叔看著我，提醒我不能意氣用事。

「噉我哋依家可以點做？」

「今次嘅對手相當狡猾，就算小詠可以感知到佢嘅位置，佢好有可能會喺中間設置陷阱。但佢嘅目標既然係你，我哋就可以利用呢一點，我哋要化被動為主動，等佢自投羅網！」

「即係……要我做誘餌？」

「無錯！雖然我哋話有一個星期時間，但以防萬一，我哋就喺第六日，即嚟緊星期五實行呢個計劃！由呢一刻開始，我、小詠同新抱仔都唔會再接近你，我要等隻嘢以為，你已經同我哋斷絕咗關係，到時等佢主動襲擊你！」

「就係咁簡單？」

「當然，呢段時間我會用其他方法去騷擾佢！等佢以為我哋為咗救人而放棄咗保護你，而你就扮到好似之前咁頹廢，我相信，佢一定會忍唔住出手！」

「但係……萬一佢唔出現，或者佢早咗出現點算？我無辨法通知你同對付佢㗎喎？」

「你少擔心，你估我咁辛苦吸收佢嘅邪氣係為咗咩呀？就係可以隨時知道你嘅情況！只要佢有任何異樣或者開始接近你，我哋就會行動！」

「無錯，所以我哋依家要做嘅嘢，就只係等佢上當，到時就可以將佢消滅！」天命叔信心十足地說，看來小詠的出現真的為事情帶來了生機。

「但……德叔佢會點？」雖然事情看似愈來愈順利，但德叔的事卻是完全沒有提及，難道……

「呢一層……」天命叔眉頭緊皺，看來並不樂觀。

「德叔係咪已經……」我緊張地說，但話在喉頭裡卻吐不出來，我實在不想接受德叔遇害的事實。

天命叔沒有回話，只見他手指不斷有所動作，看來是為了卜算德叔的情況。

「我只能夠講，佢暫時無事……」天命叔說話時，緊張的神情並沒有緩和下來，看來德叔的狀況並不單純。

「啫係點？我哋係咪仲有機會救到德叔？係嘅話係咪依家要行動？」

天命叔朝小詠看了一眼，然後便說。
「小詠，跟我入嚟，我同你起卦睇下德叔依家到底咩情況。細路，我啱啱幫新抱仔驅走咗體內嘅邪氣，但佢身體仲未完全恢復，你幫我照顧好佢！仲有，千祈唔好入嚟側室，如果唔係會影響到我哋卜卦！」

天命叔交待完後，他小聲跟阿詩說了兩句後，便跟小詠一起走進道堂旁邊，一個專門用來打坐和修練的房間，開始為德叔的情況卜卦。

房間內餘下我和阿詩，氣氛顯得有點尷尬。
畢竟自從認識阿詩，基本上大部份時間都會和天賜一起，像這樣和阿詩單獨相處的情況可謂少之又少。

當我仍在腦內尋找著能夠打開話題的話匣子，阿詩卻已先一步跟我說話。

「係呢子鋒，你有無搵過天賜呀？」果然，我和阿詩之間，最容易引起共鳴的，仍然是天賜這個小子。

「我？我無呀，開學嗰排佢有打過畀我嘅，不過都係隨口傾咗幾句。係呢，噉佢有無搵你？」

「有呀，佢話佢喺嗰邊都遇到啲怪事，之後就諗起你啦。佢仲特登打嚟叫我睇實你添。」談起天賜，阿詩本已漂亮的臉上，自然地泛起了笑容，使她看起來更加動人，害我也不禁看傻了眼。

「子鋒？做咩眼定定噉望住我呀？」阿詩察覺到我在發呆。

「無……無呀，我喺度諗，天賜個衰仔唔知前世做咗啲咩好事，可以搵到好似你咁靚又咁溫柔嘅人做女朋友啫。」我發自內心讚賞。

「哈，多謝你喎子鋒，天賜佢都無試過同我講呢啲嘢。」阿詩欣然接受了我的稱讚。

「嗰個木頭人點會講呢啲嘢呀，你肯做佢女朋友，佢執到啦！都唔明，明明我同佢都係咁上下啫，點解佢有一個咁好嘅女朋友，而我就無！」

「唔係呀，阿奶都幾好呀！佢都幾靚女，又幾細心呀。」

「佢靚？係，我承認佢係唔錯嘅，不過比起你，佢有排都未叫靚囉。仲有，佢邊鬼度細心呀，成日唔記得呢樣嗰樣，脾氣又唔好喎，仲有呀……」我不知受了甚麼刺激，好像打開了甚麼開關一樣，不停訴說著阿奶「優秀」的一面。

我正說得興起，卻見阿詩在我面前不斷眨眼，好像在提示甚麼似的。
我並沒有意會到她想表達甚麼，反正興在頭上，便繼續剛才的話題。

直到阿詩忍不住別過臉去，我這才驚覺到，背後好像傳來一陣殺氣。
我強壓著內心的恐懼，慢慢的回頭察看，只見我的「女朋友」阿奶，不知道甚麼時候進到屋子裡，正一臉「歡容」地看著我。

接下來，我遭受了數分鐘比死更難受的處罰後，才總算平息了她的怒氣。
我還沒有來得及詢問她為甚麼會來到道堂，側室裡傳來了天命叔的聲音，只見他和小詠一起步出側室，看來已經順利地卜出了德叔的情況。

這一刻的我，仍然不知道，我和德叔，將會經歷一個慘痛的狀況！

朋友妻

德叔

朋友妻

咪走雞

（三十九）德叔的情況（二）

「咦，你嚟咗啦？」天命叔看到阿奶，並沒有感到驚訝。

「係呀，之前唔該晒你……哋，我嚟還返條鎖匙畀你嘅。」阿奶道謝時，視線看了看一旁的小詠，然後在桌子上放下了鑰匙。

「嗯，你依家覺得點？有無咩唔舒服？」天命叔收好了鑰匙。

「我無事啦，身體仲比之前輕鬆咗。不過依家會睇到啲原本睇唔到嘅嘢……」話畢，阿奶又偷瞄了小詠一眼。

「呢層係正常嘅，原本你就有呢方面嘅資質。經歷完暑假嘅事，再加上今次直接畀靈體嘅邪氣入侵，導致你更加容易接收到佢哋散發出嚟嘅能量，你睇到佢哋都好正常。」

「噉……係咪我以後都會見到……呢啲邪靈？」阿奶的說話，看來引起了小詠的不滿，只見她漲紅了臉，但又不敢作聲，大概是因為天命叔也在場吧。

「其實唔係所有嘅非人生物都係邪靈嚟……不過，從你嘅宗教角度去睇嘅話，你都無錯嘅。我可以答你嘅係，如果唔做一啲處理嘅話，好大機會會一直都見到一啲非人嘅存在。如果你唔想再見到，你可以返去之前間教堂，神父會幫到你。不過，如果你接受到嘅話，我建議你可以保留返呢種能力，始終呢個係緣份嚟。」

「呢一層……」阿奶看來不太願意保留這種特殊能力，不過，這是很正常的反應吧，當初我變得能看到靈體後，也是萬般不願意的。

「我諗你都係唔好保留好啦，反正接觸咁多『邪靈』，對你都唔係咩好事！」小詠突然插話，看來她對阿奶好像有點不滿，不知道她們是否發生了甚麼爭執。

「我……我頭先唔係噉嘅意思……」阿奶也知道剛剛她說錯了話，無奈地看著小詠。

「小詠！咳咳……其實你唔駛咁快決定，你仲有一個月時間可以去考慮，如果你諗清楚都係唔想要呢種能力，到時你再嚟搵我或者直接去搵神父，我哋會幫你嘅。」天命叔嚴厲地瞪了小詠一眼後，然後便跟阿奶解釋了她的情況。

「同埋，如果你……仲有一齊嘅諗法，呢種能力，對你嚟講會係一件好事。」天命叔看了看我，才又對阿奶說話。

阿奶聽過後，認真地考慮了一會，看來仍未能作出決定。

「我……我諗我要再考慮下。」阿奶看了看我，然後認真地對天命叔說。

「唔緊要，你過一過嚟先。」天命叔對阿奶招了招手。

只見天命叔用桃木劍在阿奶身上碰了數下。
「好啦，你依家暫時唔會再見到啲靈體住，你可以返去慢慢諗清楚再決定。不過，你記得照返神父嘅說話，每日都要祈禱同讀聖經，噉做嘅話，啲靈體就唔會埋到你身！」

「明白，不過……我唔可以留喺度幫手？」

「唔好啦，之前我哋噉辛苦呃咗嗰隻嘢，等佢以為你同子鋒無任何關係，你依家幫手嘅話，只會增加我哋嘅負擔。同埋，雖然話有一個月時間，但如果可以，盡快決定保唔保留你嘅能力會好啲。」

天命叔跟阿奶交待了兩句後，便吩咐阿奶先行離開。
臨離開前，阿奶在我耳邊說了兩句：
「我雖然呢一刻唔係你女朋友，但係你完咗件事之後，你要將你嘅真心話講畀我知。到時，我都會諗清楚點做，我……我等你。」

阿奶沒有給我機會作出任何反應，便已飛快的離開了道堂，遺下還沒有來得及整理好思緒的我在道堂裡。

「哼！都唔知佢有咩好！」小詠看到我在發呆，她鼓著臉小聲地說，看來仍然對阿奶感到不滿。

「細路，唔好發呆啦，快啲過嚟，德叔嘅情況，我哋已經大概知道啦！」聽到德叔有新的情況，我馬上清醒過來。

「點呀？德叔佢……佢無事呀嘛？」我緊張地問。

「你仲記唔記得堅嬸？」天命叔用提問代替了回答。（溫馨小提示：堅嬸出現於校園鬼故事 - 紅衣女孩，有興趣嘅讀者可以去我FB或者紙言睇返）


「記得，點會唔記得，我依家有時都會去探佢。咪住，你嘅意思係……」我大概猜到天命叔的意思。

「嗯，德叔嘅身體受到控制之後，依家佢嘅三魂七魄雖然仍然存在，但係有部份嘅魂魄已經受到損害。雖然未至於好似堅嬸噉唔見晒啲魂魄咁滯，但最懷情況……」

「係咪會好似……好似堅嬸噉？」我心裡感到一陣悲痛。

「無錯，從醫學角度睇，就係變咗做植物人一樣。」天命叔話音剛落，我的眼淚已忍不住流了出來。

想不到因為我的事情，竟連累了德叔。

「不過，你可以放心，德叔嘅情況其實係樂觀嘅。救返佢之後，我相信我都可以搵返齊佢嘅魂魄！」

「噉……噉都好啲，早啲講呀嘛，唔好嚇我啦！」我大大鬆了一口氣。

「依家我最擔心嘅係，我同小詠無論點樣開壇起卦，德叔嘅情況都只能夠占卜到一半，無辨法睇清楚佢嘅全部！」天命叔皺著眉，我亦感到事情有點不太尋常。

雖然我沒有跟天命叔學過卜卦，但理論還是明白的。
卜卦的作用，其實只是把不同的可能性，透過當事人的資料，加上卜卦者的力量，來進行預測。

而卜卦者會把所有可能性寫下，然後想辨法使其避開一些凶險的異像。
當然，最後發展成何種狀況，還是要根據現實情況來決定。
所以，卜卦並不是萬能的，但像德叔這種情況，卻是十分罕見。

「不過依家點擔心都無用，我同小詠會繼續嘗試去幫德叔起卦，有需要嘅話，我哋個計劃會提早執行！」天命叔的說話，令我放心了很多。

之後，天命叔對我們交待了整個情況後，我便按照計劃離開了。
雖然接下來的數天，也不能再跟他們有所接觸，內心的確有多少不安，但是，為了能夠引誘那靈體上當，我會堅持下去的。

可是，想不到，就在當天晚上，竟會發生這樣的事情！

正呀有文

正呀有文

正呀有文

推

子鋒有後宮

推

推