一直未食過omakase 請問有邊間最值得食

市面上林林總總咁多間 又成日比連仔屌呃錢
想慶祝自己三張生日 去邊到體驗最好最正宗

鮨見

又水人食垃圾 勁狗

市面上有質素嘅都好難book 例如雲隱

而家放題貴，成三百蚊埋單
我食元氣壽司都係二百零蚊左右

難得見到有唔係引戰既omakase post，認真答下巴打你。

正如五樓巴打所講，其實香港水準比較好既壽司鋪一般都比較難book，甚至有啲係一定要熟人介紹／帶你去先可以食到，例如︰Hare同Mori，先唔好講佢地值唔值得排咁耐隊，畢竟每個人口味唔同，但我個人覺得咁樣去求心帶、乞位其實好撚反智，為左食個飯又要埋呢個堆又要埋果個堆，都幾無癮。呢d預約困難店我覺得食唔食到隨緣就好，唔好強求。

同時如果你唔係熟客，有唔少鋪頭都幾易炒車，舉下例︰

一、Sushi Mamoru︰經理炒車單野最近先上完熱門，我都好少係Omakase FB谷見到咁多人留意一個post，有興趣可以去番睇。

二、鮨中本︰之前同我朋友傾好收少d corkage，結果都係收足全數，私底下都唔係好肯退，搞到擺上網先肯退番收多左既錢俾俾我朋友，同一間野之前我一個熟人去食飯，收左訂金結果埋單時收佢全數，對信用卡單時發現仲夠膽死唔退錢，話多左果截轉做store credit。野食黎講算幾好但係無論幾好食呢間野我都唔會再去，誠信有問題。

仲有啲壽司鋪要指名大將serve或者要包吧檯先唔會炒車，名就唔開啦，但個人覺得隨非你真係成日搞飯局，或則去呢類地方都係會失望居多。

咁到底有無啲book得到又唔會點炒車既鋪呢？都有既，又舉下例俾巴打︰

一、Sushi Kami︰呢間我都去左唔少次，以壽司鋪黎講唔難book，周末唔清楚但我好多時weekday去都係前一到三日book就有位。佢唔屬於好傳統江戶前酒餚還酒餚、壽司還壽司既鋪，會梅花間竹咁上，不過又好難話佢唔正宗，因為日本都有一線壽司鋪會咁做。個人覺得其實佢菜單順序做得幾好，唔似Mori同天鮨咁一黎就濃味打爆你個味蕾（主要係想d客開酒），佢既酒餚味道上優雅好多。

另一方面係處理肥既魚好似中拖、大拖咁，佢地係類似Masa咁一塊魚片兩刀（三層），第三刀先切斷條魚，咁做視覺上會好睇啲，同入到口個感覺會比起較常見既打花刀（台灣佬叫割千刀，呢個做法個口感出黎係傾向入口即溶但魚肉掂到條脷果下會有些少顆粒感）黎得smooth少少。



佢地off menu其實可以將個海膽手卷轉做紫菜赤鯥包海膽，基本上就係用燒過既赤鯥魚去替代左舊飯，好撚好食，我次次去都會叫。



呢間野水準穩定而且唔算難book，算係我有時朋友想食壽司要搵地方既時候臨時臨急既go to，不過佢地d樓面就比較生手少少，有時會擺下d無傷大雅既小烏龍，同埋唔會成日轉Menu有新菜，對食慣食熟既人黎講無乜驚喜，量係唔細既係道數偏少，唔太介懷的話我覺得Kami值得幫襯。

好同意
自問唔係嗰啲乜嘢foodie
純粹鐘意食omakase，但又要等成幾個月
甚至半年先可以食到
我覺得有d誇張

係咪真係非食不可呢？
等既時間，又成唔成正比
當然呢d都係好個人感覺

有時早半到一個月book
價錢正正常常，唔會太貴又唔會太平就ok

二、The Araki︰其實Araki San都算好出名，而且難得地主要既壽司一般都係佢一個人握晒，位就得九個不過長期都好似唔係幾爆，我諗最大原因係因為佢貴，人頭4000 + 10%，開酒750ml一枝500，1.5L以上盛惠一千蚊枝，全香港最貴，真係好撚柒貴。



而且佢其中一個特色係會用本地魚料去做壽司同酒餚，呢度講既本地魚輝係指係本地街市買到既魚貨，而唔係一定要本港水域捉到，有人欣賞，有人唔欣賞，我自己係屬於後者，啲瀨尿蝦甜起上黎好甜，無味起上黎無味，大連鮑垃圾，魚湯用本地蠟魚亦唔見得好味左。比較起佢地同一間鋪既日本魚料，有時真係會覺得過山車咁。



係度又長氣多次，魚唔一定係愈新鮮愈好食，做壽司用既魚會做活締，活締可以防止魚類因為死前受驚而消耗ATP，無晒啲ATP的話啲肉會有乳酸同氨堆積，令條魚屍僵，而且會影響條魚既鮮味；一般黎講釣上水既魚會盡快做活締，去等條魚保鮮期長啲，同時亦都條到時間個魚身去分解脂肪同肌肉組織轉化成鮮味；除此之外所有做壽司不經煮熟既魚都會做高速急凍處理去殺蟲，呢d都係需要時間做，唔係條魚一上水就食、生劏就最好味，想了解多啲可以自己去Google睇下咩叫活締，相關資料其實好多。

至於點解香港、大陸、台灣漁民唔興做活締主要係因為文化問題，首先做活締要專門既人手同時間，搞得一條黎佢地都已經可以捉多幾條魚，同時傳統文化上華人喜歡完完整整，鍾意睇到條魚買果陣生生猛猛，活締之後條魚俾人砍左一刀外觀唔完整，又唔識游水，功夫多左又賣唔出自然就無人做，岩岩講左活締既原理係防止魚類因為死前受驚而消耗ATP去令條魚變好食，你諗下條魚上水俾人掉入個玻璃缸度養，跟住大人買魚既小朋友又鍾意嚇鳩啲魚，上水又要俾個客、魚販捉住黎舞，乜鬼野ATP都嚇走晒啦。

所以點解本地魚唔係咁適合做刺身、壽司生食用係有科學根據。番番去Araki，雖然岩岩講到佢有缺點，但佢既吞拿魚從赤身到拖羅都真係好撚出色，中拖大拖會各分兩舊（迷你版），一舊頭一舊尾，一舊肥啲一舊肉味重啲，就唔會出現呢個客食到同果個客食到既野唔同口感唔同味道既情況，同時佢切邊角料既耗損出晒名大，好多食得既但無咁好味既部份都會俾佢切走，所以係舊舊都好撚正；另外佢既Ikura都好出色，呢個唔是來貨問題係功夫問題，包做壽司之前手洗好幾次去洗薄啲殼，薄到係魚子一掂脷就化開，呢樣野係好多一線日本壽司鋪都做唔到既水準。



係The Araki我食左我認為全香港最好食既吞拿魚、Ikura、海膽同玉子燒，而且係好難忘果隻，如果筆直唔係問題，強烈建議去試一次。

仲有記得要叫大飯，因為佢份量偏細。我都好耐無咁認真寫野食，全部相都係我自己影，上面推薦俾你嘅餐廳我都食過第一身經歷，如果我講大話的話罰我永遠book唔到餐廳淨係book到鮨見，祝巴打你第一次經驗開開心心。

所以我主張唔卜檯，緣份到自然會有朋友叫我去食，緣份到自然會有師傅放位出嚟俾我執漏

巴打高質 第二間就貴得滯，對我來講

すきやばし次郎

明白嘅，第一次係我都差啲過唔到我心理關口

巴打高質討論mark低咗

咁平點解冇新圖？

新名

d5毛
出一次先5毫子
邊出到新圖比你丫
人地好辛苦架
將就下啦

一開始食太高級太正既，就唔知原來仲有更好

盡做盡做，太多好嘢食係連登俾假膠/真心膠污名化唔忍心

睇你budget,我食開中低價就會推鮨釀、tokami、shion、云隱,其中得tokami比較易book,其他都係等執雞

釀我都食過，酒餚出色，個茶碗蒸同玉子燒真係好正，燒魚都唔差，但男師傅（師傅個名有男字）個握功真係仲有好大進步空間。



見巴打你講開Shion，又醒起啲野。

補充多兩句，雖然俾得咁多錢會對服務既要求高左，但係人類始終係人類，有時犯錯好難免，尤其是日本餐廳既服務員訓練水平係真心無老牌酒店高級餐廳既水準，如果完全係想食氣氛同服務而食物本身既佔比唔重，良心建議去番食西餐，文華、四季、香格里拉旗下d中西餐廳服務水平都好高。

講番食壽司Omakase，記得要提多幾次佢地你有咩唔食，就算去日本都好有時我提佢地我唔係好鍾意食生蔥，都有鋪頭係會唔記得（雖然會瘋狂道歉），所以如果想件事情順暢啲，自己做多步提多兩次，大家都開心，無謂炒車又要嘈邊個岩邊個錯，同得朋友、客人、女伴去食飯，一個唔該有野炒車，嘈又好似好小家咁，唔嘈條氣又唔順，都係可免則免。

同埋真係每個地方既口味唔同，我有朋友唔喜歡食銀皮魚，亦有朋友唔食拖羅，問清楚同行朋友有咩唔食，提多幾次，確保自己食得開開心心。同埋記得問有無exotic野，有時啲師傅拎啲野出黎唔係個個擺得入口，記得有一次去Shion，食到一半個師傅拎左兜素魚出黎，呢個素魚唔係講緊齋，而係形容緊佢個樣，因為佢幾乎全透明，食法係將湯汁倒入個杯度，再倒番十零條生勾勾既素魚落去，道菜上到你面前既時候啲魚仲係個杯入面眼大大望住你掙扎緊，然後師傅會叫你倒入口，要「咀嚼」之後再吞，無錯係生吞，啲魚仲游緊水。

當日同檯有幾位女士都唔敢食，要隔離男伴幫手吞埋，有時男人唔敢吞，又要面起上黎一野倒落肚你都咪話唔尷尬，我自己對呢樣食物就問題不大，但係都唔會特別想要食佢，如果接受唔到呢類痴線野最好問清楚先。