《同居女孩》(完結篇)

非常好，唔想咁快完

好似無端端多咗啲唔關事嘅嘢咁

有乜撚唔關事先

【第五十八話 共同進退】

人們安好嘅世界，中六嘅我哋正專心準備即將到來嘅文憑試。

我哋一行七人霸佔咗一間班房做past paper。

「搞撚掂！」做完數學卷嘅陳浩然大叫。

「好叻呀BB！」李樺誇張咁攬住陳浩然。

「兒豬，你呢個駁論可以加一個例子。」幫倩兒核對通識卷嘅我講。

「衡B好叻呀。」倩兒笑住答。

「唉，又放閃。」周璇抱怨道。

「鄙人同吾內助都做完中文寫作。」男班長道。

「咁不如猜？」女班長問道。

「好！」其他人異口同聲地答。

「包剪揼！」七個人同時玩包剪揼。

「Yes！」猜完後陳浩然大叫。

「頂！」我都大叫。

五個包同兩個揼，一鋪就輸咗。

兩個揼就係我同倩兒，咁就算猜落去都無意義。

「咁我同我BB去買飲品啦，whatsapp落單啦。」我有啲唔唔忿氣咁拖住倩兒落地下小食部買嘢食。

「一路順風。」周璇揮住手講。

「麻煩晒。」男班長講。

我同倩兒沿樓梯落樓，慢慢行去小食部，順便由操卷嘅壓抑中抽身再休息一下。

「好累呀B。」倩兒挨落嚟。

「乖啦B，我同你一齊堅持，好快捱過呢段時間㗎啦。」我摸摸倩兒個頭。

「好啦，有你係我身邊真係好。」倩兒抬頭向我笑。

「我都係咁諗。」

唔知大家有冇經歷過DSE操卷嘅地獄，由中六嘅九月開始到四月考DSE為止，基本上每日都有十個鐘係溫書或者做卷，精神每日都好繃緊，如果做卷嘅分數比上一次低就會陷入驚恐狀態，壓力會一下子增大。就算做得好咗，都會好執著做錯嘅地方，要迫自己比前一日嘅自己進步。

不進則退嘅心理壓力好似隨時會將自己壓垮，慶幸嘅係我身邊有同我一齊努力、前進嘅人。

「飲無糖豆漿得唔得呀B？」我拎住豆漿問我嘅另一半。

「好呀寶貝，但係⋯⋯」倩兒搶走我手上嘅豆漿然後調皮地講：「我要同你飲同一枝！」

「係嘅係嘅。」我口似無奈，但係心中好甜。

「你快啲買佢哋嗰份啦！」倩兒邊飲邊講。

「係嘅，係嘅。」我打開whatsapp group，然後買咗5包飲品之後就返上班房繼續做卷。

我同倩兒拖住手走返入嗰個壓抑嘅空間，但係我哋有對方，所以喺痛苦嘅時光我哋可以互相支撐對方。

除咗對方，我哋仲有一班伙伴。

「喂，我哋會一齊入u㗎可？」我問。

「屌你，肯撚定啦。」陳浩然自信地講。

「鄙人都如此希望。」男班長講。

「我會同兒兒一齊讀大學！」周璇講。

「無問題嘅！」李樺興奮地講。

「傻豬你驚？」倩兒問。

有一同奮鬥嘅同伴真係好好，就算呢段時光堆積滿壓力，但係我伙伴嘅存在為我帶嚟欣慰。

我驚嘅大概係未來會失去呢班朋友。

「有大家係身邊就唔驚。」我怕羞地講。

「屌你啦，好撚嘔心。」陳浩然講。

「無論未來點都好，我哋都會係朋友。放心啦。」周璇講出唔符合佢人設嘅話。

「咁不如我哋今晚做啲癡線嘢？」李樺道。

「你想玩咩呀B？」陳浩然噁心地問。

「是咁的，不如我哋今晚係學校過夜？」李樺將佢嘅計劃講出嚟。

「好！」周璇馬上同意。

「但係夜晚有校工巡喎。」男班長質疑。

「咁不如去我哋到過夜同睇星？」倩兒提出。

「好呀！」周璇又馬上同意。

「我哋到係指？」女班長問。

「倩兒同諾衡屋企。」陳浩然答。

「點解無人問我意見？」我提出最大問題。

「女主人話得就得啦！」周璇講。

「唔得呀BB？」倩兒用佢水汪汪嘅雙眼望住我講。

「緊係得～」我馬上回答。

「好嘢BB！」倩兒即刻攬住我。

「咁不如上天台？」陳浩然提議。

「屌你，你點解知我有天台㗎？」我驚訝地問。

「我點會唔知呀師傅？」陳浩然反問。

「天台得檯櫈同暖爐咋喎。」我講。

「咁不如買個gas爐上去打邊爐？」女班長提議。

「我哋屋企有呀。」倩兒成個女主人咁講。

「咁我哋做多兩個鐘卷就快手買餸打邊爐啦。」陳浩然講。

「如此吾等嘅學習時間會否變少？」男班長問。

「一日半日，當放鬆下啦，橡筋拉得太緊都唔係太好。」女班長講。

「好。」男班長馬上答應。

「條女話乜就乜。」周璇講。

「咪班佢啦，快啲溫完書就走人啦！」我講。

當日嘅晚上，我哋七個就喺我嘅天台一邊打邊爐，一邊欣賞星空。

「考上大學之後我哋仲會唔會可以咁樣聚會？」周璇問。

「可以嘅。」女班長講。

「考完DSE我就會考個車牌，之後就買㗎七人車同大家周圍去。」我講。

「考到先算。」倩兒講。

「哈！」大家不約而同地笑出聲。

「屌，咁撚光，淨係睇到幾粒星。」陳浩然跳脫地講。

我哋淋浴喺快樂嘅氛圍下放鬆咗一晚，而倩兒當晚畫咗一幅我哋七個人嘅油畫。

【第五十八話 完】

【第五十九話 離世】

考完DSE到等待放榜期間，醫院傳來噩耗。

「媽，你放心啦，我會睇住自己㗎啦。」坐喺病床邊嘅倩兒講。

虛弱地躺喺床上嘅伯母已緊閉雙眼，心跳機發出緩慢嘅「嗶嗶」聲。

「已經有人睇住我啦，所以你唔洗再擔心啦。」

「嗶⋯⋯嗶⋯⋯」

我坐喺病房嘅門口，默默地陪伴倩兒。

翌日，伯母離世，倩兒無大哭大鬧，佢只係靜靜地坐喺我身邊。

再過幾日，倩兒將母親火葬，再將骨灰拎返屋企。

閂門之後，倩兒就從後背攬住我。

「辛苦你啦。」我輕聲地講。

「嗯。」

沉靜數秒後，倩兒再講：「你會唔會一直陪係我身邊？」

失去咗最後屋企人嘅倩兒向我求救，佢好需要一個依靠、一個承諾。

我轉身將倩兒輕輕擁入懷中，再講：「我應承過你，所以我一直都會陪住你。」

「嗯。」

痛苦嘅時候，喺我身邊嘅一直都只有倩兒，喺倩兒身邊嘅亦只有我。

「叮噹。」門鐘突然響起，於是我去開門。

「世伯⋯⋯」係倩兒老豆。

「你嚟想點？」倩兒壓抑住怒火地講。

世伯望望倩兒，然後語帶歉意地講：「我想拜一拜我老婆。」

「你有當過佢係老婆咩？」

「我知道我係一個仆街，我唔奢求你會原諒我，但係我只係想同愛過我嘅女人告別。」

「我遲啲再講你聽佢葬喺邊到。」

「咁⋯⋯女呀，你近嚟好嗎？」

「唔洗扮關心我啦，走啦。」

「唔係扮⋯⋯就算你唔原諒我都好，我只係想你知道我已經改變咗，如果你想返屋企嘅話⋯⋯」

「唔洗。請你離開。」倩兒有千言萬語想講，但係佢將一切都收喺心中，佢唔想再同所謂嘅父親糾纏。

「呢到始終唔係你屋企，寄人籬下都唔會比得上屋企。」

「你所講嘅屋企根本唔係我屋企。一個屋企核心嘅嘢已經消失晒，留戀嘅人同事都無晒，淨低痛苦嘅地方，我點樣叫做屋企？」

「爸爸我已經唔會再⋯⋯」

「你傷害完我咁多次之後我仲點可以相信你？」

「我真係會改，希望你會畀我一次機會。」

「其實我同你已經無關係，我做咩都同你無關係，況且你都唔了解我，我只係因為唔好彩先做咗你個女。我同你已經講得太多，請你即刻離開。」

倩兒語畢，我就拉住世伯入𨋢，再送佢出大堂。

世伯試過掙脫，但係有做gym嘅我比佢大力。

「我會好好睇住倩兒。」講完後我就上返樓搵倩兒。

倩兒見到我返嚟，佢就問：「不如我哋去澳洲旅行，順便探下世伯。」

「咁突然？」我老豆近排去咗澳洲做嘢，佢本身租咗間apartment，我哋去旅行嘅話可以去佢到住唔洗租酒店。

「我想散下心。」

「我睇下有冇機票先。」反正等放榜呢段時間都無嘢做，去個旅行都好。

「下星期一有唔太貴嘅機票。」睇嚟倩兒已經check過機票。

「咁就下個禮拜去啦，我打電話同老豆講聲。」

就係咁，下個禮拜我就同倩兒要出發去旅行。

【第五十九話 完】

【第六十話 感動】

「衰仔，探老豆都咁突然呀。」喺機場接我同倩兒嘅老豆講。

「麻煩晒你啦世伯。」倩兒禮貌地講。

「唔講晒老豆。」我講。

「倩兒，你媽媽嘅事寶係好遺憾。」老豆講。

「嗯。最少佢依家唔洗再受苦。」倩兒答。

「我下次返香港會去拜下佢。」老豆講。

「多謝你。」

「咁講返你哋旅行嘅嘢啦。呢幾日我請唔到假，但可以借㗎車畀你哋去玩。」老豆講咗啲奇怪嘅嘢。

「吓？我啱啱先P牌咋喎，同埋我嗰個廢牌嚟。」我講，我考DSE之前已經排緊期考車，一考完DSE就喺油塘1 take pass考埋個車牌返嚟。

「得㗎啦，我㗎tesla有autopilot，無咁易炒嘅。」老豆拍晒心口咁講。

「淆淆地。」

「autopilot會搶你軚唔畀你撞㗎啦。」

「一係世伯你夜晚同衡仔練下車？」倩兒提議。

「咁會唔會拎走咗你哋啲時間呀？」老豆問。

「唔會，我哋係香港有好多時間。」

「咁我借走我個仔啦。」

「隨便拎。」

「⋯⋯點解無人問我意願。」我抱怨。

當晚，我哋就去咗食自助餐。

食完再擺低倩兒返apartment之後我就同老豆去咗揸車。

「揸得幾好呀。」老豆讚我。

夜晚嘅suburb無乜車，所以我唔洗擔心阻到人嘅情況下周圍行。

「無乜人先揸到姐。」我講。

「無事㗎啦，揸到直同預到位就可以㗎啦，㗎車唔會畀你踩線。」老豆講。

「係咩。」

「係呀。」老豆再講：「咁你有冇信心考入大學呀？」

「八大都有嘅，但係三大就可能要搏下。」我老實地答。

「如果唔得嘅話可以過嚟澳洲讀。」老豆提議。

「再睇下點。」其實唔會，因為我唔想離開倩兒。

「睇嚟你唔想，哈。唔緊要嘅，我無乜所謂。」老豆笑住講。

「多謝你。」老豆都幾體諒我。

「我多謝你先真。」唔知點解我好似無咁唔鐘意我老豆，或者了解咗佢加埋時間，我已經覺得佢係一個唔錯嘅父親。

「咁揸多一轉我哋就返屋企啦，唔好要倩兒等太耐。」老豆講。

6日5夜嘅行程嘅第一日就咁完結咗。

之後我同倩兒去咗戰爭紀念館、皇家植物園、維多利亞女王市場、墨爾本古監獄、墨爾本動物園等等嘅地方，仲去咗亞拉河遊船，而每一晚倩兒都會叫埋我老豆一齊喺市中心食飯。

可能我對老豆嘅睇法真係唔同咗，我依家好願意開口同佢講嘢，以前嗰種厭惡感已不翼而飛。

第五日，我同倩兒兩個去咗滑雪。

「你記唔記得我話過要帶你去澳洲睇雪。」我問。

「記得。不過今次係我話嚟澳洲。」倩兒反駁。

「你叻豬囉。」我篤篤倩兒臉頰。

「衰人！」倩兒篤返我轉頭。

同倩兒滑咗幾轉之後，我哋勉強可以滑到一段路。

玩咗一個鐘多啲我哋就已經累到攤喺雪上。

「其實你想嚟澳洲係咪想我同老豆見面？」我問倩兒。倩兒堅持嚟澳洲同埋要每晚同我老豆食飯令我咁諗。

「其中一個原因。」倩兒唔否認。

「多謝你，明明依家係你痛苦嘅時候。」

「我都想嚟散下心。」倩兒牽起我隻手。

呢個女仔，明明自己傷心緊，但係佢都願意為我著想。雖然我覺得唔洗急住去搵老豆，但係倩兒一番心意我就欣然接受。

倩兒再講：「媽媽走咗之後，我第一個感想就係要珍惜眼前人。所以我想你同你爸爸相處多啲，唔好未來先後悔。咁啱我又想散心，所以先咁急想去旅行。」

「多謝你。」

有呢個如此為我著想嘅女仔，夫復何求？

「我都多謝你，因為，我嘅世界先精彩咗咁多。」倩兒莞爾一笑。

「你都為我嘅世界填上咗色彩。所以真係好多謝你，同埋我愛你。」

「哼，而家先知我好咩？」倩兒講完就拎起一舊雪球扔向我。

「頂！你扔我！」我講完就就用雪球扔返倩兒。

「衰人你還手！你咪走呀！」倩兒講完邊追邊向我扔雪球。

「傻嘅先唔走！」我都用雪球扔返倩兒。

「衰人唔準扔返我呀！」倩兒嬲爆爆咁講，個樣都幾可愛。

「咁唔公平㗎！」但係我之後都無再用雪球扔倩兒，只係單方面做佢嘅移動目標，呢個女仔開心就好。

「我扔死你呀！」倩兒邊講邊扔。

「呀！我唔忍啦！」我轉身撲低倩兒，再壓喺佢上面。

「喂也！」倩兒叫。

「頭先係咪扔得好爽呀！」我輕輕地掐倩兒鼻頭。

「哼！」

我扶起佢，再背對背咁坐。

「可以啦，你唔洗再忍啦。」我講。

「咩呀⋯⋯」倩兒一頭霧水。

「喊啦，呢到無人睇到。」倩兒無喊過，母親離世之後佢一直都忍耐。我再講：「就好好地咁喊一次。」

「無啦啦喊乜？」倩兒反問。

我轉身攬住佢再講：「我知你忍咗好耐，伯母離開咗之後你都無好好喊過。」

「我邊有忍呀⋯⋯」倩兒嘅身體開始震抖。

「真係唔洗忍啦。」我掃掃倩兒背脊。

「咩呀⋯⋯」

「喺我面前，可以放心喊出嚟，無必要忍耐。」

「咩呀⋯⋯嗚⋯⋯」

「嗯。」

「嗚⋯⋯」

我唔知倩兒因為咩原因而一直唔喊，但係如果唔畀佢好好抒發情緒，咁呢個散心之旅就會變到毫無意義。

然後，倩兒就喺我懷抱中喊咗好耐。

喊完後，倩兒輕輕推開我。

突然，一個又一個嘅白色小球飄落到我哋身邊。

「落雪⋯⋯」我難以置信地講。

「係落雪呀！」倩兒興奮地跑走，然後喺雪中不停轉身。

「墨爾本嘅冬天明明無可能落雪⋯⋯」除非喺山下，唔係嘅話墨爾本根本無可能落雪。

「唔好理啦！快啲過嚟啦！」倩兒高興地淋浴喺雪雨中。

「唔理你！」講完我就飛奔去倩兒身邊攬住佢，就當呢場雪係上天畀我哋嘅禮物。

「咁樣咪一齊睇到雪囉！」倩兒講。

「咁勉強都叫完成目標。」我笑稱。

「你好彩囉！」

「可以同你一齊係我嘅運氣。」我講。

「唔好怪晒運氣呀！係你揀咗喺我身邊㗎！」

「係嘅係嘅。」

倩兒退後幾步，雙手放到身後再笑住同我講：「多謝你。」

我同倩兒就返上車揸返去apartment。

車上，倩兒講：「我唔喊只係因為時機唔啱。媽媽走嘅時候比起唔開心，我更多嘅係空虛，然後一直都搵唔到機會喊，所以我先無喊。」

「傻豬，我畀你嚇死。」

「你先傻，咁都嚇親。」

「你依家有冇好啲？」

「雖然未到釋懷，但係就放鬆咗好多。」

「咁就好啦。」

「多謝你。」倩兒講完就輕輕挨落我膊頭。

過咗兩秒，我忍唔住講：「轉頭再挨，揸緊車，我怕手震。」

「衰人！唔鬼浪漫㗎你！」

翌日，老豆喺機場送我同倩兒走。

「你保重啦老豆。」

「世伯你保重。」

「你都係。遲啲喺香港再見啦。」老豆講。

上到機之後，我望住好快瞓住咗嘅倩兒，我知道呢個女仔真係好為我著想。

我都想為佢做啲嘢，所以我心中做咗呢個決定。

【第六十話 完】

聽日出結局，舊版結局唔出啦

一次過好多文

可以同你一齊係我嘅運氣

做愛都唔純真？

至少唔係寫曬過程

舊版係咩？

本來58話就完，但上面有人話唔關事，所以我收起咗個尾，成件事改咗佢算

【第六十一話 畫室】

「歡迎光臨呀咁多位。」我係教室入面同陳浩然一行人打招呼。

「呢到都幾靚喎！」周璇讚嘆。

「能否聘吾在此工作？」男班長問。

「你今次考到入大學先算啦。」女班長笑道。

「Year 1就咁大膽搞生意！」陳浩然拍拍我背脊。

「啲家長錢好易呃㗎咋。」我笑言。

「你咪畀啲家長聽到你咁講呀。」倩兒責怪我。

「今日倩兒就係大家嘅畫畫老師！大家快啲埋位！」我講完之後就拎啲畫畫工具出嚟，再坐埋去學生檯到。

「係嘅！」陳浩然坐落屬於小學生嘅坐位，比例錯晒。

「阮老師快啲教我啦！」周璇叫道。

去到呢個位，係時候講下。一年前DSE放榜之後，我、倩兒同周璇都好順利咁考入大學，分別讀CS、VA同BBA。男女班長、李樺同陳浩然雖然有3322，但係唔想入樹大嘅佢哋決定retake一年再試下。

喺Year 1到Year 2嘅Sem break，我同倩兒開咗一個畫室，教小朋友畫畫。

今次我唔係用老豆錢，而係過去一年自己去返私補賺錢，再畀錢租咗個鋪位畀倩兒教畫。

我開頭係想租個工廈單位畀倩兒搞個畫室，但係佢話要搞生意嘅話就要我哋兩個都有份，所以商討之後我哋決定喺商場開間小學生室補習社再加教畫畫做興趣班，賺錢之餘又可以畀倩兒繼續畫畫。

本來，想搞畫廊係因為我想支持佢追逐畫畫嘅夢想同時有能力維持到生計，但係最後呢份禮物我都有份。

點樣就係我想為倩兒做嘅事，除咗係佢身上得到呢嘢之外，我都想給予佢一啲嘢，我想成就佢呢個人。喺我察覺到倩兒都我嘅全心全意同著來之後，令到另一半變得更加好呢個諗法就一直糾纏喺我嘅思緒入面。

或者我哋兩個已經唔洗再分你我。因為對方開心嘅話自己都會開心，我哋要嘅係兩個人同時開心，一個人開心但係另一個人唔高興嘅話我哋都唔會完全地高興。

我哋要嘅係自己同對方同時開心，所以真係無你我之別。倩兒唔再係他人，而係變咗自己嘅一部分，對倩兒嚟講我都應該係咁。

依家6月，陳浩然佢哋等緊DSE放榜，因為唔會阻到佢哋溫書，所以我哋今日邀請咗佢哋上嚟玩下。

「今日我要同大家一齊畫一樣大家都熟悉嘅嘢。」倩兒透過Projector展示一張相畀眾人睇。

「唔係咁開心呀。」陳浩然質疑地講。

「都幾有趣呀。」周璇笑道。

「亦為一個回憶。」男班長點頭。

「都可以係一個總結。」女班長延伸。

「快啲開始啦！」李樺雀躍地講。

倩兒見到大家熱烈嘅反應，佢都開始開始進入今日嘅正題，開始教大家素描。

見到倩兒嘅笑容我都會心微笑。

大家都仲係到。

大家無因為中學畢業而分散，只係相處嘅時間無以前咁多，但係大家都仲係呢到。

我望住其他人，大家猶在嘅感覺令我悸動。

回顧過去，當年倩兒不情願咁嚟到呢個家，到選擇留係我身邊，最後成為我嘅另一半。

曾經，我可以選擇對倩兒嘅窘境視而不見，但係我選擇咗走入佢嘅生活，而佢都走入咗我嘅生活。

我哋無驚天地泣鬼神嘅愛情故事，我哋有嘅只係默默陪住對方嘅時光。

因為倩兒嘅存在，我嘅生活變得精彩起嚟。

阮倩兒，多謝你。

今後我都會喺你身邊。

返到屋企之後我攬住倩兒，然後喺佢耳邊細細聲講：「我愛你。我會一直喺你身邊。」

一個願意喺我身邊嘅人、一個肯等我嘅人、一個支持我嘅人，我真係好幸運。

「我都係。我會一直支持你。」倩兒笑住回答。

完。

完！！！！！

冇甜完

搵到個咁嘅另一半 夫復何求