[真人真事][校園][純愛]《最陌生的人，就是曾經最熟悉的人》

睇到諗起同個女仔既回憶

分享下

唔啦 驚佢見到 怕佢仲放唔低 好似啊琳咁

佢係絲打?

唔知佢係唔係 但驚係

明白的

推推推

多謝

我想見的笑臉 只有懷念

不懂 怎去再聊天

不如不見聽到好sad

好久不見同不如不見真係

我鐘意斷絕來往多d

我鐘意斷絕來往多d

冇聽柏宇

第七十章
日子一日一日咁樣過去
呢排我做嗰啲野都係差唔多
即使我已經返到去外國,
我都係keep住同呀琳用面書傾計
當然啦,
係用Angela Wong個身份
而唔係樂仔,
不過講真,
有時都唔係成日傾
始終佢都要應付A-Level
間唔中咪同下佢講加油,
唔好咁搏呀之類嘅說話
雖然我知道呢類說話未必幫到佢
不過我都係滿足自己
因為我真係好耐冇同過佢呢啲鼓勵說話
難得依家有機會,
咁樣我梗係唔會放過啦
咁喺考A-Level期間,
我有時都會喺面書入面問佢考成點
咁佢都話考得唔錯
起碼去到臨場冇淆底
咁佢有時會問返我,
好彩我之前已經估到有呢一著
所以每次我都問下Candice
聽下佢講嗰啲卷有乜野重點
同埋嗰啲口試題目係揀中邊條等等
當然啦,
Candice係唔知道我會咁做
我亦都冇同佢講
正如我當初喺天台望住呀琳一樣,
佢都係唔知
呢啲野點樣講出口呀
所以Candice每一次問我,
點解咁關心佢地考A-Level
我都淨係話想睇下香港嘅A-Level考乜野內容
而冇講到我有同呀琳傾計
之後呀琳有一日同我講
話佢聽日考埋英文口試就完,
仲問我幾時考
咁我就梗係話冇咁快啦
因為我冇問到Candice英文口試考乜野
之後我問返佢點樣慶祝
佢話佢會同frd唱通宵k
我估佢呢個frd應該就係Candice
之後我喺msn問返Candice,
原來我冇估錯
呀琳真係同Candice唱通宵k
佢兩個又會咁啱
夾埋喺同一日考
如果當初,
我冇去到外國的話,
會唔會聽日就係我陪你唱通宵k呢
算啦都係唔諗啦
珍惜現在好過.

咁樣喺六月頭,
我見到呀琳upload左啲謝師宴嘅相
相中入面嘅呀琳
著住一條白色裙
仲要著埋一對白色高踭鞋,
真係好似公主
我見到佢同好多同學,老師影相
張張相,
呀琳都將對方比下去
喺我眼中呀,
除左呀琳之外,
我見到好多熟悉嘅面孔
有唔少都係我以前嘅同學同埋老師
睇相都覺得佢地好開心
之後我就喺msn搵左Candice,
佢話我地學校謝師宴條例就好寬鬆
佢話講到明俾舊生返去
即係有啲喺度讀中四中五,
但係會考之後就去左第二度讀,
我地學校係俾佢地返去
早知我就乘機返去
最多俾機票錢
但我覺得係值
因為謝師宴個個肯定會做到好隆重
我返去睇女都好呀
當然啦,
其實我目標只係一個
就係想見返呀琳,
嗰日佢真係好靚
不過依家講乜都冇用
都過左去喇,
一生人唔會再有第二次中學嘅謝師宴
錯過左就錯過左,
就好似呀琳咁樣,
無論我依家點樣努力都好,
佢個世界都唔會對住我開放
佢立心趕我出嚟,
就一定唔會接納返我
睇睇下啲相,
我再喺個銀包入面,
拎返當年中四畢業禮我同呀琳影嗰張合照
原來呀琳喺三年入面都唔係變得好多,
都仲係我熟悉嘅容貌
就算依家行出街見到佢都會認得
好彩當日有叫到Candice曬張相俾我,
如果唔係,
我對呀琳嘅容貌,
一定會比依家模糊
其實我好想,
可以好似嗰張合照咁樣,
再搭多你一次膊頭
我唔貪心,
一次已經夠
當然我都知係妄想啦
但我都仲係控制唔到自己咁樣諗,
明明同自己講過唔好ff咁多
結果我都係做唔到,
就好似當初咁樣
我同我自己講過,
好想令到你笑
我亦同你講過,
唔會激嬲你,
結果,
我都係一樣都做唔到
之後我inbox呀琳,
Angela:「謝師宴好唔好玩呀 」
呀琳好快就覆左我
呀琳:「好玩呀 」
Angela:「著得好靚喎 」
呀琳:「多謝呀
都係個frd陪我揀 」
Angela:「男仔嚟 」
其實我問呢條,
係想知道呀琳依家有冇拍拖
明明一早同我冇關,
但我都仲係要問
真係好諷刺,
呀琳:「唔係呀
女仔嚟
好朋友咋.」
Angela:「原來係我諗多左 」
呀琳:「冇你咁靚女呀 」
Angela:「你靚啲啦 」
其實呢句唔係擦鞋,
我真係覺得你係最靚女
幾時問我都係咁講
呀琳:「好喇,
唔好再互派高帽
咁你去左謝師宴未 」
Angela:「去左喇 」
呀琳:「唔擺相嘅
等我睇下你著得幾靚丫嘛 」
我堂家姐喺大陸都冇謝師宴
咁我又點樣搵相俾你呢
Angela:「擺咁大堆相好煩 」
呀琳:「哈哈係呀
咁啲野好唔好食 」
Angela:「ok啦 」
呀琳:「貴唔貴呀 」
Angela:「麻麻地啦ok嘅 」
呀琳:「你知唔知我地幾好笑呀......」
我喺度同緊呀琳傾計嗰陣,
其實我依家做嘅野
咪正正係我以前同佢傾計咁囉
你一言我一句,
大家接著大家,
氣氛好好
好開心,
同msn一樣,
我估唔到呀琳會同一個陌生人講咁多野
雖然我依家都係佢朋友,
但始終只係上網識,
開心嘅係,
呀琳會同我講咁多咁嘅野
等我可以知道佢個近況
唔開心嘅係,
佢同一個上網識嘅女仔都咁多野講,
反而同一個現實識嘅人可以一句野都唔講
我都唔知我應該開心好定係唔開心好.

午安

樂仔應該要借機約阿琳出黎睇eason演唱會,然後相認啦

樂仔應該要借機約阿琳出黎睇eason演唱會,然後相認啦

咁樂觀

巴打今晚仲有冇？

巴打今晚仲有冇？

有

交呢

交呢

依家出

第七十一章
六月尾,
就係呀琳同Candice放榜嘅日子
咁我梗係即刻問Candice佢同呀琳入邊間u啦
斷估唔會爆冷入唔到掛
所以我就喺msn問Candice,
我:「你地入邊間u 」
Candice:「你又知我地實入u 」
Candice冇野好
最好就係長期online
一搵就搵到佢
我:「扮乜野呀你
你地係睇下入邊間嘅啫 」
Candice:「咁誇獎呀 」
我:「咁究竟你地地入邊間啫 」
Candice:「城大呀 」
我:「兩個一齊丫 」
Candice:「係呀 」
我:「咁咪如你地所願囉 」
Candice:「嗯 」
我:「去到大學好多狗公,
你睇住呀琳呀 」
明明一早已經同我冇關係,
但我都仲係要去理
我叫佢睇住呀琳
係因為大學咁多狗公,
呢啲狗公通常都係呃蝦條,
會令到呀琳受傷害
所以我先叫Candice睇住呀琳,
最諷刺嘅係,
傷佢傷得最深嘅人偏偏就係我
咁我又有乜資格去講呢
講完我都覺得慚愧,
Candice:「得喇
放心啦 」
之後我就再喺面書入面搵呀琳
點解都仲要搵
首先,
呀琳並唔知Angela Wong嘅真正身份,
放榜個個都講
Angela Wong身為朋友,
咁去問佢都好正常丫
反而唔問就唔正常
之前間唔中會傾下計,
依家放榜竟然唔問
所以我就算知道答案
都要問多次呀琳,
Angela:「你入邊間u呀 」
呀琳:「城大呀 」
Angela:「開唔開心
係咪想入嗰間 」
呀琳:「開心呀
同好姊妹同一間 」
Angela:「咁咪好囉 」
呀琳:「你呢
你讀邊間呀 」
弊喇
我冇諗過佢會問番我添,
我唔可以答城大丫
萬一我話係我都係城大,
佢就嚟搵我見面咪死
所以我求其講左間,
Angela:「科大呀 」
乜野科就唔問佢啦
事關我都唔知有咩科
萬一佢問番我轉頭就pk
等我遲啲問返Candice咪知囉
之後我估佢地可能要搞大學啲野
所以我都好少搵佢地
等佢地安頓好晒,
先再傾都未遲
你問我有冇掛住同呀琳傾計嘅時間
話冇就呃你
但係我喺度諗,
其實我同佢原本唔應該有傾計嘅時間
我依家都係借左第二個身分去呃傾計嘅時間
我應該要好滿足啦,
如果呢個時候仲喺度慨嘆,
佢呢排少同我傾計的話
咁我就真係貪得無厭,
做人唔可以咁貪心架.

過咗一個月左右,
Candice喺msn搵我
Candice:「樂仔講單野俾你聽 」
我:「講嚟聽下 」
Candice:「呀琳今日搬屋呀 」
我:「搬去邊度呀 」
Candice:「觀塘囉,
我今日都有幫佢手 」
我:「咁嗰部鋼琴呢
有冇一齊搬埋 」
Candice:「有呀
佢地call左車,
所以可以搬埋去
係喇點解你會知佢有部鋼琴嘅 」
我:「佢之前買嗰陣係我幫佢搬返去丫嘛 」
Candice:「好q重喎 」
我:「佢有架大板車俾我呀嘛 」
Candice:「唔怪得佢死都要搬返去啦 」
我:「唔明 」
Candice:「呀琳同我講過
佢媽咪話如果嫌重,
可以將部舊琴賣出去
然之後再買部新嘅返嚟,
但係呀琳死都要搬
唔肯買新鋼琴,
仲話有好多回憶呀裏面.」
我:「你想講乜呀 」
Candice:「你明我講乜野嘅 」
我:「佢之前好鍾意呢部琴
我同佢買嗰陣,
見到有好多比佢呢部更加貴嘅琴都冇買
一心只係想買呢部 」
Candice:「咁我就唔知啦 」
我:「我同佢過左去啦
分分鐘佢已經唔記得我係乜水.」
Candice:「會唔會呀 」
我:「我仲好記得中五嗰陣,
佢對我嗰種冷漠嘅態度
我就知道我做乜都冇用
佢都唔會再接納番我呢個朋友.」
Candice:「呢啲野冇人幫到你
你自己明就得啦 」
我:「嗯 」
之後我上面書,
見到呀琳upload左一幅相,
係講佢搬屋
咁我就大條道理搵佢喇
Angela:「你搬屋呀 」
呀琳:「係呀 」
Angela:「搬去邊度 」
呀琳:「觀塘 」
Angela:「點解嘅 」
呀琳:「屋企人決定
我都冇加意見哈哈 」
Angela:「辛唔辛苦呀 」
呀琳:「辛苦呀
部琴好重 」
Angela:「你識彈琴呀 」
呀琳:「識少少啦 」
呀琳真係好謙虛
無論三年前對住我,
定係三年後對住Angela,
佢都仲係咁謙虛
呢方面一啲都冇變過
Angela:「點解唔放棄呢部
走去買第二部,
咁你咪唔使咁辛苦囉 」
呀琳:「點解你同我媽咪講同一樣野嘅 」
梗係啦,
我喺Candice口中得知架嘛
Angela:「咁啱呀 」
呀琳:「係呀
佢都係叫我咁做,
但我真係好鍾意呢部鋼琴
同埋有好多回憶 」
Angela:「咩回憶呀 」
終於問到我最想問嘅野,
雖然轉換左身份
不過都起碼達到目標
呀琳:「中學回憶,
所以有得保留嗰陣盡量都想keep返住 」
Angela:「咁好啦唔阻你休息喇
拜拜 」
呀琳:「拜拜 」

夜闌人靜嗰陣,
就係我諗野嘅時候
你搬左屋,
即係我第日返到嚟香港嗰陣,
我都唔可以好似之前咁樣
喺天台偷望你
估唔到我依家連偷望嘅權利都冇埋
想見你一面愈嚟愈難
我好想知道,
究竟你講嘅中學回憶,
當中有冇我呢個人喺度呢
其實我大可以追問落去,
我甚至可以同你講,
我就係樂仔
但我好擔心一樣野,
呢樣野唔係你講嗰個答案唔合我心意,
如果你話,
你中學嘅回憶入面係冇我
我完全可以接受
最多只係有啲啲唔開心,
況且我已經接受晒,
已經過左最痛嘅時期,
我最擔心嘅係,
如果我話我係樂仔
我好驚你會從此唔同我聯絡
咁我就唔可以再同你傾計,
去了解你嘅近況
咁我開呢個面書用戶就變得冇意義
呢個風險我真係唔會去搏.

其實呀琳仲在意架
乖啦，去追返人啦

唔好喊

其實呀琳仲在意架
乖啦，去追返人啦

老實講到依家仲未知佢在唔在意

睇到好心up 雖然男豬抵死

睇到好心up 雖然男豬抵死