[真人真事][校園][純愛]《最陌生的人，就是曾經最熟悉的人》

第四十四章
大家做過中學生都知
考完試就梗係派卷
講起啲成績,
我就不過不失
好彩有呀琳幫我溫一溫
如果唔係真係不堪設想
精英班啲讀書狗真係好勁
全部都係幾分上落,
你個成績差三分,
排位已經可以差好遠
呢個係我之前諗都冇諗過嘅野
因為係普通班嗰陣,
三分只係一個好細嘅分數
基本上對你嘅成績冇乜影響,
精英班係完全兩個世界
三分變左係一個好大嘅分數
我仲記得,
有一條友俾老師改錯卷
改多左三分俾佢,
佢嗰科嘅成績即時由全班第一跌到去全班第五
可想而知,
精英班真係好緊湊
講開又講,
呀琳同Candice真係好勁
每一次都名列前茅
好彩我冇影響到呀琳個成績啫
如果唔係真係對唔住佢
掛住同我呢條粉腸溫書
搞到自己成績冇咁好
到時我就真係唔知點算
派完卷之後,
跟住學校淨返散學禮
我地即將升上中五
諗番起呢一年,
都覺得好奇妙
首先喺上年呢個時候,
收到張成績表嗰陣
知道我係讀精英班
嗰一下好開心
我終於可以同我自己心入面嘅女神同一班
因為當時估計呀琳九成九都係入精英班
但九成九始終唔係肯定,
特別係當你愈重視愈期待一樣野嘅時候,
你就會愈有保留
所以當夜晚Candice打過嚟,
肯定左呀琳係入精英班嗰陣
真係開心到飛起
自己唔洗再估估下
入左精英班之後,
令我估唔到嘅係,
我竟然咁快同呀琳熟左
當然,
呢個功勞係歸於Candice
係佢同我講呀琳喺邊度補習
的而且確,
補習係令我同呀琳嘅關係提升左好多
如果冇呢樣野,
可能我地今日只係同班同學
連朋友都稱唔上
咁喺呢一年發生嘅野,
就會完全消失
我唔會同佢食甜品,
我唔會同佢去單車,
我唔會同佢去上天台食蛋糕,
我唔會收到佢送俾我嘅鎖匙扣同埋頸巾,
我唔會喺除夕夜同佢出嚟,
我唔會借個膊頭俾佢,
我唔會上佢屋企,
我唔會聽到佢提琴,
我唔會知道佢嘅身世,
仲有好多好多嘅野,
我都唔會知道,
呢方面真係要多謝Candice
係佢令我知道咁多野,
令我嘅中學生涯添加左好多色彩
未至於咁乏味
不過我覺得呢一年過得好快
或者好似啲人咁講,
開心嘅時刻過得特別快,
我完全明白呢個道理,
明呀,真係明.

到左散學禮嗰日,
處理好晒其他野
出席完之後,
我地就放學
但係大家都知架啦,
通常散學禮,
高年級學生係唔會咁快走
會留喺度影相呀玩呀等等,
我地已經係中四
即將升上中五,
咁樣都算係高年級丫
所以我地都係留一陣先走
同班男同學一齊喺度玩
講起上嚟,
係真係學生時間先會咁樣成班人一齊癲
出到嚟已經唔會有人陪你咁做
玩完一輪之後,
呀琳過左嚟搵我
呀琳:「不如影張相咯 」
咁我按照慣例,
我係拒絕唔到佢
雖然我係極唔鍾意影相
不過冇計啦,
尋晚呀琳已經講定
叫我今日帶相機
我就估到佢會叫我影相
我地先叫左Candice幫我地影一張全身相先
喺嗰張相入面,
我隻手搭住呀琳個膊頭
終於今次係佢借個膊頭俾我
跟住呀琳話不如我同佢自拍,
有幾張都幾乎面貼面
如果當時我將我個頭擰轉隔離對住佢正面的話,
基本上就一定錫到
但無論我點樣想都好,
始終唔可以跨越呢個距離
爭啲啲就係爭啲啲
不過呢啲啲對我嚟講,
真係好遠
呀琳:「咁就完左中四嚕 」
我:「係呀真係好快 」
呀琳:「我都覺 」
唔通你同我一樣,
都係覺得今年過得好開心
所以先覺得咁快
但係我始終唔敢開口問佢
我:「兩個月之後見啦 」
暑假最衰就係呢度,
因為我起碼要等兩個月先可以見返呀琳
已經冇藉口約佢出嚟
呀琳:「你就想呀兩個月
我地約出嚟玩咪得囉 」
我:「會唔會阻住你溫會考呀 」
呀琳:「溫得多都攰架
梗係要放鬆下啦 」
我:「你話架 」
好想我仲有得見
未至於咁失落
呀琳:「你唔好唔出嚟呀 」
我:「一定唔會 」
只要係你約到,
我一定唔會唔出嚟
直到今時今日都係冇變過,
唔知你仲記唔記得呢?

夜晚返到屋企,
我收到一個消息,
一個改變我一生嘅消息.

就係主腳要出國讀書
繼續推

就係主腳要出國讀書
繼續推

今晚就知

就係主腳要出國讀書
繼續推

今晚就知

推

就係主腳要出國讀書
繼續推

今晚就知

推

謝謝

第四十五章
喺當日嘅下晝,
我同呀琳喺附近商場行完一陣之後
就返屋企
咁就正式完成整個中四生涯喇
中四嘅最後一日都可以同呀琳渡過
我梗係開心啦
毒勁就係好重視呢啲野
可能喺人地眼中,
只係一樣好微不足道嘅野
但我自己就會珍而重之
珍而重之到好多年之後都記得
當中原因只有一個,
就係陪著我去做呢啲野嘅人係某個人,
一個你一生最鍾意嘅人,
返到屋企之後零舍開心
總之成個人心情好愉快
做乜野都特別有心機
啲人成日講,
暴風雨嘅前夕特別平靜,
原來係真嘅.

話說喺夜晚嗰陣,
我老豆,我呀媽同我,
三個一齊食飯
同平時完全冇分別
正當我好似平時咁樣,
食飽飯,
就返入去房玩電腦嗰陣
我老豆同我呀媽叫停住我
話有啲野想同我講下
我當時心諗,
呢單野應該都唔細單
平時好少會咁樣
專登講出口叫我唔好入房住
老豆:「樂仔,
有一單野想同你講 」
我:「做咩事 」
老豆:「你記唔記得我地之前同你講過,
話想送你去外國讀書 」
我:「記得呀做咩 」
老豆:「我地諗住安排你下年一月至二月嗰陣就去嗰邊,
你有冇問題 」
果然冇估錯,
真係大單野
我以前成日笑tbb啲電視劇,
話邊有可能咁多人去外國讀書
唔好傻啦,
個個咁q有錢咩
郁啲就話去外國讀
估唔到今次件事會發生喺自己身上
真係講都唔信
老實講,
當我聽到我老豆話送我去外國讀書嗰陣,
唔知點解,
我個腦入面,
第一時間係諗起呀琳
我喺度諗,
如果我去外國,
咁咪冇得見呀琳囉
而且當時互聯網又冇依家咁發達
唔係咁易聯絡得到
就算可以聯絡呀,
都唔會好似依家咁方便
仲未計時差個問題呢
但係我知道,
我老豆同我呀媽為左送我去外國讀書,
真係好慳家
我又實在做唔出浪費佢地心意
如果呢兩個唔係我至親,
咁我就梗係唔使理佢地啦
係咪先
唔通你慳錢我就一定要去咩
但係依家唔得
以當時我嘅心理質素去睇,
我係唔敢喺屋企人面前表達我嘅意見
簡單講,
即係廢柴一條
佢地話乜我就話乜
特別係人生大事嗰陣,
當然如果你問我,
想走定係留低,
我可以答你,
一定係留低
十年前同十年後我都係咁樣答,
唔係因為香港好啲,
亦都唔係擔心啲乜野思鄉病,
而係因為,
香港有一個我放唔低嘅人,
呢個就係我最大原因
我知道,
當我老豆咁樣同我講嗰陣,
基本上都冇乜彎轉
我屋企就咁嘅,
雞毛蒜皮嘅野,
就我呀媽話事
轉大件事就調返轉,
由我老豆揸fit
理論上我係可以參與意見
但正如我頭先所講,
我以前係唔敢喺輩份大過我嘅人面前,
表達同對方相反嘅意見
但我真係唔想放棄呀琳
所以我特登問一句,
希望可以奇蹟咁樣,
扭轉局面
我:「你地放心我一個人喺出面咩 」
我諗住打親情牌
搏佢地會覺得我自己搞唔掂自己,
所以最後都係唔送我出去
實際上,
當時我嘅自理能力真係麻麻地
老豆:「放心,
喺嗰度有你姑姐睇住你
你同佢關係又好,
點會唔放心呀 」
呢個姑姐我同佢真係幾啱傾
有啲似朋友嗰種親戚關係
所以你問我,
如果我去到外國係同佢住,
我都唔會擔心溝通上有乜野問題
老豆:「你姑姐收留你,
令到啲住宿費縮減左好多
如果當初叫你去住寄宿家庭嗰陣,
咁我地儲嗰筆錢就要更加多 」
我:「咁多謝姑姐呀......」
估唔到出親情牌都打唔贏
基本上已成定局,
因為我知道
當我老豆決定左嘅野,
就唔會變
老豆:「樂仔,
出外國讀書可能對你有幫助
尤其是你啲成績唔係特別標青 」
我:「我明嘅......」
都係嗰句,
去外國最擔心就係同呀琳個關係會變差
冇得見面真係會爭好遠
不過冇計啦,
鬼叫自己讀書唔叻
老實講,
我都覺得自己如果係香港繼續讀嘅話,
入到大學嘅機會真係唔大
當然你地會問,
點解喺中三嗰陣你就得,
依家你又冇信心呢
大佬點同呀,
一個就係中三考內試,
另一方面就係會考同埋高考,
完全係兩碼子嘅事
既然已成定局,
再諗落去都係冇用
不如珍惜埋同呀琳相處嘅呢半年,
或者咁樣仲實際.

第四十六章
過左兩日之後,
Candice嗰家人上左嚟食飯
咁食完飯,
Candice照例入左嚟我間房同我傾計
我地嘅爸爸媽媽就係喺廳傾
大家河水不犯井水
Candice:「聽媽咪講話你下年頭去外國讀喎 」
我:「係呀 」
Candice:「會考都唔考 」
我:「唔考喇
如果考埋會考先走太遲 」
Candice:「讀左中學咁耐,
唔考埋會考會唔會太嘥 」
我:「我都知
原本諗住今年就走 」
Candice:「咁點解唔喺今年就走 」
我:「唔捨得呀琳呀
所以想拖得就拖
雖然我都知遲早都要走.」
Candice:「咁我呢 」
我:「唔捨得你呀老友
咁樣滿意未 」
Candice:「算你個死仔識做 」
我:「Candice姐咁幫我
梗係唔捨得你啦 」
Candice:「認真講丫
由細細個未戒片就識你,
依家你去一個咁遠嘅地方,
點都有少少唔捨得 」
我:「痴線無啦啦做乜咁感性
我都冇咁快走 」
Candice:「又係喎哈哈
係喇,
呀琳知唔知你會走 」
我:「唔知呀
我冇同佢講過,
同埋唔知點樣開口 」
唔知各位巴打絲打有冇一個感覺,
你對住一個你好重視嘅人,
有啲野真係唔知點樣講出口
特別係呢啲唔算小事嘅事,
當然啦,
可能喺呀琳眼中只係一件小事
咁我就唔知喇,
唔好話呀琳丫,
如果對方係Candice,
我一樣唔識點樣開口
今次係Candice知道左先,
我先可以咁樣同佢講
Candice:「咁我都知好難開口嘅
你咁鍾意佢,
睇你條友都係最後先講架啦 」
我:「係呀,
我愈遲講
佢要追問嘅時間就愈少,
真係唔知點樣面對佢 」
以前嘅我就係咁樣,
從來只係識逃避,
有啲乜野事上嚟,
淨係識拖
拖都冇得再拖嗰陣先至講出嚟,
因為我覺得咁樣,
對我嚟講係最易開口
就好似以前學校派成績表咁樣
從來都係家長日之前一日,
先講俾屋企人知我啲成績
可能我覺得等到最遲一刻先至講,
佢地要問我,要煩我嘅時間,
會比起我一早講少
又或者係我根本冇乜勇氣
就是開不了口讓她知道,
我:「身邊都冇乜frd知,
你係唯一一個知,
唔好爆響口 」
Candice:「得啦
唔係唔信我呱,
識左你咁耐我知點做 」

咁樣之後嘅生活都冇乜點樣變
暑假都係喺屋企多
知鬼叫我咁毒咩
係間唔中呀琳會約我出去
有時去溫書,
有時去附近商場買野
我都有問佢,
乜唔使成日溫書咩
下年都會考
因為我見好多人都搏晒命溫書
點知呀琳話溫書溫得多都悶
不如出嚟行下玩下
證明讀書叻嘅人,
都唔係日日攞住本書讀
有時我同佢拍住行,
我望住佢嘅側面,
我真係唔知點樣開口
其實唔係冇試過,
但係每次我嗰句「呀琳呀,我半年後要去外國.」想講嗰陣,
我個口總係不其然唔識擘大
我都喺度諗,
呢張面孔,
我仲有半年就冇得望
當時唔同依家,
社交網站唔發達
你話依家就唔擔心啫
上面書,IG就可以睇到
但係嗰陣冇架嘛
衰啲講句,
真係見得一次得一次
係倒數緊,
當然佢唔知我咁諗啦,
我喺佢面前亦都扮到好正常
呀琳唔係蠢,
佢對於呢啲野好敏感
少少心情變化都可以捉到
所以我一定要喺佢面前,
盡力克制我嘅情緒
我唔知道,
當佢聽到話我下年要走嗰陣,
個心情係點
可能好平淡,
亦都可能好震驚,
我唔係佢我唔知啦,
但與其我要咁樣搏,
倒不如收埋唔好講
等佢呢一刻,
唔知我半年後要走
如果佢因為咁樣而唔開心嘅話,
呢個係我最唔想見到嘅野
唔開心唔係一樣好野,
一個擁有就夠,
唔需要兩個都唔開心,
但係,
原來我都只係空口講白話,
講就識講,
做就唔識做.

嗰種熱情一定會慢慢冷卻

btw我想知樂仔點樣形容個情景可以令你寫得咁仔細

我問題
有啲位我唔知可以點打得仔細啲

打錯字唔同咗意思

嗰種熱情一定會慢慢冷卻

lond d

btw我想知樂仔點樣形容個情景可以令你寫得咁仔細

我問題
有啲位我唔知可以點打得仔細啲

打錯字唔同咗意思

佢咁多年都講左好多次

第四十七章
喺2007年7月31號,
Candice無啦啦打俾我
呢條友好少打俾我
直覺話俾我聽應該又發生左啲事
Candice:「得唔得閒呀 」
我:「做咩先 」
Candice:「唔理你得唔得閒喇,
有啲野我要面對面同你講 」
挑
咁你就唔好問我得唔得閒啦
我:「你上嚟啦 」
之後唔使三個字Candice就到左,
我:「小姐你好趕喎 」
Candice:「梗係趕啦
今次大件事 」
我:「講嚟聽下啦
不過抖順條氣先 」
之後Candice講左一單非常震驚嘅事,
我諗都冇諗過會有呢單野發生
好意外
咁樣究竟係咩事呢
以下我就講返出嚟啦,
話說呀琳下晝約左Candice,
呀琳約Candice好正常丫
大家咁好姊妹,
但係今次竟然係約喺麥當勞嗰度
Candice就唔多明喇
因為呀琳好少約佢喺麥當勞
Candice去到麥當勞先知點解,
原來呀琳想約Candice傾啲野
所以就相約喺麥當勞一路坐一路傾
至於呀琳想同Candice傾嗰樣野,
就係令我震驚嘅嗰樣野.

咁樣究竟係乜野事,
令到我震驚呢
原來呀琳想同我表白
Candice同我複述返,
呀琳話聽日就係8月1號,
好想喺新一個月嗰陣有個新開始
Candice覺得唔意外,
因為佢一向覺得呀琳係鍾意我
Candice:「我同你講過架
係你唔信我咋嘛 」
我:「每個男仔喺自己鍾意嘅女仔面前
總係會冇乜自信架啦
會覺得自己好似同佢個世界有啲距離,
但又唔捨得放棄佢
所以就默默喺佢身邊 」
Candice:「冇膽就冇膽啦你
聽埋落去先啦 」
我:「好.」
為左方便讀者們,
以後我會用對話形式形容返呀琳同Candice講嘅野
呀琳:「你之前冇估錯呀,
我真係鍾意樂仔 」
Candice:「其實我一早估到啦
我由中一識到你依家,
你根本好少同男仔行得咁埋
我就估到你有野,
係你個衰妹唔認識咋嘛 」
呀琳:「咩喎
咁人地怕醜吖嘛
同埋我遲早諗住講俾你知
唔會瞞住你 」
Candice:「咁點解你會鍾意佢嘅 」
呀琳:「你仲記唔記得,
你曾經問過我點解會咁留意樂仔 」
如果讀者們仲記得,
我曾經叫過Candice問呀琳
點解佢會咁留意我
明明我同佢從來冇同過我同一班,
嗰陣時無論我定係Candice問呀琳,
呀琳都冇答過我地
好,
去返當時情況先
Candice:「記得呀做咩 」
呀琳:「中三嗰陣
有一次我陪你去操場睇人踢波,
你嗰陣要睇呀狗(Candice鍾意嘅嗰個男仔)嘛 」
Candice:「係呀
跟住呢 」
Candice:「因為我嗰陣,
我個目的只係陪你
全程淨係掛住同你傾計
冇望到出面,
突然之間有一球波
飛埋嚟我嗰度
我嗰陣真係好驚
因為個波同我好近
同埋球速好快,
我係驚到郁唔到
當我以為自己一定會俾個波打中嗰陣,
有一個男仔用手拍走左個波
嗰個男仔就係樂仔 」
我聽完之後,
終於醒返起有件咁嘅事喇
話說我地學校晏晝會開放個操場俾我哋做運動
我地一係就打籃球,
一係就踢波
我冇記錯的話,
籃球同踢波係梅花間竹咁樣間住
一日踢波,第二日就打籃球
咁啱嗰日就係踢波
我自不然就落左去踢啦
我自己喺學校踢波呢
就極度唔專心嘅
會成日望下個操場
邊度有靚女
唔同我地喺街場
喺街場真係好想贏
一心一意踢好場波佢
咁我嗰日就見到呀琳行左出嚟睇我地踢波
當時我同佢係完全唔識
又或者咁講,
係我識佢佢唔識我
所以淨係踢踢下嗰陣,
望住佢就算
冇其他舉動,
基本上我全程個活動範圍淨係喺佢企嗰個位附近
因為近望睇得清佢
我好清楚嗰陣佢唔係想睇我踢波
佢話就話企喺度,
但係成程都係掛住望隔離
亦正正係因為佢望住隔離,
所以並唔知道我望住佢
突然之間,
有條友斬左個高空波俾我
點知嗰條友屎波
斬得高得滯
最慘係,
佢嗰個波又唔係細細力嗰啲
係大大力咁樣飛埋去呀琳嗰度
按道理,
我係唔需要追嗰球
因為實出界
如果用勝負角度去睇
最多咪等下一球,
重新組織過
但正如我頭先所講,
當時個波係直飛去呀琳嗰度
呀琳又掛住望隔離,
根本唔知個波飛緊埋嚟
係有條友大聲叫:「睇波呀 」
呀琳先望返住個球場
嗰陣見到佢個樣嚇到呆晒
咁我冇理由唔做野架,
所以就即刻扮頂頭鎚
之後用隻手拍走佢
化解呢個攻勢
但係大家都知啦,
邊有咁多做英雄呀
我咁樣做之後,
梗係唔會好似電影咁樣
什麼英雄救美啦
我得到嘅下場,
只係俾人鬧我做乜手球
某人:「樂哥,
依家唔係呀你打龍門喎
做乜扮卡斯拿斯守籠呀 」
我:「收皮啦
個波傳得咁衰,
姚明都頂唔到啦
焗住用手 」
我以為呀琳唔知係我拍走個球
因為當時佢嚇到面容失色,
所以一直冇放喺心上面
原來呢單野佢係知道.

sad end就負皮x2

sad end就負皮x2

唔好呀

唔想睇住一段感情白白流走
雖然係故，但完全代入晒

唔想睇住一段感情白白流走
雖然係故，但完全代入晒

多謝巴打咁投入

快d出文呀 衰鬼，搞到我甘感動

快d出文呀 衰鬼，搞到我甘感動

好好好

第四十八章
繼續去返呀琳同Candice嘅對話先
呀琳:「你知啦,
女仔對一個人有好感,
啲原因係可以好怪架嘛 」
Candice:「我都明白 」
呀琳:「當時樂仔仲俾人笑佢用手球
我嗰陣唔夠膽出聲
其實我係好想多謝樂仔
佢嗰陣真係好型 」
Candice:「聽你咁講又真係幾型嘅
你個衰妹都收得密喇,
原來嗰陣已經對人有野 」
呀琳:「嗰陣只係有好感啫
真係鍾意佢係今個學期嘅事 」
Candice:「竟然係咁
講嚟聽下 」
呀琳:「你嗰陣想同呀狗一齊坐丫嘛
咁我咪成全你地囉
一入到去,
見到樂仔坐左喺最後嘅單丁位
我就二話不說坐佢前面喇
我嗰陣好開心架
因為中四中五可以同佢同班(我地學校中四之後唔會再調班),
你都知啦,
好多男仔都成日搵我傾計
但係嗰陣樂仔好奇怪
坐左我後面一陣,
從來唔會同我傾計
當我同佢傾計嗰陣,
講野又窒下窒下
但明明之前聽佢講野都唔係咁樣嘅
我就覺得佢好搞笑喇,
又好特別喎 」
Candice:「你鍾意人先玩人特別啫 」
呀琳:「嘻嘻
係架
我地喺補習社相遇嗰一刻真係好開心
當時我仲暗自對個天講左句多謝
因為真係冇諗過會喺補習社見到佢
之後同佢傾計,
先發覺佢真係好怕醜
同平時喺學校好多野講完全唔同
咁我就信佢真係好少同女仔接觸啦
當時嘅佢好可愛架,
唔知點解,
我對住佢真係好開心
可以乜都同佢講
唔會有dead air,
個感覺好好
同埋個傻仔好鍾意聽我彈琴
原本有人讚我彈琴好聽,
我已經好開心
仲要係樂仔讚我,
咁我梗係更加開心啦
平時對我又好好
特登去買蛋糕同我慶祝生日
兩個人靜靜地食蛋糕係好開心,
嗰種感覺好寧靜
同埋成日肯借個膊頭俾我瞓覺
其實有幾次我係唔眼瞓,
只係想乘機挨喺佢膊頭嗰度
挨喺佢膊頭真係好舒服
好溫暖架
有次我踩單車受傷,
佢孭起我返屋企嗰陣係最開心
佢仲問我介唔介意啲汗黐住我
我心諗梗係唔介意啦
佢嗰陣咁著緊我,
又幫我貼膠布
又可以扶實佢
最後仲可以俾佢孭住,
老實講丫,
我嗰陣反而覺得受傷係一件好事
我係咪好傻呀 」
Candice:「咁佢知唔知你咁樣諗先 」
呀琳:「梗係唔知啦
佢好蠢架
我成日鬧佢蠢
佢都唔知
我有時都做到好出面
例如成日同佢飲埋同一支野,
點知佢個反應只係覺得兩個人飲埋同一支野
完全唔知我個意思
咁樣都算喇,
有次我彈孤單心事俾佢聽
佢完全唔明白當中有咩意思
除夕呢啲大日子約佢出嚟,
我諗住佢會feel到啦
點知又唔知
有一次我特登玩接龍,
同佢講我愛你
咁你知啦,
女仔都要矜持架嘛
諗住藉住玩接龍同佢講我嘅心意
但係佢又唔知道
除夕嗰晚,
佢話送我返屋企,
我特登同佢慢慢行返去而唔搭巴士
俾晒機會佢都feel唔到
真係蠢到加零一
有時我都唔知,
佢係鍾意我,
定只係當我朋友
所以我好想聽日約佢出嚟表白
還掂佢咁蠢,
等佢同我表白真係蚊瞓
倒不如我開口算
聽日就係8月1號,
如果得左嘅話,
一嚟代表住有新開始
二嚟呢個拍拖紀念日好易記 」
Candice:「加油呀
作為姊妹一定支持你 」

原來呀琳鍾意左我咁耐
我真係完全唔知道
聽完之後,
我喺度鬧自己
點解咁鬼蠢
如果當初醒啲嘅話,
我同佢已經係情侶
Candice:「你話係咪好大件事喇 」
我:「真係好大件事 」
Candice:「咁你諗住點做呀 」
我:「我鍾意佢,佢鍾意我,
正正常常的話
大家就順理成章拍拖 」
Candice:「係呀 」
我:「但係我半年之後要去外國
既然我而家知道佢咁鍾意我,
到時真係要分開的話,
無論對我對佢都唔好受 」
Candice:「唔係掛
唔通你想拒絕佢 」
我:「老套啲講句,
長痛不如短痛
如果我同佢拍拖,
冇錯,
我係好開心,
但係到分離嗰一刻,
我地會比從來冇開始過更加失落 」
Candice:「咁你地可以試下嘅啫
唔一定要拒絕佢呀嘛
你又鍾意佢,
佢又鍾意你,
拍拖其實好正常
遲啲嘅事遲啲先算啦 」
我:「但係到時就唔止我一個唔開心
佢都會唔開心
我走都走得唔安樂,
我只會更加唔想走
走左之後,
又唔知點樣維繫long d呢
我唔想呀琳到時咁辛苦去遷就我,
如果我地要維持喺msn傾計,
佢要捱到好夜先得
佢好鍾意瞓覺架,
我唔想佢辛苦
與其係咁,
不如從來冇開始過
如果到時大家真係仲係鍾意大家的話,
到時再開始都未遲 」
Candice:「你有你意見我一定尊重你嘅
我諗佢都估唔到你會拒絕佢 」
我:「我都估唔到自己係咁啦 」
之後我個電話響起,
原來係呀琳打俾我
Candice:「邊個打俾你 」
我:「呀琳呀 」
Candice:「佢打嚟應該想聽日約你表白 」
之後我就接聽左,
呀琳:「樂仔聽日有冇野做呀 」
我:「冇呀做咩 」
呀琳:「不如聽日約出嚟丫
天台等好冇
有野想同你傾 」
我詐傻咁同佢講:「想傾乜野呀 」
呀琳:「聽日你咪知囉
兩點半等啦 」
我:「好啦 」
呀琳:「咁聽日見啦拜拜 」
我:「拜拜 」
Candice:「我有冇估錯呀 」
我:「冇呀
萬一聽日佢唔接受我嘅答覆,
你記住要喺佢身邊陪住佢 」
Candice:「知道啦
你會唔會後悔呀
而家改仲嚟得切喎 」
我:「唔會喇
你幫我睇住佢就得喇.」
Candice:「咁好啦,
唔阻你啦拜拜 」
我:「拜拜 」
Candice走左之後,
我喺度諗,
我自己都估唔到自己會拒絕佢嘅表白
明明我咁鍾意佢,
以前恨同佢拍拖恨到發燒
估唔到依家有機會嗰陣反而就拒絕
諗都冇諗過會係咁
如果我唔去外國咪好囉
我嗰陣覺得唔開始係好過開始,
縱使千萬個唔願意,
我都要狠下心腸
但我估唔到,
今晚係我最後一次同佢講電話,
以前嘅我就係咁樣,
成日估呢樣估嗰樣,
但係全部錯晒,
一啲都唔準,
從前計錯得太多喇,
做人千祈唔好自以為是,
呢個世界唔係你覺得咁樣就係咁樣,
唔好以為自己好醒,
所有野都計得啱,
因為當你計錯嗰陣,
後果係你承擔唔到架.