[真人真事][校園][純愛]《最陌生的人，就是曾經最熟悉的人》

第六十四章
終於去到外國
咁我就唔多講喺外國嘅生活啦
一嚟嘅悶親大家
二嚟亦都冇咩特別好講
有冇識到鬼妹
朋友嗰種囉
唔知係咪我好彩,
我去到外國遇到嗰啲朋友
不論男仔定女仔,
我都覺得佢地幾友善
初初溝通上係有少少困難架
始終唔係用緊母語
不過慢慢就慣啦
其實好多野都係架啦,
你如果用一定時間去浸,
好多野都會習慣
人始終係有慣性嘅生物
不過咁,
你問我鍾意喺香港多啲
定係喺出面多啲
咁就梗係香港啦
始終我適應左香港嘅生活模式十幾年
我喺外國只係幾個月
冇得比嘅
咁當然我又唔係有乜野思鄉病,
只係夜晚間唔中會諗返喺香港嘅事
唔知老豆同老媽子生活點呢
冇左我呢個忤逆仔又慣唔慣呢
定係完全冇影響
少左個人阻住佢地二人世界
佢地可能仲開心呢
唔知Candice準備會考準備成點呢
不過我估佢搞得掂嘅,
讀書成績咁好
當然,
除左諗佢地之外,
當然仲醒起一個人啦
唯一唔同嘅人,
當我諗起其他人嗰陣,
隻眼好生性
唔會排啲水出嚟
唯獨諗起嗰個人,
眼睛就變得好唔聽話
我都控制唔到佢地,
由佢地自己流出嚟
我真係好掛住佢
成幾個月啦,
自從我升左中學之後,
我未試過咁耐未見過佢
以前最多都係暑假個幾月見唔到佢,
今次係最耐
成兩三個月,
兩三個月已經咁樣,
好難想像喺度四,五年會點樣.

喺呢段時間,
Candice間唔中都會同我喺msn傾下計
多數都係佢問我喺外國點樣
我問佢地喺香港點樣
當然啦,
話題入面梗係牽涉到呀琳
Candice話呀琳好搏命,
係咁溫書
佢預計佢地兩個都可以原校升上中五
我聽到都覺得好開心
因為我知道呀琳好想升返原校,
佢好耐之前講過
可能佢會覺得我已經唔記得晒
但其實唔係,
正如我之前所講
佢講嘅每一句說話,
我都記得好清楚
甚至比自己嘅事更加清楚
每一次同Candice喺msn傾完計,
準備offline嗰陣,
我都不其然會望呀琳個聯絡人名稱度
仲係灰色
我唔知佢係冇on定係繼續封鎖左我
其實有幾次我好想同佢講啲好老套嘅說話
乜野會考加油努力嗰啲呀等等
但係最後都冇咁做,
佢做咁多野趕走我離開佢嘅世界
如果呢個時候,
我再咁自私
為左一己私慾而接觸佢,
我覺得會影響到佢
當然,
佢可能一早已經當我不是甚麼
但無謂搏啦係咪先,
從Candice口中知道佢啲消息就已經好足夠,
我已經傷害左佢一次
我到今時今日,
都仲記得當日佢崩潰嗰個樣
歇斯底里咁樣喊
依然歷歷在目,
我冇得同佢講野,
我就好自然
拎住佢送俾我嗰個鎖匙扣,
對住個鎖匙扣講
「呀琳
唔好俾咁大壓力自己呀,
你咁叻
一定可以升返原校繼續讀,
以前你溫書嗰陣,
係咁幫一條廢柴溫書
你嘅成績都冇影響
依家身邊少左個廢柴
咁又點會唔得呢?
冇左個人阻住你仲好啦 」
呢啲就係我想同佢講嘅野
其實都唔係第一次,
之前都已經咁樣
每當我有乜野想同佢講嗰陣,
我都係唔敢搵佢,
唯有用一個咁樣嘅方法滿足自己
我都解釋唔到我點解會咁樣做
明知佢唔會聽到嘅
講講下,
我再望一望個「琳」字,
就知道今晚,
我又控制唔到對眼.

謝幫推

唔好唔開心

今日無啦？

今日無啦？

夜晚有

等你

等你

好

第六十五章
跟住落嚟都冇乜特別,
轉眼間去到八月
就係香港會考放榜嘅日子,
之前Candice已經同我講左今日話放榜
唔知佢同呀琳考成點
應該得嘅
等左好耐,
Candice終於上線
我:「你地考成點 」
Candice:「一如所料可以升讀原校 」
我:「咁咪好囉 」
Candice:「我同呀琳都好開心
但係跟住落嚟又要應付A-Level
都係放鬆一陣咋
A-Level難好多 」
我:「咁我唔知呀
你地加油啦 」
Candice:「唔講喇
我依家同呀琳出嚟慶祝,
遲啲先傾啦 」
我:「拜拜 」
呀琳如願以償
真係好開心,
其實我知道,
佢考成點,
同我已經冇關係
佢唔會同我講,
唔會同佢慶祝
但即使係咁樣,
我都仲係好開心
都係嗰句,
佢開心就係一切
當然如果想再圓滿啲,
我梗係好想係自己令佢開心啦
不過冇可能架喇
算數啦,
幻想得太多
最終受害嘅只係自己,
其實我依家可以知道佢嘅近況
已經好難得
唔敢再奢求其他野喇.

去到十月,
係呀琳生日嘅大日子
呢個時候,
Candice就梗係會搵我啦
我仲記得上年
我見到佢用緊我買俾佢嘅水樽
真係好開心
呀唔係,
係「Candice媽媽」買俾佢先啱
咁快就已經一年,
我去到外國都已經有半年咁滯
我仲記得上年呢個時候,
每逢星期一,三,五,
就跟喺呀琳後面行
原來我已經有成半年冇再跟住佢嚕
有時,
我都明白有啲巴打,
唔係好鍾意跟住自己嘅女神行
因為覺得咁樣同女神好遠,
唔想再追逐女神
而係想拍住女神,
我可以理解
但係當你去到一個階段,
連追逐嘅資格都冇嗰陣
你就明白,
其實跟住自己嘅女神行,
都衰唔晒,
起碼你仲可以去「追逐」先
其實已經好過唔少人,
有啲人,
連追都冇得追.

咁之後Candice就搵我
Candice:「就快到呀琳生日,
今日有乜野表示 」
我:「我想自己揀禮物,
但係依家我喺外國
所以今年唔使麻煩你
等我可以自己揀嗰陣,
先再勞煩Candice姐你出馬 」
Candice:「冇問題丫 」
我:「不過你驚唔驚呀琳會問你
點解今年你媽咪唔送禮物俾你 」
Candice:「唔驚
佢唔係呢啲貪得無厭嘅人,
當佢知道冇嗰陣就好識做
唔會打爛沙盤問到篤
就算會都唔驚啦,
大把藉口 」
我:「你都算狗囉
好姊妹你都呃 」
Candice:「唔想架,
鬼叫你係青梅竹馬咩 」
我:「係喇,
咁佢依家仲係咪用緊我送俾佢嘅嗰個水樽 」
Candice:「係呀 」
聽完之後,
總算有少少安慰
其實我好清楚,
如果呀琳知道真相之後,
佢一定唔會用個水樽
佢咁恨心忘記咁多野,
點會接受我送俾佢嘅野
如果係咁嘅話,
佢依家係用緊第二個水樽
而唔係我送俾佢嗰個,
我呢啲安慰,
其實都只係呃返嚟
如果唔係Candice俾個身分我,
唔好話呢啲安慰
我連佢會用我買嗰個水樽嘅機會都冇,
所以真係好多謝Candice
咁唔怕麻煩去幫我,
唔會有人用其他身分係會開心
人始終係有私心,
點會想自己做嘅野係用人地身分去做
冇功勞之餘,
又冇錢落袋
只有一種人例外,
就係嗰種知道自己已經唔可以令對方開心
所以先用第二個身分,
去做自己做嘅野.

其實樂仔忽然唔見左去外國讀書 啊琳唔會覺得好意外咩 然後唔會懷疑當初樂仔係為佢好先reject?

其實樂仔忽然唔見左去外國讀書 啊琳唔會覺得好意外咩 然後唔會懷疑當初樂仔係為佢好先reject?

嗰陣考會考
Study leave之後冇見過,
之後可能以為佢轉左校讀中六

到最尾Candice有無同呀琳坦白話其實同主腳係青梅竹馬？

到最尾Candice有無同呀琳坦白話其實同主腳係青梅竹馬？

唔劇透

Candice 幾好丫
樂仔有無鐘意過佢

Candice 幾好丫
樂仔有無鐘意過佢

冇
佢話真係冇feel
可能由細識到大?

加速未

加速未

盡量

睇到標標地眼淚

睇到諗起同個女仔既回憶