Leaps call/put 討論區

甚麼是leaps？
Leaps嘅全名係Long-Term Equity Anticipation Securities，意思係一年或以上嘅指call/put option。

結論
好處：
- 槓桿效應放大回報，無保證金要求
- 槓桿倍數任你揀，風險可高可低，靈活有彈性
- 以較低成本接觸高股價股票 (e.g. AMZN, GOOG)

缺點：
- 唔適合短線投機賭博，只適合長期投資
- 需要一定期權知識，起碼你要明白時間值、delta、rollover依啲概念
- 唔適合本金太細嘅人，起碼要有幾千蚊美金
- 唔係隻隻股票都啱玩，只適用於期權交投最活躍嘅股票/ETF (e.g. SPY, QQQ, AAPL, AMZN, BRK.B)
- 數據稀少，難以backtest

lm

Leaps call/put有咩用？
有啲優質股票/ETF你長遠睇好會升，但係又嫌爆發力無妖股咁勁。Leaps call可以幫你放大優質股嘅回報，等你唔洗炒妖股都有豐厚嘅回報。
又或者有啲股票股價入場貴太高(e.g. AMZN, GOOG)，用leaps call你可以用較低嘅費用入場(雖然對好多人嚟講都仍然好貴)。

例子：
我長期睇好標普500指數，我可以買追蹤標普500指數嘅ETF，即係SPY嘅leaps call。
寫依篇文嘅時候(21/07/29)SPY嘅價格大約係$440。假設我估佢兩年後無可能跌穿$220，咁我可以揀到期日係23/06/16、行使價$220嘅call，而家依張call大約係$223.5。 買現金買100股SPY需要$44,000，但係買leaps call需要$22,350。

由於行使價$220係遠低於現價，所以依張call屬於深入價內(deep-in-the-money, DITM)。DITM call嘅特質係delta值極高。依張call嘅delta = 0.993。意思係當正股上升$1，依張call嘅價格就會上升$0.993。
張call嘅價格上升嘅金額同正股上升嘅金額幾乎係一樣，但係張call本身嘅入場費係現金買正股嘅一半，因此以百分率嚟計，張call升嘅幅度就接近正股嘅兩倍(有效槓桿 = 2倍)，相當於你用一半嘅資金就複製到現金買SPY嘅效果。
與孖展相比，leaps無保證金要求，所以無斬倉嘅風險，而且喺槓桿倍數上更有彈性，保守嘅可以做1.5-2倍槓桿，極端進取甚至可以做到12倍以上嘅有效槓桿(當然唔建議你去到咁盡，下面會解釋原因)。


除咗長期睇升可以買leaps call之外，長期睇跌某隻股票都可以用leaps put嚟買跌。
例如快手啱啱上市嗰陣，我覺得佢市值根本唔值1萬億，但係又唔肯定佢會幾時跌，所以就開咗一張22年3月到期嘅leaps put。
我開嗰陣快手股價係$320，張put嘅價格係$63.38。而家快手係$118.9，張put嘅價格已經去到$205，升咗3倍以上。
Put快手嘅過程可以睇依個post：https://lih.kg/aLvOtAV

使用leaps call獲得槓桿有咩成本？
任何槓桿嘅方法都一定有成本。就算股價不變，時間值嘅耗損都會令call嘅價格下降，你可以理解為獲得槓桿嘅「利息」。
由於DITM leaps call嘅價格絕大部分都係內在價值(intrinsic value)，時間值係極低，所以行使價越低，獲得槓桿嘅成本就越低，同時有效槓桿都會越低。

如果你想要較高嘅有效槓桿，行使價就要揀高啲。例如揀at the money 行使價$440，一年後張call嘅理論值會由$46跌到$31，但係有效槓桿大約係5.75倍。一年嘅「利率」大約係32.6%。所以唔建議你槓桿得太盡，否則股價橫行你一年都會輸3成。下跌嗰陣更加可以好快輸5成以上。

如果你本金細急住財自，先考慮較高較高嘅行使價。如果你本金已經唔細，例如已經揸住幾百萬港紙，只係想穩穩陣陣放大回報，行使價就可以揀低啲。

玩期權會唔會好容易輸哂所有錢？
好多未接觸嘅期權嘅人都會以為期權好高風險，擺入去嘅錢好容易都會輸哂。其實leaps call風險高低視乎行使價同平倉時間。以下就講吓行使價同平倉時間。

首先講吓行使價。行使價越低就越安全，但同時槓桿效果都會越細。好似上面個例子咁，兩年後SPY跌一半發生嘅機會係極微。就算係2020年3月嗰陣連續熔斷，SPY都係由最高$330.681跌到$214.107 (-35.25%)。不過金融海嘯嗰陣就試過由最高$126.274跌到$58.718 (-53.50%)。

咁係咪代表嚟多次金融海嘯，啲leaps call就會跌到零呢？依個就牽涉平倉時間。
如果你揸到到期日股價仍然低過行使價，咁的確會跌到零嘅。但係我玩leaps call無論賺蝕都必定唔會揸到到期，通常喺距離到期日半年嘅時候就會平倉。(半年只係隨意揀，可能係7個月/8個月，總之唔建議揸到到期日半年以內。因為越接近到期日嘅期權時間值嘅耗損越快。)
因為就算股價跌穿行使價，距離到期日仲有一段長時間嘅call仍然有一定價值。依個時候你rollover去更遠嘅到期日，等佢將來升返你仍然可以翻身，依招叫Rolling LEAP Options。

而且如果有足夠本金，你嘅leaps call可以散彈槍式分佈喺唔同嘅到期日，唔好一炮過將所有資金集中哂喺同一個到期日。又以SPY做例子，leaps call到期日你可以選擇220617、220916、221216、230120、230317、230616、231215。「散彈槍式分注買入」依一招可以分散某一刻股價下跌嘅影響。除非真係長跌好多年，否則「低行使價」、「散彈槍式分注買入」、「Rolling LEAP Options」依三招可以令你長玩長有。

高質！可唔可以教埋普通options

邊啲股票適合玩leaps call？
上面提過揀期權交投最活躍嘅股票/ETF。你可以睇吓期權嘅成交量、期權嘅到期日選擇多唔多、leaps call嘅未平倉合約數多唔多。對於點樣先夠多我無一個絕對標準。你可以參考吓SPY、AMZN、AAPL。

揀交投最活躍嘅股票/ETF係因為bid-ask spread細啲，你想買或者平倉嗰陣成交都容易啲。如果你揀成交疏落嘅股票，買賣嘅時候可能要硬食好差嘅價位，影響你投資嘅回報。另外好多到期日可以選擇嘅股票/ETF有助實行上面提到嘅「散彈槍式分注買入」。

普通options太多人寫過，上YouTube都大把教學。
推薦你睇依個鬼佬channel：
https://www.youtube.com/channel/UCYOHtOzMZGwXBLZX1Ltf78g

Leaps call TQQQ係咪無敵？
全倉TQQQ巴打喺連登財經台gel哂頭，完勝大眾炒妖股妖幣嘅賭徒。TQQQ嘅威力近幾個月眾人皆知。咁到底leaps call TQQQ係咪一個好策略呢？

TQQQ係leveraged ETF嘅一種。之前我都開過另一個post討論leveraged ETF，有興趣了解可以睇返以下依個post：
https://lihkg.com/thread/2518419/page/1

講返leaps call TQQQ。首先TQQQ嘅IV比較高，所以leaps call做到嘅有效槓桿會低啲。例如QQQ行使價揀ATM、一年後到期可以做到6.64倍有效槓桿。TQQQ揀行使價揀ATM、一年後到期只可以做到2.71倍有效槓桿。

不過由於TQQQ本身已經係納指每日三倍，再乘加埋leaps call嘅槓桿即係做到納指每日4.5-9倍左右。不過你其實唔需要leaps call TQQQ，用返leaps call QQQ揀高啲行使價都同樣做到咁高槓桿。至於邊種方法好啲我都無研究，不過QQQ嘅期權成交量、到期日嘅選擇就肯定多啲。不過值得注意嘅係leaps call嘅有效槓桿會隨住股價上升而下跌，升到一定程度你可能需要rebalance去維持你心目中嘅槓桿比率。

而且咁大波幅遇到下跌嘅時候真係會跌得好慘。Leveraged ETF本身已經係一種高風險投資工具。你用埋衍生工具去玩咁危險嘅投資工具就危上加危，leaps call TQQQ係超高槓桿嘅高危賭博。如果你承受唔到心理壓力，就好容易做錯決定喺低位嘅時間斬倉。遇到跌市跌到本金得返10%都唔出奇。你小注以小搏大都可以，但真係好全倉leaps call TQQQ。我唔想有人睇完依個post之後跳樓。

正，原來有term

唔難明，有心一定學得識
我覺得value invest + option 先可以盡快財自
反正爛命一條

信貸 LEAP CALL TQQQ幫到你

Leaps put SQQQ/VXX係咪無敵？
長期睇好就用leaps call，長期睇跌就用leaps put。
咁SQQQ/VXX依啲嘢全世界都明知佢長期會跌，leaps put係咪贏硬？

無咁簡單。
正因為佢世界都知道佢地會跌，所以賣put嘅人都唔會低價賣俾你。張put嘅價格已經price in咗未來嘅跌幅。
Leaps put SQQQ/VXX我估都會賺到少少錢，但係回報真係唔吸引，正正經經leaps call返SPY仲好。

（不過抱住實驗精神，我都有用少少錢去leaps put VXX當做吓實驗。幾年後可以同大家報告吓。）

少有高質有內容call option教學

高汁留名
成日想做leap spy但遠期bid ask好闊
唔敢入手

SPY已經算最好啦
你買嗰陣逐格咁試吓有冇人賣俾你

有咩文章值得睇？
我研究leaps call嗰陣睇咗幾篇大陸人寫嘅文章，內容都好豐富。我喺度總結依兩篇文嘅精華。

1. 期权投资策略（六）：LEAPS
https://yang.observer/2021/03/03/option-strategy-leaps/

依篇文討論咗股息、risk-free rate對leaps嘅影響。
簡單嚟講買call收唔到股息，所以股息率越高，leaps call嘅價格就越低。而risk-free rate越高，leaps call嘅價格就越高。

2. 一种加杠杆方式的简介和探讨：滚动购买长期期权 (Rolling LEAP Options)
https://www.physixfan.com/yizhongjiagangganfangshidejianjiehetantaogundonggoumaichangqiqiquan-rolling-leap-options/

依篇文提到有幾條公式：
1. 有效槓桿：
有效槓桿 = (Delta Value of Option * Price of Underlying Security) / Price of Option
2. 獲得槓桿嘅成本：
獲得槓桿嘅成本 = Strike Price + Price of Option – Price of Underlying Security
3. 隱含利率：
1 + 獲得槓桿嘅成本 / (Price of Underlying Security – Price of Option) = (1 + Implied Interest Rate) ^ Duration

點睇Poor Man's Covered Call (PMCC)
Poor Man's Covered Call (PMCC)即係做leaps call嘅同時再賣出較短期嘅call option。以leaps call + short call嘅方式以較低入場費去複製covered call。我個人唔鍾意依個策略，不過都討論吓。

好處：
- 可以賺取現金，降低買leaps call嘅成本

缺點：
- short call入價之後難以處理
- 如果你間券商支持covered call，喺持有正股嘅情況下short call (covered call)係唔需要保證金。但係做PMCC券商可能仍然有保證金要求 (依一點唔太肯定，有做PMCC嘅巴打可以分享睇法)

我嘅睇法：
Leaps call最麻煩嘅地方在於short call入價之後唔知點處理。我諗到幾種處理方法，但每一種我都唔滿意。
處理方法1. Rollover
最正路嘅處理方法。不過SPY依啲index fund真係可以連續升幾個月，不斷roll可能只會令雪球越滾越大，保證金要求越嚟越高。如果你roll咗半年都未有退出時機，心理壓力都幾大。
處理方法2. Leaps call行權
一來成個策略打亂哂，二來Leaps call有排先到期，仲有一定嘅時間值（特別係行使價高嘅leaps call）。如果行權就會損失時間值，太早行權係輸錢之選。
處理方法3. 賣走leaps call再買貨變covered call
一來成個策略打亂哂，二來又需要大量現金買貨，唔值得咁做。
處理方法4. 開short put對沖short call
保證金要求好高，遇到大跌又會short put leaps call雙重輸錢
處理方法5. 其他
大家可以留言分享吓

SPY依啲index fund本身IV好低，做short call真係執粒糖，short call賺到嘅期權金跟leaps call帶來嘅強大回報相比根本不值一提。唔值得為咗粒糖而打亂哂成個策略。而且Leaps call本身已經幫你減低咗入場成本，再用short call去進一步減低成本幫助不大。如果想成本低啲，最簡單嘅方法係leaps call行使價揀高少少囉（當然風險都會提高）。
當然如果你諗到更好嘅處理方法，或者可以做PMCC嘅。只係我目前未諗到。

目錄：
#1 甚麼是leaps？
#3 Leaps call/put有咩用？
#4 使用leaps call獲得槓桿有咩成本？
#5 玩期權會唔會好容易輸哂所有錢？行使價、到期日點揀？
#7 邊啲股票適合玩leaps call？
#9 Leaps call TQQQ係咪無敵？
#13 Leaps put SQQQ/VXX係咪無敵？
#18 有咩文章值得睇？
#19 點睇Poor Man's Covered Call (PMCC)？

點睇leap call SPACs 股？

買完leaps call之後，你就唔洗再花心機去尋找十倍股。簡簡單單SPY、QQQ已經係十倍股。

仲有leap call SVXY
有咩risk?

根本做唔到，以TPGY為例，到期日最遠只係去到220121，無一年以上嘅call俾你揀。而且期權成交量通常都好低，bid-ask spread會好大。

長期睇好fb, 資金唔多，係咪可以考慮otm leaps call?
可唔可以簡單講下