【古典文學】此情可待成追憶，只是當時已惘然——李商隱

學到野，多謝樓主

多謝巴打鼓勵先真

巴打點解唔開facebook page?

好提議
驚開左無人睇

巴打開啦 我實睇

咁等我設計吓個Icon先
事成再同各位有心嘅巴絲打講

如果你唔介意
我都可以幫手諗個idea
或者design吓

可以分享吓
我都仲諗緊點設計

封面相呢就山水畫啦
profile pic就簡簡單單一個毛筆字
如果樓主本身識
自己畫張中國畫同寫吓書法就perfect

我參考吓先

留名

古人也是三國志迷？
細讀李商隱籌筆驛詩

三國時代係一個好迷人嘅時代
現代咁多電影、電視劇、遊戲咁再創造
或者我地以為三國熱潮係現代嘢
其實古人都好鍾意三國嘅
但呢一切嘅形成，都必須歸功於文字嘅建構
陳壽寫《三國志》，後人評價好高
加上裴松之嘅人作注，加左大量有趣嘅講法
到羅貫中寫《三國演義》，妙筆生花
成就左三國時代嘅魅力

李商隱係一個好鍾意用典嘅詩人
魯迅講：
「玉谿生清詞麗句，何敢比肩，而用典太多，則為我所不滿。」
上次我地講左用典嘅詩文化
而轉過頭黎睇，亦都可以話李商隱
係一個好有歷史意識
係晚唐末世中對朝代興衰敏感嘅詩人
熟讀史書嘅佢，比起我地
一早就已經係忠實嘅三國迷



李商隱活係晚唐
三國相距已隔百年有多
果個時代並未有我地熟知嘅三國演義故仔
更加無三國無雙呢隻Game
佢寫呢一首詩嘅起因
係因為佢路經籌筆驛呢個地方



籌筆驛
魚鳥猶疑畏簡書，風雲長為護儲胥。

簡書：竹木所制嘅軍中文書
長：一直
儲胥：軍營

《方輿勝覽》：
「籌筆驛在綿州綿谷縣北九十九里，蜀諸葛武侯出師，嘗駐軍籌畫於此。」
孔明最後出山打魏國，係四川嘅籌筆驛駐軍
李商隱咁啱經過呢個地方，諗起以前讀過嘅故事
突然間好有感概寫左呢首詩，「詠史」之作

起首即奇句，不合常理反而更加有趣
為左強調孔明軍令如山嘅威嚴
本來魚同鳥識鬼你孔明咩
但而家連魚鳥都識驚，你話恐唔恐怖先
古人話「孔明忠義貫神明」
天上嘅風雲都一直保護住孔明嘅軍營

同埋兩句嘅特色係對偶
魚鳥對風雲
猶疑對長為
畏對護
簡書對儲胥
唔止用意精奇，仲要有結構之美
一開波已經見到詩人手法不凡



徒令上將揮神筆，終見降王走傳車。

徒令：白費
降王：劉禪
走傳車：長途乘車，意指做俘虜

詩入面有所謂嘅「抑揚頓挫」
我地睇到詩首兩句係「揚」，係對孔明嘅讚美
去到呢一邊，筆法一轉，就係「抑」啦
章法頓挫，起落有致
對偶係句法之美，頓挫係結構之美
成日都會係古詩睇到

熟知三國故事嘅人都知
孔明為國家出左好多力，北伐失敗
但係就算佢幾咁勁，都係改變唔到蜀漢敗亡
劉禪都最後都係做左人地嘅俘虜
「徒令」、「終見」
都盡見詩人對孔明嘅惋惜之情

管樂有才真不忝，關張無命欲何如？

管樂：管仲、樂毅。兩個都係賢臣
關張：關羽、張飛

《三國志·諸葛亮傳》：
「身長八尺，每自比於管仲、樂毅，時人莫之許也。」
孔明係成日讚自己有管樂咁勁嘅
呢到詩人都係同意，話孔明比得起佢地
咁事實上孔明確實變成左一個「歷史典範」
如果唔係，我地點會今時今日仲讀佢篇出師表

詩可以抒情，亦都可以議論
李商隱係到拋出左一個中國士人成日面臨嘅難題
才同命，係可以唔對等嘅
「古來才命兩相妨」
係中國思想入面
「命」從來都係一種違反人自由意志嘅客觀因素
係一種無法超越嘅限制，無法預測嘅局限
所以我地會稱之為「命限」，正係呢個意思

愈勁嘅人，醒到好似孔明
好打到好似關羽、張飛
都係逃唔過自己嘅「命限」
「無命欲何如」，呢一個係問句黎
詩人感知到，愈有才華嘅人，面對「命限」
反而會令人覺得更加悲涼
一切都無法改變，又可以點呢？



他年錦里經祠廟，梁父吟成恨有餘。

他年：有過去、來年兩意，此指來年
祠廟：成都城南，有諸葛武侯祠
梁父吟：孔明成日讀嘅一首詩

詩人由經過古地而起興作詩
歌詠孔明嘅才情
以至議論才與命之間難題
最後用一種悲嘆嘅口氣抒發自己嘅感情

等我將來經過成都嘅諸葛武侯祠
一定會再次吟唱梁父吟
為孔明當年無法完成功業
再次幫佢抒發呢種無盡嘅遺憾之情

最後再讀一次呢首三國詩：
籌筆驛
魚鳥猶疑畏簡書，風雲長為護儲胥。
徒令上將揮神筆，終見降王走傳車。
管樂有才真不忝，關張無命欲何如？
他年錦里經祠廟，梁父吟成恨有餘。

相比杜甫果種深切既傷痛
我鐘意李商際果種淡淡既憂愁多啲

相比杜甫果種深切既傷痛
我鐘意李商際果種淡淡既憂愁多啲

李義山算係學杜學得好成功
學之餘，又轉出自己嘅風格
要諗埋佢面對嘅前人係盛唐詩人李白杜甫
要突破真係好難，但佢做到

好好睇

好睇可以追埋我其他Post
每篇都係嘔心瀝血寫出黎

樓主好有心
之前睇過台大公開課講錦瑟

台大好多公開課都唔錯
多謝巴打支持
記得交流吓

有冇LINK???

我搵搵先

我中學個仆街中文老師有你咁既級數就好

我以前都遇過唔少差嘅中文老師
好多無熱誠甘心局限係教科書入面
希望呢邊都可以提供一個學中文嘅資源

其實樓主係咪教書？
真係講得好好，清晰易明又吸引

我中學個仆街中文老師有你咁既級數就好

我以前都遇過唔少差嘅中文老師
好多無熱誠甘心局限係教科書入面
希望呢邊都可以提供一個學中文嘅資源

其實樓主係咪教書？
真係講得好好，清晰易明又吸引

再次感謝絲打支持

我中學個仆街中文老師有你咁既級數就好

我以前都遇過唔少差嘅中文老師
好多無熱誠甘心局限係教科書入面
希望呢邊都可以提供一個學中文嘅資源

其實樓主係咪教書？
真係講得好好，清晰易明又吸引

如果探長係我老師就好

愛情忠貞？典故的化用和反用 讀李商隱青陵臺詩

我地曾經講過詩歌用典係詩文化嘅呈現
用典嘅範疇好廣泛，愛情典故係其中一大類
李商隱所用嘅「青陵臺」，正正係中國一個好出名嘅愛情故事
干寶《搜神記》：
「宋康王舍人韓憑，娶妻何氏，美，康王奪之。」

好耐好耐以前，戰國宋康王見到個美女
佢就好鬼想食呢個美女啦
點知發現呢個女人係自己手下韓憑嘅老婆
宋康王做得國君，緊係大哂，搶左佢老婆返屋企
仲要迫到韓憑自殺死左
何氏結果當住宋康王面前，係青陵臺跳左落黎
「左右攬之，著手化為蝶」
周圍嘅人想捉住佢，只係撕裂左佢件衫
碎左嘅布係空中就好似蝴蝶一樣咁飛黎飛去


青陵臺
青陵臺畔日光斜，萬古貞魂倚暮霞。

畔：邊緣
貞：忠貞

中國傳統美學不同於西方
西方古典美學，往往係以悲劇呈現
但中國就會成日見到，正因為現實千瘡百孔
所以要用想像超越，補充缺憾
王曰：「爾夫婦相愛不已，若能使冢合，則吾弗阻也。」宿昔之間，便有大梓木生於二冢之端，旬日而大盈抱，屈體相就，根交於下，枝錯於上。又有鴛鴦，雌雄各一，恆棲樹上，晨夕不去，交頸悲鳴，音聲感人。
韓憑同何氏嘅故仔，結局係佢地就算死左
就算宋康王隔開佢地，唔比佢地同穴而葬
佢地墓地依然長出兩棵樹，連埋一齊，仲有成日有對鴛鴦係上面
政治權力令愛情於現實中滅亡
但愛情卻係想像中超越政治權力，得以完滿

李商隱呢兩句，正正係化用左呢個愛情典故
「萬古貞魂」，係何氏永恆嘅愛情
即使係「日光斜」，即使係「何暮霞」
都無法改變佢地愛情嘅專一


莫訝韓憑爲蛺蝶，等閒飛上別枝花。

蛺蝶：其中一種蝴蝶

絕句多數係三四句最妙
而呢三四句似乎係好難解得通
第三句係用左倒裝
莫訝韓憑＞韓憑莫訝
第三四句嘅意思係：
唔好驚訝韓憑老婆化成蝴蝶
佢隨時都會去搵第二個男人

我地就咁睇，真係比李商隱嚇親
大佬你寫呢兩句都唔符合個典故嘅
如果前面首一二句係「化用」
呢邊三四句，我地會叫做「反用」
即係故意將個典故所表達嘅意思，反轉佢黎講
形成一個強烈嘅對比、張力

李商隱果然係一個叛逆嘅文人
因為佢睇穿左呢種愛情故事嘅偽善
未嘗唔可以視為佢對中國美學力求圓滿嘅諷刺
「莫訝」，愛情本來就無保障
「等閒」，情侶隨時都可以移情別戀
總之個個都係雞，隻隻都係鴨
睇到呢邊，你可以話李商隱故作奇語
但計我話呢，佢呢個情場浪子，食女多過你食飯
佢嘅愛情睇法，正正係我地日常見到嘅現實

我地再讀一次：

青陵臺
青陵臺畔日光斜，萬古貞魂倚暮霞。
莫訝韓憑爲蛺蝶，等閒飛上別枝花。

好仔的肥假：
巴打出文好快！想講返呢首----

因為見到「日光」、「貞魂」呢兩個詞，呢首詩畀我既感覺係講緊跟大佬、或者係君臣之類嘅情況——青陵臺都唔係畀太陽正面照住，而忠貞既魂魄所倚嘅雲霞亦去到日暮時份，呢兩句既語氣都非常之灰，所以最後兩句好似晦氣話咁⋯⋯（---"我唔妥你，可以飛你；我唔鐘意你，可以寫詩唱衰你 ，老細，你啤咩呀，出黎隻揪丫"）

等我快啲追埋最新一首先。戈登巴打加油！

我中學個仆街中文老師有你咁既級數就好

仆街中文老師

留名

留名重溫

我中學個仆街中文老師有你咁既級數就好

仆街中文老師

大家積怨好深

留名學野

留名

多謝絲打捧場

留名學野

thanks bro

lm

出文先