[真人真事] 重寫以前香港發生過冷門既命案奇案 (2)

浪茄腐屍與三億毒品案 (下)

天台的「磚塊」

係警方重返現場之後，竟然係村長既天台搵到一磚磚，總共有二十六箱、重達三百七十二公斤既可卡因，懷疑係有人覺得「最危險既地方就係最安全」、以為警察黎左次之後就唔會再搜過，選擇將毒品運返去。警方當場拘捕六名男女，包括村長彭月雲、佢老鼠、細妹、細佬，弟婦，以及案發前曾到訪村屋既一名男子，全部被控一項販毒罪，據講有人係警誡下承認係為左接近二百萬港幣酬勞，先至冒險將毒品寄存在此。

雖然警方係偶然之下破左呢單毒品大案，但係張馬奇去向依然成謎，警方懷疑佢一早就因為「講唔掂數」而被殺客，所以探員繼續係大埔田村作地氈式搜索，包括附近草叢甚至係化糞池，希望搵到佢既蹤影。

或者應該咁講—「出得黎行預左要還」，張馬奇早係呢件村屋毒品案之前已經僥倖逃過一死。話說當時毒販慣性收到可卡因之後會先批發比拆家，然後各自加工稀釋成「可樂」，先至再係唔同地方售賣，咁樣可以將原本利潤提升三成。不過拆家為左節省成本，係提煉「可樂」時會用價錢平既劣質可卡因代替煉製，由於係火燒時會產生濃烈臭膠味，所以無論係吸毒者定係買家都唔會「貪平」而買。據講張馬奇係較早前就試過因為咁做，被同行荷蘭買家發現大興問罪之師要求換貨不果什至下達江湖追殺令，張馬奇嚇到唔敢上水只派手下去判刑，最後因為買家被警方釘上著草，事件先不了了之。因此警方唔排除有人故技重施，落得慘死下場。

「我相信被捕者之中，有人知道張馬奇下落，但他們堅持緘默，警方也很無奈。」有個警方高層就咁透露過，話已經擴大調查範圍，追查村長一家人如埋張馬奇所有通訊紀錄，以及他們曾接觸的可疑人物等，「總之有拉錯、無放過，直至證實張馬奇是生是死為止。」

可惜既係案發已經超過十年，張馬奇無論係生係死仲係無人知曉，雖然當時一度懷疑過浪茄腐屍係佢，但最後兩條人命既死亡失蹤真相都係石沉大海...