[真人真事] 重寫以前香港發生過冷門既命案奇案 (2)

德福花園五屍慘案的傳聞

相信大家對呢單幾十年前既兇案一啲都唔陌生，案中五名女受害人因為誤信假道教師傅李育輝作法祈福，慘遭有毒符水謀財奪命，雖然警方係案發無耐隨即破案，但係呢件事背後依然存有許多耐人尋味既傳聞...

傳聞一：由第六名死者「揭發」慘案
根據警方追查，五名女受害人屍體都係係德福花園Ｃ座５樓某戶徐姓受害人之一既屋企發現。係事發當日，李育輝要求三名想添壽死者係紙上寫上不如意之事、又叫佢地跪係放有百幾萬港元現金既「神壇」面前，作法完畢後要求佢地係屋內唔同位置飲用加料「符水」，最終各人因中劇毒而死，面部肌肉抽緊而且牙齒緊扣，死狀慘不忍睹。

然而呢件慘案揭發過程亦係相當離奇，因為幫忙「揭發」既竟然係一名已死之人：１９８９年７月２２號晏晝時分，一名四十歲姚姓婦人係德福花園T座跳樓身亡，佢留低左三封遺書，其中內容與幾日前一單婦人失蹤案有關，警方係跟隨線索追查之下搵到去徐姓受害人屋企，係拍門無應又聞到陣陣惡臭之後，破門入屋先發現呢單慘案。雖然警方偵破左件謀財害命大案，但上面提到既姚姓婦人自殺原因成迷、係遺書中有意無意提及受害者既姓名亦係耐人尋味。

傳聞二：與十九年前工業意外的巧合
係１９７９年７月２２號夜晚，正係興建中既德福花園發生一單嚴重工業意外，五名釘板男工以及一名男雜工係Ｃ座大堂地下打盤將兩包英泥運上十二樓地台工作，當臨時升降機係接近九樓時，突然失靈急速墜地。在場其他工人聽到巨響之後撬開一睇，發現六名工人經已瞬間慘死，各人均頭爆肢裂、什至被鐵枝貫穿腹部，屍疊屍般死狀恐怖。
據講，原本不幸搭上呢部死亡升降機既仲有兩名女工，正正係佢地要求將兩包英泥放入升降機，不過因為男工們拒絕再帶多兩包上樓就即刻關門啟動電梯上樓，佢地先「僥倖」逃過一劫。
經過死因庭足足七日聆訊，證賽意外唔係由超載引起，而係托架中其一個螺絲啤令扭曲生鏽，造成故障失靈。詭異既係當時法官審此案時視察且乘坐一部位於深水埗同類升降機時，亦都發生過故障，所幸既係無造成任何傷亡。然而最後法庭都係將慘劇定性為意外，涉事公司剩係肯賠償死者家屬幾萬蚊，令到佢地大感不滿。
值得一提既係當年工業意外男死者們，各人都不約而同咁有談婚論嫁既女友、腹大便便既妻子，正正係十九年後，德福花園又先後發生六屍命案，其中五名死者都係Ｃ座單位身亡，自然引黎種種猜測，指係六名男工鬼魂要搵相同數量女性作鬼新娘之說，係單純巧合定係「鬼新娘」穿鑿附會之說當然就無從稽考。

傳聞三：命案現場鬼影憧憧
自五屍命案發生之後，兇案現場就傳過有清潔工因為遇上怪事後辭職。當時，有位清潔工表示，佢每晚去兇宅所在樓層倒垃圾時，都會聽到陣陣急促的拖鞋腳步聲、又有把女人聲同時講：「等我呀，我今日仲未倒垃圾呀！」果個清潔工人開頭以為只係自己聽錯，但當垃圾清理完所有垃圾之後，發現後五樓樓梯門仲有有袋包裝整齊既垃圾放係地上面，裡面有一堆日常用品但夾雜住「鬼畫符」既紙張，清潔工見狀知道自己時運低賴野，好快就辭職唔做。

又有傳聞指，有Ｃ座住客係深夜時分坐升降機返家途中，係五樓電梯開門遇上身著多年前打扮既女性，「佢地個樣好模糊唔係好睇得清」、「一開門果下成陣冷氣跟埋入黎咁」，奇怪既係佢地只係望左眼又無行到入電梯，果個住客係返到屋企先醒起係五樓發生過既命案，令人不寒而慄。

另一方面，案發單位除左同層樓上樓下既樓價受影響，本戶更加係自由２０１１年開始放售都無人問津，係２０１３年曾托拍賣行以三百萬出售，亦都無人「敢」承接，直到今時今日都只係有租客期中租住，睇黎呢間「兇宅」既恐怖程度就算係出名驚無樓住既香港人都怕左。

出左

明白會改進
今晚趁仲有心機寫會出多篇

尋晚睇左單比較冷門嘅案件
呢幾日寫埋佢
開左個頭唔知點寫落去好

加油！

Lm 樓主welcome back

當你有文既時候，就當係bonus

駁唔到

呢單野睇危險人物講過
但唔知單工業意外

坊間將成件事寫得太靈異
其實單工業意外除左死亡人數同之後命案一樣
都無話咩特別傳聞

都難怪啲人會諗起嘅
但其實人嘅惡念恐怖過鬼

呢個真係 寫咁多單野
發覺人心先係最恐怖
就好似德福呢單
最多咪以為個道士呃下錢
點估到佢會狠下毒手殺哂

係咁寫鬼故，個道士作案手法同下場係點？

睇返傳聞一
最尾係大陸比人捉到啪左

留名

韓國個件養母好似話想判死刑
唉
點解咁多人落到咁重手
仲要係自己揀個細路返黎
香港個兩件，明明有屋企人想湊又唔比
韓國個件換可以揀唔領養
死爭返黎虐待係為乜

仲要扣假期

飛鵝山—悲劇絕境

行山熱潮
「近年山野意外增加，山嶺搜救中隊協助處理的山嶺出動次數，於２００５年至２０１５年間，由５７次增至１３３次，十年間增幅達兩倍多。據２０１５年統計，最嚴重意外黑點為西貢，達３８宗，佔所有意外近三成，其次為大嶼山及新界東北。Wilson補充，近年行山人士似乎由西貢轉戰新界東北及大嶼山，所以意外亦有增加。他提到其他行山意外黑點，包括偶有山洪暴發的黃龍坑，及有不少懸崖峭壁的馬鞍山。」— 徑 · 香港 （https://www.trailwatch.hk/blog/347）

係唔同原因推動之下，行山近年黎成為香港人熱門活動之一，然而行山人士往往因為缺乏安全意識或者係準備不足，經常發生唔同類型既意外，什至造成人命傷亡，本人希望用呢篇文章針對飛鵝山黎寫警剔大家要注意安全，避免悲劇再次發生。

鬧市觀境台
飛鵝山獨特之處位於黃大仙區、觀塘區、西貢區和沙田區既交界，坐落九龍界限邊緣之上，牛池灣東部，四順以北。係飛鵝山上可以飽覽九龍半島、香港島、西貢蠔涌和白沙灣一帶景色，因此一直成為香港熱門行山地點之一。

上飛鵝山既方法有好多種，比較簡單而多人采用既係分別由飛鵝山道同扎山道兩條車路上山，然後再唔同既崎嶇小徑到達飛鵝山山頂，其中一段往「自殺崖」既石臺，位於飛鵝山西南方山脊頂，係一塊巨大陡峭既岩壁，更屬於飛鵝山最險要之處，斜度頗高且難度屬４粒星需要一定體能，但正正因為果個位可以俯瞰九龍一帶景色、遠眺維港，所以往往愈危險之餘亦係愈多人慕「命」前往。

崖如其名自殺崖
單計最近呢個年代黎講，飛鵝山自殺崖一帶就發生過唔少大大小小意外什至造成多宗傷亡：

２０１４年１１月２１日，六十歲男子與友人行山，因為肚痛緣故脫隊解手後，懷疑因為不熟地形無法跟上隊伍而失蹤，搜索人員最後係深夜，位於自殺崖附近發現其遺體。

２０１７年８月２６日，兩名大陸男女遊客係颱風帕卡襲港時被困飛鵝山，超過１６０名消防員係八號波下冒死進行通宵拯救行動、而且陪同事主係山上渡過一晚至脫險，可幸最後全員無恙安全下山。

２０１７年１１月２９日，擁有豐富行山經驗但只係著用普通行山裝備既四十八歲女子，同十餘人分成快慢兩組（事主為慢團），係往自殺崖開闢新路取小徑登山時，不慎踩到碎石滑倒墮落崖墮崖卡係樹上面身亡，期間更係友人身邊「碌過」。

２０１８年１０月２日，六名行山「初哥」就讀同一國際學校高中少女係飛鵝山行山時，其中一人不慎跌傷，飛行服務隊將該受傷少女救走後，其餘五名少女係落時山時迷路，係被困一夜後獲救。

２０１８年１０月２９日，二十五歲女子夜晚獨自到飛鵝山行山，期間以手機打過１１２緊急求助電話，指自己在行迷路，搜救人員連日登山搜救不果，女子至今仍未尋回。

２０２０年４月２７日，五十六歲女子同十名友人登頂後往自殺崖時落山時，疑以失足墮崖２０米卡左係岩石罅而亡。

２０２１年３月１０日，五十八歲退休保險男經紀，係朝早獨自經充滿碎石巨石既鵝肚棧道攀登自殺崖時失蹤，搜救人員最後係附近既靈鷹石發現昏迷不醒既事主，可惜最後仍傷重不治。

２０２１年３月１１日，三十一歲現職教師，係失蹤多日後被發現死於自殺崖邊，據悉死者有精神病紀錄因此唔排除自殺可能性。

２０２１年４月１８日，二十四歲女子係石峽尾離家後往飛鵝山自殺崖登山後失蹤，援救人員係前一晚分別搵到事主既帽同行山鞋，又於當日下午係鵝肚棧道險要位置搵到已經證實不治既事主，但事件仍然留下許多迷團。

發生「意外」的原因
原因一：耳濡目染下忽略自身安全意識
正如開頭所講，行山近年來成為香港人潮流活動之一，有唔少ＫＯＬ拍片擺上網「教」人行山，令到大眾以為行山係一件好簡單既事，只要跟足佢地既教學必定萬無一失。然而正正就係抱住呢種心態，好多意外就係咁油然而生，身亡事主好多都係因為忽略自己以及體能裝備等相關事宜，「一失足成千恨」。

原因二：獨行
大家仲記得十幾年前探員丁利華西貢行山失蹤事件嗎？當年丁利華一個人去到西貢行山，因為不明事故係途中迷路失蹤，至今仍無音訊。好多時行山發生既意外往往就係因為事主無人陪或者對自己有信心，而選擇獨自行山，呢個行為其實係好危險，最直接原因係若果獨行不幸發生意外都難以求救，若果有人同行至少大家可以互相照應，增加遇到意外時既生還機會。

原因三：偏向虎山行
雖然行山容易發生意外，但其實會造成人命傷亡既往往都係高危非正式山徑既地段，例如飛鵝山就被漁護署列為十六個「郊野公園曾發生致命及嚴重意外的高危地點」之一。行山人士有時為左追求刺激同絕美境觀，經常無視政府一早設立於唔同登山口既危險告示牌，往危險地方進發，問題更既係呢啲地方位置險要，一旦發生意外，搜救人員往往要冒生命危險去拯救相關人士，亦因此造成更多悲劇。

總結而言，希望大家行山都打醒十二分精神，除左要結伴同行，係出發前都要衡量下個人能力．避免去容易發生意外既危險山徑，老土講咁大個人條命係自己，最怕係出事果時害埋其他人。

願你係另一個世界安息
[/member][/member]