卡雲尼(曼聯7號)
2021-05-23 21:14:47
天網恢恢又一例子—馬鞍山路井頭村劫殺富翁案(上)
千萬富翁離奇命喪屋內
2010年11月既一個早上,年過七十、人稱來叔既老翁鄧路來,係下午時分被堂弟發現倒臥係自家村屋廚房昏迷不醒,頭部有好似拳頭咁大既傷痕,係牆上同窗門都佈有血迹。係警方到場後進一步調查後發現屋內有被搜掠過既痕迹,唔少抽屜被拉開;來叔既私人財物例如銀包、鎖匙、手機等亦都無埋。有認識事主既鄰居形容,來叔為人友善好客,從來都無同人結怨,唯一可諗到就係有人心懷不軌為財狠下毒手殺害來叔,而事實就的確如此...
移英開餐廳致富
來叔係後生果時移居英國,係當地經營外賣餐館,除左賺到唔少錢,仲養大埋四仔一女,直至早年因為掛住香港既生活先獨自返番黎,係馬鞍山井頭村買起過兩幢三層高屬豪宅級數村屋既分別作自住同埋租出用途。因為來叔係英國生活多年,平日行為舉止亦充滿英倫紳士風格,佢平時出門都會著上整齊西裝,每日好規律咁坐車出馬鞍山飲早茶再去街市買餸,閒時娛樂就只係賭下馬,真係好難想像有咩人會對來叔落手。
警方初步判斷係一單典型既入屋行劫案,因為較早前井頭村亦曾發生一宗入屋行劫案,一名雙程證劫匪被捕,所以不排除來叔就係被企圖入屋行劫既兇徒所殺害。
提款的老人
警方翻查來叔銀行戶口記錄,發現係案發後翌下午一點,有位「老人家」身穿黃色外套撐住枴杖去到荃灣匯豐銀行分行,冒認來叔身分及簽名,將佢登記地址電話號碼正確提供予客戶經理,又係進一步核對身分證後,先成功提走六十萬元、係三點半左右又將來叔聯名戶口內二十九萬元,轉帳至某人卓越理財戶口。
人心不足蛇吞象,呢位「老人家」食髓知味又係同日下午四點折返匯豐銀行分行,要求拎多五十萬元出黎購買人民幣,然而就係呢個舉動成為日後檢控既有力證據。因為來叔戶口一日三度提出巨款,早已超過每日上限港幣一百萬元,所以銀行經理起疑要求再三核對真人與身分證明文件,同時用閉路電視拍低左疑人既樣貌。面對指真人比相片更加肥胖既質問,「老人家」解釋係患癌同埋進行化療緣故引致臉部腫脹,又發難投訴用唔到電話系統購買股票以及唔記得戶口密碼,要求立即取得新密碼,然而銀行經理完全唔接受呢個荒謬既解釋,就以更改密碼需時為由,要求疑人一星期後拎封確認信先幫佢辦理提款手續,「老人家」見無計可施,只好黯然離去。
果然,警方憑住閉路電視錄像以及係案發地點廚房雪櫃上既一個指模,查出呢位「老人家」既身分。