蓮花山焦屍情殺案
貯水池中的恐怖焦屍
1993年5月某日,荃灣蓮花山下花山村既李姓村民因為屋企村屋水管漏水,係請求水務署人員前來協助仍然搵唔到原因之後,決定親自沿水管上山調查,係途中經過一個廢棄貯水池,嚇然發現裡面有一具殘缺不存既燒焦屍體,從而揭發因忘年不倫戀引申出黎既情殺案...
法醫係接報後到場驗屍,發現死者頭腳被燒至化骨、身體四肢被斬開分散各處,因此相信現場唔係第一案發現場。而因為屍體實在難以辦認,警方只能通報失蹤人口組咁大海撈針,睇下有無人既親戚朋友係最近失去聯絡。果然係無耐,就有個男人因為母親多日失蹤於是前來認屍協助調查,佢雖然都無法透過屍體樣貌分辦出死者,但就憑警方係事發現場搵到既一抽鎖匙,成功打開佢屋企以及所經營既旅館大門,確認事主正是其母親韓蘭芳。
雖然警方成功查出死者身分,但係對案件事發經過等都係毫無頭緒。事隔十年,就係案情膠著多年不了了之之際,一名因偷竊而係內地被捕既男人阿權竟承認自己就係兇手!
「同是天涯淪落人」
案發時韓蘭芳43歲,育有一子一女,早年經歷兩段失敗婚姻,但「情場失意職場得意」,佢係個人事業上撈得有聲有色,係旺角經營一間生意經常爆滿既旅館暨旅行社,仲係仔女眼中被視為一名持家有道、任勞任怨、母兼父職既母親。因為旅館早已上軌道,所以韓蘭芳閒時都會去到荃灣河背街一間士多打麻雀偷閒娛樂,韓蘭芳就正正係果到結識左改變佢一生既男人。
當年只得26歲既阿權係1993年初來港,係呢間士多打工看鋪寄宿,因為士多成日會有客人黎打麻雀,阿權間唔中都會補三缺一咁「戥腳」,於是無耐就同韓女混熟。韓蘭芳年過四十但風韻猶存打扮入時,與同樣都係離過婚既阿櫂非常投契,逐漸進展至發生超友誼關係,經常偷偷約會開房什至係士多入面做愛。
表面上阿權唔介意韓蘭芳大佢十幾年,經常以老公老婆相稱;但另一方面阿權又知道韓蘭芳同時亦有唔少親密男友,心裡覺得大家都只係咁岩「同是天涯淪落人」,將呢段有性無愛既關係視為各取所需既表現,就算一齊落去都係唔會開花結果,所以係不久之後,阿權就係卡拉OK認識左一名年紀相若既女子交往,同時亦都打算向韓蘭芳攤牌,結束呢段不倫關係。
無心殺害的棄屍過程
係5月12號夜晚,韓蘭芳又去到士多搵阿權,閒談之間得悉原來韓蘭芳一早知道阿權「背叛」佢,係出面私交女友「出軌」,因此醋意大發前來大興問罪之師。就係爭執之間,士多電話響起,韓蘭芳思疑正是阿權女友來電,於是衝到樓梯口搶接電話,阿櫂阻止同時「不慎」將韓蘭芳推下閣樓導致重傷致死。
阿權大驚,聲稱自己當時腦海一片空白,係冷靜過後認定「比人見到實知係我做,到時就要坐成世監」,於是就部署要毀屍滅跡。阿權先用牛肉刀將韓蘭芳分件分截咁斬開,裝進兩個紅白藍大膠袋,係用清潔劑清洗現場過後,又以「運送肥料為由」叫來朋友渣車接載自己至叔伯係荃灣蓮花山下花山村既農地。阿權到埗確認四周無人後,就拎出預先準備既電油焚燒肢體,又將殘肢棄置係荒廢既貯水池內。
真相羅生門
翌日,阿權係電台得知韓蘭芳屍體被發現既消息,但佢依然若無其事咁繼續工作生活,係士多倒閉之後先返回內地生活。唔知係咪多年來抵受唔住良心既責備,阿權竟然係偷竊案被捕後和盤托出,但又係庭上反口覆舌堅持自己唔係有心殺害韓蘭芳,最終因為誤殺及非法處理屍體罪名成 立被判入獄九年半。
然而,女死者兒子係判列後為母親品格平反,表示母親對阿權「無可能睇得上眼」,阿權明顯係想謀財害命,因此理應處以謀殺罪。時至今日,兇手已經刑滿出獄,但係韓蘭芳既性命就早早定格係女人四十既美好年華,而當中事情既真相亦都係無人知曉...