[真人真事]寫下未有人提過嘅香港奇案

暫時我見講得最detailed嘅都係英文sources
例如負責佳寧清盤嘅律師Ian Robinson
同埋毛姨姨個老公Philip Bowring
但中文資料好多都係左抄右抄
無乜細節
香港商業案玩到死人
牽涉埋馬來西亞内政
呢單好經典

樓主寫得好仔細
多謝你咁努力

其實除咗殺人案
啲失蹤案都好值得講


銅鑼灣書店東主同肖建華被虜走之前
大陸喺回歸前都試過虜走身處喺香港嘅人返大陸
但後嚟又係不了了之

星光行 特工被殺案都好少資料

翁靜晶本危險人物5有
有興趣我可以睇住寫一次

失蹤案隔離卡雲尼巴打啱啱寫咗
呢啲難搵啲不過可以試下

九龍仔賭場爆炸案(下)

案件喺十一月二日正式開審，劉培同龔發二人一同被控謀殺賭客朱芬，以及兩個賭場負責人楊添同盧源，兩位被告都否認控罪。

因為佢喺被捕之前同過唔少人講佢嘅案發動機同過程，所以調查一方唔駛花好多功夫已經還原到成件事。一切都係關於其中一個賭場負責人周仰同劉培之間嘅恩怨。

1965年7月至8月，廣勝聯坐館同一眾高層人物相繼被捕，成個字頭嘅人當然大為緊張，好想搵出有邊個係提供線索俾警方嘅二五仔，結果不出幾日就發現佢地身邊嘅周仰正正係不惜出賣自己大佬嘅人。然而，現實始終唔同電影，呢個周仰並無俾社團中人報復。而劉培就係被拘捕嘅大佬嘅手下之一，自此劉培就開始同周仰結怨。但生活迫人，劉培喺迫於無奈下亦只可以拜託同自己結怨嘅人。根據賭場負責人劉輝嘅作證，喺案發前兩日劉培曾經喺佢用膳之際到訪，表示自己想喺賭檔尋求一個職位，而劉輝以賭場不缺人手為由拒絕，劉培無特別講乜就離開咗。其後周仰知道劉培想搵工後，就帶人去打劉培，而且唔准佢再喺九龍仔出現，又話劉培已經「全無勢力」，講如果報警就會再搵人打佢。劉培因為怕佢喺賭檔一帶嘅勢力而暫時離開。據佢所言，佢甚至日間唔敢返自己九龍仔嘅居所，要夜晚先可以偷偷摸摸返去。試問一個黑社會嘅中層人物點會甘心受有家歸不得嘅屈辱?

於是劉培決心對付周仰，根據龔發所言，劉培本身長期被警方追查，再加上佢並唔識製造炸藥，於是佢就用刀指嚇外號「炮杖發」嘅龔發，命令佢去相熟店舖買炸彈原料。其後佢地合力整咗一個炸彈，劉培就親手喺夜晚拎去賭檔。佢喺賭檔附近靜靜地擺低炸藥，但並無點燃。但賭場眾人吞雲吐霧，煙頭亂飛在所難免。炸彈被煙頭彈中後開始冒煙，劉培見狀就叫其他人快啲走，但可惜已經太遲，結果造成咗呢單三死二十三重傷嘅慘劇。

案發後，佢並唔打算隱瞞自己係主謀。同劉培相識十幾年嘅溫楠就表示喺案發後一日曾經同佢見面。劉培一見面就問佢知唔知九龍仔爆炸事件係邊個做，然後佢就話:「你當然唔會想出是何人所幹，其實乃係我所做，因為被人看得太低，屢次被人輕視……」正正就因為唔衰得俾人睇，三位同劉培素不相識嘅人無辜枉死，而佢嘅仇家周仰只係受到輕傷。

如果謀殺罪成立，身為主謀嘅劉培必然會被判死刑。所以佢就聲稱自己並非搵劉輝求職，而係想問佢借錢買白粉。至於溫楠方面，劉培話自己實際係上面向溫楠追一百四十蚊嘅白粉債。佢並話如果真係佢犯咁嚴重嘅罪，當然唔會主動向其他人提起咁蠢。劉培亦表示當佢喺茶果嶺被拘捕後，當時拘捕佢嘅兩位沙展為咗想拎到口供，就給予佢兩包白粉即場吸食。佢喺被押到九龍警察總部後亦有再吸食警方俾佢嘅白粉，而佢嘅口供只係因為毒癮起神智不清而隨口說出。佢雖然承認自己一早已經認識第二被告龔發，但並無以刀指嚇佢，亦無叫佢買炸彈原材料同整炸藥。所以成件事劉培並無角色。

至於龔發方面，根據化學原料店同文具店店員嘅口供，佢喺案發當日下午曾經分別到兩間店舖買白火藥四斤同沙紙四十張，佢亦承認自己有份製作炸彈，但堅稱係被劉培所威脅。

最後陪審團判兩人三項謀殺罪罪名成立，法官蒙上黑紗，判兩人繯首死刑。二人其後對刑罰上訴，法庭考慮到龔發同周仰等人並無仇怨，確實有因被脅迫而犯案嘅可能性，因此將佢嘅死刑改為監禁二十年，而劉培則維持原判。喺上訴結束後僅僅十日嘅1966年4月15日，劉培被送上刑場，是為香港尾二被執行死刑嘅死囚。一場江湖恩怨最後以四個人嘅性命為代價終結。

有更新
推帖

支持

Sor我可能要再下一篇先寫
危險人物寫得好齊不過我唔想抄佢太多
我搵搵有乜佢未提過，真係冇我先用自己文筆寫一次

終於諗到下篇寫乜好
最遲後日出文

推返文

鯉魚門浮屍案(上)

1958年3月8日，警方接獲有人報警，指領港員(海港領航員)陳元喺出海期間由帶水艇「雨榮八號」上墜海失蹤。警方立即派人喺海面搜查，同時查問「雨榮八號」上幾位船員，不出二十四小時，五十二歲嘅船長，亦為高級領港員嘅張雨榮就因為涉嫌謀殺陳元被拘捕，當時陳元嘅屍首尚未被尋獲。

張雨榮被捕消息一出，鯉魚門嘅一眾居民都為之而震驚。因為呢個人絕非等閒之輩。今日鯉魚門俾大家嘅印象通常都係食海鮮，然後自己都好似魚咁被人劏到出哂血。但鯉魚門喺五十年代係罪案溫床，以鯉魚門村為主近鯉魚門海峽一帶同中國海岸連接，於是村民除咗以捕魚、曬鹹魚為生，大多以走私為副業。另外，鯉魚門村地形狹窄且被海包圍，村外人一般難以進入，一個咁偏僻嘅地方自然做乜都難以被外人得知。因此有村民販毒、釀私酒、開賭檔喺村內可謂家常便飯。

但呢位張雨榮唔需要靠呢啲勾當為生，佢任職持牌高級領港員一職，負責接受,不同船公司委託，引領從外國駛來的船泊岸。當時全港領港員只有十五位，而佢係最為資深嘅其中一人。佢靠自己嘅薪金自組船隊，擁有兩隻小輪同舢板五隻，全部都以佢嘅名「雨榮X號」命名，喺居民大多都從事不法勾當嘅鯉魚門村入面可以話係富甲一方嘅富豪。村民對佢都尊敬有加，佢更加喺鯉魚門燈塔附近一個碼頭刻下「雨榮橋」三字，而且將嗰到當係自己船隊嘅停泊處，可見佢喺鯉魚門嘅勢力。

雖然係咁，但佢年事已高，而領港員呢個專業要入行絕非易事，所以佢想傳承自己領港員嘅專業俾一眾有心入行嘅後生，同時亦可以為自己船隊增添幾位生力軍，因此佢喺1940年代末已經收徒，轉眼間已經有五位門生，而死者陳元亦為徒弟之一。佢喺滿師後曾經喺張雨榮船隊任職一段時間，月薪為五十蚊外加食宿，陳元獲牌後月薪加至三百蚊，其後亦有不斷加薪，到1957年11月已經加至五百蚊，外加獎金及津貼月薪以千元計，喺當時絕對係高薪一族。

但陳元最後都係決定離開師傅，佢聯同兩位同樣受傭於張雨榮嘅領港員自行開設「香港領港公司」。但三人並無忘記師徒之情，喺空閒之時都會返去張雨榮嘅船隊幫手，每月大概為張領十五隻船入港。喺案發當日，陳元又返去「雨榮八號」幫手，兩人喺舵房忙碌後坐低閒談，水手大副等人亦喺甲板休息。其後陳元突然衝出舵房，而張雨榮就手持「黑色物件」尾隨，眾人雖然未知乜事，但都深明大事不妙。

辭職都要殺人？

Lm

佢係為啖氣多啲
星期六寫埋個下篇先

順手問問大家想睇星光行特工槍殺案定馬維炬案多啲
講明先兩單都會睇住危險人物寫

好 等你下集

第一單有咩咁奇

其實出完文先覺得用命案好啲

留名 支持樓主