勁喎屌你
2021-01-25 03:50:42
城寨白粉格謀殺案(上)
對於九龍城寨嘅印象,相信年輕一代即使無機會親身到訪,亦都透過非常有限嘅相,影片,或者係川崎嘅城寨主題樂園係一個龍蛇混雜嘅地方,毒品、無牌行醫、難民都隨處可見,當年居民相信都見怪不怪。出乎意料嘅係謀殺喺城寨係非常罕見嘅事,最少有紀錄嘅係。而有紀錄嘅第一宗城寨謀殺案發生喺1959年,呢單案雖然案情唔複雜,不過就案件引伸出嘅問題為當年唔算平靜嘅社會再添一啲爭議。
1959年7月24日凌晨四點幾,位於老人街九號一個白粉格傳出慘叫聲,驚醒咗住喺附近嘅居民,佢地由屋企望出去,雖然燈光昏暗,佢地都見到三個人匆匆逃走,仲有一個人倒臥地上。深知不妙嘅居民就立即報警,可惜警方到場後傷者已經傷重不治。警方見死者身中多刀,而且現場有少量現金同白粉失蹤,警方相信呢單係劫殺案,就派出大批警員入城寨內調查,而且拘捕咗大批癮君子同毒品檔負責人作調查。根據喺九號白粉格住宿嘅伙記所言,死亡嘅男人名為冼貴,任職白粉格經理人。喺案發前,曾經有幾個男人去白粉格向佢追債,分別係綽號「傻漢」,34歲嘅王漢、綽號「跛手根」,40歲嘅盧根,以及29歲嘅司徒顯超,三人喺案發後一同失蹤。警方馬上通緝三人,幾日內,佢地已經分別落網。
案發原因非常單純,因為冼貴已經拖欠三個人十五蚊一段時間,急住要錢「上電」嘅三個人就一齊去白粉格追數,冼貴當然唔會輕易就範,就從櫃中拎出白粉一包,叫三個人「有本事就拎啦」,結果事件演變成打鬥,混亂間死者俾人用刀狂插十幾刀,其中直插胸口嘅幾刀成為致命傷。至於邊個落手,三人就互相指證,而呢個正正係佢地喺案中都有重要角色嘅最好證明。
人證方面,城寨人煙稠密,加上有癮君子深宵依然四處流連,所以有唔少人都目睹事發經過。幾個證人都見到案發過程嘅唔同部份,佢地亦都喺認人手續中認出三個疑犯。此外,佢地亦喺王漢間屋搵到一件血衣,上面血跡嘅血型同冼貴吻合。
證據對三個人極度不利,佢地亦都要面對另一個困難——無錢請律師。三個被告都無正常收入,而且即使有錢亦都全數花費喺白粉上面,自然唔會有錢請律師,只可以靠政府委派嘅一個俾佢地。然而,委派律師唔一定淨係識求情,代表王漢嘅委任律師史菲特大律師打出咗一張令政府措手不及嘅牌,唔單止為三個被告帶嚟一線生線,更加令港英政府正視咗一個從未處理嘅問題。