剛剛分手的你，入黎傾下，大家互相扶持好嗎？(129)

小學其實未講完...
睇嚟我真係一講就停唔落口嘅人黎...

齋睇上邊漏左一個好大嘅背景設定...
現實喺同同學相處/家人相處都一塌糊塗嘅我，理論上應該會早於因為冇朋友嘅孤獨感，而快速改變同他人相處不善嘅性情+對惡意抱過激反應嘅習性。

而唔係等到真切咁傷害到家人先停止仗賴暴力。
【事實上我嗰時亦只係停止左對家人以暴力回應嘅習慣，對同學上到中學都依然如此。
而乖僻既性情，甚至到而家都冇變。

-

嗰part係【網友】。
話曬都係00出生，網絡時代嘅新生兒。
點會只有現實而冇虛擬世界嘅人生？

為左補充現實層面嘅朋友不足，
當時嘅我主要係玩可以喺網絡交友嘅online game.
【摩爾x園...】
【我諗我要畀人屌支那仔了，but what ever.】

我仲曾經得出自己一套睇法喺【網絡嘅朋友先係真正嘅朋友】，因為唔會憑第一印象就唔鍾意你，唔會睇你嘅成績【我成績其實還好】，外表【我其實唔樣衰】，家境等一切你以外嘅部分。只會睇你嘅言談，同當中反映嘅性格本身。以此為基礎得出嘅朋友先係真正嘅朋友。

呢種世界觀曾經相當咁拯救左我...
又或者係害左我？
因為令到我有地方可以躲藏，可以唔改變自己嘅乖僻性格都冇所謂。

直到開始發現網絡嘅關係維繫無比薄弱。
話Del FD就Del FD，話從此唔online就唔online.
不但如此，現實中受到嘅傷害，也只能被佢地喺隔空千里嘅前提下以言語安慰...其餘一切佢地都做唔到。

開始醒覺老師曾同我講虛擬取代唔到現實，而我當時速速駁嘴嘅行為有幾無知。
當下只有不知自己到底為何要繼續存活於世嘅...迷惑。

覺得現實除左家人，邊個都唔需要我。
而對於屋企，我實在太年幼。
要我用而家嘅眼光去審視當年應該點樣行動，就算我自己睇都覺得實在係種苛求。

於是我喺大概小五/小六一次考完試之後，同阿媽去食M記慶祝嘅時候我同佢講。
「媽咪，我好攰，我想死啦。」
「我唔想再做人啦，我覺得好辛苦啊，你可唔可以畀我走呀。」

佢當下到底係以咩心情嚟聽我呢番說話呢...
我唔敢想像，自己嘅仔女喺小學，用一把聽起嚟就好細個嘅聲音同佢講，好似要去學校旅行然後給阿媽拎$20費用咁同佢講，自己唔想做人。

我只記得佢嘅回答：「你信阿媽一次，只要你大個左呢一切就會過去。讀埋小學佢之後上到中學，你身邊嘅衰人就會唔見曬，聽阿媽講一次，上到中學你就唔會再咁痛苦㗎啦。」

大概當時嘅我對此實在半信半疑...
但其實，比起疑問占比更多地，內心係採信的。
因為係阿媽啊嘛，係媽咪，係大我好多嘅媽咪，係會真心為我著想嘅媽咪。
係呢個世界上除我自己最關心我嘅媽咪。
係遠比我睇得更遠嘅媽咪。

...係如果我唔見左佢會難過嘅媽咪。
...係雖然認真諗過殺死我，將我捉去窗口想掉我落街，但最終都將我抱返入屋嘅媽咪。

所以我決定聽信...
去相信來自「媽咪」所講嘅話。
雖然唔明白原理，點樣先可以拯救我嘅內人，但我就係決定去信，因為係世界唯一愛我嘅母親。

-
...然後係不值一提嘅，僅剩兩年不到嘅地獄。
因為不僅一提，所以略談。

我喺學校依然故我，旁人亦然。
老師依然繼續針對我...用自以為教精我嘅心態。
佢個名類似周潤發。
對於我詐病唔去畢業camp，只覺得係我嘅不成熟，究盡追責同懲罰。
明明並唔可能對我嘅處境一無所知。

總之我最後成功咁捱過小學。
對學校嘅情感，喺去到一日聽到學校因意外塌樓，心底非常高興嘅程度。
唯有副校長教我何為悲嘅極致「哀莫大於心死」呢句話，銘感五內。