（短故）《千祈唔好追自己鍾意嘅作家，有一日你會唔再鍾意佢》

--------------------------------------

（女）

和岑健衡拾級而上，有點一步一驚心；每一下氣喘都好像嘆息著昔日的片段。

我努力地爬上梯級，但喘氣聲也驚動了他：「好攰？」

「少少啦，好耐無做運動。」我邊喘著氣邊說。

「唔係成日同何加勤上嚟咩？」他又譏諷我。

我笑著瞪他，便不再花力氣說話，直到登上山上的第一個平地。

我和何加勤相擁過的位置。

此刻重遊舊地，原來我也沒有太大的感覺。

「之前你哋坐呢到？」岑健衡指著山邊。

我點點頭，問他：「你呢？」

「我哋都係。不過我知上面都有得坐，你有無上過去？」

「無喎。」我眼底看的風景是深水埗，一直如是。

「咁上去啦，唔好坐呢到。」他引著我到更高的位置。原來上面有些櫈子，瞥眼一看，是石硤尾的光景。

我們才坐下不足幾分鐘，便來了一陣大雨。

他帶我摸著黑跑向涼亭避雨，不過我們都避不過渾身濕透的下場，狼狽非常。

「黑仔喎，一上嚟就落雨。」他一邊抹著身上的水珠一邊說。

「我諗唔會落好耐？好彩呢到有得避雨咋。」滿佈雨雲的夜空像一片陰暗壓下來，我心裡只暗忖自己真的很倒霉。

我們抹乾了身上的水點後，靜靜地仰頭望天，期望大片烏雲會盡快離去。

我忍不住點起了煙，狠狠地吸又狠狠地呼，將一切情緒發洩在一根幼幼的燃燒中物。

他突然播起一首歌，聽前奏的旋律應該是八十年代的老歌。

「嘩，咁嘅歌你都識？」我驚訝他這個年齡會聽這種歌，我以為老套念舊的只得九十後。

「我老竇揸車成日播舊歌，所以我成日聽。」

「咁呢首咩嚟？我無聽過喎。」

「下雨天梗係要聽返首〈下雨天〉啦。」

「邊個唱？」

「Blue jeans。」

這首歌很老派，不是屬於這個年代的產物，不過是適合我用作拼命回想舊香港的時代曲。

配合雨點的沙沙聲，我覺得特別悅耳動聽。

「首歌有feel啊可？」他問。

他和我肩並肩、膚貼膚，我們的距離很近。

只要把頭微微轉向他，我和他的臉就會是鼻碰鼻般親密，連他的氣息也會一清二楚。

我不自覺地想起和何加勤相依相偎的情境。

「係呢，你好似無講過你個ex喎。」我想起他也是未放下前度的狀態，便忍不住問起。

他把頭轉過來，和我只有幾厘米的距離。

「無呀，其實無可能一齊返，係我傻啫。」他無奈地苦笑，然後又看一看我。

我一直壓制自己身體的動靜，絕對不可以輕舉妄動。

現在的氣氛彷彿滲透著紅色的警示，提醒我不要太過浪漫化，否則會十分危險。

--------------------------------------

#######################


（男）

我和沈卓怡在涼亭內細看雨灑，淅瀝沙啦伴隨著blue jeans的〈下雨天〉，成為了今夜在山上的主題曲。

她的皮膚緊貼著我的身體，就如醞釀了一份透明的曖昧，在雨後的空氣裡飄揚。

靜候期間她問起我前度的事，我只是略略帶過，才發現最近其實少了想起她。

在涼亭待了好一陣子，我的雙腿就開始痕癢起來。

「仆街，我好惹蚊。」上一次和羅啟宜上來，下山後便滿腳紅點。

沈卓怡聽罷便從袋裡掏出一枝噴霧，把它從上而下噴光我全身：「益你。」

「你又醒喎，帶蚊怕水。」我舉起一個手指公。

「做人要學識汲取教訓。」

「咁上次都咬得你好勁。」

「所以今次有備而來，唔會俾自己再中伏。」

她說的是蚊怕水，又可能語帶雙關地說著何加勤。

正當她又準備點煙，我就從自己的煙盒裡抽出一枝煙給她：「試下我個枝。」

她帶著狐疑的眼神用手指輕輕把煙一夾、再點起：「咩嚟㗎。」

「健牌呀，好嘢嚟。」我逕自又抽起煙來，和她一起吞雲吐霧。

「ok喎。」她笑著點頭。

我們由香港的煙聊到日本的牌子，她又坐在我身旁睡著了。

我不其然地凝視著靜止了的沈卓怡：她的皮膚不是十八廿二般的幼嫩，白哲與她扯不上關係，粉底下的眼紋也是若隱若現；不過她睫毛很長、鼻子挺直，稱不上美麗，但一定不醜。

我忍不住伸手輕輕摸了摸她的頭頂，就像我以前摸著前度一樣。

腦袋裡自然地飄過我和前度的片段：

在下課後空蕩蕩的課室裡牽她的手、在夜深人靜的小巷和她接吻、在她家裡陪她應對排山倒海的工作；

最後看著她嫁人。

她是我的中學老師，比我大九年。

當時我十七歲，她二十六。

我們偷偷摸摸地開始、偷偷摸摸地結束；除了有天地為證，這段關係像「六四」對中共的意義—就是沒有意義，因為從來沒有發生過。

我沒有告訴沈卓怡，其實我一向喜歡年紀比我大的女人。

#######################

星期六夜咗少少出
今晚係咁多啦，都接近嗰故嘅高潮位了
好睇嘅畀嗰正評支持吓，留言都得
多謝收看

做咗CD-ROM咁耐 一直都無留過言比你
話說你寫嗰啲故次次都睇到我入心入肺
希望你可以繼續寫落去
加油呀！

多謝你啊
我其實睇到呢種留言會好開心

太開心終於收咗鼓佬皮

唔怪得岑仔好似有種「超越佢年齡嘅成熟」

推

好似好眾望所歸咁
但之後應該就要睇岑仔sad ending

岑仔人生贏家，溝到miss

一口氣追返以前嘅故 覺得樓主真係好厲害 故事取材都勁引人入勝 行文都好有自己嘅風格 有種說到心坎嘅感覺

將3個人嘅心路歷程都寫得好仔細！
沈卓怡今次可唔可以有個happy ending?

多謝你嘅欣賞
都係將自己鍾意嘅嘢融入創作
覺得好睇嘅推介畀朋友呀

鼓佬收咗皮
我最期待的畫面出現了

多謝啊
初嚐寫三人視角
大家有咩意見都可以講吓

好好睇好中意沈卓怡所有故

深水埗夜遊套餐

多謝多謝

條煩膠竟然仲妄想想扑野

最近太忙，三四日前要重睇
結果依家至睇完
對鼓佬好多巴絲都留哂言我就唔講喇
反而想知沈卓怡嘅心理年齡係幾歲
好似好少女仔24歲左右就好獨立？
唔知點講
總之係需要一個比較心態年輕嘅男仔
令佢活得更自在

Sorry for 1999
求樓主回覆

你可以開團收返$700

有啲想睇岑健衡同miss嘅故事

呢個問題好難用一個實數答你

根據沈卓怡嘅心路歷程
由tinder故仲係不顧一切追求愛情，當時未畢業
去到情人節故畢業前夕經歷懷孕、墮胎再失去重要嘅男人
出嚟做嘢同阿P分手後識到惺惺相識嘅何加勤
但都係開花無果

其實沈卓怡會同一般同齡女仔有分別
源於佢一直累積落嚟嘅經歷

去到24歲，佢已經演變到單純去追求純粹嘅開心
連遠少少嘅嘢都唔想，或者話唔敢去諗
心態年輕男子帶畀佢嘅
係嗰種等佢唔使再做「大人」嘅舒適感

我唔知有無解答到你嘅疑問
但要我就住角色設定去講嘅話，就大概係咁

比起錢
我想多啲人睇我嘅故多啲