[連登治國方略] 大國狹縫 - 芬蘭

Mannerheim線

作為一個超級芬蘭迷，睇你個 post 睇到射咗
支持

繼續支持

連呢度都見到你鏟雪

文！

繼續戰爭 - 喊出黎又輸鳥

巴巴羅薩作戰係人類歷史至今最大規模既有組織軍事進攻行動，超過五百萬德國同佢既盟國士兵參與，但即使係咁，其實德國一方響開戰時，坦克同飛機既數量其實仍然不及蘇軍既一半。咁點解納粹德國同一眾德軍總參謀部既軍事高材生仍然咁有信心可以贏到呢場戰爭呢？一方面，蘇聯既大清洗，無厘啦更將自己80%既軍隊領導層消滅，呢種響大敵當前仲鬥紅玩批鬥既痴L線行為固然係重點因素；另一方面就係蘇軍響冬季戰爭用左唔成比例 (平均每1個芬蘭士兵死亡,就有8個蘇軍士兵陪葬) 既代價先勝出，令到德軍有實證參考，有理由相信蘇軍根本係無料扮四條既紙老虎，基本上一擊可破，令德軍對自己太有信心，對響蘇聯境內既情報收集 (特別係蘇聯國內既交通狀況)，補給準備 (特別係冬季裝備) 不足。而我地既主角芬蘭，急欲奪回失地，亦對德軍so far橫掃歐陸既戰績有信心，就上左呢架賊船。

德國高速公路

德軍諗住揸Benz去蘇聯片車，但蘇聯既路根本就唔係路德軍好多時候都係靠行同獸力行軍補給

獸力行軍補給示意圖

呢張先岩

響1941年12月，蘇芬戰線隨著芬軍響佔領整個卡累利阿之後停止進攻已穩定落嚟；但蘇德戰爭中線，德國中央集團軍對莫斯科發動代號「颱風」既攻勢，就係12月初，響距離莫斯科20公里既地方被阻擋落黎。12月5日，莫斯科附近既蘇軍發動大規模反攻，徹底粉碎咗德國同芬蘭速戰速決既希望。呢個時候既芬蘭，就開始處於騎虎難下既位置，既無辦法單獨同蘇聯講和，另一邊德國又不斷要求芬蘭付出更多，響發動更進取既作戰。但即使係咁，蘇芬戰線響跟住落嚟既一年幾都大致維持穩定。

黎到莫斯科近郊既德軍Panzer III

Btw 1942年，希特拉帶著自己馬仔凱特爾 (Keitel) 到訪芬蘭幫Mannerheim元帥賀壽，希特拉有一段同Mannerheim既私人談話內容，比當時芬蘭電台既人偷偷地錄左，內容中希特拉提到，完全冇估計過蘇聯有咁痴線既戰力同工業生產力，呢段錄音暫時係流傳唯一一段希特拉日常談話既錄音。
https://youtu.be/oET1WaG5sFk

芬蘭元帥Mannerheim，德國元首Hitler，芬蘭總統Risto Ryti

響呢段時期，由於英美認為，芬蘭無理會要求，繼續響摩曼斯克鐵路進攻，又簽訂反共國際條定，因此認定芬蘭係德國盟友而對芬蘭宣戰，雖然係咁，英國並無好似對德國咁，對芬蘭城市發動戰略空襲，只係象徵式空襲芬蘭軍港，算係不幸中大幸。另一方面響1942年，納粹極醜惡黑警黨衛軍領袖希姆萊 (Heinrich Himmler) 到訪芬蘭，期間要求芬蘭配合納粹黨既猶太滅絕政策，整返個芬蘭送中送德條例，將國內既猶太人送晒去德國洗白白見耶穌，但芬蘭並無向政策上配合。唯一一次芬蘭將猶太人送德發生響1942年11月，有8個奧地利裔猶太人被轉交黨衛軍，當中7人被立即處決。呢件事響芬蘭國內其實引黎好大反響，特別係國內宗教團體既抗議。除此之外芬蘭亦對德國表明，絕對會保護所有芬蘭人民，包括猶太人，因此希特拉都放棄咗響芬蘭清洗猶太人。芬蘭軍隊內亦有好多猶太人，當中竟然仲有3個芬蘭猶太人獲頒鐵十字勳章，不過佢地都拒絕接受。

芬蘭陸軍中將西拉斯沃 (Hjalmar Silasvuo) 同去芬蘭放暑假既黨衛軍領袖Himmler

其中兩位獲頒鐵十字勳章既猶太人Leo Skurnik同Salomon Klass，另一位係女護士Dina Poljakoff

時間去到1943年2月，德軍響南線史太林格勒 (Stalingrad) 會戰決定性大敗，呢個時候芬蘭就知道呢場戰爭玩唔到落去，於是就重組內閣，並開始向蘇聯尋求停戰，但史太林 (Stalin) 不接受有條件停戰，而要求芬蘭向蘇聯投降，呢個要求芬蘭實在無辦法接受，因此停戰談判並無進展。1944年6月，蘇軍響卡累利阿 (Karelia) 發動大規模進攻，響6月底就已經差唔多將芬蘭推返去1939年芬蘭原有邊界。呢個時候德國唔想芬蘭同蘇聯單獨講和，承諾向芬蘭提供軍火，特別係反坦克武器對抗蘇聯，而芬蘭總統Ryti亦對德國承諾，只要我一日在位，芬蘭唔會Quit自行離場；但呢個時候既蘇軍，係一股遇神殺神，遇佛殺佛既鋼鐵洪流 (蘇聯國歌響起，自行配樂https://youtu.be/U06jlgpMtQs)，響7月就已經推進到冬季戰爭後既國界，雖然靠住Made in Germany既軍火，同埋蘇軍準備響波蘭發動大規模攻勢而暫時冇增援芬蘭戰線，頂住左蘇軍進攻，但芬蘭好清楚知道，蘇軍依家唔係人咁品，如果再打落去，蘇軍好快會響赫爾辛基歌唱偉大既蘇聯祖國 (自己禁replay)，所以芬蘭總統Ryti響8月啦啦林辭職唔撈，咁我已經唔撈，芬蘭就可以同蘇聯講和啦！芬軍總司令Mannerheim隨即被委任為芬蘭總統，開始同蘇聯商討停戰。

1944年，獲委任為芬蘭總統後，步出芬蘭國會既Mannerheim總統
呢個時候既Mannerheim真係可以話係 I am Finland，難怪佢係最偉大既芬蘭人

由巴錫基維 (Paasikivi Hi again) 帶領既代表團，響1940年冬季戰爭之後，再一次來到莫斯科向史太林講和。坦白講，我係巴錫基維，我都唔知同史太林講乜好，"你信我啦今次我會乖架啦" 咁樣？但巴錫基維就係有令到史太林放心既特殊技能，蘇聯響9月，同意左用以下條件同芬蘭講和：
1. 回復1940年冬季戰爭後既邊界
2. 割讓整個白沙摩地區
3. 割讓芬蘭灣幾個島
4. 租借博卡拉 (Porkala)，一個響赫爾辛基西南既軍港，比蘇聯50年
5. 響蘇聯賠償3億美金 (相等於今日44億美金)，6年內找全數
6. 逮捕並審判同納粹德國合作既政治領袖，包括前任芬蘭總統Risto Ryti
7. 最攞命既係，芬蘭必須自行將德軍驅離芬蘭領土，唔係就蘇軍自己黎，導致芬蘭軍隊要立即掉轉槍頭同德軍作戰

巴錫基維響赫爾辛基簽署有關向蘇聯賠款既協議

條款係極度嚴苛，但為左保住獨立，芬蘭又一次無得揀，只能夠接受和約，正式轉會蘇聯，並命令西拉斯沃中將指揮芬軍向芬蘭北部拉普蘭地區 (Lapland) 既德軍發動進攻。

拉普蘭區首府 Rovaniemi 響德軍撤走時因為焦土戰術成為廢墟

Btw有關芬蘭建國到二戰既坦克，搵到個幾好既Source
http://ftr.wot-news.com/2014/08/05/finnish-armored-forces-in-ww2/


借返黎既T-28

KV-1

連ISU-152都有

Btw Greater Finland真係好難......死症都係唔夠manpower so sad，德國佬又唔爭氣

推

聽日希望會開始講戰後芬蘭，會先講講戰爭既代價，之後就會係比較單元化咁講戰後芬蘭各方面既政策 (會用一個時期，再分唔同政策範疇黎講，而未必係純講戰爭咁完全順著時序講)


Paasikivi: 我係好重要既人

橙
企錯邊

Kone?

好正

戰爭年代終於結束

1945年4月，所有德軍被驅逐出芬蘭國境，拉普蘭戰爭結束，去到呢個時候，芬蘭既戰爭年代終於圓滿結束 (直至目前為止)。而戰爭對芬蘭嘅傷害係極度龐大，單單講拉普蘭戰爭，雖然人命傷亡相對地好少，但德軍響撤出時候使用左焦土戰術，摧毁咗拉普蘭地區超過四成房屋，同超過470公里長既鐵路，令超過10萬個芬蘭人成為無家可歸既難民，並且響拉普蘭地區大規模布雷。拉普蘭地區既鐵路網絡，要用12年，去到1957年先重建完成，而留低既地雷同炸藥，去到1973年已經清除既已經有超過1,100,000個。

德軍響拉普蘭地區留低既割蓆告示

再擴大講繼續戰爭同之前冬季戰爭對芬蘭民族造成嘅傷痕，就更為深刻，係芬蘭民族永生無法忘懷嘅創傷回憶。

響芬蘭赫爾辛基最大嘅公墓，希達尼美公墓 (Hietaniemi Cemetery) ，埋葬咗好多死亡既芬蘭士兵同平民既遺體，響小丘上面，係逝世的芬蘭總統同其他政治領袖，以及最偉大既芬蘭人Mannerheim既墓碑。同例如美國將戰死軍人分開墓地埋葬不同，芬蘭既做法係不分軍民，會將每個芬蘭人既遺體送返去佢家鄉所屬城市或者教區埋葬。

公墓入面Manneiheim既墳墓

呢個地方除咗有搵返遺體既士兵墳墓之外，仲有無數響戰爭失蹤既芬蘭人既名字，而每一個墓碑上面，都有記錄呢個人嘅名字，出生日期，出生地點，死亡日期，同死亡地點。而呢個墓地有好多人，出生日期係1910至20後，死亡日期幾乎全部都係1939年至1944年之間；再詳細啲睇死亡既集中時間同地點，主要係響1940年2月至3月 (冬季戰爭末期)，1941年8月 (繼續戰爭初期)，同1944年6月至8月 (繼續戰爭末期) ，地點就主要係維普利 (Viipuri) 同佢附近既地方，可以見到呢個城市曾經3度易手背後附帶嘅人命傷亡。芬蘭響呢一連串戰爭入面，一共有超過10萬人死亡，係總人口既2.7%，如果換算返係中國人嘅話，等於死左超過30,000,000人。


除咗死亡既人之外，仲有超過90,000人傷殘，30,000個芬蘭婦女成為寡婦，55,000個芬蘭小朋友成為孤兒，615,000個芬蘭人無家可歸，而且成場戰爭入邊有超過八萬個芬蘭小朋友被撤退到瑞典，造成左一直延續到下一代既創傷回憶。統計數字指出，呢啲被撤退既小朋友，他日成為父母親之後因為心理疾病被送院既機率，係冇被撤退嘅小朋友既雙倍。

頸上面掛住名牌，被撤離家鄉既芬蘭兒童，佢地有好多唔會再見到自己既父母，唔會返到原來既屋企

而最後既停戰條約，要求芬蘭將自己政府同納粹德國合作既戰犯拘捕並且審判，如果芬蘭唔照做，蘇聯就自己拘捕佢地，而且好大機會判死刑，因此芬蘭無奈咁通過咗一道有追遡期嘅法律，我拘捕前芬蘭總統Ryti，好荒謬咁指控佢當初為咗守衛芬蘭，有廣泛支持而實施既政策為非法，同時拘捕芬蘭既戰時首相，戰時外交部長，同其他曾經去柏林同納粹德國磋商既人，咁不過始終叫做自己人處理返自己人 (投訴警察課?)，基本上呢班人係咁以 被訓斥 響生活環境舒適既監獄坐幾年就算數，有啲仲之後回到政府工作。

被審判清算既一眾戰時政府高官

芬蘭因為和約要向蘇聯賠款，對於芬蘭呢個相對細小而未工業化既經濟造成好大負擔，雖然反面咁諗呢個賠款，係迫使芬蘭快速發展重工業，例如造船業同出口工業，去支撐呢一切賠款，間接促成左芬蘭之後既經濟起飛。另一方面芬蘭要同意同蘇聯保持特別既貿易關係，每年都要由蘇聯進口起碼20%既國內商品同基本資源，包括石油。而大家都知道共產主義生產出黎既消費品一般都係垃圾，於是芬蘭人又再一次發揮自己既黑色幽默，例如係蘇聯進口既 Moskvich汽車，成Q日都壞，而同一時期歐美國家用既車，都有可以打開收埋既太陽蓬，於是芬蘭人就講笑話，Moskvich既車都可以有太陽蓬，不過應該裝響下面，而唔係車頂，點解？咁佢壞Q左個陣，你咪可以直接響架車入面用腳推囉！

芬蘭設計既Moskvich私家車示意圖

響莫斯科博物館既Moskvich私家車

Lm

BT-42

Lm

我想知馬達漢墓上既紋章
有咩來歷

Mannerheim出生於一個源自德國既芬蘭貴族家庭，佢墓上面果個係佢個家族紋章


http://www.mannerheim.fi/01_elama/e_tmerki.htm

戰後芬蘭 - 一切都重新上路

大戰結束之後，芬蘭馬上就需要着手將原先全面軍事化既國家還原去經濟mode，而且戰後經濟民生都面臨極嚴重既問題，進入左三年 (1945-1948) 既危機年代。呢段時間入邊，其實成個國家既未來都好唔明朗，首先就要面對有機會被蘇聯策動本土共產黨政變，威脅民主政體。但係好吊詭地，作為一個民主國家，又要容許共產黨響國家入面正常運作。響1945年3月既國會選舉入面，共產黨率領嘅選舉陣營甚至贏得左大約四分一嘅議席，佢地仲嘗試接管警隊果然有槍都係好重要。同一段時間既歐洲，蘇聯響波蘭，匈牙利，保加利亞，羅馬尼亞指使當地嘅共產黨掌控政權，響捷克斯洛伐克發動左一次成功嘅政變，希臘又發生國民軍同共產黨既內戰，芬蘭可以講得上係食唔安坐唔落，共產黨奪權嘅陰影無處不在。

拉普蘭地區登記身份既難民

1948年捷克斯洛伐克政變中響布拉格 (Prague) 既共產黨民兵

其次就係經濟嘅困境，芬蘭響過去五年嘅戰爭入面，幾乎所有有手有腳嘅人都從事戰爭相關嘅職業，農田被荒廢，民生工業機器冇人維修，芬蘭三分之二嘅運輸船隊被毁，好多民用車輛都冇晒可以換嘅零件，燃油亦都十分短缺，普通平民由本身用火水爐變到要燒柴取暖。同時間因為卡累利阿又再去返蘇聯手中，大批難民又再次湧入芬蘭，加上大量響戰爭中傷殘嘅士兵，響瑞典返嚟同本地因為戰爭造成嘅孤兒同寡婦，全部都需要住屋，金錢同情緒上嘅支援。而響百廢待興嘅芬蘭，呢D支援只能夠由尚算完好無缺嘅芬蘭家庭各自分擔，每一個有能力嘅家庭或多或少都要收留一啲難民或者孤兒就好似家長接放學同湊仔返屋企過晚夜咁，共渡時艱。

芬蘭接濟難民同胞示意圖

面對着咁嚴峻嘅政治經濟環境，芬蘭開始發展佢自己一套嘅治國同外交理念－芬蘭化 (Finlandization) 去維持芬蘭既獨立地位，避免國家被蘇聯接管。芬蘭戰後嘅兩位總統巴錫基維 (Juho Kusti Paasikivi 龜婆又係我呀，1946年接替因健康理由辭任既Mannerheim至1956年為芬蘭總統)，同基科南 (Urho Kekkonen，1956年至1982年為芬蘭總統) 決定採用同戰前截然不同嘅手法去同蘇聯交往。佢地認為，以前完全唔理蘇聯嘅做法係導致戰爭災難嘅成因，芬蘭必須要接受自己係一個弱小嘅國家呢個事實，而且芬蘭嘅地理位置，注定冇辦法獲得西方盟國有力嘅支持，芬蘭別無選擇，只能夠與惡魔共舞，永遠要考慮蘇聯嘅諗法同立場，要同蘇聯由上至下保持不斷嘅溝通，要贏得蘇聯對芬蘭嘅信任，向蘇聯中國證明，芬蘭作為一個獨立國家對蘇聯嘅好處多過芬蘭作為蘇聯一部份一國兩制下既特別行政區。咁樣嘅做法係有代價，芬蘭需要犧牲一部份正常國家會認為不可侵犯既外交自由同經濟上既獨立。

同赫魯雪夫 (Khrushchev) 好friend既基科南

巴錫基維作為兩次 (冬季戰爭同繼續戰爭停戰都係佢) 去莫斯科跪玻璃嘅芬蘭外交官，認為史太林 (Stalin) 對於芬蘭的要求，同意識形態無關，而係地緣政治同對西方整體戰略上既要求，例如要確保列寧格勒既安全，確保芬蘭灣唔會比西方艦隊進入。只要呢一切有關蘇聯國防嘅因素得到滿足，蘇聯就唔會搞芬蘭。

都係同赫魯雪夫 (Khrushchev) 好friend既巴錫基維 (史太林既公開照片就真係好少)

響二戰之後，基本上歐洲每一個國家都依照自己嘅政體去 被 歸邊，西歐民主國家就會接受馬歇爾計劃 (Marshall Plan) 嘅援助，劃入西方經濟圈，加入北大西洋公約組織 (直至現時仍然存在既北約 NATO)；東歐的共產國家就參與莫洛托夫計劃 (Molotov Plan)，加入共產陣營嘅跨國計劃經濟，加入華沙公約組織 (WTO / Warsaw Pact)。但作為響蘇聯旁邊嘅民主國家，芬蘭並冇接受馬歇爾計劃既援助，亦都冇加入任何一個軍事組織，只係響枱面同蘇聯有貿易協定，響枱底同歐美民主國家保持一定嘅貿易同外交關係。

北約同華約陣營

政治上容許芬蘭共產黨運作，經濟上保持同蘇聯嘅緊密貿易關係，不向西方過度靠攏，不加入西方領頭嘅組織，同時依靠兩位戰後總統同蘇聯領袖史太林，赫魯雪夫 (Khrushchev) 同勃列日涅夫 (Brezhnev) 保持良好嘅互信關係，芬蘭先至可以鶴立雞群，倖存響二戰後迅速降下既鐵幕之外。

1953年逝世既史太林，希望同佢一樣既獨裁者都早死早著

基科南總統響佢自己嘅傳記入面，咁樣解釋巴錫基維同佢自己嘅外交政策：芬蘭外交政策嘅最基本工作就係理順芬蘭既存在同周邊地緣強國嘅利益，係一種預防性 (preemptive) 既外交，係要用最低調最唔起眼嘅方式，避免任何威脅國家獨立嘅外交危機出現。芬蘭作為一個小國，絕對不能夠有錯覺，以為自己嘅立場係可以動搖國際形勢嘅天平，必須要時刻保持最現實嘅自我評估，而唔可以比任何感情左右呢種現實嘅判斷。芬蘭響戰爭之中得到一個教訓，自己芬蘭只能夠自己救 (A nation should rely only on itself)。

1961年出訪美國既基科南，隔離係美國總統甘迺迪 (John F. Kennedy)

事實證明芬蘭嘅戰後外交政策，對於保障芬蘭嘅獨立係居功至偉。冷戰40幾年芬蘭仍然成功保持獨立，並同蘇聯保持良好嘅關係，最後比既賠款比和約時寬減左，租借出去嘅軍港亦都早左 (響1956年蘇聯就歸還租借五十年既Porkala軍港) 被歸還。響冷戰中後期，蘇聯亦都容許芬蘭增加對西方貿易，並且加入歐洲經濟共同體 (EEC) 同歐洲自由貿易聯盟 (ECFA)，外交上成為左蘇聯對西方嘅窗口。貿易上，芬蘭亦都成為左蘇聯對外第二大貿易夥伴，好多西方嘅商品同科技都透過芬蘭進口蘇聯。

芬蘭其中一樣出口去蘇聯既貨品 - 破冰船

但呢一切外交上既與敵同眠，響內政上都係需要付出代價配合，究竟響內政上面芬蘭需要做啲乜野先至可以確保到佢唔會激嬲共產黨呢？大家見到巴錫基維同基科南做左咁多年總統 (加埋36年)，究竟係點響一個民主國家做到呢？

1976年，陪同到訪既英女王事頭婆伊利沙伯二世 (Her Majesty the Queen Elizabeth II) 出席國宴既基科南

講返少少點解會想開post關於芬蘭，個靈感就真係最近咁岩睇咗Upheaval呢本書，覺得芬蘭既歷史雖然唔算長，但佢既經歷同一D政策真係好值得香港人借鏡。即使一個地方獨立左，除非佢本來既宗主國四分五裂徹底收皮 (e.g. 冷戰後既克羅地亞 <> 南斯拉夫，巴爾幹戰爭/一戰之後既保加利亞 <> 土耳其，其實例子係好少)，否則始終都係要思考點樣同佢響之後相處，芬蘭就係一個好例子。

一個受強大帝國壓逼既民族要獨立，係需要響苦難中煉成堅毅與盼望 (就好似芬蘭既民族精神 Sisu 咁)，係需要激情同熱血 (亦都需要付出鮮血)，而獨立到係好令人對未來充滿希望同振奮，但保持獨立，靠既唔止係激情，而係最現實理性既經營同妥協。

正！