[連登治國方略] 大國狹縫 - 芬蘭

LM

文呢！

支持巴打

芬蘭自己既Inter-War Period

莫斯科和平條約簽訂後，105日嘅冬季戰爭結束，芬蘭人勇武捍衛自己國家嘅獨立，而代價亦都極為高昂。

大約350,000士兵投入戰鬥 (總人口既10%)
超過25,000人死亡或失蹤 (大約係總人口0.7%)

喊住行落防空洞既芬蘭婦人

當然芬蘭人成功咁令蘇聯付出高昂到嚇死人嘅代價，蘇軍響冬季戰爭失去起碼100,000士兵，更加有講法係超過500,000。傳說有一個蘇聯將軍得知最後得到嘅領土條款個陣，悻悻然咁講左一句 “我地得到左岩岩好夠埋葬士兵屍體既土地”。


N咁多個成為芬蘭凍土一部分既無名蘇聯士兵，共產主義好

雖然國家係保得住，但悲哀嘅係，本來犧牲咁多想保護嘅領土，最後為咗停戰，基本上全數割讓比蘇聯：

1. 整個卡累利阿地區，包括重鎮維普利 (Viipuri)
2. 芬蘭北部雷巴奇半島，及薩拉以東領土
3. 漢科半島同芬蘭灣先前要求嘅幾個小島

以上領土等於芬蘭種領土嘅10%，大約40,000平方公里，差唔多等於將成個荷蘭咁大嘅地方割出去

而由莫斯科和平條約見到，最後割讓出去嘅土地，比原先蘇聯要求嘅更多，特別係要將整個卡累利阿地區放棄。當時好多不在前線既芬蘭民眾，對於咁樣嘅停戰條件，都覺得十分意外，甚至憤怒，佢哋多數都期望停戰之後嘅邊界，會以停戰當時雙方控制地區為準。3月13號芬蘭全國下半旗致哀，而兩名芬蘭內閣部長都請辭以示抗議，迫使總理Ryti要重組內閣。


呢個地方仲相等於450,000芬蘭人嘅家園，大約等於總人口嘅12%，呢45萬人幾乎全部都選擇離開本來既家園，搬去其他芬蘭控制嘅土地，拒絕成為俄羅斯人。雖然呢種民族意識係好令人感動，但當時對芬蘭經濟亦都帶來極重嘅負擔，例如房屋糧食都突然變得極為短缺，令本來經歷戰爭後嘅經濟情況更差。失去左超過一成嘅農耕土地 (特別係卡累利阿地區)，戰爭期間芬蘭嘅肥料進口暫停，加上夏季時嘅壞天氣，令1940年芬蘭嘅穀物收成只及所需嘅4成，面臨嚴重的饑荒危機。

卡累利阿一個撤離之後嘅城市

此外11%嘅林木儲備，隨着割讓土地而失去，相等於芬蘭林木業嘅15%經濟總量。另外失去17%嘅發電量，17%嘅鐵路網絡，而維普利同漢科半島，本身都係重要嘅貿易/工業中心同港口，而家全部都molamola。

精神上，經此一役，無論係乜嘢譴責，保證同條約，通通都響蘇聯嘅霸道之下顯得冇力，芬蘭人對所謂國際社會嘅傳統支持完全失去信心，促使左芬蘭人實行最現實嘅國際外交，並開始認真思考同另一個惡魔合作嘅可能性。

個人認為響冬季戰爭最仆街既西方領袖，法國總理達拉第 (Eduard Daladier)，開埋D死人空頭支票想水芬蘭同蘇聯打落去

相信有唔少聲音都會馬後炮認為，當初袋住先咪又唔使死人，又蝕少啲，點解撐行要say no? 作為香港人相信大家對呢種抉擇都有自己嘅諗法，我暫時就唔多講個人睇法住。但無論如何，芬蘭係守住左。

冬季戰爭後芬蘭進入左一段好短嘅和平期，呢一年幾以來，整個芬蘭，基本上都摩拳擦掌，一方面要安置由卡累利阿走過來嘅難民，另一方面要準備軍事力量，等機會攞返失去嘅領土。

芬蘭戰時將超過8000個兒童安置到瑞典以策安全，但呢班細路好多返到去芬蘭個陣都已經發現自己原來既家庭已經破碎咗

呢段時間，除咗需要解決國內問題，重整軍備，芬蘭當局亦都對自己國內輿論進行監控，避免國內對莫斯科和平條約同蘇聯嘅批評過於明顯同猛烈，過早咁挑釁蘇聯。好多之前買落或者有人應承捐嘅軍備，都響1940年嘅夏天至秋天送到，而去到1940年芬蘭國家開支有45%都係軍費。由於響呢個時期，整個國家都圍繞軍隊運轉，Mannerheim嘅軍隊領導，實質上同民選政府平起平坐，甚至間中會同民選政府產生衝突。

同時國內嘅形勢亦都好差，原先保持中立嘅挪威被納粹德國入侵，整個波羅的海地區都受德國海軍控制，令到芬蘭唔少進口受到影響，加上之前講到因為和約失去農地同壞天氣嘅因素，芬蘭只能從瑞典同蘇聯進口糧食。

戰後芬蘭損失嘅領土/農業/林木業/鐵路

與此同時芬蘭處於兩大惡魔中間，已經得罪過一邊，所以都別無選擇只能夠亦同另外一邊交往，做平衡外交，特別係響德國佔領挪威之後就更加需要對德保持友好。芬蘭更曾經同德國討論購買軍火，但起初德國因為暫時未擊敗英法兩國，仍然同芬蘭保持距離。

蘇聯同時亦對芬蘭極不友好，蘇聯派來嘅大使主張蘇聯應該全面吞併芬蘭，又干預芬蘭選擇嘅內閣成員，甚至響芬蘭總統Kallio中風病危時候，講到明話如果芬蘭選出例如Mannerheim呢類反蘇人物做總統會當做違約。芬蘭就響一個咁惡劣既內外環境下，咬緊牙關，又無可奈何咁開始為下一場戰爭做準備。

1940年夏天，圍繞白沙摩港口既鎳礦 (Ni) 礦產應該由芬蘭賣俾德國，定係賣俾蘇聯既爭議，一度升級到蘇德兩方都準備軍事行動，以防對方出兵奪取白沙摩，最終同礦產相關嘅外交談判不了了之，呢件事亦都令到芬蘭軍政領袖普遍認為，同蘇聯和平共處基本上係冇可能，芬蘭香港要贏，蘇聯中共必須死，自此之後就更下定決心向納粹德國靠攏。

[未來照片注意] 芬蘭總統Ryti，芬蘭元帥Mannerheim，德國元首Hitler，同德國陸軍元帥Keitel

時間黎到1941年春天，芬蘭陸軍參謀總長 Heinrichs 去到柏林同納粹德國陸軍總司令部包括參謀總長哈爾德 (Franz Halder) 會面，席間雙方 “交換” 左大家對同蘇聯作戰既 “經驗” 同 “想像”，而呢個時候，芬蘭一方並未得知即將響6月開始既世紀大行動......又或者係一個收復失地既機會？

芬蘭陸軍參謀總長 Heinrichs 同未被元首燉冬菇既陸軍參謀總長Franz Halder

另外節錄翻譯左Mannerheim元帥向冬季戰爭完結後，給士兵的話 (原文: https://histdoc.net/history/mheim.html)：

我哋嘅國家同蘇聯終於達成和平，係以向蘇聯割讓幾乎所有你哋曾經拋頭顱，灑熱血保衛嘅戰場為代價嘅和平。

你哋唔想要戰爭，你哋只係想要和平工作同進步，但你哋被迫參與一場戰爭，響呢場戰爭裏面你哋都做咗好偉大嘅事，呢啲偉大嘅事會喺未來好多個世紀都為人稱頌。你哋有超過15,000人會永遠都見唔到自己嘅屋企，數唔清咁多人唔會再有能力工作，但你哋對敵人都造成好重大嘅損害，有200,000個敵軍葬身響我哋嘅雪地，用破爛無神嘅眼睛望住我哋嘅星空，而呢啲唔係你哋嘅錯，只係你哋跟隨戰場嘅規則：殺人，或者被殺。



但即使你哋展現出非凡嘅勇氣同犧牲精神，我哋嘅政府被迫響好嚴苛嘅條款下講和。但呢個係可以理解，我哋嘅軍隊太少人，預備士兵同軍官都唔足夠，我哋未準備好同大國決戰。當我哋英勇嘅士兵守衛領土嘅時候，我哋根本冇方法去採購物資；我哋要響完全冇防線嘅地方修築防線；我哋嘗試搵人幫但是無人來；我哋要嘗試響個個國家都瘋狂擴充軍備嘅時候買軍火。但你哋英勇行為令全世界都欣賞同敬重，但打咗三個半月我哋都仲係孤零零一個國家，除咗兩個營咁多既援軍外，我哋乜嘢幫助都冇，你地不分晝夜冇人輪更咁作戰，敵軍嘅攻擊每次都有新嘅增援，將你哋嘅生理同精神負擔拉到極限。

當呢場戰爭被記錄喺歷史入邊嘅時候，世界會知道你哋付出左幾多。

16個星期嘅戰鬥裏面我哋嘅軍隊仍然並冇被打敗，我哋嘅國家面對着不斷嘅空襲，死亡同恐怖，但仍然冇屈服。依家我哋被迫要割讓我哋世世代代耕耘嘅土地，比一個生活哲學同價值觀都同我哋不同嘅外族，但我哋嘅士兵一定要繼續努力，響我哋剩餘嘅土地為無家可歸嘅人準備居所，一定要準備好守護我哋剩餘嘅祖國。

我地好清楚守護西方文明係我地千百年來既歷史責任，亦都以此自豪。
但呢刻我地已經同西方冇拖冇欠。
(We are proudly conscious of the historic duty which we shall continue to fulfil; the defence of that Western civilisation which has been our heritage for centuries, but we know also that we have paid to the very last penny any debt we may have owed the West.)

呢幾日WFH都忙到傻，出文遲左有怪莫怪

推

推推佢先

High juice tui

繼續支持巴打

用錯不推文

LM

我呢個位打得好籠統，年份就應該無錯，定係Hanko 30年？

Kone 通力電梯，如果我無估錯

推 等緊繼續戰爭

支持巴打

支持
芬蘭到而家仲係行中立路線冇入北約 但講軍工始終瑞典勁啲

Suomi