March 4 - Day 2 - Moshi
今日主要係作短暫休息,以及作登山既最後準備
Moshi係乞力馬扎羅山山腳一個小鎮,距離機場大約40公里,基本上所有爬山既人都會係呢度先作停留保給(包括我)
前一晚係的士同間tour company既聯絡人約好左會係呢日下晝兩點黎到hostel做briefing同檢查我d裝備齊唔齊(有漏就要租),之前既時間基本上係free既
朝早終於見到host主Mama Simba,佢一見到我就隊隻手過黎(手背向上),我心諗做乜9,唔通要我好似紳士咁單膝跪低錫佢隻手?我係咩都唔知底下伸手握左佢既手腕一下,佢就縮開左
佢話佢係第一次迎接來自香港既人,好歡迎我黎到,好想知多d關於香港既野
我一諗起香港依家既景況,我係咪應該誠實咁講香港依家越黎越唔好?
要話唔好度度都唔好架啦,下下都要搵缺點既話(我地既)人生只會過得好辛苦
唔通真係同坦桑尼亞人講香港真係好差咩
但係,最後我都係選擇將香港現況我對香港既睇法話左俾佢聽
果度(基本上我去親既所有hostel同hotel)都會免費提供早餐
而早餐基本上就係:麵包(配果醬、花生醬或者牛油)、蛋、生果(西瓜、香蕉、芒果),
日日如是,去到邊度都係食呢d野
右邊既係佢地新鮮榨出黎既芒果汁,好濃,唔似香港果d溝左d唔知咩化學物又加勁多水果d,係真 ‧ 純正芒果汁
佢地養既貓,一見到我拎住碟野食就想染指
係唔俾你食你吹咩
食完大約11點,Peter(有鬚既文生)就話帶我去城中心睇下
我坐左佢架車行左大約十分鐘去到一個地方,通街都係文生d親戚
Peter問我有冇坦桑尼亞既電話卡,我話冇,佢話最好買返張,有事上黎可以打電話求助,依家基本上係坦桑尼亞人人都有起碼一部電話
佢就係某個寫住Wakala(Agent)既攤檔幫我搞,順便整埋上網服務
電話卡開通過程異常複雜,雖然好平,但係又要我輸入乜乜物物既資料又要我係部電話簽名又要影埋我本passport,搞左大半個鐘先整好
張電話卡本身好平(1000先令,大約3-4蚊港紙)
打電話同上網服務就係用一種類似儲值卡既模式,我開通左打電話(從來冇用過)、短訊(從來冇用過)同3G上網(500MB)合共9000先令(30蚊)
基本上有紅色遮既地方都有得整或者儲值電話卡
整完,Peter話佢有野做,附近一間叫做Union Cafe既地方d咖啡好好飲,問我要唔要去果度放生我,定係車我返去
我即刻陳豪上身,話點都要去試下非洲咖啡,嘆完自己行返去就得
果度最出名既係Kilimanjaro Coffee,我去到諗住要一杯,點知店員話冇曬冰整唔到
我唯有退而求其次叫左杯Latte
真係幾好飲,陣咖啡香係我個口入面維持左好耐
Kilimanjaro模型,到呢刻我都唔知座山(睇起上黎)有幾高
hea到大約12點半,我就起程回歸
去之前已經係Google Map down左Moshi鎮既地圖,成個地圖非常簡單,得幾條路又冇乜地標,令到曾經係歐洲生活半年既我以為呢度只係一個「小」鎮
跟住Google Map行,行左大約十五分鐘之係發覺:
喂唔對路wo,點解我行左成三個字都係係同一條路上面?
d路完全冇盡頭既喂,仲要人影都冇隻,莫非…可終生美麗咁行錯路?
行多陣終於見到人,路過既不論大人小朋友個個都眼定定咁望住我
的士路過會停低問我「Taxi?」,我話我唔係姓陳就拒絕左佢地
雖然d路好似冇盡頭,但係我就係唔鍾意半途而廢,再加上我仲有時間,點都要自己行埋呢段路佢
最後,雖然Google Map係路線上冇fake我,但係我番到hostel果陣已經係下晝兩點既事
以為半個鐘就行得完既路我足足行左個半鐘先搞掂