近排睇番舊相，不經不覺間，原來接觸街頭健身（calisthenics）都三年了。突然有點不吐不快，關於健身，有幾點想同大家分享下
:一：自律 + 熱情 = 成功。個人覺得兩者係缺一不可。徒有自律而缺乏熱情，與常年勞役自己訓練無異，日子耐左，精神肉體總不免會累垮，最終都會頂唔順。即使你係萬中無一既痴線佬，能夠咬緊牙關捱到得到成果既一日，then what next ? 停下腳步？都岩，反正經已達成目標，冇需要再折磨自己啦，right? 咁諗就死，要知道健身有如逆水行舟，不進則退，停操一陣好快就回塘。但心身俱累下，又點堅持落去？是以缺乏熱枕作棟樑，健身訓練淪為a mere mean to an end (達成目標既手段)，難有足夠既motivation堅持走遠。另一方面，空有一腔熱情而無自控能力，條路都係難行。要知道passion comes and goes，總有d日子忽爾熱情驟降，頓覺得一切都好無意義、運動好無聊、人生好空洞。呢個時候，缺乏自律，放任自己頹唐，只會令進步放緩。再者，遇上平台期，突破好多時都係靠意志去強迫自己做唔鐘意／一直以黎忽略左既練習，先能夠突破瓶頸。若缺自控能力，容易會避而不練 (我唔鐘意練既野，練黎做乜?)，結果就係停滯原地、徘徊不進。所以個人有一套哲學：當你能懷有熱情，且持久自律地訓練，成功離你不遠矣。而一路走黎，都識左唔少朋友，發現有成果/堅持到既，都無一例外，對健身/fitness抱有熱誠之餘亦意志堅定，能夠自律恆常咁訓練。所以各位有心接觸健身既朋友，不妨問下自己，係咪同時具備熱情同自律？如果缺失左其中一樣既話，係時候諗諗法子補救了。（我都明白自律倒還好，不過係一個念頭之間既事，但熱情就相對虛無縹緲得多，人係無辦法迫使自己對某某事物燃起熱情，有d野早有定數，冇就係冇。呢個觀點某程度的確無從辯駁，我都認同或許某倍份人係生性如此。但我同時都相信：也許只消轉一轉個mindset，從另一個角度睇健身呢一回事，你就會能夠對訓練本身萌生出熱情，呢點下面會再作討論。）
二：Be patient，唔好同其他人比較。我都曾經試過，將自己既進度同其他人相比（尤其網絡上面既成功例子），相形見絀下，不免覺得自己進步好慢，受懷疑、沮喪、不甘等負面情緒霎時攻上心頭。依家睇番，其實好唔理智。其一，網上充斥住太多成功既誇張特例，正常人係唔應該拎佢地作為參照。數學上黎講，網上既例子絕對係佔人口中既少數（正常人進度麻麻既，好少會放上網分享，就算真係放左上去，都好難會係網絡上面流通到。所以你網上接觸到既samples其實好biased.）其二，好多健身前後既對比圖，都係千挑萬選下篩出，往往有住最佳既角度同燈光條件。而好多時實際既成果係無網絡上所表現出既咁誇張。（包括我上面既對比圖其實都係特登簡出黎。）其三，好多名星/網上名人都係經過長年累月既訓練，先練就到今日既力量同身型。諷刺既係，我地好時只會聚焦於佢地既end-result，係冇考量過對方背後默然付出過既汗水同時間下與之相比，結果當然只會迎來失望。
三：Find enjoyment in the process，學會享受訓練本身。個人覺得呢點係至關重要，係培養熱情既關鍵，亦係我三年黎可以無間斷地堅持訓練既主因。好老實講，去到呢刻，訓練對我黎講經已唔係咩苦差，並唔係為左練成某某動作／練到某某肌肉而存在，而係我由衷享受/期待既一樣興趣。記得岩岩開始健身，從來冇思索過呢個問題，默認訓練僅僅係為成果而存在，所以有時都練得幾辛苦下，只想快手練完鬆人。然後記得某日睇左 barkid既一段短片(內容大概係講健身唔應該靠意志，而係應該將健身視為一種娛樂，因為享受而做。)當下茅塞頓開，決定嘗試從訓練當中尋找快樂。慢慢，我開始關注自己訓練中既感受，將全副心神聚焦於訓練當下既每一分每一秒：我學會以身體同自己既感受為重，有時狀態唔好就做輕d，狀態好好有motivation先黎個heavy session，唔會日日都go all out，唔會時時刻刻都力求進步，而係適時放緩腳步；我開始唔會諗做完呢個訓練我就會變強、變大隻或者點點點，而係專注於訓練入面既每一個動作，感受自己身體既控制同協調、肌肉既發力與收縮、呼吸既節奏起伏。慢慢，我變得愈黎愈鐘意訓練，有時諗起聽日有得練野就會成個傻仔咁滿心期待。而當我愈來愈關注自己感受，將心神聚焦於當下，係某d時候，什至會發現自己會進入一種無心無旁騖既狀態，仿佛感覺唔到時間既流逝，全副心神都傾注於當下既每一set同每一rep。果種極致專注既狀態，認真痛快淋漓 (運動表現會變到好好，仿佛一切都變到好輕鬆)。因為偶爾能夠進入到呢個咁痛快既狀態，令我更加鐘情於訓練。訓練對我黎講已變變左一種享受。所以有時都會諗，如果冇果段片，我就未必會有呢番感悟，咁我今日就唔會咁享受訓練。That’s why 我覺得熱情係可以培養出黎：或者只要你嘗試將焦點由目標／成果慢慢移至訓練本身，訓練中以自己既感受為重，適時調整訓練強度，並全神灌注於當下，你就會學懂如何享受訓練本身，然後發現：原來於你而言，訓練係本質地有價值，並唔係為左達到某某成果／目標而存在。咁既心態下，你就會自然而然既燃起對訓練既熱情。而係熱情作伴下，訓練同玩耍劃上等號，自然容易堅持得多。當然，如上文提過，passion comes and goes，即使係依家，我偶爾都仲會有懶／冇乜motivation既時候，咁都要靠住自律，鞭策自己要堅持。但咁既情況，其實自從我有左”享受” 呢個mindset後，都什少發生。(上面描述果種仿似”入定”既專注狀態，其實係好多運動員口中既”入左zone”／心理學入面既”flow”，網上都有好多相關資料，有興趣既朋友可以自己搵資料瞭解下)
當然，上面既心得都只係我個人既經驗同體會，大家未必需要照單全收，始終每個人既性格同身處既環境都不盡相同，要細心諗下對你黎講，邊d論點值得借鑑／邊d講點套用唔落。最後講多幾句，個人綜觀成個fitness industry，關於點樣練肌肉/點樣執行某某訓練動作既具體資訊多不勝數，但就鮮有討論會觸及心理層面，例如 「究竟應該帶住乜心態去對待健身呢件事？」、什或乎 「健身去到最尾係為左D乜？」、「訓練既價值究竟在成果定係過程？」等等呢類更本質（同時都更抽象同無謂）既問題。由於我都鐘意諗呢方面既野，日後心血來潮都會再出同樣類型既post（或者video都唔定），分享下自身既感受同體會，希望會填補到呢個knowledge gap
希望上文會比到motivations/values大家，其實只要有一個人因呢個post而嘗試接觸街頭健身/對呢樣運動有新既體會，我都已經心足
（冇就唯有當係整理思緒，聊以自慰一番so sad)。各位巴打有乜意見／問題，都歡迎係下面提出
Btw有興趣睇更多相關資訊既朋友，可以follow小弟既fb page & youtube channel
FB:
https://www.facebook.com/GetGohk/
Youtube:
https://www.youtube.com/channel/UC5I0JlaPNhNyE_Jzl3g4QdQ
唔好咁啦好尷尬
