大家好,第一次係連登開post,旨在同各位巴打分享通識科考試心得,希望係最後3個月幫到大家。post得上黎,內容緊係全免。
因興趣同工作關係,2012年、2018年都以自修生嘅身份報考通識科,慶幸都取得5** 。而我認為如果充分掌握到通識科課程同考試嘅要求,如整合/比較資料、運用資料/論據解說嘅特點,對其他學科嘅考試都有幫助,尤其邏輯說理嘅要求,即使上到大學寫paper,呢套論說/邏輯推論嘅方式都會用得著,所以多年來都努力係唔同層面推廣呢科。當然,同學可以將有關考試技巧轉化去唔同層面運用都係後話,當前最重要係要應對黎緊嘅公開試。
近月,就去學校幫手講解通識科內容及考試特點,發現臨近公開試,唔少學生依然唔能夠將三年所學重新整理,亦唔懂得點應對考試。所以為左幫到更加多有心讀書嘅同學,決定係度分享下
1. 論點有咩要求?
呢度所講嘅論點,係任何「題型」中嘅段落,最基本都要做到咁(要求唔複雜)。
主題句 (展示概念 / 歸納能力) + 解釋概念 + 引用例子支持(卷一用資料優先) + 申述說明(扣題) + 小結。
咁概念係邊度黎?緊係你自己讀返黎﹗
2. 題型用黎做咩?
坊間好多時都分題型黎教,希望同學可以用唔同方式去應對。呢度,我想大家諗一諗題型幫到你邊一部分,我唔反對用題型分類,但唔少同學記題型都記到好亂,咁明顯害左你。其實,題型只限於幫你答得框架,好比你中英文作文,寫議論文都有一定嘅框架,但框架係無幫你填滿內容(段落內容嘅要求睇返第1點)。所以坊間成日鬧通識科話背框架就考到,呢種指控並不正確。
題型分類當然都有功能,就係當你見到題目關鍵字之後,識得係答題時用相應嘅框架,避免你做少左要求而失分。但由於近年考評局出題都有微少變化,考題嘅要求亦愈黎愈清晰,如指明兩個原因、兩個影響、一個關注點等,呢類題型嘅框架亦不外乎︰
引言 + 論點(要求幾多個論點就用幾多段) + 結論
依幾年要記熟嘅框架,可能淨返「論證立場」、「比較題」、「評估題」等題型。同學答呢幾類題目時記得一定要︰
表明立場 + 從不同角度論證 (+ 比較同評估題要加入準則黎衡量) + 駁論 + 總結重申立場…… 絕對唔難記吧
但同時,死記框架唔一定幫唒你,講到尾考生要靈活應對 ︰
如2018年卷一題2c,既要先從資料指出信念,又考資料多大程度上支持。當然,聰明嘅考生都知道,係資料抽取及解釋信念後,後半部分同以往限定資料論證立場(如2013年卷一題1b,環球肥胖果題)並沒有分別。所以,有框架唔代表你唔需要臨場應對,亦即考評局多次提及考生唔應該死記硬背特定框架。
3. 卷二選答題目嘅技巧
如果同學有睇考評報告,你會見到每年卷二3題揀選嘅比例分佈明顯唔平均,而得分亦有差異。
2017年選題百分比︰
Q1:19.2% Q2:71.3% Q3:9.5%
2018年選題百分比︰
Q1:20.2% Q2:53.6% Q3:26.2%
從考生表現得知,2017年揀Q3和2018年揀Q1嘅考生,成績比另外兩題的為差。但亦睇到好多學生識揀,正因為咁,有心考嘅你絕對唔好揀錯。唔想做揀錯果個,你揀果下先問自己︰
1. 3題入面,邊條嘅題型相對易d ?
2. 你揀左果題嘅每隻提問字同關鍵字,你真係明?
3. 如果你揀完都無信心,你答題a前,不妨簡單列一列你係題b嘅pts,唔好答完a題先諗題b……
以上嘅分享都係好入門,之後都會慢慢更新。而對於通識科有咩野問題,歡迎係度問,識答嘅一定會答到你明。
最後,以下係我自己係文憑試卷5**嘅答案,完全公開的,會同步持續更新。
Facebook︰通識5星星
https://www.facebook.com/dselsjohnyy/