【歐遊遊記 2018】獨遊瑞士法國德國奧地利 17日童話小鎮雪山風景遊

去個廁所要幾錢

多唔多廁所？？

問多個問題

你日日唔同景點，即係成日搬酒店定點

通常1歐
講起發現 我好少去廁所所以無特別留意 幾乎去親都係火車上 唔洗錢
景點就好似通常旅客中心 餐廳先有
大車站 商場都有
呢d 通常都要錢
有時仲有d流動廁所

經常搬 17日住左11間 但真係無計
歐洲同一個地方好少話會好多野玩到5 6 日，
所以要搬住玩
但我packing好快 又用backpack
無覺得好煩

我冬天落雪都咁玩
因為歐洲暖氣感覺無日本咁熱 唔洗太onion
入室內除左件大褸就夠 搭車就掛係窗隔離d勾/當被 唔洗放袋 室外就一定會著返
又唔知我件褸好定點 -10到18度都可以一lup佢就搞掂 無其他外套要除/著
冬天仲可以帶少d衫 因為唔洗洗咁密

但日本果種係熱到想除剩一件既程度 就會一入室內可能要除好多野咁

但等左陣，有一小範圍既陽光！

會見到呢張同上面真係唔同架
不過都唔係最靚我相信。
因為始終無果種：哇痴線架…哇點解咁靚 既感覺。
因為我本來睇人地D相多，以為呢度會成塊鏡咁睇到d山既倒影，
不過黎到見到唔知點解好似好少水咁 ，個倒影唔明顯，
唔知係位置問題定點，我四圍捐都見唔到果個效果 。

不過有D陽光，D山石立體好多，已經係不幸中之大幸。

其實左邊間屋仔外既橋仔路係keep住有人係果度影相 ，
我身後都有唔少人係度同我一齊影緊個湖，
所以面對呢個咁既環境，但四圍都係人聲，好似怪怪地 。
不過又靚又出名既地方就預左多人都係咁，無計 ，
但你就預無得靜靜咁係度hea下，因為呢個位好細 ，
個個都係黎睇呢個位，所以會幾熱鬧下 。

我趁有陽光，就狂影多好多張好似一樣既相。
高d既角度影好似會睇到明顯d既倒影。
我仲搵左個影相唔錯既人幫我用手機同相機影，
唔錯唔錯，好少人地搵啱人影相

點影始終無果種倒影感。
後來發現影倒影黎講，呢個唔係好既位置，陣間果度先係。

好似無水咁 但其實真實睇真係好似好少水

之後我影夠後，就決定行埋去對面。向呢個湖既右邊一直行就係，行唔洗一分鐘就會見到呢個位：

其實呢個位好似仲靚，起碼個感覺無咁乾塘先 。
但係我等左勁耐中間果兩條友都唔肯走

另一張相無咁明顯，所以成功p走左，byebye
呢個位個湖雖然而全無倒影，但d色真係好正

繼續行，見到有倒影啦

呢d先係倒影黎架嘛

一路行過去對面岸，其實初頭都係好輕鬆，
就係下面呢d少少向上斜既路。

左邊一路都係湖，不過就有樹檔住。
間中會有d位無樹，就有d d 湖睇。

一路行都無咩人。
睇黎好多人都係睇完頭先個位就走，但其實對面都值得去架。

呢種路行極都未完 間中有d驚喜，呢張可惜下面唔知點解有水波，
唔係既話就係幾完美既鏡


之後就開始到左最難行既位：

唔好睇佢好似普通行山樓梯咁，佢每一級都係完全唔平坦，
仲有有d級又會厚d，有d又薄d，
整體上都係好厚既級，要好用大脾力咁上，
之後每級又好長，你兩隻腳行一級就太窄太短，
一隻腳一級呢又要跨得大步d，就更用力，
仲有d位整唔到梯就鋪塊板算，勁有好易pk既 feel，
全程一路行都企得唔太穩，但又無d卸到力既扶手，
有時又要讓下路比人行上行落，
總之就一路行會好攰 ，你又要勁專注咁行，
因為你唔望地下行實好易差錯腳扭親，
我途中都見到有鬼佬差錯腳趴左落地。
你睇咁多碎石，一PK都好難唔損手爛腳
所以以我呢d完全唔行山既人都順利行完都算係咁。

不過上面張相我幾鐘意，因為個湖鏡面搞到呢個位好似係半山懸崖咁，但其實個水面都唔係離呢個位太遠

唔知點解呢個位睇d水又深色d

d山石係完美地被反射



但我一路行真係勁想知：完未啊

無陽光，d水黑色咁

頭先果種路一路向上可能都持續左15-20分鐘，
咩力都無曬，終於都見到正常路 。

之後就到落
落都好辛苦，下下咁大級踩落去，你對腳同襪衰d既，
你d腳趾都實生水泡 ，滕頭都要受好多力。


平路啦 光都無曬。
呢頭望過去係咁。呢下咁啱有dd陽光

不過唔知點解呢頭d水好多泡泡定細細粒既垃圾，總之睇落好似好污濁

最可惜就係對面座山唔見左個頂

下圖無咩光啦，你會見到個水面好多唔知咩，一達達。

又有光，呢度都有間屋，似乎有個名，叫牛奶小屋？


好似攻略果度講，我鐘意呢度多d，
唔係因為覺得靚D（其實呢邊D水好混濁），
而係因為呢度比頭先果度舒服好多，
因為廣闊好多，
頭先果度根本就係係個樹蔭下影完屋仔張相就算 ，
但呢頭係個大草地，上面有牛、有賣牛奶、食物既地方 ，
你可以求其搵個位hea下，舒服好多，唔係剩係可以打咭同影相 。

呢度好好太陽但對面d山一pat野咁。


呢度有草地，上面有牛，好多牛鈴聲。







我既目標係去前面呢間屋度買牛奶飲。
佢既牛奶就感覺夠曬天然，叫做fresh milk，
可能係呢度d乳牛度搾既，有兩種味，
原味同牛油味牛奶（buttermilk）。

木欄同呢度既環境夠曬配合


fresh milk 2歐；
butter milk 都係2歐。
一場黎到，咁辛苦過到黎緊係要試曬兩種啦。


呢間屋仔都好可愛。佢其實係間餐廳，
出面有張好長既枱，係度食野應該都好好feel



到手啦！
佢係比個玻璃杯你，飲完比返佢。
其實我一個人又要拎相機又要拎兩杯奶真係好狼狽 。

兩杯奶表面睇落係完全無分別，不過飲落你一定分到 。
我既建議係，
千！萬！不！要！買！牛油奶！！
好難飲 ，你簡直係好似飲緊溶左既酸牛油咁 ，
好恐怖，感覺係壞左既奶咁 ，
如果唔係比錢買既，我直頭覺得係飲完會肚痛果d 。

而個fresh milk就好飲啦 ，濃濃既牛奶 ，
質感會比平時既黏少少，
心理作用上點都覺得呢度飲既fresh milk係正d既！
特別係係呢個環境慢慢飲下奶，真係幾好feel 。

而個牛油味既奶 ，我都試左好多次忍下睇下會唔會慣左就ok，
係唔得架！
我最盡只係飲左2厘米都唔知有無既水位，
但fresh milk我就飲曬。
我拎返去果時都要鬼鬼祟祟，因為我覺得好似無飲過咁比返人好浪費

頭先我就係落去坐住草地飲。

呢幾陣太陽完埋之後，個天就變左咁。


乜光都無，我回程啦

回程既路我剩係想快d完成段路，所以我一味行剩係影左呢張

一野飛到我我就行到碼頭啦

呢邊又咁好太陽

呢個時候條隊唔長唔短，大概係等一架船後下一班就到我上。




20分鐘左右既船，就到紅蔥頭呢度 St. Bartholomä

紅蔥頭教堂 St. Bartholomä

睇得出今晚一定好好天，d雲無曬（但聽日就一樣係唔好天）。

呢個教堂其實係船上影係最靚，上到岸反而又變得無咩野。

一舊舊圓形，係幾可愛既


有時間既，坐下呢度都會幾舒服。



基本上呢度就係得呢d同個餐廳。

教堂係由側面入。


好細既小聖堂，幾涼，行到攰係度坐下都唔錯

白雪雪

好快我就出返黎，之後直接去碼頭等船
因為呢度真係無咩好做，
所以我都建議一黎國王湖就玩左上湖先，之後過黎行個圈就走得。

排緊隊果時會路過一個印台，可以印印仔，
我都印左個落張票度。
佢話如果你想蓋個印就自己入1歐定唔知幾多落個箱度


呢度既船可以帶動物，有隻好大既狗

落船後，發現下班巴士係10分鐘內走，
於是我都無時間慢慢行手信店，
直接向巴士站行，諗住返去Salzburg先買。
不過原來salzburg係無國王湖既野買



之後都係一直坐巴士返到去Salzburg同check in，
關於酒店既野會係遲D再講

國王湖完整遊記完啦
呢度天氣好既話係值得黎，
我唔敢話必黎 ，因為我未見過真係好天係咪好鬼靚，
不過就算好似今日麻麻地既天氣，都係值得黎下既，
我諗我睇到既得好天既3-4成
有幾陣陽光果時都係幾靚
但如果天氣差到光都無，我諗就唔好特登黎了
D山草湖無光會好無睇頭

推

唔係必須 但我唔想一日搭太耐車 所以經innsbruck停一停再入
Salzburg一次過應該有火車搭入瑞士既
你揀個城市做落腳地
再去grindelwald應該無問題
有時間

推一推先 聽日加速

DAY 9 奧地利薩爾斯堡 SALZBURG — 用 SALZBURG CARD 觀光遊記 - 行程 交通



上次歐遊係奧地利無去位於西部既Salzburg 薩爾斯堡，今次就黎玩返喇～本來其實我黎既目的係方便我去國王湖，但結果Salzburg遊好驚喜，呢日好充實，因為28歐既Salzburg Card真係包好多活動
係度由朝玩到傍晚就啱啱好，張咭基本上包曬市內出名既景點同交通，仲有市外搭纜車上山睇景同一個幾有趣既宮殿都包，用佢一日可以有好多唔同既體驗，絕對買得過

Salzburg Card 一日版一張28歐，聽落唔算平，但真係好抵玩，呢篇會講下呢日我用佢黎去邊玩、每個景點所需時間、有咩做等等。

用盡 SALZBURG CARD 行程路線 參考時間
我既路線係由市內玩到市外，到傍晚就返市內食野，行下：

是日基本上我係10點開始行程，玩到6點。
10:00AM – 2:30PM
行程No. 1-4
1．薩爾斯堡主教座堂 Dom zu Salzburg （有入內）
2．行格特萊德街 Getreidegasse ＋參觀莫扎特出生地 Mozarts Geburtshaus （有入內慢慢參觀）
3．薩爾斯堡現代博物館 Museum der Moderne Salzburg （剩係睇觀景台）
4．薩爾斯堡要塞 Festung Hohensalzburg（有入內參觀）
期間無入餐廳食lunch，一路行一路食


2:30PM – 4:30PM
搭30分鐘左右去No.5既Untersteg睇風景，4點半左右落返山腳，
搭四個字左右去6號既海爾布倫宮 Schloss Hellbrunn

5:00PM
睇海爾布倫宮5PM果場Guided Tour，全程45分鐘左右

6:30PM
返到Salzburg 既餐廳晚飯

8:30PM
係No.8 一帶，Salzburg河邊睇風景 日落 ＋行下米拉貝爾宮 Mirabellgarten既玫瑰園

9:30PM
天黑 返酒店

以上所有交通、入場門票都係一張28歐既Salzburg Card包曬，佢既詳細資訊會係下篇再講。

SALZBURG 遊記
早上，首先從酒店行3分鐘去火車站整返張Salzburg card ，
呢間酒店位置靚，我好滿意，係另一篇會再寫佢。
其實今日天氣預報係講到全日落雨 ，
但結果係天氣好到傻 ，
剩係係玩水既海爾布倫宮落左陣細雨，不得了！！


係火車站出黎，緊係搭巴士去河果帶～
我向左邊巴士站行，但呢個時候，望住啲車出出入入，
係完全唔知點搭，
而家你用google map係會見到呢啲班次：


但我果時Google 建議既係無 O bus 3 / 5 / 6 呢啲，
只有 25, 170, 160, 而個巴士站係唔多見有呢啲巴士，
係果個車站，只有1,2,3,4,5,6呢啲車
不過好彩呢度有唔少tourist info 既職員 ，
我就聽佢講順利搭左3 /5 /6 號巴啦，
發現當時google map 既交通係完全用唔著，
於是我就係巴士上拎左張bus map慢慢睇 ，
去到之後我直頭download左個salzburg既巴士App ，
都幾好用，不過而家大家應該唔洗download啦，
因為跟住上圖既「O-Bus」number搭就OK啦。

順帶一提，Salzburg Card 巴士只限：
O-bus 1-14 號 &
Albus公司既Regular Buses : Citybus A, 20-28, 34, 35, 151號。


有得叉電既巴士

睇左咁多日古城，雖然Salzburg都係古城，
但佢個感覺都幾唔同，有種高貴既格調。
仲有呢個城市主題色似乎係藍白色。


莫扎特廣場
黎到莫扎特廣場，好冷清，
因為個廣場無咩野睇，似停車場多啲。


呢度有個莫扎特雕像。

我唔係特別好音樂既人，對佢唔算好有興趣。

真係無咩人，又無古城地磚 。
呢個廣場既睇頭反而係教堂呢邊，多人好多 。


呢個教堂吸引到我黎睇，
因為佢前門白色果個位好靚 ，入面都整得好精美 。


好大既噴水池。


呢座野係任何觀景台睇都好搶眼。
佢初初建果時係羅曼式教堂，不過因為嚴重受損，
被迫拆除，改建為巴洛克建築。


薩爾斯堡主教宮 Salzburger Residenz，出面好多馬車。

而家薩爾斯堡主教宮基本上係用黎被人租場用，
不過入面仲有個 DomQuartier Salzburg 既Museum可以參觀，
Salzburg Card都包既，但我就無去啦。
入面似乎係有啲宮殿呀、畫呀、工藝品睇下咁，
有興趣知多啲可以睇下官網。




我就一野入個教堂。
我覺得呢個教堂都幾特別，個正面唔係對住大廣場，
而係係個內庭入面。
而重點係，佢入面裝修靚過唔少大教堂。

薩爾斯堡主教座堂 DOM ZU SALZBURG

開放時間：
星期一至星期六：8:00am開；5-7點關，個個月唔同，請睇下面條link
星期日：1pm開；5-7點關，個個月唔同，請睇下面條link
http://www.salzburger-dom.at/en/information/opening-hours/#.W_vOtJP7R-U

點解可以無人？因為佢封左路姐，
其實其他位有唔少人，不過又唔多嘅。


好多天花畫既教堂。
其實以前我以為歐洲既教堂全部都係咁，
黎到睇多啲先知就算外面好靚既教堂，
入面都唔一定造得咁精緻。






左右好似一樣咁，幾得意。



其實都係入去行個圈就完。之後去內庭既另一面，係一個廣場。

CHAPTER SQUARE – KAPITELPLATZ

呢度見到山頂既薩爾茨堡要塞 Festung Hohensalzburg，
不過我未打算上去住，先係度行下先。

Südliche Dombögen 金球人，
唔太清楚有咩意思，不過就覺得幾得意。
我幾鐘意呢度，幾靚～




呢度仲有一排手信攤檔，我都有所收獲，

覺得隻色好代表到Salzburg

呢度行入去就可以到上城堡既纜車站。
但唔係下面呢度 呢度唔關事的
純粹想睇下個路軌。



呢班細路睇啲水車睇到勁興奮

出返黎

好似有生氣左


好記得行到呢頭有兩個成個賓妹樣果類南美20零歲女人係度一路行一路chingchingchongchong
好弱智同無聊


呢度既屋同德國既感覺真係幾唔同，
呢度既多數大大座，正正方方，
用色就粉色系，好簡單。
黎到呢度我就知自己離木骨屋既地方好遠了 。




成架車都係，幾可愛，不過無買，無咩興趣。

行行下有啲隧道咁既路可以通去最旺果條街。


格特萊德街 GETREIDEGASSE

呢條街咁旺一黎因為佢係H&M街，好多店係度，
二黎莫扎特之家又係呢度，
再加上佢號稱Salzburg最美街道，
自然好多人係度行，都唔錯，
甚至有BLOG吹到佢係歐洲最美街道，
呢樣我就真係心諗大佬唔好咁痴線啦，
其實呢條只係一條好多好靚既吊牌招牌既街，
之前都見過唔少，靚佢好多倍既都有，
唔係啲人吹到咁特別，唔好太高期望，
不過你點都會經過佢既，係度影下相都OK既～啲牌的確幾靚。




下圖咁睇又唔錯

Nordsee！！！ 話說我睇中左下面呢啲海鮮盤，

但佢竟然要成17定22歐
洗唔洗呀，對我黎講Nordsee只係快餐，
緊係覺得唔抵唔會買 最後我都係買返我最愛既薯角算

莫扎特出生地 MOZARTS GEBURTSHAUS
食完就去莫扎特之家。
其實佢門口唔起眼，下面仲要係超市
不過呢條街的確得佢咁既色，
同埋門口長期有堆人係度
你唔特登揾，miss左都唔出奇


Salzburg Card 免費入場是基本吧，
正價 EUR 11 (有興趣可以去埋故居，都包既)。
莫扎特出生地開放時間：
Daily 9 am-5:30 pm
July, August: daily 8:30 am-7 pm
Dec. 24: 9 am-3 pm
(last admission 30 min. before closing)
Closed periodically during Mozart Week when concerts take place.

首先係呢啲舊時設備

然後就係唔比影相既部分，
有莫扎特一家既故事，佢既作品既真跡，
用過既物品等等，
我覺得就算對音樂家無特別興趣都好，
都會覺得個館好睇，我都好認真咁慢慢睇。

幾得意既係，莫扎特似乎唔太鐘意Salzburg，
去左Vienna之後都無咩再返過黎，
返黎都講到好唔情願好鬼想走咁
完全無鄉愁咁

個館認真睇你既話都可以用上一粒幾鐘，
出返去後，見到出面有間咁既店

重點可以留意下後面既Mozart幾厭惡佢地

而加出發去No.3，
薩爾斯堡現代博物館 Museum der Moderne Salzburg ，
其實我對當代藝術興趣不大，
我剩係黎睇觀景台
但值得去呀！


跟住google 路線一路行過去，

要揀佢門口個巴士站，
行/搭車都係5-10分鐘左右：

如果你點錯位（點個館），佢會水你去兜路，

下圖就係門對出既街景啦


薩爾斯堡現代博物館 MUSEUM DER MODERNE SALZBURG
MÖNCHSBERG 觀景台
呢個館有部𨋢係直上觀景台既，Salzburg Card 包左觀景台，
正價EUR 8，
開放時間：
Mönchsberg
Tue—Sun 10 a.m.—6 p.m.
Wed 10 a.m.—8 p.m.
平時星期一休息
During the festival season （相信講緊聖誕）
Mon 10 a.m.—6 p.m

上到去就見到：


河、山、城堡、市景一眼無遺，
之前以為Salzburg全部屋都藍白灰，
原來都有唔少橙色既。
仲有條河好黃 但個景係幾正～

本來以為咁：

不過zoom近啲好似真係：

真係藍白色既城市！

好搶眼既教堂

其實前面有堆草要避開
我覺得呢度地形都幾得意，環山之內有塊好大既平地，
有河穿過，之後無啦啦有幾座好細既山仔咁。

河既另一面都見到，但果邊無咩地標，所以無咩睇頭。

落返去，會見到書店同藝術館入口

唔係文青既我緊係一野skip左

影返門口，係咁樣既：

呢度有個巴士站，當時我見有車就上，反正唔識搭，
結果錯方向，唔知去左邊 ，
就襯早係大既車站落車，搭其他線返去Mozart 廣場
呢個時候呢D Map就用得著，
不過download App就更好，
會講埋架車幾時黎。而加就google map都夠用。

話說google會建議你搭巴士A既，
而我不知巴士A是咩來，
行去城堡個纜車站都係11分鐘姐，行都OK，沿路有野睇。

至於一早玩完城堡再黎呢度，再係度搭車直出市外玩又得唔得呢，
我睇就分別唔大，因為都係要係Mozart廣場轉車（25號巴士），
或行11分去某個站先可以一take過出市外玩，
要行既路唔會差幾遠。

薩爾斯堡要塞 FESTUNG HOHENSALZBURG

見到咁多人我嚇左嚇，以為要排長龍，
好彩原來佢地只係聽緊野既學生

上城堡連來回纜車要 € 12.20 （2019會加到EUR 12.90），
用Salzburg Card 唔洗錢。
上面有幾個展館，Salzburg Card 係包官網上Basic Fare 既館，
（我懶得譯啦譯主要既） salt storeroom, torture chamber （酷刑）, look-out tower, ‘Salzburg Bull’ – mechanical organ, Fortress Museum, Rainer Regiment Museum, Marionette Museum （木偶館）, fortress precincts, Alm passage.
除左木偶館外，都係典型城堡野。

有啲位係要加錢入既（買EUR 16.30 既All-inclusive ticket就全包）：
unique Princes’ Apartments in the main castle and the Magic Theater (Golden Hall, Golden Room, bedchamber of prince archbishop Keutschach † 1519)
大概係啲華麗既皇宮啦，我就睇過太多，無入既。
我見官網話11am前用Salzburg Card可以入埋State Rooms，相信即係呢啲。

詳情：https://www.salzburg.info/en/sights/top10/hohensalzburg-fortress

開放時間：

January-April*: 9:30 am-5 pm
May-September: 9 am-7 pm
October-December*: 9:30 am-5 pm
*Easter and Advent weekends: 9:30 am-6 pm
Dec. 24: 9:30 am-2 pm (last admission 2 pm)


好輕鬆咁就上到車，左右係無風景既，面山腳果個位就有啲野睇下咁。

到了觀景台呀～

我上親高位最大目的都係睇景，
咁我覺得頭先現代博物館個景好睇好多，
因為企係呢個位影唔到個要塞

角度都無咁靚

有趣，呢個位睇，條河又藍返

唔知邊度黎





無咩好影，行下先：

呢個堡白色，簡單得黎都有特色。

我就去我最感興趣既木偶博物館，
不過就比想像中細，一個圈仔就完。

木偶造型都同個城堡相關。

原來仲順便賣公仔


佢個樣好得意


海爾布倫宮都有～

呢度有段video講個要塞既故事

之後就無野睇了
四圍行個堡





我最鐘意既係呢段片，用左好新鮮既方法、
可愛既插畫去講呢個要塞既建築歷史，
我好享受咁睇曬，平時果啲我會睇到訓著
例如紐倫堡果個



以下係城堡必有展品


佢話呢張係佢地既床，睇落個人勁短，可能因為張床正方形啦。

下圖係話重建過程中發現以前最初係有好精美既柱同拱形頂，
後來不斷改建後就埋住左，
係近代改建想拆果時發現左呢個結構，就保留左。

真係精美過而家唔少，而加白牆一片

呢個位，佢唔講都想像唔到原貌係點

係下圖

D免費館睇曬，出去行下。
呢個要塞都幾似一個小城鎮




同城下面個啲建築風格都幾唔同下


落山了，見到呢個位，呢隻鴨好似住係皇官入面咁


山腳有水斟，斟水時間，水流超慢，但啲水的確好飲既





呢度仲有個洞，
話比錢去（好似係個花園仔）kiss下就可以永遠係埋一齊

走人




係時候出市外玩啦～
Mozartsteg (Mozart 廣場) 呢個站搭25號巴士去到Grödig Gartenauer Platz ，
幾步就到Untersbergbahn GmbH呢個纜車站。

大塞車，架車埋唔到站

佢到站果時真係一片混亂，因為埋唔到站，
佢個樣好似直頭唔打算黎咁 ，繼續行，
好彩佢塞車塞住左，等車既人就直接行去車門yap個司機 ，成功上車。

落車位係咁樣，多數人都會係海爾布倫宮落，
呢個站都有既，但唔多。纜車站就係視線範圍內。

UNTERSBERG 高山峭壁纜車

座山好高好型呀

呢個車站係有班次規定既，唔係有人就入，
30分鐘左右一班我搭3黎，要等搭半先有。

alzburg Card 免費；夏天：EUR 15-16 ； 冬天：EUR 25 歐 。
詳情：http://www.untersbergbahn.at/en/die-untersberg-bahn/preise
開放時間：8:30 AM to 5:00 PM
（22 October 2018 – 14 December 2018 關閉）



紅燈即係未入得。
呢度仲話你知佢既纜有幾粗
。話說出面我見個纜好少支架，又好斜咁，
望落條條fing咁，都幾恐怖


夠鐘～架車好大，人唔多。

控制室，乜都影唔到



衝呀 話咁快就到半空


好綠好靚

戲玉黎啦

職員都係度。日日睇，應該無曬感覺啦
佢個位最好，無玻璃

真係好斜

經過個架果下，架車震一震，離心力勁大，
全車即刻嚇左嚇，互相對望，然後笑

好型既雪山石 但因為唔夠高，夏天山頂無雪既


過左一段山頂，繼續上

又過多個

上面開始多雲，能見度低啲

啲地勢

再過

到啦，上到黎下面好矇

（山上風光待續）

呢張係望返去纜車站。呢度有個餐廳。


呢個位其實好正，你真係feel到自己係好高既位。山上既草好翠緣。


有好易行既山路，我既目標就係去佢山上既十字架：

下圖可見，從纜車站上去，轉四個彎都到，10分鐘內既事。

其實一路行我都有啲驚，差錯腳真係係咁先，但條路唔窄既，行入啲都ok



唔知點解有個營火堆


沿途既景好舒服好靚。但下圖果邊我就唔行了，太遠了。

行下面左邊呢條

好靚呀一舊舊




呢段路其實好快行完，但我影左好耐好多一樣既相

下圖既黑點係雀黎


就到了


係下面睇上黎真係睇唔出山頂有草

到了

四圍影下





呢度真係好舒服好舒服

果邊山頂有更高既十字架，太遠了，不了

疑似國王湖果幾座山，因為勁高，又的確係附近。

太多雲睇唔到頂，不過好事黎，姐係今日天氣同琴日差唔多，我無miss左佢既好天氣




落去lu




好快就返返黎

天氣越黎越差，走了

落山睇另一個角度

左邊既石正呀




有架車飛過，但快門咁岩set慢左


下面天朗氣清

呢度無紀念品買，即刻去等車去海布倫宮/惡作劇之宫，
同一架車，25號，反方向。

海布倫宮/惡作劇之宫 (HELLBRUNN PALACE / SCHLOSS HELLBRUNN)
黃色圍牆既就係啦。

建於17世紀，但絕對唔係古蹟咁簡單，
一定係最好玩既古蹟！下面會講多啲。

惡作劇之宫用Salzburg Card 免費，正價 EUR 12,50，
時間直接用官網資料：

夏天開到9點幾都有，真係可以由早上玩到晚上。

一入場，應該去左邊既ticket office買/換飛先，再去右邊入場。


我剛好一個人可以zip埋入5點果場tour。


入場，呢度一定要guided tour


入面幾靚架，因為當時主人馬庫斯‧西提亞斯大主教好好客，
成日請客人黎，整到靚一靚，
仲好鐘意玩佢地 —— 呢度好多噴水機關，
你隨時會被佢fake左，企係啲噴水位，
搞到個身濕曬
記住做定被人玩心理準備
唔好入去被人玩到發爛咋


一路行疑心都好重我事前特登唔睇人地劇透，
咁先好玩，我都唔打算係度開曬估，
加上因為驚濕，我收起曬相機，無咩點影相。




首先係度聽下介紹，有去過既巴打就知下圖有咩咁搞笑


好多印度佬，有個聽聽下仲無啦啦手機大聲播野，
被人叫佢收皮
之後呢個位發生咩事就唔講啦
有人想知再講



之後我就收起我相機啦，專心玩。
呢個宮好好玩，你會見到有啲位擺明伏位黎，
但有啲人真係好真心咁唔知，企埋去唔走，
大家都會好期待佢地中伏果一刻，
笑死
總有啲人點都會企錯位，中曬伏
仲有你幾小心都好，都好難完全唔濕，
我都有中伏，好彩只係好少
好推薦大家黎玩
真係個特別既景點！

玩完後，就出去安全既花園啦，但呢度無野睇。



買左啲postcard就等車走了，
仲見到個tour guide 踩單車放工。

之後我就返去市內晚餐，係間啲野好難食既餐廳。
其實本來想睇河景先，但見個天好灰，影相唔靚，就去食飯先。

呢度幾熱鬧幾正，唔知點解仲有條有流水既渠同波波，
似乎好乾淨，啲細路係度玩啲水


L’OSTERIA SALZBURG 好難食 唔好去


見佢 trip advisor上好似評價ok，黎到又多人，
仲好平，一個pasta先10歐左右！

我太耐無食Carbonara, 緊係叫返個

等左超耐後，黎啦。

個麵質我諗都唔洗多講，一睇就知過曬龍，漲，
但見咁多sauce應該會好味掛。
點知，無味！！！！！！
痴線，完全無味 ，要自己狂落芝士粉，
隔離枱個英國佬食緊Risotto，
同我輪流借黎借去個芝士粉，狂加果隻
更din既係，佢埋單果時，個waiter問佢好唔好味，
佢竟然話： it’s perfect
我因為cancel左個panna cotta就叫埋單，
個氣氛有啲薑，佢就無問我好唔好味，
我無機會話無味，都驚我再踩多腳會被人打
美好既Salzburg一日被呢餐垃圾破壞左
再諗起Hallstatt果餐好貴既垃圾，
幾乎可以confirm係奧地利係唔應該入餐廳食，只會嘥錢。

SALZBURG河景 POSTCARD 位

呢個位係邊呢，就係Makartsteg呢條橋一帶。

不過一開頭黎果下因為日落，啲光要影相既話有點尷尬。




呢個時候真係好寧靜好舒服！

慢慢啲光平均DD，再後制tune D 色

想影相既話我覺得呢個鐘數唔係好時機，
因為個要塞影出黎真係長期橙色，我tune得好辛苦
但肉眼睇係ok



下圖係橋上影


好橙


呢幾個位睇真係幾靚 ，
之後順路去埋米拉倍爾宮花園Mirabellgarten

米拉貝爾宮花園 MIRABELLGARTEN

呢度有個大玫瑰園，不過唔知係因為無曬光，我覺得唔特別靚，無咩野睇

可以做影要塞既前景，不過個城堡而家變左紅色



之後天都黑得7788，所以就搭巴士返火車站返酒店休息～
11個鐘既行程完滿結束～
真係超充實、好開心既一日。
其實有啲人會chur到玩埋海倫布宮果頭既動物園先返黎，
不過咁就太chur啦，
同埋自己一個去唔太啱feel
是日既行程我覺得已經好夠玩～
再多就太攰

推

感謝巴打支持
canon 500D