【歐遊遊記 2018】獨遊瑞士法國德國奧地利 17日童話小鎮雪山風景遊

又好耐無上黎打遊記 ，雖然之前Exchange係歐洲四圍玩左百幾日（遊記link放下面/可以起底睇），但歐洲靚既地方實在太多，返左黎之後又儲落左一堆自己覺得好靚、好想快d去既地方 ，於是係歐洲Exchange既兩年後，我終於都忍唔住，係今年5月即興買左機票 ，6月尾就展開左我呢個17日既歐遊睇風景之旅

今次係獨遊，因為實在太即興、日數又唔短，所以一時間搵唔到個有咁多假同我癲既旅伴 ，而我又唔想再等，加上瑞士、德國呢頭其實都係歐洲入面治安比較好既地方，所以對於一個去過歐洲exchange既女仔（我）黎講，安全顧慮唔會太多，結果就自己一個都照買機票去 。

呢次去既地方主要係瑞士、法國東部、德國南部、奧地利西部 ，我專搵可以影靚相既地方（除左當中兩三個只係踏腳石），所以幾乎日日都睇到哇哇聲 。行呢個路線，睇景真係睇到好滿足，有曬我超鐘意既童話小鎮、古鎮；又有靚到痴線、仙境咁既雪山、湖景等，真係超級推薦 以下係成個路線既大概情況，數字係指旅程既第幾日，可能都有啲Chur，唔係特別鐘意城鎮既話可以Skip某D古城咁玩 。


其實返黎後我keep住有係FB page出遊記，但因為太忙出得好慢，想儲定D先post上黎 而家應該得閒D可以打密D 都係照舊多圖千字文 ，有咩關於去歐洲玩同exchange既都可以問下，我會盡量答，黎吹下水講下你地玩成點都歡迎
利申，今次D相會重filter

我今次係2018年6月尾玩到7月中，
搭既係荷航(KLM)同法航(AIRFRANCE)，
去程：HKG → Amsterdam, Netherlands（轉機10幾個鐘當行下）→ Zurich, Switzerland
回程：Zurich, Switzerland → Paris, France （轉機1小時）→ HKG

實際上去左邊，大概有咩睇，會係度講左先 （唔夠位，要post埋2樓 ）：

17日童話小鎮雪山風景遊 路線行程
DAY 1 AMSTERDAM, THE NETHERLANDS （轉機點 玩半日）
香港 → 飛機 → Amsterdam

呢個地方無顯示係上面地圖，因為只係巧合停留，有睇過我之前既遊記都知我之前黎過2次，荷蘭係我當時去Exchange既國家，今次轉機既停留令我可以重遊故地咁行個圈、影下相，返到黎 荷蘭果下真係好感動。

Amsterdam → 飛機 → Zurich
Zurich→ 1 HR 火車 （半價咭後 15.6 CHF） → Basel

DAY 2 BASEL, SWITZERLAND （踏腳石）

其實本來對Basel完全無期望，只係因為想去Colmar而佢又有巴士過去，我就黎左玩大半日，但因為天氣好好，呢日係度都行得好舒服，所以我幾鐘意呢度。

Basel → 1.5 HR Flixbus ( 9.9 EUR) → Colmar

DAY 3 COLMAR & RIQUEWIHR & HUNAWIHR, FRANCE

Colmar 呢頭真係好似童話世界
佢係可以連埋Alsace呢頭既幾個小鎮一齊去，當日我就去埋Riquewihr

仲好伏地行埋去 Hunawihr （遊記會講點伏法 ）


Colmar → 1 HR Flixbus ( 5 EUR) → Strasbourg
Strasbourg → 2 HR Flixbus ( 12 EUR) → Heidelberg

DAY 4 STRASBOURG, FRANCE & HEIDELBERG, GERMANY

Strasbourg 其實係轉車順便行下，但我又幾鐘意呢度，佢有現存世界第6高既教堂，現實睇巨型得好誇張。


海德堡最吸引到我係呢個好爛既堡

Heidelberg → 1 HR Flixbus ( 6 EUR) → Frankfurt （踏腳車）
Frankfurt → 2.5 HR DB train ( 19.9 EUR) → Rothenburg ob der Tauber

DAY 5 – 6 FRANKFURT (踏腳石) &
ROTHENBURG OB DER TAUBER 羅騰堡, GERMANY

羅騰堡（上圖同下圖）真係我最最最鐘意既小鎮 ，因為呢度既人好好，風景又靚，成個氣氛好開心。



而Frankfurt就真係完全唔洗特登去，香港黎 ，佢個old town都無咩特別，太新淨，好假，我只係唔想一次過搭咁耐車先係度行下。

Rothenburg ob der Tauber → 2.5 HR DB Train → Nuremberg 紐倫堡
Nuremberg 紐倫堡 → 2 HR DB train (不是ICE) → Munich
全日交通用拜仁邦票 25 EUR （不可搭ICE類火車）

DAY 7 NUREMBERG 紐倫堡 & MUNICH（踏腳石）, GERMANY

紐倫堡古城都幾大，但由於羅騰堡太靚，黎到呢度就覺得呢度無咩野 ，
不過個城堡高塔同水井幾值得去下 。

Munich → 2.5 HR DB Train & Bus → Fussen & 天鵝堡
天鵝堡 & Fussen → 2.5 HR DB Train & Bus → Munich（踏腳石）
全日交通用拜仁邦票 25 EUR

DAY 8 新天鵝堡 SCHLOSS NEUSCHWANSTEIN, GERMANY

其實我之前黎過，但果次天氣差、呢個位既觀景橋又整緊，今次順路就黎多次 。

Munich → 1.5 HR OBB Train （19.9 EUR）→ Salzburg
Salzburg ← 1.15 HR Bus (12.2 EUR 全日票) → Königssee 國王湖

Post 唔曬，下面繼續

DAY 9-10 KÖNIGSSEE 國王湖, GERMANY & SALZBURG, AUSTRIA

今日天氣一般，得幾陣好短暫既陽光，所以無想像中咁靚，要落重 filter 不過呢度的確靚既 。


Salzburg 係我黎國王湖呢頭順道一日遊既，呢日天氣好好，呢度仲幾多野玩，值得一黎，我仲上左附近一座山。


Salzburg → 3 HR OBB Train (19.9 EUR) → Innsbruck
Innsbruck → 2HR OBB Train (28.9 EUR) → Bludenz（因意外臨時加插）
（原定翌日 Innsbruck→ 4.5 HR OBB Train (19.9 EUR) →Schaffhausen）

DAY 11 INNSBRUCK & BLUDENZ, AUSTRIA

呢日其實落大雨，但忽然有一陣陽光，即刻四圍影相，不過就無上到本來想去既北山。


黎Bludenz係因為一個痴線既意外，事前我根本未聽過呢個地方 。

Bludenz → 2.5 HR OBB Train （19.9 EUR）→ Stein am Rhein, Switzerland
Stein am Rhein→ 1 HR SBB Train (半價咭後 8.3 CHF ) → Schaffhausen

DAY 12 STEIN AM RHEIN & SCHAFFHAUSEN, SWITZERLAND

Stein am Rhein 落雨都已經好靚 ，唔落雨實靚到痴線


Rhein Fall 係全歐洲最大既瀑布，係城堡下面既觀景台睇，的確好震撼 。而Schaffhausen市內，因為我行行下落大雨，我無真係遊覽佢 。

Schaffhausen → 3.5 HR SBB Train （半價咭後19.2 EUR [Supersaver票]）→ Grindelwald

DAY 13 – 14 GRINDELWALD 格林德瓦 , SWITZERLAND

Grindelwald呢個地方真係靚鬼到痴孖根，完全係痴線，
靚到你唔明點解世上會有咁靚既地方 。


Lauterbrunnen 瀑布鎮


Interlaken 兩邊既其中中一個湖，如果唔打算遊湖/去Harder Kulm睇景既既千其唔好特登落返去行Interlaken ！無咩野睇好伏 以上呢個係入黎Interlaken去Grindelwald果程火車上見到既景，靚過我特登落去見到既野。


The First 上面既一個湖，由上纜車一刻去到行山再落山，無一秒唔係哇哇聲 ，一！定！要！黎！行！山！





上 Top of Europe (Jungfraujoch) 站

Grindelwald → 3 HR SBB Train (半價咭後 33.2 CHF ) → Zermatt

DAY 15 ZERMATT 策馬特, SWITZERLAND

馬特洪峰真係超級可愛，睇極都唔會厭。


我呢日行曬成個五湖健行。呢度既山勢同少女峰果頭既非常唔同，係截然不同既感覺。



Zermatt → 2 HR SBB Train → Bern
Bern → 1 HR SBB Train → Luzern
Luzern → 1 HR SBB Train → Zurich
(全日交通半價後 29 CHF Saver Day Pass)


DAY 16 BERN & LUZERN, SWITZERLAND

呢日本來係Zermatt唔好天既buffer日黎，不過琴日幸運地完成五湖行程，呢日就多出黎去揾野玩，
首先去世界遺產古城 Bern，不過呢日天氣唔好，我覺得佢既大街係幾有特色。


仲去左Luzern，呢個係Luzern最出名既橋，呢度我覺得可以做既野唔多，同Bern夾埋一日就啱曬。
呢個地方我都係坐住車遊覽多，我仲上左個塔頂，個景唔錯。

DAY 17 ZURICH, SWITZERLAND

正如好多人所講，呢度真係無野做，我係度只係等緊晚上既飛機，
之後發現呢度必做既係狂食（平過香港既）甜品

Zurich → 飛機 → Paris → 飛機 → Hong Kong

旅程完結

洗費
17日全程洗費：~ 26000 HKD
總住宿 (16晚)： ~ 7000 HKD
總市際交通： ~ 3500 HKD

其實正常唔洗洗咁多錢，因為我16晚入面只係住左4晚Hostel，其餘單人房、雙人房既價計返都比2個人去玩貴，加上我有起碼2000幾蚊係買野，
仲有2000蚊左右係因為旅程阻濟/意外而多左既洗費 ，
正常食、玩、住、行黎講，22000都夠做，我一路都無刻意去慳住玩 / 食，但當然都唔係餐餐入餐廳食啦。

行程、交通資訊等攻略詳情都會係黎緊既遊記度講

【Exchange 歐遊百幾日系列】既Amsterdam篇、克羅地亞+希臘篇、意大利北部篇、奧捷斯匈13日中歐四國篇可以起我底睇返，我都整合左係http://mangotofufa.wordpress.com/ 方便睇同自己做紀錄，有興趣既巴絲打可以係入面睇

對歐遊/exchange前準備有咩問題既巴絲打歡迎係度/FB inbox 我Facebook page http://www.facebook.com/mangotofufa/
我去過/知既都會幫幫手，當中既國家包括荷蘭、比利時、意大利中北部、西班牙中北部、法國巴黎同東南部、摩納哥、盧森堡、德國、波蘭、捷克、奧地利、匈牙利、瑞士、斯洛伐克、斯洛文尼亞、克羅地亞、希臘雅典同Santorini、波斯尼亞和黑塞哥維那 (Bosnia & Herzegovina) 既Mostar 等等；英國剩係去左利物浦 ，總之就係北歐、最東既東歐、葡萄牙及英國絕大部分同愛爾蘭無去

留名

瑞士好撚靚

今年歐洲夏天熱到痴撚咗線
諗返都驚

（二）DAY 2 BASEL遊記 比想像中美麗既瑞士巴塞爾 BASEL, SWITZERLAND | 優美既萊茵河畔景色 德瑞法交界點 隨處可見既可愛小屋

（因為Amsterdam無去新地方，之前又打過Amsterdam篇，所以skip Day 1）

Basel位於瑞士西北部邊境，如果純玩瑞士，唔少人會略過呢個地方，不過對於會去法國Colmar既我黎講，落機後係度行一行，再繼續搭巴士去Colmar就最好不過啦 。



提到Basel，可能會聯想起每年都會係香港搞既Art Basel，而其實Basel本來的確係以博物館密集聞名既瑞士城市，當地亦的確有個巴塞爾藝術博物館(Basel Art Museum) ！不過今日我黎到Basel，係一個館都無入既 ，因為上次歐遊睇左好多個美術館，搞到暫時對藝術館仍然審美疲勞，所以索性亂咁行下呢個城市啦（講完都覺得自己好無文化 ）。



起初睇網上遊記，真係睇到差D想skip左Basel，因為睇親都好似係講果D好現代既街頭藝術品，咩機械噴泉，而睇開我遊記既應可能都知我對呢D現代野無咩興趣，我差D以為Basel係好現代化既城市，會無咩風景睇，所以甚至打算一黎到行兩行就直接去搵個位坐大半日。不過，往往毫無期望就會有驚喜，由於有啱啱落機對歐洲既「新鮮感」同超好既天氣，我都幾享受係Basel既呢日，亦覺得呢度係幾靚。對我黎講，佢最正既唔係現代藝術品或博物館，而係萊茵河畔既景色，同埋瑞士古城式屋仔既細節！
（利申：佢唔係有咩特別既河景，只係優美、舒服，如果你係玩完一大堆歐洲古城先黎，或者天氣一般既話，你一定會覺得呢度無特別。呢篇主要係紀錄，並非推薦文，千其唔好抱住好大期望去之後話我吹大左，伏左你，我要瘋狂強調，我只係想講順路不妨係度留半日，行個圈！！）

遊記
逗留時間：11:30am – 4:30pm （5小時）我覺得啱啱好

一到Basel既車站，我已經覺得同想像中唔同，我想像到呢個城市好現代，最多old town個廣場就多d古建築咁，但一黎到見到個火車站發現個車站竟然係行鄉土風，有大量木既顏色，個環境令我聯想起D大殼場。



黎到第一件事，一定係搵Locker放行李先。Locker係呢個大堂既下層，搭電梯一落就見到成個Locker場。



非常乾淨，唔似德國果d成陣尿味。



我既背囊只需要用到細既locker，盛惠6 CHF (~48HKD)。每次關locker前都好驚拎漏野 。



買埋補給飲品是常職吧。係瑞士既ok.-度買左兩個飲品，呢度加埋2個幾CHF，左邊係葡萄適類飲品，右邊果支still water黎，但竟然都可以有怪味 ，好伏，到我晚上刷牙果時終於諗到咩味黎，係水喉水既味 。

車站外現代建築同古建築各佔一半。



話說我期望低到直頭黎到先開始搵有咩景點同佢地既位置 ，最後係google map上求其揀左個古城區既大教堂 （巴塞爾主教座堂 Basler Münster）就出發啦 ，google map話要行三個字。

基本上頭10分鐘都係歐式現代建築多，都係預料之內。而呢個地標原來唔洗搵都會自然路過。

「拿鐵錘的人(HAMMERING MAN)」
佢其實係識旭既，隻手不斷係度dupdupdup ，
本來睇相覺得無咩野，唔打算去搵佢出黎，但現實見到佢旭又覺得幾特別幾得意。



見唔見到佢隻手既變化，我估唔多覺 ，我影左條片。
呢個全日無休既Hamering Man係個向工人致敬既藝術品，又幾有意思。

一路過完Hammering Man，就開始有D古城D既感覺喇 。



呢個噴水池d水完全係亂fea





左邊就係 Kunstmuseum Basel 巴塞爾美術館 (Basel Art Museum)，我只係咁啱路過既。
入面有15世紀至1960年期間既藝術品，佢另外仲有個新分館，係專擺現代藝術，叫做當代館（Gegenwart），兩座野本來唔係相連，隔幾條街，但就有地下通道可以互通。
我就當然無入去啦 。



繼續行，對呢3座相連既瑞式古城小屋特別有興趣。好多人話「歐洲度度一樣，咪又係屋仔同教堂！」但對我黎講，古城分別在於細節，我鐘意睇佢地個城市結構同留意d屋仔建築，雖然都係屋仔，但外觀分別都幾大，好多時你一睇一張街景都可以估到呢個係咩國家。



瑞士既屋仔比較簡單，就係啡頂、白牆身同好多張開既墨綠色窗門，簡單樸實，唔會有超精緻既窗框，佢地最大分別基本上就係個門口既設計。左邊果間已經算係特別d，有個個屋頂下會有d花紋。

沿路行行下，被一個巷仔盡頭既屋吸引到我。



基本上呢3間野放埋一齊，已經好靚。睇返googlemap，盡頭間野並無特別名堂，如果想搵佢出黎，可以search 係佢隔離既Basel Zivilstandsamt （registry office）。



盡頭間屋仔真係好得意 果個凸出黎既紅色騎樓 屋頂既瓦片都比其他屋仔特別。





隔離呢間都幾靚，但我都係唔知咩黎。





呢個就係Basel Zivilstandsamt （registry office），有個前花園。

以上呢d全部唔係咩景點黎，但我覺得幾靚留意呢d路邊景色好過去打咭

巴塞爾主教座堂 BASLER MÜNSTER
繼續向教堂行，見到側面喇！
係個由紅色砂岩造既教堂，隻色都幾靚。我自己覺得呢個教堂比較特別既係佢頂既光面瓦片，但睇相完全feel唔到個屋頂有幾搶眼



巴塞爾主教座堂係瑞士國家遺產，係11至16世紀間建成，係羅曼式同哥德式風格合體，同好多教堂一樣，都係起初用羅曼式建，後來再加建哥德式既元素。





唔知係咪一個人旅行就特別得閒去慢慢研究，佢上面呢d用日光影子顯示既鐘我就左好耐角度先真係睇到個啱既時間出黎 以前d人睇鐘係咪要特登行一行到呢個位睇



呢個角度睇到佢有兩個相鄰既鐘，我當時估係一個講時針、一個講分針唔係既話都唔知點睇了，係咪因為太難睇，於是下面加個現代人用既鐘



教堂座落於一個極度少人既廣場。



係咪因為太曬呢，睇見個廣場，我一度以為呢個古城係無人既。



呢個教堂都幾靚，幾鐘意佢隻色。



本來呢個角落係幾靚，可惜搞緊工程。



巴塞爾大教堂，佢本來係羅曼式建築，但1356年巴塞爾有場地震，一野震爛左個教堂，之後就有人重建，到15世紀初再擴建。



成堆瑞式屋仔排成一行。見到呢頭好似得個教堂同冷清既廣場，我就再睇下地圖搵地方去，發現好近萊茵河，就決定去河邊睇下。
係教堂正面既右側通道行過去，就會去到河邊喇。





Basel四圍既垃圾筒都會有呢隻好hyper既乳牛豬叫人掉垃圾



唔知點解廣場同教堂呢頭會有片樹林



仲有堆中年啊叔好靜係度玩唔知咩遊戲，每人手上都有個球，每次掉落地，成班人就會行幾步，全程都唔洗講野咁，掉下行下勁專心望住d波唔知做緊咩係香港唔會見到成堆中年啊叔好靜咁玩遊戲最多都係有d阿伯捉象棋







北瑞士、南德、東法呢頭特別多呢d木骨屋，今次Basel間中都會撞見幾間

教堂背面，其實係個觀景台 。

PFALZ BASEL 觀景台


呢個觀景台可以睇到萊茵河畔，但我覺得係對面岸望返過黎靚過呢度望過去好多。



左邊見到好多高樓大廈 右邊都有幾橦。



同埋呢面岸望過去最大問題係無重點，全部都係一樣既屋仔。其實對面岸望返過黎真係靚好多，不過暫時都係po住呢面岸既相先。



好典型既瑞式啡頂屋仔。見到對面有得坐下，我都想去對面睇埋。不過…



見到條橋離我咁遠，都糾結左陣過唔過對面 不過，後來發現係唔洗經橋過對面，因為觀景台正下方有碼頭去對面河！！



上圖呢架船係橫渡黎，見唔見到佢有條繩拉住去上面橫過條河既纜，架船就係被佢拉住咁穿梭兩邊岸，重點係一d都唔貴，只需1.6CHF，真係意外地平，好多遊記都無提到有呢樣野，但其實好值去玩下，以「遊船」方式過河，一定好過搭巴士！

其實我本來以為瑞士乜都貴，搭船一定好貴就無諗住搭船，只係見係呢個位睇d屋唔夠靚，想低角度d，又見有樓梯落去下面，就想沿下面河邊行去橋，





一路行我都好驚下面會無路行，然後要爬返上黎，因為樓榜都都幾斜 但洗濕左個頭就一直行埋落去 。



下面睇係靚過上面睇



呢張相就清楚睇到個船點玩法啦



哇咁快就落到底，睇下：



原來成個城牆咁高 而下面呢度只有一條掘頭小徑，係通唔到去橋，一定要上返去先去到 果時有d覺得中伏，不過！



再落就有船搭 雖然唔知幾錢，但都去望下影下相先



瑞士d河真係條條都湖水綠咁既色，而且係見到下面d石

萊茵河橫渡 — 想過河一定要黎搭下！


河邊真係好舒服



見到呢個牌我真係勁開心 點解可以咁平！！13HKD就可以係瑞士搭船過對面



等船期間，有架好巨型既船裝住d泥山出現左





船來了 全船只有我一個

船夫將支桿放好角度後就入左去玩手機，完全唔洗駕船





架船比想像中慢，我影左好多張一樣既相。靜靜地坐船，感覺好正 嗚哇。



先劇透少少對面岸既風景，一見到已經知過對面岸係正確既（同場加映玩手機既船伕）



頭先上船既位置，已經變到幾遠下



就到岸啦，好明白點解d歐洲人咁鐘意係呢d位坐成日，真係好舒服，唔會得個曬字，涼風陣陣 。





又到船伕工作既時候



到


呢邊反而多人上船。



有人除緊褲準備落水其實都有d細路係度游水，
當然我就無影啦，係歐洲影細路唔著衫咁游水，唔想被fbi捉我



架船話咁快就去到咁遠，但我係船上又唔覺咁快。

萊茵河畔景色




呢度點睇都靚過對面睇，可能因為d屋疊高d。



碧綠。呢度真係好舒服！無黎錯。


對面岸呢邊就真係可以沿行行去橋喇。



河邊既屋近睇好可愛





瑞士既呢d噴泉水基本上都係飲得既，好似話無講唔飲得既都會係飲得的。



我係度食我既lunch



係早上搭飛機時因為上機前已經食左野，所以就 keep起左個包



睇住河景食包，除左好舒服都唔知可以點形容



對面有教堂撐下場，靚好多






話咁快都就到條橋。

哇原來Basel都打左咁多貼極都未完

LM

我咁啱果期仲係好涼，但返香港後見D人係咁話好熱

瑞士真係癲

留名

續BASEL


繼續j路邊小屋，好似d特登裝修成咁既cafe，但佢只係民居





瑞士好鐘意四圍插旗。



呢度終於見到d餐廳，仲好多人 睇黎個個都堆曬係呢頭



內街都幾靚，但都係無咩人



仲有間好核突既店，係外牆整d假螞蟻 係好搶眼既，不過好令人不安



橋頭呢邊有間朱古力店，幾靚但賣既野好貴，我只係行左個圈可能唔算好出名，入面得幾個人。



再黎一樣既相。



其實現實睇係好鮮色，不過可能有d背光，點整都係變左偏紫色





d樹都好靚，為呢個景貢獻不少


呢條橋好闊，可以行電車。上面插滿旗，全部都賣緊藝術館既廣告




又返返火車站果邊既岸，呢頭離火車站有半小時既步行距離，但而家先1點幾 ，可以慢慢行。

我唔行前面大路，轉左入一條幾靚既內街。



木骨屋啊 黎緊幾日會見到更多更靚既





仲有d小教堂，我就懶得入去啦。



好似話係 Bronzezeitlicher Graben，但我唔知即係咩黎，呢度有個好似Bern周街都係既果種噴泉。



好簡樸既小巷







呢條街無咩名堂，但佢d屋仔既窗框色彩好繽紛，位置係自然史博物館附近。



呢個自然史博物館外有個戴黑超既骸骨 文化之都真係唔同d



可唔可以住入去



行行下又返遞黎冷清廣場喇 都係咁冷清



今次我入左教堂隔離個院仔睇。

但呢度通唔到入教堂，教堂好似無開？（會唔開架咩 ）



成個教堂都係好多疑似聖經金句既碑





右邊個六角形令我聯想起細個玩既rpg軒轅軒叁玩過就會知點解



行行下覺得有d陰森





走返出去

因為只係2點，距離4點半上巴士既時間仲有兩粒幾鐘，於是就去埋本來打算一黎就去左先既瑞、德、法三國交界點我都幾鐘意去呢d聽落幾無聊既打咭點 上次exchange就同我fd去左我個城市 Maastricht附近既荷、比、德交界點 今次有時間，又難得近近地，無理由唔去既。

行到附近一個車站，就搵車去交界點。

DREILÄNDERECK 三國交界紀念碑 + BASEL交通攻略

交通
前往Dreilandereck 其實都幾易，只要搭一架市內8號電車（Weil am Rhein, Bahnhof/Zentrum 方向），車程15分鐘，係Kleinhüningen站（似乎係總站黎）落就去到啦，車費：SWISS PASS免費，正價5.2 CHF單程，有半價咭就2.6CHF單程（直接揀小童價），市內交通黎講都好貴下，好彩有半價咭 。

呢架車都經好多主要景點，Basel火車站、中央廣場(Marktplatz)、主教堂同藝術館呢頭就有Barfüsserplatz 或者Bankverein站，係google map search Kleinhüningen就自然會話你知最近既8號車車站。

不過並唔係一落就見到，係要行15分鐘左右先到個交界點，不過都係直路黎，所以並唔難行。

從上圖可見，個紀念碑唔係係正map上個交界點中間，不過象徵意義上果個位就係個交界點啦。


順帶一提，Basel 或者瑞士既巴士、火車票基本上都唔洗好似其他歐洲城市咁要人上車後搵部機蓋印去Validate張票，亦唔洗一早買定幾張以防d細站無售票機，因為佢真係每個站都會有部售票機。



而你買完張票，佢就會係票上印明你張飛係邊個站買，有埋出票既日期時間，不過佢又無講張票可以用幾耐，網上都唔多覺有相關資料，所以如果你（好似我咁）一次過買兩張單程票，諗住當來回咁用，就錯喇，因為會變左兩張15:24分出發，由Bankverein出發既單程飛，回程真係唔知仲可唔可以用安全起見，我回程係再買過張飛 嘥左2.6CHF







呢度既車站真係設備齊全個時間都可靠
一落車，其實已經好少人，比想像中少人去，一路行，只有我同對面一對夫婦 。果頭都完全唔似有景點係附近連貨櫃碼頭、火車車廠都有有d偏僻，唔係前面有對夫婦既都可能會考慮折返



轉左個彎後，就係直路一條。





一路行發現原來呢頭係D遊船Tour既碼頭，晚上睇黎會搞船P。上圖果個吊臂… 係吊住果d party 閃閃鏡波



鏡面啊




前面對夫婦除左佢地，沿途真係無人。



睇黎係呢度個碼頭office



好彩我睇過個紀念碑d相，唔係可能以為呢幾支旗就係個交界點



因為佢都有三國國旗 話說行到呢頭對夫婦就上左去一間cafe之類既野，呢個時候我先知原來佢地唔係同我一樣黎睇交界點可能係黎等晚上上船玩。

個紀念碑就係呢支火箭形既柱啦



好藍 成個景點完全無人，荷比德果日落大雨都有好多人

呢支野整得有誠意過荷比德國果碌：

被個單車友遮住左，係舊石黎 但呢度就有三支國旗咁。



每隻翼都有個國旗，話你知你係邊個國家 黎到呢度，我張sim card個電訊商就係咁轉台 所以唔係好上到網

我家下係瑞士



我家下係德國

話說上次我同個fd去荷比德交界點果時，我地圍住果個交界柱跑圈話我地不斷穿梭3國
今次我fd唔係度，我就自已一個圈住呢碌柱跑圈
好彩附近無人見到

其實黎呢個交界雖然聽落好無聊，但對我黎講都幾有意義，因為呢3個國家都係今次我個trip既其中3個，我個路線都係沿住佢地咁圍圈行，黎埋呢個交界點就完滿啦



一隻不斷穿梭三國既天鵝

見唔見果條橋，行過去就可以到法國既某個不知名村落啦，我見有台灣遊記blogger真係去行個圈，我見咁遠，又無咩時間，又攰，就不了果邊橋頭有支法國旗同德國旗因為條橋係連接住德、法邊境



Cap返個GPS先 我走既時後終於見到有韓國人黎啦 好彩都唔係得我咁無聊

回程後，我本來打算直接搭返火車站hea，點知係車上就「發現左」個景點未去，一野落車影下相

集市廣場 巴塞爾市政廳 BASLER RATHAUS, MARKTPLATZ


係車上望出去見到呢棟野，一野跳落車啦唔少市政廳都係咁上下樣，但我覺得呢個靚特別靚，因為係紅色既我直頭覺得佢個形狀同某城市既係一樣咁濟，但我又醒唔起係邊個城市



同個藍天好夾啊



佢上面仲有壁畫，頂又有金色既塔仔同反光既瓦片，d細節好靚 同埋我最鐘意既就係暗暗地既紅色呢棟野啱我



話說唔知點解黎到呢度，四圍超多野飛黎飛去，有d似香港d飛蟻但就係蚊既樣，完全唔針人，但會飛撞落人度 真係激多，都幾滋擾





行為藝術，佢唔係拉緊小提琴，佢只係拎住支樹技，但個樣就一直好似拉緊音樂咁，
佢張紙寫住：
What is it that makes you pause and contemplate?
有乜野會令你停一停、沉思下？
從路人個個路過都好疑惑咁望住佢，研究佢做緊咩，就知佢今次成功左



個市政廳有個內庭可以入去望的。







好多壁畫



又有呢d我覺得好瑞士既雕像，細細隻，好多金、黑、紅、綠色係上面，好多地方都會見到，特別係噴泉上面。



其實我都幾想上塔，但我唔見有入口
紅、深啡色，係幾型



呢帶基本上都係得個市政廳，隔離就係H&M街，於是我就起行返火車站啦


臨尾急急腳係車站 tourist info 度買左個磁石，好似要8CHF，但都預左



其實仲有咁多款，不過因為上次去日內瓦同自己講下次去瑞士一定要買個木屋磁石，於是就買左呢個，雖然其實呢度一間呢D木屋仔都無



BASEL 係一個好地方 5個鐘既半日遊，玩得好開心
但都係果句，唔洗特登黎睇呢個城，順路停下行下就夠

下篇會講DAY 3 COLMAR

感謝

留名

17日點去到咁多地方 , 我之前19日去瑞士奧地利都要SKIP 好多地方先夠時間

感謝

瑞士好靚好靚好靚好靚

26k係total？
不過德國消費我覺得唔太貴