【歐遊遊記 2018】獨遊瑞士法國德國奧地利 17日童話小鎮雪山風景遊

係呀，諗返雖然洗多左，但值呀

DAY 5 德國法蘭克福遊記 + 一日集齊曬多種你唔會想遇到既阻滯：MISS車+上錯火車+火車延誤+錯過尾班車驚魂記

話說今日係搭車災難日，基本上無一次交通係順利，全部都係因為我既失魂（好彩其餘十六日都順利無事）。因為呢兩單野，本來無野好寫既法蘭克福遊記就變左千字文啦，先講第一單，只係熱身黎。

話說本來我就買左火車票呢日早上由海德堡去法蘭克福既。琴晚訓覺前望左望自己之前打好既行程表，見到係11:46既車，又懶得double check返張車票，覺得果時已經 check過，應該無問題，我就去訓覺，準備訓到自然醒，慢慢食早餐，hea到11:30出門口。

到第2日，我8點鐘都醒左，真係慢慢係度hea，好難得終於hea到就黎11:30，就開開心心拎車票出黎出發去火車站啦 。一睇…我頂 ，張車票係10:46開出，11:45到！！！！ 唔係11:46開！！ 好膠，即係頭先我好辛苦hea左好耐時間，其實係係到整到自己miss火車。 呢程車係20歐架！！ 仲要係non-flexible既車票，即係只能搭指定時間果一班，miss左就無架啦，要買過張。於是我心都離埋，即刻上traineline睇下今日其餘班次幾錢，即時先買火車票既話要起碼30歐，點知！睇左陣見到，traineline建議我搭12:10pm果班Flixbus！即時買都係只需要6歐！！哇！！！救星啊！！

呢班Flixbus仲要車程都係1個零鐘，只係慢十幾分鐘！之後我就諗，點解一開始我會買左DB，成20歐又唔係快好多。諗落就知，因為我當時search由 Heidelberg去Rotherburg，見成段路程太遠，就睇火車，不過當時就諗漏左我分拆出黎去Frankfurt呢段係可以改搭巴士。

到左12:10分，Flixus既巴士站有好幾架車黎左，次次都好緊張去睇係咪我果架，但一直都無我果架，起身又坐低，起身又坐低。雖然之前歐遊都慣左d巴士遲到，不過因為今朝既失誤，令到我成個人都精神緊張，所以見佢咁耐都唔到，都有d不安。再起身坐低n次後，過左半個鐘左右，我果班車終於都到喇！！嗚哇，只係比少少錢就補救到我個低級錯誤，其實已經好好彩，所以遲到我都唔介意了。不過無諗過呢次miss車只係是日既前奏…

係下一單災難之前，首先講下Frankfurt呢個地方同遊記先 。

美因河畔法蘭克福（Frankfurt am Main）遊記

Frankfurt 正式全名係美因河畔法蘭克福（Frankfurt am Main），雖然多數大家都係叫佢法蘭克福就算，但其實德國有兩個法蘭克福，所以叫係美因河畔法蘭克福先係最準確既叫法，但我當然都係會佢叫做法蘭克福就算。法蘭克福係德國既一個大城市，全德國第五大，佢亦係重要既交通樞紐，唔少香港人黎德國，都係飛法蘭克福架。不過，呢個地方我就覺得對去旅行既人黎講，都係當落機點就算，因為真係無咩野好做，可以話幾無聊，亦無咩地方特別靚，現代城市樣，成個中環咁，千其唔好見佢個名幾響覺得佢好重要，就特登走過黎 我都係當佢中轉站先黎行個圈架。

到左Frankfurt，首先就入火車站寄行李。大城市既車站氣派的確係唔同既。



車站入面仲有好可愛既模型，不過要比錢佢先會郁。





法蘭克福既火車站好繁忙，火車流量係全德國第2高。



不過另一樣大城市成日比我既感覺就係，佢地多數會雜d，呢個站個Locker果頭勁大陣尿味，勁噁心 。



locker位就係呢個大堂左邊深藍色果度入去。

話說當時已經過左中午，所以其實都好餓，而係車站終於見到我好耐無食既魚魚Nord See！！



睇過下我遊記既應該都知我好鐘意吹奏呢間nordsee既薯角，我真係好鐘意佢個薯角，於是當然要叫返個！！！



左下角係薯角既價錢牌，分別係細中大盒既價，



因為一個中盒都已經好大，夠2個人share，於是我叫左個細既。時間無多，今個lunch我又係頹食唔入餐廳喇，我發現我今個trip真係無乜坐低食過lunch，係得晚餐先會入餐廳 但都幾啱我，因為一坐就要等黎等去，最後成1.5-2粒鐘先出到黎，我比較想去玩多d 晚上先慢慢hea同食好野

原來細盒既醬會分開比我，以前買開中或者大盒既會倒d醬係個威化造既杯仔度，再擺係盒入面。呢樣亦係我鐘意魚魚既原因，我鐘意每舊薯塊點幾多醬就點幾多，佢唔會直接淋堆醬落去我d薯角度，搞到其中有d薯角太多醬，或者食到成手都係醬。

出去先！個站外面睇有d似Basel果個。





說說由火車站去古城要行20分鐘，唔知點解又係無顯示任何電車路線，剩係叫我沿住前面呢個大直路一路行。



一出黎都無咩大感覺，但行落就真係覺得呢度好中環，四圍都高樓大廈，好多銀行總行，因為德國聯邦銀行、歐洲中央銀行、法蘭克福證券交易所同好多大型商業銀行總部都設立係度，亦有好多歐洲同跨國大型集團既總部都係法蘭克福。佢亦係歐盟既經濟中心。



對於一心黎歐洲睇古建築既人黎講，Frankfurt真係唔洗黎，我本來亦預左呢度無野睇，唔會特登黎，只係唔想一次過搭5粒鐘車去Rothenburg，先係frankfurt行幾粒鐘再繼續去Rothenburg。（雖然因為頭先同接住既自製阻滯，結果我用左更耐先到Rothenburg ）





呢個係間酒店黎，真實幾靚，但睇相我唔知點解聯想起半島 ，不過呢間大好多。







行行下，見到Rossmann！仲好大間。



對我黎講Rossmann就係德國版萬寧，咁啱我都預左要係歐洲買多d 沖涼同洗頭用既野，而呢間咁大，實會有，於是就當黎frankfurt shopping咁入去。

Rossmann入面我最鐘意睇佢果d專比人買旅行用品既貨架，有大量我好鐘意用既濕紙巾，仲有好多輕量裝沐浴露、洗頭水等，每樣都係1、2歐咁，我仲發現佢有比香港多既dry shampoo，我正好需要，因為次次搭完轉巴士火車，頭頂唔知點解就笠左勁多，好似好耐無洗頭咁，明明我晚晚洗。而香港d dry shampoo好劣質，萬寧買到果d都係勁臭既，見到呢度有我就雙眼發曬光。

呢度有好幾個牌子，我都唔識佢地，就靠包裝揀，見到有支話黑髮專用，就諗係咪唔洗噴完成頭白粉？咁又幾好，加上呢支細細支先3歐，就買左支啦。

出到去即時搵塊鏡試下，初頭都幾好，因為佢真係做到無味，效果又好，真係無白色粉，但…我一望隻手，是黑色的！！！頂，原來黑髮專用就係白色粉變黑粉，結果我望一望我額頭…都好多黑炭粉係上面，好似啱啱逃離火災現場咁，仲有我對手都黑曬，拍幾多下都拍唔走d黑粉，於是頭先買既濕紙巾就大派用場…抹好後，全部紙巾都係黑色既！！痴線！！



抹完之後我再撥一撥d頭髮，撥完一睇隻手，都是黑色的！！呢支野真係好伏，唔知世上除左黑人之外仲有無人適合用呢支野，於是我影完張相後，諗都唔諗就掉鬼左佢，就係下圖呢支，大家可以留意下我d手指…好似摸完舊炭咁。



我一路行，d頭髮一路旭就一路染到我個額頭黑返，抹完又黑，如是者無限loop左好多次，最後都係廢時理佢，有個呀伯路過凝望住我額頭，我就知我額頭又黑左，媽啊好伏！！好想洗頭！！呢支野搞到我每兩秒就要抹一次面。

推

繼續行，



路邊突然有間幾靚既cafe，個風格好襯海德堡。

行得越近古城，就越黎越多大品牌既店。呢頭好熱鬧。




行左四個字，終於開始似到老城啦。





教堂隔離都係要加d現代野







有個花墟。
繼續行去廣場…到啦。

羅馬廣場 RÖMERBERG


不過好多野都整緊。

雖然係老城廣場，好多木骨屋，但我覺得好新淨，所有野都係一睇就知係近年建既。唔知係咪因為造得太完美，好公整，無左種古舊感。



呢幾間木屋好大，係幾有特色，因為係小鎮唔會有咁大間。
本來一排咁睇都幾得意，不過有間整緊，影響曬。



上面既人吊緊d野落去。



廣場中心呢舊野又整緊，佢白色果碌野仲有你qr code叫大家上個網睇原貌 。

後面呢座係市政府 Stadtverwaltung Frankfurt，幾大。



廣場無咩野睇，亦唔靚，於是四圍行下。



呢間幾特別既。







呢間紅木屋都幾型，咁多細緻既木架。





有間教堂 法蘭克福主教座堂 Kaiserdom St. Bartholomäus，入左去，純粹想搵個位坐下。



hea完我就出返黎，見到有手信店，呢張postcard…設計得太精美啦！真係好想買一千張派街坊哦！



呢間個樣好似教堂，但好似唔係黎。純粹個樣幾得意，影下佢。



睇完呢度，都係無野好做，一於行埋去河邊。河邊有個景都唔錯，不過都唔係咩特別野。









呢度係幾舒服既，黎到Frankfurt唔知做咩好既話，直接係度坐全日算。（我好似對呢度所有野都不太欣賞 ）



呢度有路軌，但我完全唔見有車經過。





仲有個橋景，好天之下唔錯既，不過好天就度度都靚架啦 但條橋本身都的確係幾靚既。
話說去到呢度已經差唔多要返火車站，為左唔miss車，我都無留太耐，沿路一直行返去。



呢頭係幾舒服，不過我行到腳底都生曬水泡，好想有車直接返去火車站，但唔覺有



對面有個嘉年華，有時間實去望下，不過無時間又腳痛，廢時去了，



個嘉年華應該都同果時Amsterdam果個差唔多，果時我地玩到就黎嘔 中曬伏詳情可以睇：【歐遊百幾日遊記】荷蘭 AMSTERDAM 篇 （五）Food Market + 機動遊戲。
https://wp.me/p8A312-38



影埋呢度就全速行返火車站啦。

上錯火車+火車延誤+錯過尾班車驚魂記
話說由Frankfurt去Rothenburg都唔係好方便，要轉2次車，即係一共要搭3程火車，全程2個幾鐘，車程如下：

18:22 Frankfurt (Main) Hbf – IC 2027
19:32 Würzburg Hbf
轉車
19:41 Würzburg Hbf – Regional train 58131
20:23 Steinach (b Rothenburg)
轉車
20:36 Steinach (b Rothenburg) – Regional train 58911
20:50 Rothenburg ob der Tauber

返到車站，拎返行李後，我醒起去到Rothenburg呢d小鎮已經9點，都唔知仲有無野食，就想係Frankfurt買定d外賣去，就把握5分鐘時間去Nordsee買個沙律。

買完後，就急急腳趕上火車。
另一件痴線事就開始啦 ，
我見到係11號月台，就衝過去，仲用手機係度影架火車。
我覺得係時間太趕加上自己唔夠專心，掛住影黎影去，搞到出事。


影完相我好驚佢無啦啦開，就一野飛左上車，
一上車，火車就真係開左。心諗真係好 ，好彩無miss火車 。
火車係6:22開，果時我手機只係6:20分，佢就開左，
初頭都不以為然，搵好位就坐低，然後我就望出去，
但一睇路軌d牌，寫住12號月台！！！！！

睇多幾個牌，頂！！真係12號月台既車！
我果架11月台既火車係隔離果架！！！
無錯，我太心急衝錯左上另一架火車…而架車已經開左！全速開出！！！我心入面已經叫曬救命…
今朝睇錯火車時間 ，而家又睇錯月台牌 ，痴線！ 真係無一程車係順利
仲要全部都係因為自己疏忽而搞出黎…我已經不斷同自己講今程一定唔可以miss，結果…。
我當時完全唔知點樣可以知道呢架車係去邊…電子牌又無，
只希望下一個站同我本來果架係一樣…
加上一入路軌就咩network都無曬，上唔到網，想search都search唔到。

呢個時候查票員入黎啦，我即刻狗衝去同佢講我上錯火車，
問佢呢架車係去邊的，佢話呢架車係去munich既，
之後就幫我搵我可以點…
不幸地兩架火車係完全唔同路線，因為我d車票只可以搭原定果班車，下班車我係搭唔到，
所以佢建議我下個站落車，搭回頭車返去frankfurt ，
再搵ticket office幫我改返張車票，我問：
我洗唔洗係frankfurt買過set車票
（心諗今次無600HKD都唔洗指意去到Rothenburg ），
佢就話 no, the officer will help you.
聽完心入面都放左心少少，
結果我去到下個站都要等半個鐘先有車，
然後再搭半個鐘車，最後一粒幾鐘後又返返Frankfurt車站。

當時係7點半，我已經睇定下一班車，
係8:22pm開既車，預計11點先到Rothenburg，佢亦係我search到既尾班車，但覺得去到就得啦，夜都無所謂，同民宿講聲就ok。
而係車黎之前，我要去office改好我set車票。

一去到Frankfurt既ticket office，見到勁多人，原來係要拎飛排隊既，
仲要係排緊百幾張飛 ，
雖然有8個職員左右，但目測每幾分鐘先輪一個人，
而下班去Rothenburg果set車係9個字後就開，
我去拎飛果時，同派飛果個職員講我既問題，
佢就送左啱先另一個人等到唔耐煩放低走人既果張飛比我，
話：「你拎呢張啦，唔係就有排等啦」
我見張紙已經揸皺曬
但真係好彩有佢，只需要等十幾個！
初頭我都覺得自己好黑仔，咁危急仲要等，
但等落發現坐我隔離果個等緊百幾張飛都坐係度等 ，
而我幸運地得到人地送既「插隊飛」，成功係下班車前處理！

故事仲未完，
到左我，我同個職員講左我既情況，初頭個職員一開始就話我要買過張飛，不過佢見我個樣咁慘，佢就無直接趕我去買飛，
再問detail d 我本身坐錯左邊架車，
check左一大輪之後，佢竟然突然話，我出過set車票比你啦，
但剩係今次先比，以後一定要睇清楚先好上車。
我都唔太知點解佢會突然轉軚，雖然佢個樣好似有d惡，
但我都非常非常多謝佢免費幫我改我set車票做下一班車 。

當我開心地狗衝出去搭下班車果下，發現原來故事都係未完！
因為呢班前往Wurzburg既火車delay，
而且係delay30分鐘！


delay本身唔係問題，但我即時check下預計到達時間仲有無車駁去Rothenburg…係！無！架！！！
我係肯定會miss尾班車去Rothenburg。
點解要咁對我啊！！明明架車係度，但就係唔開！！（聽講壞左）
當時月台好多廣播，但基本上都係只有德文，真係唔會知發生咩事。

於是我係唔同月台跑黎跑去搵職員，
睇下仲有無車可以去到wurzburg，咁啱一個係架ICE前面既女職員話：
你可以上我呢班車，我呢班車係去Wurzburg既特快車（ICE）。
嗚哇！聽到特快呢個字真係就黎跳起，我真係感動到半喊咁confirm完多謝佢 ，
佢見我把聲咽哽咁都覺得好誇張，係度笑住講welcome
之後我就衝上車 。
其實平時就唔可以話轉車就轉車，今次係因為我架車delay先可以轉另一架快d既車。故事完未？未啊！！！
坐左陣，我見佢都唔開車，我就開始懷疑…落車一睇個站牌，
原來呢架都要delay，仲要係1粒鐘，即係雖然快d，但仲遲開車 ，
一樣無尾班車搭 ，我當然即刻又跳返落車再搵其他職員 。

哇，幾時先完啊！

我又跑返去我本來要搭果班車個月台，話說頭先咪話已經行到腳底出水泡，呢個時候我真係唔得閒理個水泡，見職員就跑過去，因為好驚問問下架車突然會開左
當時我見到遠處有個職員，就跑去問佢，今次呢個真係我既大救星，佢真係極好人，超級好人，
當時有三四個人圍住佢等問佢野，佢都逐個回應，勁好態度，比著香港，一個對三個客實會好躁剩係想打發曬d人走，但我單野勁長佢都好耐心聽，仲係面帶笑容，勁有耐性同我講，佢話雖然我miss硬尾班車，但放心，我呢d case係會有免費的士搭，
因為我係DB delay搞到搭唔到尾班車，所以DB會比free taxi voucher比我！聽到有的士搭我都安心好多，
不過得佢leader先有taxi voucher係手，所以我都未可以放心曬，
因為未可以即時拎到的士券，於是佢就慢慢講我知點樣可以搵到果個人，一陣要搭到邊個站，坐第幾卡車等佢上黎check飛時同佢講 etc，仲有有時佢見我聽唔明佢講既站名，佢都好樂意幫我寫係車票上面，
點解德國人可以咁好人！！我記得個職員係光頭，戴個鼻環既，嗚哇，我從此對戴鼻環既後生仔改觀啊！！


於是我終於可以上車好好坐低等佢開車！！
話說呢架車好full，我路過見到一個窗邊空位，不過個德國女仔放左個袋係上面，我望左下都廢時叫佢拎開，因為又要讓我zip入去咁，就轉身想繼續行，
點知個女仔主動問我係咪想坐，超級nice，仲行出黎，歡迎我坐入去，仲超好笑容！！然後問仲我想坐出面定入面，哇點解可以咁好人？？如果係香港，有時你搭巴士想叫人拎開個袋比你坐，都好似得罪左佢，佢會黑口黑面好唔情願咁fing起個袋由你入去，點解德國人可以咁大愛，我咁多行裝佢都歡迎我入去，仲清左個枱面d野比我放我d沙律上去，好人到難以置信！！
好多人話德國人好冷漠、唔肯講英文、歐洲人歧視亞洲人，嗚哇無啊！！今日遇到既每一個人都超好人對我極好啊！！我真係覺得自己今日唔好彩得黎又好鬼好彩

我個沙律拎左兩粒鐘都無機會食，而家終於可以坐低食。
其實到呢刻我都唔知黎緊仲有無痴線野發生，
但起碼我知道今晚起碼會有的士搭，我都安心d，終於可以慢慢食，
而呢架車一個鐘既車程最後停下開下，都搞個個幾鐘先到職員講既果個站，不過我等極都等唔到佢講既果個人黎查票，
剩係見好多職員來來往往咁經過，可能因為火車delay，
個個都好忙搞呢樣果樣，無人停低查票。

樓豬忡咩事成日都咁准唔冷靜

真係唔知果日發咩神經 之係仲有單

歐豬最仆街就係吉卜賽人同一堆移民、佢哋偷嘢技術好拿手

黎緊都去歐洲 好驚會miss 火車

係 好彩今次完全無中伏
可能都因為呢d地方安全dd 同埋我都算準備得夠

留明

係果刻就好想自己有買pass
真係要小心睇platform同預多d時間buffer
有唔肯定既厚面皮問人confirm，平時我唔鐘意問， 呢日奶野後我都狂問問問問

真係好撚鍾意海德堡

感謝巴打

巴打點解咁鐘意既

推呀

留名

G持 有睇開你個blog

要加速喇絲打

怕羞仔唔敢問人

留名支持

續

呢個係我當時既ig story 過左佢講既果個站後，
我都未見有人查票，穩陣起見，我自己行出位，
打算搵個似leader既問，又好好彩地，
一去隔離卡就遇返頭先幫我既超好人職員！！
見到佢我就安樂，因為佢最清楚我等緊咩，
佢見到我果下已經知我想問咩，於是就幫我搵果個人，
但搵左陣發現，佢唔係附近，好彩問一問！！
之後佢就建議我，照係Wurzburg落車，果個站都算大，
有個counter會有職員處理呢d事項，而且果個counter係未收既
（當時10點零，個counter 收10點半），
如是者我又再瘋狂多謝佢，我一定會記住佢架！！
到站後就衝去個counter。

到站後，去到counter，見個職員本來都準備收工，
因為佢隔離位已經執緊野，但好彩未走曬
我就比曬我d車票佢睇，講我miss左尾班車，佢又問下我野，
又check呢樣果樣後，（又問我點解會miss左車 ）
嗚哇最後終於比左張taxi voucher我！！


我張重發既車票同埋下面係Taxi voucher得來不易

不過因為原來中間呢程車（Würzburg Hbf – Steinach (b Rothenburg) ）都仲有尾班車，只係第3程（Steinach (b Rothenburg) – Rothenburg ob der Tauber）無尾班車，
所以的士只係for取代第3程車，而家要做既就係照搭下一班去Steinach既火車，出到去就會有的士搭，
上面仲寫左的士司機既車牌——佢連的士都幫我call埋
於是我就狗衝去等火車，超級小心睇清楚d火車牌、月台牌，
上車前都要捉個職員黎問係咪呢班車，
職員又係勁好態度，答d咁無聊既問題都勁好笑容，
真係誇張過日本。

到到Steinach，我見到有架7人車咁既的士，
雖然車牌唔同我張voucher寫果架，但我都行去望下，
上面有個德國女仔問我係咪都係無左尾班車要搭的士去Rothenburg，
然後就歡迎我上車，仲落車幫我開門，幫我拎野，不過佢唔係司機，
佢只係另一個乘客！！
我又要問啦，點解可以咁好人架！！
佢唔係職員，真係大可以唔理我，自己摺埋玩手機就得，
但佢係咁幫我，仲幫我同個司機做翻譯，
笑住同我講好多德國人都完全唔識英文，
我真係而家先發現原來德國人係咁好客，真係好好人！！

過左陣，佢見到有另一架的士，就問我，咦，
會唔會果架先係你搭既的士？睇個車牌，係啊！
原來DB係幫每個乘客各自book一架的士，於是同佢地道別後，
我就去左另一架的士。
個司機直接問我住邊間酒店，就起行啦！！
佢仲車埋我去酒店門口，太好啦，
係的士上面我真係好感動，因為終於都見到終點啦！！

當時已經12點幾，路上真係幾乎無車，feel到司機都開好快，
成條路黑到剩係見到車頭燈前面既路同地面少少反光既貓眼，
大概十零分鐘，終於見到d木屋仔，嗚哇！到左Rothenburg啦！！

司機仲問我咁夜會唔會check唔到in，
不過因為頭先我已經同民宿申報左我會過左12點先到，
民宿主人都教左我點搵鎖匙上去自己房，所以到左酒店問口，
同司機道別後，我就去開門。

一入去，竟然見到民宿老闆！
我以為佢已經訓左，佢仲同我講Guten ________（唔記得佢講邊個字，一定唔係Tag）
雖然只係好簡單既打招呼，但可能佢把聲好有爸爸feel，
又講得超warm，聽到覺得好感動，佢仲無即時叫我搞check in同磅水，
剩係話我知我行果邊樓梯就上到房，嗚哇太好人啦，
我真係有返到屋企既感覺！！

入到房果下真係超級極度感動，
本來唔洗3個鐘既車程，最後我搞左6粒幾鐘，終於都到左羅騰堡既民宿房！！仲要係好warm既德國小木屋！！


好彩今日係住單人房，唔係住hostel，
所以可以好好咁沖個涼、訓個靚覺！！
呢間住宿我真係好推薦，報告就下一篇詳細講啦 。

有趣既係，本來由heidelberg去rothenburg，我係可以一過搭5粒鐘車（都要轉車），但因為唔想一次搭咁耐車，
我就留陣frankfurt再搭2粒幾鐘車，點知最後呢2粒幾鐘反而就變左6粒鐘，
仲過多過本來全程果5粒鐘！真係諷刺，
不過呢個奇遇記都算係咁，就算又搭錯車又delay搞到miss尾班車，
我都唔洗補錢就可以到達Rothenburg，
仲因為咁遇到咁多超好既德國人，
發現德國人有幾咁好人，係不幸中之大幸啊！！

故事未完全完，當我臨訓前想充電，又有精彩既事：
我個萬能轉插壞鬼左！！

個插頭唔知點解出唔到黎… 卡住左…因為佢咁萬能，
我真係只係帶左佢呢個，結果而家我就變左無轉換用…
唉點解呢個時候先搞d咁既野，
比我安心訓下得唔得啊！！
都無辦法，好彩尿袋都仲有d電，我就用尿袋差住電話訓，
聽日再搵下邊度有得買轉插…

呢日終於完啦！！
Frankfurt呢日Suppose無咩好寫既遊記變左可能係最多字既遊記…
不過…朋友們都講得啱，咁先深刻難忘啊嘛，諗返都覺得呢個經歷係幾神奇，不幸同幸運爭住出場，真係夠曬迂迴曲折。
睇到呢度既巴絲打，好多謝你咁多字都睇曬 ！
呢個故事教訓我地，上車前一定要睇清楚時間，預多d時間慢慢上車，
仲要專心，唔好掛住玩手機，要確認月台牌，
每樣野都要睇幾次！
仲有，有唔肯定既野唔好怕醜，瘋狂問職員！呢度既職員真係好專業！！

聽日，就係成個trip我最鐘意既地方之一（其實有好多個）
羅騰堡既遊記喇！

即出

感謝絲打 請多多指教