【歐遊遊記 2018】獨遊瑞士法國德國奧地利 17日童話小鎮雪山風景遊

我留左兩晚
第一晚settle down
第二朝一起身就出去玩足一日 住埋呢晚
翌日早上搭車走

病左 暫停多陣先

take care呀
我終於都捱完個trip啦

謝謝
下個trip諗定去邊未呀

想毒遊去多次belgium 附近冇機場好慘
easter應該去西班牙

附近有機場真係正d
西葡

黎緊8月會去德國瑞士同捷克，
坐鐵路嘅話而家係咪得返Euro global pass 可以買？

收藏加正評左先
成個trip用左幾錢。

Basel都去 無野睇架wor
利申:去過幾次

唔係 但呢幾個地方買多國pass未必慳到錢

係呀 我去Colmar路過行個圈咋 不過都幾舒服

Thanks巴打

17日全程洗費：~ 26000 HKD
總住宿 (16晚)： ~ 7000 HKD
總市際交通： ~ 3500 HKD

其實正常唔洗洗咁多錢，因為我16晚入面只係住左4晚Hostel，其餘單人房、雙人房既價計返都比2個人去玩貴
仲有2000蚊左右係因為旅程阻濟/意外而多左既洗費
正常食、玩、住、行黎講，22000都夠做

（張機票4800左右）

DAY 4 德國海德堡遊記 （上）— 值得一睇既海德堡古堡 HEIDELBERGER SCHLOSS

海德堡既景點基本上都係曬古城，而古城同火車站並唔近，係要搭電車轉駁既。如果你慣左鐵腿遊既，你由火車站行20幾分鐘就會進入老城範圍…最快35分鐘就會到上古堡既纜車站。



從火車站去古城既電車單程標準票係2.6歐，不過如果去古城既其實買city ticket就得，會平d，只需要1.6歐，佢係一種平d既票，但有限定使用範圍，就係由火車站去到古城既盡頭之間既路段，所以基本上黎到海德堡旅行，你玩基本既行程都可以買呢張飛用，如果要去再遠d就要買平時既單程票啦。

對我黎講，海德堡個堡同橋就係呢度既景點，古城其他位就行下幾舒服，但又唔算勁有特色到要逗留勁耐，所以海德堡唔洗話要好耐就可以行完。

出發

我覺得呢度既屋好有海德堡特色，呢頭既屋都係同佢古堡既顏色同風格好相似。

一出黎，先係hostel對出既商場cafe買杯雪糕先 ，過左佢，就係巴士站。

都係乳酪味雪糕，唔夠colmar果杯出色。


我一次過買左來回既city ticket，1.6歐一程。
呢度既巴士都幾密，我買飛買到miss巴士都好快有第二架33號巴士。
呢度d巴士個門口位有個又長彈力又好勁既閘，好白痴既設計，佔極多位，每次開開關關關，附近d人都要行黎行去去就呢碌野，搭過又企過門口附近既就會知我講咩 。

到站後，因為太多人去唔切個門口，於是一野去左下個站先落，好彩都唔太遠。

落車時，見到個天勁厚雲都頹頹地，四圍都灰曬無曬光（上圖），
心諗好天左幾日，睇黎係時候還


上面個堡無太陽光照住，係一堆石，無咩霸氣（呢度tune過色後已經好好多 ）。
我心諗，點解Hostel果邊太陽猛到咁，黎到呢度差咁遠 ，心情都被個天氣影響左唔少。

黎到古城第一件事，當然係上去海德堡。


去纜車站前會經過一個廣場仔。


呢度就係個纜車站喇。



呢度33號巴士站既站名係：Rathaus-Bergbahn

海德堡城堡 HEIDELBERG CASTLE / HEIDELBERGER SCHLOSS
上海德堡可以係度搭登山纜車，入到售票處門口有兩大條隊，左邊係櫃位買票，右邊係自動賣票機。佢既門票主要分兩種：
上去海德堡既纜車+參觀海德堡門票（7歐來回）
上去海德堡既纜車+參觀海德堡門票+上去再高d既位睇風景既纜車（12歐來回）

話說心入面就一直都打算買上去海德堡既纜車+參觀海德堡門票，不過去到部機果時，就見到佢呢個選項剩係用左個纜車既圖像黎表達，另一個12歐既反而就有個城堡圖案，於是我就好疑惑 ，係咪7歐剩係包纜車唔包入場卷，要買12歐呢 。於是就搵清楚d先再買，最後對返d德文既文字描述同網上資料，7歐既票的確係已經包左纜車同城堡門票，我就買左佢，出發啦 。




呢架就係上堡既纜車啦。因為我唔係企車頭，咩都睇唔到，所以過程我影相，出返黎，就係城堡果度啦。



一出站，不斷向左行就係前往城堡既大門喇。上到黎，無啦啦好曬



話說呢個堡做得最好既係每一個建築佢都會有英文說明，講返呢個係咩黎，唔會剩係得德文，更加唔會好似希臘咁放堆遺跡係度就算，咩說明都無。

下面呢個門係當時既國王送比佢老婆做生日禮物既，仲以佢命名，個門叫做Elisabeth Gate。
你可能會問：咁佢咪生日前已經見到佢份禮物？錯啦，因為呢個門係一夜之間建成架！！


唔知生日收到一座建築做禮物既感覺係點既呢。



過左個門，就係重點啦。


哇 ，就係呢個位就係吸引左我黎！！海德堡唔似天鵝堡，唔係sell童話、sell仙境果d，佢係sell一種莊嚴既廢墟感，就係佢有d位爛曬先吸引到我黎果種遺跡感幾好j。



海德堡古堡被長春藤環繞住，係爛石上面再生d野草，個廢墟感又勁左 。



好正，佢真係爛得啱啱好 。



海德堡古堡最早係13世紀已經有文獻記載，佢最初係由上下兩組城堡所組成，不過係14世紀（有d話16世紀），「上城堡（upper castle）」被雷電一野擊中，咁就爆左，之後就剩返下而家所見既下城堡，不過當時未有咁大既。



下城堡係之後幾百年進行擴建先變到咁大。直至17世紀，佢係「三十年戰爭」—神聖羅馬帝國既內戰入面，終於首次被攻擊，其後都多次捲入唔同既戰事入面，造成唔同既破壞。

係17世紀打後，古堡一直都係一個嚴重受損既廢墟，直至十九世紀，佢終於進行左較大既修復，就變成而家呢個似廢墟得黎又可以安全進入參觀既狀態啦。



另一樣精彩既係，呢度唔係剩係得個堡睇。

因為佢位置係海德堡旁既半山上面，呢度有唔少靚位俯瞰古城。 上圖就係一個觀景台。
我就最鐘意係d高位睇古城風景架啦

嗚哇，連個觀景台都係爛既！


海德堡既代表顏色絕對係橘紅色。


歐洲既教堂真係好好既地標，好搶眼。



海德堡兩個教堂咁睇真係好似樣，右邊果個係聖靈堂，左邊係耶穌會教堂（聖神與聖依納爵教堂）。聖靈堂係海德堡最大、最重要既教堂。佢地係巴洛克風格既建築，你唔會見到好尖既哥德式塔樓。



好開心，因為呢個時候真係好好天 。

睇完風景，我就去食雪糕啦。無錯，我又不知不覺skip左lunch，用雪糕做lunch


前面d日本老人家又對住鬼佬講日文 。其實佢地有盡力講英文，不過因為佢地剩係背左how much、one、two、cone呢d字，一想問其他野就忍唔住用日文。賣雪糕既德國仔勁好笑容，對住d一時講日文一時講英文既日本呀婆呀伯都好好態度


朱古力碎雲呢拿味，我發現叫親呢種味既雪糕都食落麻麻地 ，
因為d vanilla甜雪糕，所以相比下，d朱古力粒實會變到無曬味
不過我好欣賞佢個cone好高汁 唔係頹cone。


呢個係城堡門口，因為食緊雪糕，我就廢時入城堡（以為係室內 ），於是就行下花園果d先。



哇，側面見到呢個城牆好有厚身，外面爛左，入面都仲有



正啊 好硬淨。而下面呢個真係j死我



成個分開左一半脫落左，但又無散曬！！聯想起平時切蛋糕 切切下有d就會成塊冧左



我睇資料時見到一位美國作家Mark Twain係1880年時，就住呢個景寫左好美麗既描述，講得真係好精準：

「Nature knows how to garnish a ruin to get the best effect. One of these old towers is split down the middle, and one half has tumbled aside. It tumbled in such a way as to establish itself in a picturesque attitude. Then all it lacked was a fitting drapery, and Nature has furnished that; she has robed the rugged mass in flowers and verdure, and made it a charm to the eye. The standing half exposes its arched and cavernous rooms to you, like open, toothless mouths; there, too, the vines and flowers have done their work of grace. The rear portion of the tower has not been neglected, either, but is clothed with a clinging garment of polished ivy which hides the wounds and stains of time. Even the top is not left bare, but is crowned with a flourishing group of trees & shrubs. Misfortune has done for this old tower what it has done for the human character sometimes – improved it.」

真係講中心聲，呢座塔真係冧得好靚，上面既花花草草又生得啱啱好，雖然成件事好不幸，但最後出到黎既結果就令佢仲吸引過佢本身既狀態 我諗呢樣正正就係海德堡古堡點解咁值得睇既原因，佢係爛同靚之中拎左個好完美既平衡我肯定如果佢唔係爛到咁，係本來完整既樣，佢一定無咁出名，亦未必會吸引到我黎睇。



j左好耐後，就繼續行啦。



呢座塔完全係無左個頂。

話說花園遠處有d野睇下，不過太遠，一陣先去



因為呢邊有另一個觀景台

未睇到live但留個明支持先

感謝巴打

呢個位離古堡已經有一段距離，可以影曬古堡同古城。



座落於半山既城堡，氣墊真係唔同d。



話說好記得呢度有個坐緊bb車既西班牙bb見到我之後勁開心係度同我講hola，超得意 ，佢開心到佢呀爸呀媽都係度笑



呢個角度我最鐘意，我覺得靚過頭先個位，因為呢度會見到個古城既結構，佢中間有條好長、好直既大街，真係行足幾個字，呢度會見到果條街兩旁既屋係排曬隊咁。



唔知大家見唔見到我講緊邊條呢 。



呢個景我都幾深刻 雖然話去親歐洲古城做既野都差唔多，行個城、入下教堂、上個高位望落去，不過其實我唔會話厭，對我黎講，每個古城既結構都有佢既特色，上到去睇既景都幾唔同，每個都比到唔同感覺我。絕對唔係「咪又係一堆橙色屋頂！」。



睇完呢個景，就去遠處既呢個位睇啦。





係個好多死水既池



呢個成個洞口咁，搞到我聯想起d RPG，多數入面會係個迷宮，最盡頭就有個大佬 不過佢究竟係咩黎呢，當時我無行埋去睇個描述，因為懶

話說呢個花園而家係草地一片，以前呢度係設計得精緻d，
會搞到好似果d法國凡爾賽宮既花園咁，一格格，應該都有好多花咁。下圖就有以前既圖。





上面我就無上去啦，因為而家佢只係個停車場。



大家可以估下呢個咩黎。
其實呢個以前係個拎水既位，以前既僕人就要黎到呢度，入去入面拎水比城堡入面既人用啦 真係辛苦，係要整條樓梯玩人



行完外面，係時候入去啦。



呢個城塔真係好得意，留意佢門上果兩隻獅子中間，中間本來應該係有個雕塑，但而家就無左，好似被人mit走左張貼紙咁 剩返個框



順帶一提，呢度係會有人查票，因為有d人係行山上黎既，唔係個個上到呢度都一定已經有城堡入城券。



入去喇



原來入面係個廣場黎。





入到黎我有d失望，因為呢度放左好多現代野，有勁多現代燈果d，搞到個景好怪…



因為呢度而家變左個話劇場地。睇黎係扮緊意大利既場景。



莎士比亞既劇 不過如果係度睇劇，應該都幾有feel。

個setting搞到我已經分唔到邊d係道具邊d係真實既，例如左下角個噴水池…仲有橋上面果個騎樓…好有僭建feel…我真係唔知係咪屬於個城堡既



右邊舊野，破壞曬個景 我可以話你聽，其實去到入黎之前，成個堡最精彩既位已經睇曬，因為入面呢度睇既野其實唔係好特別



呢個牆係幾型，睇真d佢原來d窗既lone係見到個天空既，佢令我聯想起水道橋 即係呢d：



至於點解佢會望落係咁樣得一面，我真係唔太清楚，下圖令我覺得係因為佢無左個天花，所以企正下面就覺得佢只有一面。

呢個大樓叫做菲德烈大樓，佢有d似係布魯塞爾廣場會見到既建築物，可能因為佢地都係主要係巴洛克建築既風格。見到佢，終於feel到呢度之前係住皇室既 有d華麗感。





天氣開始陰。

呢度有間手信店，上面有古堡以前既畫，原來佢以前係有呢種色既頂 個花園都精緻好多。



而家入城堡啦。話說我行完一輪先知，如果你想上去城堡上面d位，係要參加導賞團，唔係既你只有以下既野可以做：



呢個門都幾型。



入到去就見到一段片講佢咁多年黎既變遷。

基本上呢度係城堡酒窖，成個範圍既賣點係酒，全部都關酒事，入到去首先有個大酒筒：



不過其實呢個都未係最大，呢個只係大概兩個人咁高，而最大既係入面，



呢個似乎都係個幾出名既景點位，不過我就覺得都無咩野，係好大，不過無咩感覺 。



行上酒筒頂，見到韓國導遊講緊下面果幾舊野，佢頭頂個箱有個手抽，如果你夠八卦既，可以去拉下，會有驚喜 其實係會嚇死你 因為佢會大大聲登一聲咁開左，之後彈隻木偶之類既野出黎 我果時就見到佢點個細路去拉係度玩佢





有牆既地方就有人留名





頭先講果個手拉果個就係右邊果個箱啦，你可以去拉下

話說呢個室內範圍仲有個位係賣酒既，我唔飲酒就無理到，出返去四圍行。係菲德烈大樓後面，又有個觀景台。





不過呢個位就一般，無咩野睇，所以我又黎返呢度搵野去。





話說呢度入面係教堂黎，我都係誤入左先知，入到去見到好多人，有個tour guide走埋黎，佢話佢呢度係guided tour既最後一站黎，意思係呢度剩係比參加左guided tour既人入 於是我又彈返出去。

見到呢座野下面有門入，我就入去，原來係藥劑博物館黎。



入面都幾無聊下，就係好多古時同藥劑學有關既用具。



不過呢個好復古（因為佢根本就係古 ）既皮袋仔就幾吸引。





好有中藥藥材櫃既感覺。



我好鐘意佢個升高左既地台 超似軒轅劍參畫威尼斯d屋仔既室內場景 都係果句，玩過就明好毒



不過大部份既展品都無咩特別當行個圈咁。

出返去




呢個水井專有個角落整比佢，又幾特別。

睇到呢度，真係睇完了，我都睇夠了，好攰 落返去搵蛋糕食因為見人話呢度d老店既黑森林蛋糕好食



左邊係車係上再上面睇景，即係買12歐票果d人就繼續上，而我就落返去古城啦。

海德堡古城遊記 待續

DAY 4 德國海德堡遊記 （下）— 規律既海德堡古城、閒逛河畔、欣賞老橋景、晚餐餐廳推薦

參觀完海德堡古堡，從纜車站出黎後，就開始行老城。

基本上呢度既行程可以係先參觀城堡，然後係老城慢慢沿住大街行，再過對面岸，沿住河畔行返到老橋，再返返黎老城市集廣場，就啱啱好啦。

呢個係Kornmarkt（穀物廣場），發現歐洲好多古城都有個以殼物做名既廣場，唔知有無原因架呢。



下面呢個位望上去海德堡古堡幾型，不過呢度整緊路，所以下面見到好多唔關事既野 。



話說附近有間甜品店，叫做Altstadt-Gundel，佢係一間家旅經營既老餅店，由 Gundel 家族係1896年開始經營，而家已經係第四代傳人。我上網睇遊記見到唔少人推薦佢既黑森林蛋糕（Schwarzwälder Kirsch），於是plan左黎食tea啦。佢既位置就係呢個廣場既一個角落：



左邊果度隔離就係Cafe Gundel啦！



門口都見到好多（好似放左好耐既）甜品。



不過入到去，竟然無黑森林蛋糕 因為d人講到南德d黑森林蛋糕好正，於是我都係想食黑森林蛋糕，所以就去另一間我做功課時見到既甜品店，叫做Cafe Schafheutle…係地圖上見到係要沿住古城既大街行，咁我就出發啦！

HEIDELBERGER MARKTPLATZ 海德堡市集廣場


呢座就係頭先係山上見到海德堡最大最重要既教堂聖靈堂，因為今朝已經睇左個好癲既教堂（史特拉斯堡主教座堂），我對呢個就無咩感覺，只當佢係普通地標。



大教堂呢個廣場叫Heidelberger Marktplatz 海德堡市集廣場，呢度就熱鬧好多啦。



教堂下面被一堆商店圍住，佢地係教堂呢座既建築物既一部分黎，又幾得意 。我就係下面搵到我想要既磁石





海德堡真係幾多人下。



呢間屋仔純粹我覺得幾靚就影低左，佢好海德堡，可能因為佢既紅色砂岩，令我覺得佢同老橋、城堡係同一個系列既建築物。其實我純粹覺得佢幾靚就影下，原來佢都係呢度既地標，呢度有d postcard都以佢為主角。

之後就沿住大街行啦，呢條就係頭先係山上面睇好明顯既一條大街，一直伸延到好遠，可以行足十幾分鐘，號稱德國最長既行人專用街道。



呢個時候，天氣變到好灰暗。



路過另一座教堂，耶穌會教堂（Jesuitenkirche），佢有個正式名稱，叫做聖神與聖依納爵教堂。咁樣睇好似好細，但山上望落又好多。由於我太攰，無走埋去睇。



繼續行，呢條街沿途都係餐廳、酒店同各種連鎖商店，係我成日講既果dH&M街黎。



遠處果座高塔就係頭先座教堂果度，已經行到咁遠，我仲未行到間甜品店果度



上面係大學廣場對出，我不知不覺就路過左，其實呢度都係海德堡既景點，因為佢有海德堡大學，仲有海德堡學生監獄 Studentenkarzer 同 海德堡大學博物館 Universitätsmuseum，本來我都plan左黎參觀，不過因為行到攰，加上發現自己今次想行街多過入館，於是就決定唔去。

順便講下，海德堡學生監獄以前係用黎管教一d頑皮既學生，因為佢地醉酒鬧事、破壞公物，但因為未夠秤，警察拉唔到佢地去坐監，於是就整個「學生監獄」，專用黎困住呢d搞事既學生。監獄入面同其他監牢博物館一樣，最大既睇頭都係「困犯」係牆上寫既野，我之前做功課時見到，入面既牆有好多塗鴉同有趣既字句，所以當時都有d興趣睇下，呢個門票係要連埋大學博物館門票買既，呢張「大學博物館 + 舊集會大廳 + 學生監獄聯票」三歐就買到，都好抵玩下。但最後我就無去到 。



呢座建築幾搶眼，不過佢其實無咩大特別，係 Kurpfälzisches Museum 普法爾茨博物館 ，藏品主要來自於一位文化史和藝術史學家的私人收藏。


呢個就係我食黑森林蛋糕既後備方案
有無咁黑仔 連店都無埋。見到咁，於是我就打算求其入間賣甜品既cafe食個普通cake算，不過又唔覺有咩專賣蛋糕既cafe，又唔想行返去好遠既Cafe Gundel，於是就唔知做咩好。

呢個時候，我諗起我帶得太少SD Card黎，又記得德國又有唔少大型既電子商場（好似日本果d Bic Camera果類店），叫做Saturn，亦有另一間叫MediaMarkt，基本上你需要咩電器都可以靠曬佢地，於是我就搵佢出黎啦。



圖中左邊就係啦，佢完全係係古城既另一個盡頭 於是我決定個路線就係行到過去，之後就過橋，行住對面河畔咁去老橋，再返返古城食晚餐。

終於嚟到Heidelberg

之後就係災難

忽然又好猛太陽 之後因為條路都一樣，我都無再影相，直到我入左Saturn果頭，佢係個商場仔入面，呢度有間賣果茶果d既店，仲有珍珠奶茶 見係未試過既牌子，就試下



佢叫做The Fresh Tea。



頂，d料加下加下，就變4.7歐，成40蚊港紙。



講真我都唔太記得自己叫左咩，當時個牌寫德文我又睇唔明，總之就叫左佢Classic既奶茶，加左珍珠。幾得意，個味完全唔係香港會飲到既果d奶茶味好似有d薄荷味同牛奶味，不過d珍珠就feel到有d劣質珍珠口感一定唔夠港台果d黎，但味道我就覺得都唔錯，但當然唔值咁貴仲要咁細杯。

我係Saturn一張相都無影，不過其實都唔洗影，佢就係外國版Bic Camera，有幾層樓，全部都係賣唔同既電器，成個大貨倉咁，真係乜都有，我之後都靠佢補給左我個壞鬼左既轉插。


因為行左全日，腳都軟曬，於是係商場度搵左個位坐左起碼大半個鐘坐到夠曬就出返去，呢頭係古城既盡頭，成堆百貨公司，感覺現代d，所以古城就行完，過對面橋行，對面有一片草地，亦係我個friend推薦既。



天氣好差



呢度好多人玩獨木舟

我既目的地就係下面片草地啦





呢度勁多大鳥 見個草地咁大我就一路行一路睇住風景咁行，直至我一路行覺得有d唔對路，點解呢度咁臭，成陣屎味既？一望地下… 極多地雷，遍地大鳥黃金



就係佢地d作品 而我唔帶眼咁行左咁耐，一睇鞋底，對timberland d鞋底罅填滿曬d地雷



咁多隻，緊係遍地黃金 點解我會無諗過呢度實有屎 點解d人又會坐係草地上面 我唔見有無屎既位置係可以坐得落 於是我就無再欣賞呢度既風景，全程狂hi返d屎係草地上面



呢度開始就無咩屎，呢度先係人行既頭先果度應該唔suppose會有人行，直係勁大陣鳥屎味

行完草，就行返上行人路，我覺得呢邊河既景色係沿途既樓



感覺呢邊面河既屋間間都係別墅黎



唔知呢d樓幾錢呢，不過點貴都應該唔會夠香港貴



成間酒店咁既疑似大屋



超級豪宅我已經唔知佢係屋定酒店。入面仲咁啱有人出黎，成班著曬西裝、靚裙，完全係上流feel。

呢個時候我已經行到呢度，個天好似想落雨咁





呢度本來係個幾好既景，不過……個橋塔！！整緊！！！



遊船碼頭。呢個草地斜坡幾正，坐係度睇下書應該好好feel，唔怪得我個friend推薦呢度

海德堡老橋 ALTE BRÜCKE HEIDELBERG


佢正式名係卡爾特奧多橋，不過多數都係叫佢老橋，佢長200米，闊7米，橫跨內卡河，連接住海德堡古城同Neuenheim區。橋頭本來有個古老既橋門，不過而家整緊，變左舊白色布。呢個白色野真係夠曬搶眼



完全破壞曬個景緻



越黎越近橋啦。



呢個橋景遠睇無咩野，都優美既不過未到好靚，行到呢度就覺得係幾靚 因為呢個角度可以拉埋曬個城堡、教堂塔同橋，視覺上豐富d。本來仲有個橋門既，不過……





其實咁睇已經靚過實際好多，因為呢個時候天氣真係大差，咩都灰曬色，而家tune左色先有d色彩，好天既話一定靚好多



好闊既橋，

到左盡頭啦，又返返黎聖靈堂呢頭既市集廣場。呢個位幾靚。



好熱鬧





呢條街我覺得幾靚



好海德堡











又見到Hotel Zum Ritter





幾時都咁多人既市集廣場。

因為已經行得7788，我就直接去今日plan左去既餐廳Schlossberg-Keller。

晚餐推薦 — SCHLOSSBERG-KELLER
呢間餐廳係Trip Advisor上面排第一，都覺得好合理，因為overall我係幾滿意，好味、服務好，位置都正，佢係係正個纜車站入面，都幾得意。雖然係正景點位，但佢唔係Tourish Trap 。



雖然排名咁前，不過有趣地佢又唔係好多人，基本上我去果時得幾枱人，好可能因為當時先6點零鐘，加上多數d人都係廣場果頭食。我就唔會亂咁係廣場d餐廳食，因為之前中過太多伏 。



呢間餐廳有中文menu，佢問我要中文定日文，我就揀左中文，不過後來我就後悔無直接要求英文menu，因為呢個Menu真係全中文，除左呢版有d數字比佢分辨返係邊道菜之外，其他果d餐，係完全無德文或者英文係個名附近，就算我想點果樣野，佢都唔會知我想叫咩 超搞笑。我叫餐果下都無為意，仲要本能地指住個中文名係話想要 好彩一秒後意識到個menu係無英文德文，就轉話要個Spaghetti，因為果度得一種Spaghetti揀，而個譯名係d好大陸、睇唔明既譯名，而最後好可能佢get左另一種佢地有既意粉，最後上既係無肉既類似Spaghetti Arrabiata既意粉，而我係menu上見到既係有肉既，係15歐，最後埋單既呢碟只需要12歐左右，不過唔緊要，因為總之係意粉我都ok。 因為我突然好想食意粉



Sorry影得有d衰，不過呢個意粉真係不得了，唔好睇佢好似無咩野，佢個味道好立體，有酸有鹹有甜，調校得啱啱好，最鐘意呢d味 勁惹味！其實我都唔肯定佢係咪Arrabiata，因為佢個樣就好似，不過就唔辣既，應該只係茄汁意粉，但個調味真係不得了，就算係普通一個茄汁意粉，佢都可以整得咁好味，唔會頹，所以真係睇到佢既功夫，難怪呢間餐廳可以排第1。可惜今日無食德國野既胃，因為琴晚已經食左薯蓉，我又未想食腸仔或者豬，所以我就無叫佢既特色菜啦。呢個意粉好啱我心水，我都坐左好耐，慢慢食。

食完個好味既晚餐，是日既行程就畫上完美句號啦。
聽日，就會經Frankfurt去羅騰堡

抵啦2萬6