十天淺遊－即影即有下的柬埔寨

第六天－甲：



今日會去萬人塚，先食飽再上路





又係越式早餐，除左有個燒肉撈米唔得，其他都非常滿意。個小食同之前食嗰個我估一樣，只係外形唔同



之前講到s21拷問完啲犯就會捉嚟處決。本身呢到係華人墳場，又遠離市區，可能係被赤柬選中原因。呢到處決左萬幾人，全國仲有大量呢種刑場，可想而知…



入門口會見到座塔紀念死者，裡面安放左幾千具頭骨
屍體之多，定期仲會有人係萬人塚搜索殘骸，或者你會係地下見到人類骨頭，甚至聞到血腥味



頭骨以外，仲放左好多簡陋嘅處決兇器，比如割草嘅鐮刀…因為子彈貴，只會用最鈍既鐵器打死你，從頭骨傷痕唔難想像有幾痛苦…亦有人甚至未死被活葬



處決女性時會要求佢地脫清光，因為對於佛教國家，女性露出身體係好羞恥，語音導覽話現今有女性沖涼都著住衫，我係金邊真係見過



當時呢棵菩提樹掛住個大喇叭，大聲播放住音樂，只為涵蓋被處決者慘叫音。從s21到萬人塚，明白到佢地係驚有人發現真相，中共倒台之日可能我地會見到好多呢類紀念館



呢棵樹當年用嚟處決嬰兒，處決方法好簡單，就係捉住佢手腳，掟向棵樹，一次唔死，兩次，兩次唔死…



離開既時候見到地下有舊好似頭骨既磚嚇左嚇
但願死者安息

去萬人塚比較遠，沿途好大風沙，本身想經酒店安排的士，最後安排唔到都係坐督督，價錢後補，不過所謂大風塵都唔及暹粒去大圈咁難頂

第六天－乙：

時日無多



返到去休息左陣就行去海邊酒吧街，突然聽到爆炸聲

原來今日係獨立節，舉國慶祝離法國殖民統治週年，落重本放煙花。不過試問有幾多個國家脫殖後可以風生水起



海邊除左有煙花睇，仲有大大小小檔口賣花、小食、玩具，真係非常歡樂，建議大家十一月嚟可以夾一夾時間睇下撞唔撞到獨立節





雖然多人，但因為地方大，唔算好迫，而且公廁都好乾淨，相比起放完煌花既尖東公廁…



睇完煙花，行左去前少少食晚餐





餐廳，Koun Khmer Restaurant，係呢座野旁邊，細餐廳，泰式為主。
叫左一份沙律、芒果糯米飯，同最好食既泰式炒金邊粉，即係Pad Thai。價錢平，味道好，位置方便，不過小本經營，上菜會慢少少，雖然呢頭真係好多選擇，好多我亦未試過，但經過想試亦無妨。











玩具車

支持，岩岩向柬埔寨返黎
巴打做咩唔去埋外圈行下？

第六天－丙：



食飽沿海邊行過賭場，除左北面既遊客向酒吧街，南面近賭場附近都有本地人既酒吧街。





賭場前面提過，中國人開，入面都以中越客為主，大家「香港人樣」都會受到唔錯既對待 。規模當然比馬交輸好多，表演台都係得幾個mk仔跳mk舞





入鄉隨俗，換左一蚊
嬴嬴輸輸，最後帶住一蚊走



行左個圈就走，記得前面講，想經酒店安排的士去萬人塚都無車，更莫講街邊搵車，而賭場前有幾十部泊哂係到

我無坐到，不過見到有兩個雛妓離開賭場酒店就好快上左的士走。請各位唔好去東南亞搞小妹妹，當然大姐姐都盡量唔好



途路行返酒店，見到有條友揸住機關槍坐係街邊，問下佢真定假
原來係荷槍實彈銀行守衛，估唔到連一個更亭都無，扑濕佢偷槍真係話咁易



最後係酒店旁邊，一街流動車街飲左杯雞尾杯就返房訓

啊，都有去！
係第二日大圈加埋女王宮(Banteay Srei) ，不過無注明外圈
崩密列同羅洛斯遺址下次有機會都想去

大姐姐點解唔好呢？

文員仔

崩密列好值得去

等睇多D相

安全啲咪得囉

我都想去崩密列同貢開 但太遠
Roluos group可以唔洗去 同東美蓬寺好似 仲個細個維修緊去唔到

真係要好仔細去從歷史背景、雕刻、建築方式方面欣賞，但我未有咁深入研究，對我嚟講真係好多都好似樣

我都覺得係 不過都有睇過每個寺既歷史既
等緊你講俄羅斯市場 我冇去到

第七天－甲：



今晚會坐夜車離開金邊，行程相對輕鬆，主要只有俄羅斯市場

時間鬆動，遲少少起身先出去搵野食，揀左間賣健康食品既餐應，其實唔係我揀，只係行過老闆娘好熱情叫我入去，根本未開門做生意



價錢唔貴，食物有機健康之餘又有幾款花茶飲，不過問題係間鋪未正式營業，出菜慢之餘，叫左碟燒茄子食完成餐飯都未到，取消左好似都有計我錢。今次行程出現好多柬幣美金轉換時候比人食左錢既情況，普遍到我懷疑只係佢地數口差

不過整體食物都合格，款式特別。










睇得出好地道香港人開既餐廳

又係行過去，無幾耐就見到路牌指示。注意佢有好多個名，Phsar Toul Tum Poung、Russian Market、小偷市場、俄羅斯市場。大家都係叫開俄羅斯市場，因為早期好多俄羅斯人集中係到經商。



已經見到市場，但早餐唔夠飽，行完路成身汗想休息下先行市場，係旁邊一間食越式法包既餐廳叫左個餐。話時話十一月去都咁熱，其他日子





每日都唔同午市套餐，法包、飲品、甜品，只係三蚊美金

好食過全港最好食既添記 而甜品係焦糖布甸，唔係19維記糯米糍，唔知由幾時開始香港好多餐廳整個套餐話跟甜品就係埋單送粒糯米糍比你











同老闆傾左陣計就行過旁邊市場





唔算太大，乾淨、整齊、易行。又係包羅萬有既遊客市場，因為最後一日金邊，順便買埋手信，旅遊區講價殺佢三成少不免

因為市場附近有幾間大廠，所以衣物鋪頭係主流商店之一，女女不妨買返件民族風重既披肩返香港





市場中心都有幾檔熟食檔，聽講咖啡係呢到招牌之一，大家可以留肚嚟食個麵飲杯啡





因為今晚坐夜車，廢事刺激到腸胃或者訓唔著，唯有下次嚟再飲

繼續睇

執緊行李遠行，盡快打

夜媽媽整D骨頭相

第七天－乙：



離開俄市，望望地圖見到南邊個好大個水池，以為係公園，決定行落去

愈行愈古怪，好似由繁華既一區，入左去一個貧民區









裡面係一個小小既村落，由渡河橋到小屋都係由木板砌成，垃圾堆滿整個水塘，環境非常唔好

雖然睇落好窮困，但感覺純撲，當然一個人就唔建議入去

當地人好少見到外來人入嚟，小朋友見到我影相好開心走過嚟一齊玩



打道回府已經天黑，要早少少食晚餐，準備搭夜車返暹粒


浪漫九龍塘

上TripAdvisor望兩望，酒店附近有間餐廳，Eleven One Kitchen BKK
，評分高、環境幽雅、就腳，最重要價錢唔貴。





前菜叫左越式米紙卷，份量幾足有八細件
另外又叫左牛扒，雖然佢已經煮得唔差但肉質本身唔太出色，但牛扒都係唔需要係柬埔寨食，留肚食地道菜會更好
兩道家常少少既煎蛋麵同茄汁都唔錯

值得一試既係南瓜蛋糕，南瓜味自然唔會濃烈嗆喉，軟滑香甜，配上兩片紫火龍果，清新解膩











餐廳走中高檔路線，廚房半開放式，可以睇到廚師好似五星大酒店咁打份得齊整乾淨煮野食比你，而收費只係中位水平



返酒店段路見到間貓Cafe，同今朝去既垃圾水池相映成趣…
一邊班人訓緊係垃圾堆之間，呢班貓噗住冷氣攬女鋸和牛





返酒店見無人游水…走左去泳池個沖涼先坐夜車
離開金邊返暹粒，旅程終點站

仲有個箱擺滿四肢碎骨

第八天－甲：





未夠六點去到酒店，今次揀左間大酒店，見佢有健身房、泳池，包早餐，暹粒已經玩過，最後幾日想輕輕鬆鬆休息下，點知就出事。

原來呢到啲大酒店九成房都俾旅行團包哂，一入去就見到一大堆中國人，大堂燈無開，好多設施又壞又爛，就好似以前返大陸啲三流酒店咁

做陸團為主，自然好多野都求其，員工都做到無心機，一開始感覺到同第一晚住個間分別已經好大。但後期同職員熟左，又知我地唔係大陸人，招呼即刻唔同哂

但建議都係唔好揀大酒店



因為好早到暹粒，決定食個早餐就直接去洞裡薩湖

去過柬埔寨既巴打可能都略略聽過洞裡薩湖既傳聞，一個名聲好差既「越南浮村 Vietnamese Floating Village」，另一個比較好少少既，亦係今次行程「空邦魯 Kompong Phhluk」。只係我覺得空邦魯實在唔係一個好特別既景點，甚至令我失望，真係想知越南浮村到底差成點

要睇東南亞水上人生活，首選緬甸茵萊湖







由暹粒市中心坐到空邦魯售票處約一小時，沿途黃土飛揚，請帶口罩，售票處都有口罩比你攞，但你已經吸左一程路

售票處可以食小小野再出發，但多數人去完洗手間就上車去碼頭



車費 20 USD
洞里薩湖空邦魯入場費 20 USD + 1 USD保險



一個人都比一隻船你，船長係個後生仔，英文唔算好，但你肯主動問佢都會答下附近有咩特色





其實完全唔知行程，開左半個鐘左右船，停左係一間餐廳
都估到想迫人食野，但無幾耐之前先食完早餐，不了
同船長講不如下一站，佢指一指後面，原來有另一隻小船帶你遊餐廳後面既水鼻仔叢林，但要另外收費





其他外國遊客係到都知會比人屈你一筆，好多都唔上細船

水上餐廳一千尺唔夠，其實無野好睇，見到有幾條鱷魚，可能俾錢可以玩下

上返船，船長同我講去最後一個景點

原來唔夠一個鐘船程中見到幾間弱過大澳既水上屋都當係景點

連一般水上人生活畫面都好難見到，唯一就係見到一船學生妹撐艇仔







咁最後一個景點係咩呢，就係去近湖中心，睇到一望無際既水平線

我就一朝早去，不過有人會專誠嚟睇日落，但要睇船長識唔識帶你去靚位睇，因為一般真係會帶你去一個好荒無，連草都無既湖中心擺低你，比較好既船長會帶你去叢林或者水上屋附近睇日出，等你影相都無咁單調

好可惜唔可以深入睇到水上人既生活，前後俾左幾十蚊美金，真係睇得唔多野

準備走既時候有位當地人撐住船過嚟問買唔買汽水零食





同想像中有咁大落差，可能因為會同茵萊湖比較。二百蚊港幣包一隻人撐航，玩左大半日，上左好多廟參觀，入水上屋同居民傾計，仲有水上織廠、手製雪茄工場

呢到收費同行程安排，真係令人幾失望

茵萊湖
https://forum.hkgolden.com/view.aspx?message=5182781&page=10

Lm支持

第八天－乙：



旅程到尾聲，離開洞裡薩湖係酒店行過去買郵票寄明信片，估唔到一蚊美金一張郵票



玩左成朝都餓，行左一段路去另一邊，「Try Me Restaurant」食午餐





因為離旅遊區比較遠，價錢亦比較平，味道同份量都達水準以上

吞拿魚沙律、炒炒、Amok，最後影Amok就快日落，陽光射到一台都係







呢邊有個大型商場「Lucky Mall」，超市、電器鋪、時裝等等以外，對遊客比較吸引應該係飲食方面，有非常貴既Lucky Burger，亦有間唔吸引既雪糕店…應該係本土中產消貴區

如果去開「Try Me Restaurant」，可以順路去埋「Lucky Mall」



兜第二條路返去，經過一個係當地幾新潮既商場，不過無咩鋪頭




Speed Dating



聽日會試，夜晚好靚



返酒店訓左陣就直接去酒吧街食晚餐，亦係今行程其中一間值得尊誠去試既餐廳。無收錢，淨係試過一次，如果你去發現味道好大落差…你唔好彩





呢到有好多之前未見過既高綿菜，亦係推薦原因之一，本身想試既柬式餃子，可惜賣哂。最後叫左魚餅、焗山藥、椰奶竹筍湯。魚餅結實、表皮鬆化。湯夠滑，咸甜酸辣恰度剛好。湯有跟飯，唔夠可以再添，但焗山藥都未食已經半飽




餐廳洗手間

食飽散陣步就返去訓，呢個商場係當地娛樂集中地，有機動遊樂場、超市、天空酒吧，比之前個「Lucky Mall」更值得一來


The Moon Sky Bar

萬人塚週邊d樹都好茁壯好高大好綠好靚 有說就係當年大屠殺就咁堆埋d屍體係泥到 豐富營養孕育植物

乜原來係live架咩

唔係，打得慢