1.線下交易
有紀錄顯示幫我call車朋友的確係喺滴滴平台搵到司機，滴滴嗰邊亦證實司機有發佈過同程紀錄，但後來刪除。
點解會變咗私下付款係因為司機要求，call車嘅大陸朋友其實係朋友嘅細妹，一個普通乘客唔識呢啲程序，鬼知咁樣會無保障，而且司機要求線下交易喺大陸係好常見，啲人以為俾現金無乜分別，司機要求咪照做。
至於點解司機會咁要求，通常就係因為唔想同平台分成，所以唔係乘客貪小便宜，而係司機貪小便宜。
紀錄顯示係司機要求分開付款
2.滴滴回應
滴滴話線下交易佢哋唔負責。問題係點解會出現咁多線下交易？呢個明明係滴滴嘅漏洞嚟，我喺香港call咁多次車，從來無司機要求線下交易。而喺大陸，就有好多人曾經試過遇到司機要求線下交易。
例如滴滴之前單姦殺案，涉事司機都係用線下交易呢種手法，喺姦殺發生前一日，有個女仔坐涉事司機嘅車，發生咗同我相似嘅事，最後成功逃走，但第二日就發生咗姦殺案。
3.司機監管
啱啱諗起一樣嘢，之前記者問我時未諗到，就係我懷疑當初朋友喺平台搵司機嘅時候，搵到嘅唔係司機，而係司機隔離位扮乘客嗰個。因為後來我叫老豆打電話救我嘅時候，明明我俾嘅係司機電話，但接聽嗰個就係司機隔離條友。
姐係你call車，就算跟足程序，接你單嗰個都未必係載你嗰個。
另外，我發現滴滴除咗兩單著名嘅姦殺案，仲有好多單犯罪案件，包括另一單虐殺、綁架、性騷擾......
報出嚟嘅已經好多，無報案嘅仲有幾多自己諗。
4.恐嚇事件
我講出經歷後受到大量騷擾，琴日收到騷擾電話，連日來一直有大陸人恐嚇我，話要傷害我性命、打斷我隻腳等，搞到我精神差唔多崩潰。
佢哋一邊話我唔返大陸報警就等於講大話（但我明明有咁多證據），一邊就話我夠膽再去大陸就傷害我。我知道大陸有好多人已經知道件事，佢哋認得我，見到隨時可以買起我。我本身今個星期會返大陸報警，但而家唔敢返，我坐黑車都大難不死，唔想就咁無咗條命。同埋我回應埋今次事件嘅嘢以後會徹底收聲，唔會再講任何關於政治嘅嘢。
最後，唔好問我點解咁蠢坐滴滴黑車，嗰下買唔到高鐵票又唔識搭咩車，我都好後悔，不過更加後悔係講咗件事出嚟，令自己再次陷入險境。
（五毛可以繼續話我係作嘢，你覺得安全你咪繼續搭，我唔阻你。）
