【科幻故唔係科幻幻故/幻幻故】《今次一定救到你》(2)

飛揚

329 回覆

3 Like 0 Dislike

飛揚 2025-06-04 19:03:26

「喂～」安哥仔拍一拍我，「而家幾點吖？」

我雙手插住褲袋：『一點搭九左右啦...』

「喂你睇都唔睇咁懶嘅？」安哥仔冷眼打量住我...

『你自己又唔睇？』我就唔習慣睇時間嘅...

「怕咗你...真麻煩...」安哥仔拎部電話出嚟睇，「咦喂！真係啱啱好一點搭九喎！咁準嘅你？」

『梗係啦...都唔係第一日㗎啦...』其實我嘅時間觀念係幾強嘅...

即係一起身睇過一次鐘，差唔多都唔使再睇鐘都數到個時間出嚟...

就算唔係全中...都出入唔大㗎喇～最多都係差一兩分鐘咁啦～

飛揚 2025-06-04 19:04:24

安哥仔袋返部電話：「咁我哋而家做咩好？」

『而家？』我諗諗，『行陣街先囉～』

「行陣都好～反正都冇嘢做～」

『係咯係咯～行陣囉～』

我同安哥仔就喺商場裡面行。

其實都冇咩好行～都係睇吓衫睇吓玩具咁～

不過講真，又真係好耐都未試過好似而家咁，咁隨心咁行街。

咁多店舖又咁多人...仲要帶住笑臉咁買嘢食嘢...

而家嘅我就好似...格格不入...

飛揚 2025-06-04 19:05:42

「喂你睇呢盒～」安哥仔拎起盒模型，「買咗未吖？」

『吓吓？買...買...未...未吖...』應該就未掛...

「你之前唔係話一出就買㗎咩？」安哥仔打量住我，「喂你做乜死口死面咁吖？」

『係吖...未有時間買...咩死口死面？不嬲都係咁㗎啦...』冇照鏡唔知而家塊面係點...

「仲話冇？」安哥仔冷眼打量住我，「早幾日就嘻嘻哈哈...一開學就死口死面...唉你咁樣唔得㗎～高中生㗎喇～」

『嘩你話我吖而家？你好鍾意返學吖？』返學我仲OK嘅！就唔係咁鍾意返工㗎姐！

「我好鍾意返學㗎～好過返工啦～你睇我哋嘅父母...」

『係...出嚟做嘢係咁㗎喇...』

飛揚 2025-06-04 19:06:43

其實安哥仔嘅父母都同我嘅父母一樣...大家都係由朝返工返到晚...放假又要OT搵多啲...

都係冇時間理我哋㗎喇...

唔係點解我同安哥仔咁Friend～

不過就算我哋再讀多啲書...入埋大學咁又點？知識改變命運？

我只係覺得自己付出同收穫更加不成正比...

能力越大，就只有責任越重...

收穫依然都係咁少...甚至更少...

「我哋都係要好好享受中學生活呢～」安哥仔繼續睇模型。

『都係...都係...』呢啲係唔係叫做活在當下？

飛揚 2025-06-04 19:07:22

「喂咁你買唔買吖？」

『吓？遲啲先啦...』

「吓？點解唔而家買埋吖？」

『吓？唔想囉...』

「吓？點解唔想吖？反正都係！而家買埋啦～」

『吓？遲啲先啦...冇錢吖...』

「吓？你好窮咩？」

『窮吖窮吖...』

飛揚 2025-06-04 19:08:12

都係同安哥仔Dry睇唔買。

窮唔窮係一回事...唔想買又係另一回事...

始終...心態變咗？

始終...我而家都係廿五歲嘅心態...

十年...呢十年...

同安哥仔繼續行...然後就行出商場，企喺馬路邊等過馬路...

「夏天真係熱死人...」安哥仔已經出晒汗...

『嗯...』我望左望右...望到有唔少車...

然後就俾我望到架...白色嘅Teslun？！

飛揚 2025-06-04 19:09:09

呢架白色Teslun...車牌係...FK2...367？！

『係...係佢...』呢架Teslun咪就係...

只見架白色Teslun上咗三個客...

係嗰架...做Uber嘅...

我望住架白色Teslun行...走...再走快幾步...

係佢...係佢...就係佢！

「嗯？時世？喂！時世！」

我向住架白色Teslun跑...跑快幾步！

架白色Teslun開車！

我就再跑快啲！跑快啲！喺馬路上追住架白色Teslun！

係佢喇！一定冇錯！就係佢...就係佢撞死家嘉㗎！

飛揚 2025-06-04 19:10:19

我出盡全力咁跑！追住架白色Teslun跑！但我點跑都係拉唔近同Teslun嘅距離！

唔得！我要追上去！我要阻止佢！阻止佢喺嗰晚...

只見白色Teslun越行越快！

只要俾我追得上...同佢講...唔好喺嗰晚...

我再跑快啲！搏撚盡命咁死跑爛跑！

架白色Teslun就嚟到燈位！

機會...係機會！呢次把握唔到...就追唔上...

好唔好彩之下...呢個並唔係機會...

交通燈由紅燈...轉眼變成綠燈...

架白色Teslun連收慢都唔使！直接衝過燈位！轉個彎就消失得無影無蹤！

飛揚 2025-06-04 19:11:37

『嗄...嗄...』我都無辦法...只好停落嚟...

可惡！明明就喺眼前！但就係追唔上！

「嗄嗄...」安哥仔都跑到嚟我身邊，抖晒大氣咁，「你做乜鳩吖嗄嗄...無啦啦跑咗去嗄！嗄！！！」

『冇...嗄...』我抹抹額頭嘅汗，『想做吓運動姐...一唔一齊？』

「吓？」安哥仔一面驚訝！「嗄...嗄仲跑唔夠呀？！」

『啱啱跑咗一百米都唔夠啦...』我回頭望一望，『咁就夠㗎喇？』

「痴撚線嗄嗄！無啦啦跑成百米都唔夠呀嗄嗄？！」安哥仔仲係上氣唔接下氣咁！

『做多啲運動啦～唔係真係好快變肥毒㗎咋...』

「我咁Fit嗄嗄...唔做都唔會變肥毒啦嗄嗄！」

『你咁都叫Fit？跑幾步就死就死咁...好快就變Fat添喇...』

飛揚 2025-06-04 19:12:15

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～