【pH值介乎於7飄浮的愛情故事】《一腳踏兩船》(5)

「呃...」Jeff又彈開少少，「你會唔會介意...俾人見到我喺你身邊？」

『有咩好介意喎？』我再貼返埋去Jeff，『有你喺我身邊先有安全感～喂吖唔准郁！返埋嚟！』

我就貼住喺Jeff身邊！同佢一齊等車～一齊上車～一就企定定喺車廂裡面～

介意？其實我並唔係唔介意！

我係介意！但介意嗰點同Jeff嗰點係有分別！

我介意嘅係...點解要俾唔識嘅人影響到我嘅日常生活！

尤其係我同Jeff嘅二人世界！

呢點或者Jeff唔明...點解咁都唔明㗎呢？

當然啦！受影響嘅始終都已經受影響...

俾人望住晒係其中一個問題...而另一個更重要嘅問題係...跟蹤狂...

我都偷偷留意四周...會唔會有啲一睇就覺得係變態嘅喺附近周圍呢？

同Jeff落咗車，都要提高警覺！

萬一俾人跟住就危險喇！唔知會做啲乜㗎嘛！

不過～有Jeff喺身邊係冇咁驚嘅～

所以我咪話有Jeff喺身邊先有安全感囉！

同Jeff都偷偷留意四周咁行...行到返學校應該安全啦！

不過又有另一樣嘢煩...

成間學校啲同學都望晒過嚟！一路行...個個對眼就好似Spotlight咁射咗落我同Jeff身上！

即係射住都算...佢哋仲要竊竊私語咁...

「喂喂返嚟喇！返嚟喇！」

「咦喂真係喎！又見到佢哋一齊返嚟喎！」

「我都話㗎啦！邊有咁啱吖？一定係約埋㗎啦！」

冇錯！佢哋個個都講緊我同Jeff！

「條仔乜水吖？點解會喺女神身邊㗎？」

都唔係今日嘅事啦！早兩日都聽到㗎喇！

「喂喂會唔會係佢男朋友吖？」

聽到佢哋討論我同Jeff係唔係拍緊拖...

「唔會掛？仔條咁普通...」

即係討論我哋係唔係拍緊拖都唔係問題...

「透明人嚟㗎？之前都唔覺眼有呢個人嘅？」

最大問題係講Jeff吖嘛！

「你識唔識佢吖？」

「唔識喎～」

「冇人識佢喎～」

「邊度彈出嚟㗎？」

「係彈就彈開啲唔好黐住我女神啦！」

聽到我都嬲！火都嚟埋喇！

『好過份！』正當我忍唔住想走過去同啲八婆八公理論...

「算啦算啦...」Jeff就拉住我！

『算乜鬼...』我仲係好唔憤氣！

「唔係吖...」Jeff仲係捉實我，「我都唔介意...」

『佢哋咁講你都唔介意？』我又唔明喇！

「唔係吖...」Jeff諗一諗，擰擰頭，「唔想影響到你吖嘛...」

『唔想影響到我？』我都諗一諗，『我都冇諗住要做公眾人物！』

即係咁！我有我自由㗎嘛！有拍拖嘅自由㗎嘛！同咩人拍拖關佢哋鬼事咩？冇理由俾其他人影響到我嘅自由㗎嘛！

我都唔止講過一次！呢四日都同Jeff講過幾次！但點解Jeff仲要介意呢？

吖唔係！佢係唔介意人哋點睇佢嘅！係介意影響到我嘅形象姐！

形咩象吖？我咪話咗冇諗住做公眾人物囉！

「你真係冇諗住...」Crystal打量住我，「做公眾人物？」

『冇吖！咪話咗冇囉！Jeff又係咁...你又係咁...』答完又問...問完又答...答完又繼續問問答答無限輪迴地獄！

Crystal仲係打量住我：「咁你又會唔會公開？」

『我！我...』又會唔會公開？

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

「會唔會Post IG？」Crystal繼續問，「會唔會Post你同Jeff拍拖啲嘢出嚟俾人睇？」

『呃...會唔會吖...』我皺晒眉咁諗一諗，『Post出嚟咪更麻煩...』

即係你哋都唔係唔知點毒L㗎啦...

八婆又發功

Crystal呢啲真姊妹 一嚟就係問核心問題

感冒菌入腸都會有類似腸胃炎病徵，但同時亦會頭痛頭暈，要告知醫生有上述症狀，再對治下藥

專業大人巴