【pH值介乎於7飄浮的愛情故事】《一腳踏兩船》(5)

就算偷影都唔緊要啦...影唔到走光又唔會Post上網開心Share就得喇...

之前就梗係會咁諗啦～因為冇人識我吖嘛～邊會有人將我放上網咁得閒姐～

之但係而家喇喎...就難講喇...

俾人發現到係我...影啲奇怪相...放上網評頭品足咁就唔係咁好啦...

即係我普通人嚟㗎咋！邊有可能無時無刻都Keep到最完美零死角先得㗎？！

唉我都唔係啲咩大明星都咁鬼煩...大明星咁點算？

所以話呢...我唔係食呢行飯㗎～受唔到咁大壓力㗎～

入到客𨋢，好彩都冇其他人～得我一個獨霸～

『呼～』總於都有返少少私人空間～

不過呢少少嘅私人空間好快就要結束！因為已經上到嚟Youtube Channel嘅Studio樓層！

小心翼翼咁搵搵...搵返間Studio...

行咗一陣...搵咗一陣...終於俾我搵到！

我拉門行入去...就有幾個員工望住我！

其中一個女員工好快就帶住微笑行過嚟：「你好吖Joanne～請過嚟呢邊吖～」

『哦哦...好好唔該...』我都有少少老尷...

其實我都唔係好擅長交際...

即係...我都算係陰角嚟㗎！！！

只係行咗兩步，就見到Marco！

「嚟咗喇？」Marco就同我揮揮手，「今日辛苦你喇～要你過嚟幫手～」

『唔辛苦～唔辛苦～』有錢收㗎嘛～

就咁睇其實呢度都唔係好大...一眼就睇晒...

「坐先坐先～」Marco就指指張凳，「化返個妝同梳梳頭先～」

『哦好好...』我就坐喺梳妝檯前，『係喎...LB呢？』

係吖！LB唔喺度㗎！都話一眼就望晒！唔見LB囉...

「佢塞緊車～」Marco向化妝師同髮型師招招手，「嚟緊㗎喇～」

『哦～』係吖～呢頭日日都塞車㗎嘛～係估唔到禮拜六都會塞咋嘛～

化妝師就同我化返個淡妝先～

都係好快手啦～皮膚好易上妝吖嘛～

個妝搞掂，就到髮型師幫我梳梳頭～

其實都係幫我梳返直～梳返順～梳到冇毛毛飛起～

望住鏡裡面嘅自己...係靚嘅～

就喺我都幾滿意自己個樣之時...

「Sorry～Sorry～塞車嚟遲咗～」LB就出現喇！

我望住鏡中嘅LB...佢都望住鏡中嘅我...

突然間...個心跳咗一大跳！

又係呢種心跳嘅感覺？

點解每次一見到LB...總係會有呢種心跳嘅感覺㗎呢？！

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

「唔緊要～唔緊要～」Marco向LB招招手，「未開始住～佢哋準備緊...你都化化個妝先～」

「嗯～」LB帶住微笑點點頭，坐喺我身邊。

我成個身都僵硬晒咁！有啲緊張！

Jeff係中意
LB先係愛

Jeff係又鍾意又愛
LB就係...衝擊？

joanne覺得無危險嘅原因，一定係因為佢覺得俾lb食唔係危險

係因為佢都冇諗過會俾LB食先真